ސައުދީގެ ދިފާޢުގައި މިޞްރުން ތެދުވެ، ޑިޕްލޮމެޓިކް ފިޔަވަޅުތަކެއް އަޅަން ފަށައިފި
28 އޮކްޓޯބަރު 2026 | ބުދަ 09:15މެދުއިރުމަތީގެ މަސްރަހު އިތުރަށް ގޯސްވިޔަ ނުދީ ސުލްހަވެރި ސިޔާސީ ހައްލެއް ހޯދުމަށް މިޞްރުން ސައުދީ އަރަބިއްޔާއާއި ޔޫއޭއީއާއެކު މުހިންމު މަޝްވަރާތަކެއް ބާއްވައިފި. މި މަޝްވަރާތަކުގައި ސަރަހައްދީ ރައްކާތެރިކަން ކަށަވަރުކުރުމަށް ޓަކައި ތުރުކީވިލާތާއި ޕާކިސްތާން ހިމެނޭހެން ހަތަރު ގައުމުގެ މެދުގައި ގުޅުން ބަދަހިކުރުމަށް އެއްބަސްވެފައިވާއިރު، ސައުދީގެ ދިފާޢުގައި ފިޔަވަޅު އެޅުމުގެ ފުރިހަމަ އިޚުތިޔާރު މިޞްރުގެ ރައީސަށް މިހާރު ވަނީ ދީފައި
މިޞްރުގެ ޚާރިޖީ ވަޒީރު ބަދްރު ޢަބްދުލްޢާޠީ ރަޝިޔާގެ ވެރިރަށް މޮސްކޯއަށް ކުރެއްވި ދަތުރުފުޅެއްގައި ބޭއްވެވި ބައްދަލުވުމެއްގެ ތެރެއިން | އަނަދޮލު އޭޖެންސީ
މެދުއިރުމަތީގެ ނުތަނަވަސްކަން ކުޑަކުރުމަށް ކުރެވޭ މަސައްކަތްތަކާ ގުޅޭ ގޮތުން، މިޞްރުން ސައުދީ އަރަބިއްޔާއާއި އެކުވެރި އަރަބި އިމާރާތާއެކު (ޔޫއޭއީ) މުހިންމު މަޝްވަރާތަކެއް ބާއްވައި، ތުރުކީވިލާތް އަދި ޕާކިސްތާން ހިމެނޭ ހަތަރު ޤައުމުގެ ޚާރިޖީ ވަޒީރުންގެ އިންތިޒާމެއް މެދުވެރިކޮށް ގުޅުންތައް ބަދަހިކުރުމަށް ބާރުއަޅައިފި އެވެ.
މިޞްރުގެ ޚާރިޖީ ވުޒާރާއިން ބުދަ ދުވަހު ނެރުނު ބަޔާނެއްގައި ބުނެފަައިވާ ގޮތުގައި، އެ ޤައުމުގެ ޚާރިޖީ ވަޒީރު ބަދްރު ޢަބްދުލްޢާޠީ ވަނީ ސައުދީ އަރަބިއްޔާގެ ޚާރިޖީ ވަޒީރު އަމީރު ފައިޞަލް ބިން ފަރްޙާން އަދި ޔޫއޭއީގެ ޚާރިޖީ ވަޒީރު ޢަބްދުﷲ ބިން ޒާޔިދާ އަންގާރަ ދުވަހު ފޯނުން ވަކިވަކިން ގުޅުއްވައި، ސަރަހައްދީ އެންމެ ފަހުގެ ކަންކަމާ މެދު ފުޅާ ދާއިރާއެއްގައި ޚިޔާލު ބަދަލުކުރައްވާފަ އެވެ.
ސައުދީ ޚާރިޖީ ވަޒީރާއެކު ބޭއްވެވި މަޝްވަރާގައި ޢަބްދުލްޢާޠީ ވަނީ، ސަރަހައްދީ މަސްރަހުގައި ހިނގަމުންދާ ކަންކަމާއި "މަސްރަހު އިތުރަށް ގޯސްވުމުގެ ނުރައްކާ ބޮޑުވަމުންދާ ދަނޑިވަޅެއްގައި، މިހާރު ހިނގަމުންދާ ކާރިސާ ކޮންޓުރޯލުކުރުމަށް ކުރެވޭ މަސައްކަތްތައް" ފާހަގަކުރައްވައި، "ވާހަކަދައްކައިގެން ސިޔާސީ އަދި ސުލްހަވެރި ހައްލުތަކެއް ހޯދުމަށް ކުރިއަށް ދިއުން" ކޮންމެހެން ބޭނުންތެރި ކަމަށް ވިދާޅުވެފަ އެވެ.
