"އަނެއްކާވެސް ކުޑަ 'އެޕިކް ފިޔުރީ' އެއް ފެށިދާނެ": އީރާނަށް އާ އިންޒާރާއެކު، ކަނޑުއަޑީގެ ކޭބަލްތަކަށް ހަމަލާދޭން ތެހެރާނުން ތައްޔާރުވެއްޖެ
24 އޮކްޓޯބަރު 2026 | ހޮނިހިރު 05:47އީރާނާ ދެކޮޅަށް އަސްކަރީ އޮޕަރޭޝަނެއް ހިންގަފާނެ ކަމުގެ އިޝާރާތެއް އެމެރިކާގެ ރައީސް ޓްރަމްޕް ދެއްވިއިރު، މި ހަނގުރާމަ ވަރަށް އަވަހަށް ނިންމާލެވޭނެ ކަމަށް އޭނާ ވިދާޅުވޭ. ނަމަވެސް، އެމެރިކާއިން އަލުން ހަމަލާއެއް ދީފިނަމަ ގަލްފުގެ ކަނޑުއަޑީގެ މުވާސަލާތީ ކޭބަލްތަކަށް އަމާޒުކޮށް ވަރުގަދަ ބަދަލުހިފުމުގެ ހަމަލާތަކެއް ދޭނެ ކަމުގެ އިންޒާރު އީރާނުން ވަނީ ދީފައި
އެމެރިކާގެ ފްލޮރިޑާގައި ބޭއްވި ކެންޕޭން ޖަލްސާއެއްގައި ރައީސް ޑޮނަލްޑް ޓްރަމްޕް ވާހަކަފުޅު ދައްކަވަނީ | ރޮއިޓަރސް
އީރާނުގެ ހަނގުރާމައަށް އަށް މަސް ފުރެން ކައިރިވެ، ތެލުގެ އަގު އުފުލުމުގެ ސަބަބުން އެމެރިކާގެ މިޑްޓަރމް އިންތިޚާބަށް އޭގެ ނޭދެވޭ އަސަރު ފޯރަމުންދާ ދަނޑިވަޅެއްގައި، އީރާނާ ދެކޮޅަށް އަނެއްކާ ވެސް އަސްކަރީ އޮޕަރޭޝަނެއް ހިންގަފާނެ ކަމުގެ އިޝާރާތެއް އެމެރިކާގެ ރައީސް ޑޮނަލްޑް ޓްރަމްޕް ހުކުރު ދުވަހު ދެއްވައިފި އެވެ.
އެމެރިކާގެ އަސްކަރިއްޔާއިން އީރާނާ ދެކޮޅަށް ކުރަމުންދާ ޣައިރުގާނޫނީ ހަނގުރާމައަށް ކިޔާ ކޯޑު ނަން ބޭނުންކުރައްވަމުން، "އަޅުގަނޑުމެން އަނެއްކާވެސް ކުޑަ 'އެޕިކް ފިއުރީ' އެއް ހިންގަފާނަން،" ކަމަށް ފްލޮރިޑާގައި ބޭއްވި ސިޔާސީ އެއްވުމެއްގައި ވާހަކަފުޅު ދައްކަވަމުން ޓްރަމްޕް ވިދާޅުވި އެވެ. ނަމަވެސް، މި އޮޕަރޭޝަނާ ގުޅޭ އެއްވެސް އިތުރު ތަފުސީލެއް އޭނާ ހާމައެއް ނުކުރައްވަ އެވެ.