މި މަޝްވަރާތަކުގައި ދެ ވަޒީރުން ވަނީ "ދެ ޤައުމުގެ ދެމެދުގައާއި، ތުރުކީވިލާތް އަދި ޕާކިސްތާން ވެސް ހިމެނޭ ހަތަރު ޤައުމުގެ ވަޒީރުންގެ އިންތިޒާމުގެ ތެރެއިން، ގާތުން މަޝްވަރާކުރުމާއި ވިލަރެސްކުރުން ކުރިއަށް ގެންދިއުމަށް" އެއްބަސްވެވަޑައިގަންނަވާފަ އެވެ. މި އިންތިޒާމަކީ މިޞްރު، ޕާކިސްތާން، ތުރުކީވިލާތް އަދި ސައުދީ އަރަބިއްޔާ އެކުވެގެން، ހަމަނުޖެހުންތައް ފިނިކުރުމަށާއި ސަރަހައްދީ ކާރިސާތަކަށް ސިޔާސީ ހައްލު ހޯދުމަށް މަޝްވަރާތައް ހަރުދަނާކުރުމުގެ މަގުސަދުގައި ހިންގާ ޚާއްސަ އޮނިގަނޑެކެވެ.
ސައުދީގެ ދިފާޢުގައި ތެދުވަން މިޞްރު މަޖިލީހުގެ ރުހުން
މި މަޝްވަރާތައް ބާއްވާފައި މި ވަނީ، ސައުދީ އަރަބިއްޔާއަށް އެހީތެރިކަން ފޯރުކޮށްދިނުމަށާއި، އެ ޤައުމުގެ ސަރަހައްދީ އިމާއި މިނިވަންކަން އަދި މާތް މުޤައްދަސް ބިންތައް ދިފާޢުކުރުމަށް ޓަކައި ސައުދީއާ ގުޅިގެން އަޅަންޖެހޭ އެންމެހައި ފިޔަވަޅުތައް އެޅުމުގެ އިޚުތިޔާރު، މިޞްރުގެ ރައީސް ޢަބްދުލްފައްތާޙް އަލް-ސީސީއަށް ދިނުމަށް އެ ޤައުމުގެ ޤާނޫނުހަދާ މަޖިލީހުން ތިންބައިކުޅަ ދެބައިގެ އަޣުލަބިއްޔަތުން ފާސްކުރިތާ އެއް ދުވަސް ފަހުންނެވެ.
ހަމަމިއާއެކު، މިއީ ސައުދީ އަރަބިއްޔާއާއި ޔަމަނުގެ ހޫޘީ ޖަމާއަތާ ދެމެދު ޖުލައި މަހުން ފެށިގެން އަސްކަރީ ކުރިމަތިލުންތައް އިންތިހާއަށް އިތުރުވެފައިވާ ދަނޑިވަޅެކެވެ. މީގެ ތެރޭގައި ސައުދީގެ މަދަނީ ވައިގެ ދަތުރުފަތުރާ ބެހޭ ވަސީލަތްތަކަށާއި ހަކަތައިގެ އުމްރާނީ ވަސީލަތްތަކަށް ހޫޘީން އަމާޒުކޮށް ދިން ހަމަލާތައް ވެސް ހިމެނެ އެވެ. 2014 ސެޕްޓެންބަރު މަހުން ފެށިގެން ޔަމަނުގެ ވެރިރަށް ޞަންޢާއާއި އިތުރު ޕްރޮވިންސްތަކުގެ މައްޗަށް ހޫޘީން ބާރުފޯރުވަމުންދާއިރު، ބައިނަލްއަގުވާމީ ގޮތުން ބަލައިގަނެފައިވާ ޔަމަނުގެ ސަރުކާރުގެ ދިފާޢުގައި ހޫޘީންނާ ދެކޮޅަށް ސައުދީ އަރަބިއްޔާއިން އިސްނަގައިގެން 2015 މާރިޗު މަހުން ފެށިގެން ދަނީ ޢަރަބި އިއްތިހާދަކަށް އިސްވެ ހަރަކާތްތެރިވަމުންނެވެ.
ސިޔާސީ މަގަށް ރުޖޫއަވުމަށް ޔޫއޭއީއާއެކު ކުރެވުނު މަޝްވަރާ
މިޞްރުގެ ޚާރިޖީ ވުޒާރާއިން ނެރުނު ދެވަނަ ބަޔާނުގައި ބުނީ، ވަޒީރު ޢަބްދުލްޢާޠީއާއި ޔޫއޭއީގެ ޚާރިޖީ ވަޒީރު ޢަބްދުﷲ ބިން ޒާޔިދު ވެސް ސަރަހައްދީ އެންމެ ފަހުގެ ކަންކަމާ ގުޅޭ ގޮތުން، ޚާއްސަކޮށް ކުރިއަށް އޮތް ދުވަސްތަކުގައި މަސްރަހު އިތުރަށް ގޯސްވެދާނެ ކަމަށް ފެންނަ ނިޝާންތަކާ މެދު ކަންބޮޑުވުމާއެކު މަޝްވަރާ ކުރެއްވި ކަމަށެވެ.
މި ފޯނު ކޯލުގައި ޢަބްދުލްޢާޠީ ބާރުއެޅުއްވީ، "މިހާރުގެ ކާރިސާގެ އިތުރަށް ނުރައްކާތެރި މަރުހަލާއަކަށް މި ސަރަހައްދު ވެއްޓުނަ ނުދިނުމަށް ޓަކައި، ސުލްހަވެރި ހައްލުތަކަކަށް ވާސިލުވުމަށާއި ހުރިހާ ފަރާތްތަކަކުން ވެސް ސުލްހަވެރި ސިޔާސީ މަގަށް ރުޖޫއަވުމަށް ސަރަހައްދުގެ ޤައުމުތަކުން ގުޅިގެން މަސައްކަތްކުރުން" ކޮންމެހެން މުހިންމު ކަމަށެވެ.
ހުރްމުޒް ކަނޑުއޮޅީގެ ނުތަނަވަސްކަމާއި ފުޅާވެފައިވާ ހަނގުރާމަ
މި ޑިޕްލޮމެޓިކް ހަރަކާތްތައް ވަރުގަދަވެފައި މި ވަނީ، ހުރްމުޒް ކަނޑުއޮޅި އަލުން ހުޅުވާލުމުގެ ޝަރުތުތަކާ މެދު ބޮޑެތި ޚިޔާލުތަފާތުވުންތަކެއް އުފެދިފައިވާ ދަނޑިވަޅެއްގައި، ވޮޝިންގޓަނާއި ތެހެރާނާ ދެމެދު އުފެދިފައިވާ ނުތަނަވަސްކަން މައިތިރިކުރުމަށް މެދުވެރިން ކުރަމުންދާ މަސައްކަތްތައް ހުއްޓުމެއްނެތި ކުރިއަށްދާ ވަގުތެއްގަ އެވެ.
ފެބުރުވަރީ 28 ގައި އެމެރިކާއާއި އިސްރާއީލުން ވަނީ އީރާނާ ދެކޮޅަށް ޣައިރުގާނޫނީ ހަނގުރާމައެއް ފަށާފަ އެވެ. މިއަށް ރައްދުދީ އީރާނުން ވަނީ އިސްރާއީލަށާއި ޢަރަބި ޤައުމުތަކުގައި ޤާއިމުކޮށްފައިވާ އެމެރިކާގެ އަސްކަރީ މަރުކަޒުތަކަށް ވަރުގަދަ ހަމަލާތަކެއް ދީފަ އެވެ.
މި ކުރިމަތިލުންތަކަށް ފަހު، ޖޫން 18 ގައި ވޮޝިންގޓަނާއި ތެހެރާނުން އެއްބަސްވުމުގެ ފަހުމުނާމާއެއްގައި ސޮއިކޮށް، މަޝްވަރާތައް ފެށި ނަމަވެސް، ފަހުން އެ މަޝްވަރާތައް ވަނީ މުޅިން ހުއްޓުމަކަށް އައިސްފަ އެވެ. މި މަޝްވަރާތައް ބުރޫއަރައި ނާކާމިޔާބުވީ ދުނިޔޭގެ ހަކަތައާއި މުދާ އުފުލުމުގައި އެންމެ މުހިންމު އިސްތިރާޖީ އެއް މަގު ކަމުގައިވާ ހުރްމުޒް ކަނޑުއޮޅިން ކަނޑު ދަތުރުފަތުރު ކުރުމުގެ އުސޫލުތަކާ މެދު ދެފަރާތުގެ ދެމެދުގައި އުފެދުނު ބޮޑެތި ޚިޔާލުތަފާތުވުންތަކާ ގުޅިގެންނެވެ.
މަސްދަރު: އަނަދޮލު އޭޖެންސީ