ހަމަ އެ ދުވަހު ޓްރަމްޕް ވިދާޅުވީ، އެމެރިކާއަށް މި ހަނގުރާމަ ވަރަށް އަވަހަށް ނިންމާލެވިދާނެ ކަމަށެވެ. ނަމަވެސް، ވޮޝިންގޓަނުން ބާރުއަޅަންވީ ހަނގުރާމަ އަވަހަށް ނިންމާލަންތޯ ނުވަތަ މަޑުމަޑުން ހަނގުރާމައިގެ ހޫނުކަން ކުޑަވެ ފިނިވަމުން ދިޔުމަށް ފުރުސަތު ދިނުމަށްތޯ އޭނާ ވަނީ ސުވާލު އުފައްދަވާފަ އެވެ. ހަނގުރާމައިގެ ލަނޑުދަނޑިތަކާއި އެ ކަން ނިމޭނެ މުއްދަތުތަކާ ގުޅޭ ގޮތުން އެކި ފަހަރު އެކި ވާހަކަފުޅު ދައްކަވަމުން ގެންދަވާ ޓްރަމްޕް، ފަހަކަށް އައިސް ކެމްޕޭން ޖަލްސާތަކުގައި ތަކުރާރުކޮށް ވިދާޅުވަމުން ގެންދަވަނީ "ކޮންމެވެސް އެއް ގޮތަކުން" މި ހަނގުރާމަ ވަރަށް އަވަހަށް ނިމޭނެ ކަމަށެވެ.
އެމެރިކާގެ ކޮންގްރެސްގެ ދެ މަޖިލީހުގެ ވެސް އަޣުލަބިއްޔަތު ވަރަށް ކުޑަ ފަރަގަކުން ޓްރަމްޕްގެ ރިޕަބްލިކަން ޕާޓީން ކޮންޓުރޯލު ކުރަމުން އަންނައިރު، އެ މަޖިލިސްތަކުގެ ބާރުތައް ކަނޑައެޅިގެންދާ ނޮވެންބަރު 3 ގެ އިންތިޚާބުގެ ކުރިން އެމެރިކާއިން އީރާނަށް އެއްވެސް ހަމަލާއެއް ނުދޭނެ ކަމަށް މި މަހުގެ ކުރީކޮޅު އޭނާ ވަނީ ވިދާޅުވެފަ އެވެ.
އެމެރިކާއާއި އިސްރާއީލުން ގުޅިގެން އީރާނަށް ހަމަލާ ދީފައި ވަނީ ފެބުރުވަރީ 28 ގަ އެވެ. މިއާއެކު އީރާނުން ވަނީ އޭގެ ބަދަލުހިފުމުގެ ގޮތުން އިސްރާއީލަށާއި، އެމެރިކާގެ އަސްކަރީ މަރުކަޒުތައް ޤާއިމުކޮށްފައިވާ ގަލްފުގެ ޤައުމުތަކަށް އަމާޒުކޮށް ވަރުގަދަ ހަމަލާތަކެއް ދީފަ އެވެ. އެމެރިކާއާއި އިސްރާއީލުން އީރާނަށް ދިން ހަމަލާތަކުގައާއި، އިސްރާއީލުން ލުބުނާނަށް ދިން ހަމަލާތަކުގައި މިހާތަނަށް އެތައް ހާސް ބަޔަކު މަރުވެ، އެތައް މިލިޔަން ބަޔަކު ވަނީ ގެދޮރު ގެއްލި މަގުމަތިވެފަ އެވެ. ހަމަމިއާއެކު، މި ހަނގުރާމައިގެ ސަބަބުން މުޅި ދުނިޔޭގައި ތެލާއި ގޭހުގެ އަގުތައް ވަނީ އުފުލިފަ އެވެ.
ހަނގުރާމަ އަލުން ފެށިއްޖެނަމަ، ކުރިއަށް ވުރެ މާ ފުޅާ ދާއިރާއެއްގައި ބަދަލުހިފުމުގެ ހަމަލާތަކެއް ދިނުމަށް ތެހެރާނުން ރާވަމުންދާ ކަމަށް އީރާނުގެ އޮފިޝަލުން ވަނީ ވިދާޅުވެފަ އެވެ. މި ގޮތުން، އެމެރިކާއާއި އިސްރާއީލުން އީރާނަށް އަލުން ހަމަލާއެއް ދީފިނަމަ، ގަލްފުގެ ކަނޑުއަޑީގެ މުވާސަލާތީ ކޭބަލްތަކަށް އަމާޒުކޮށް ހަމަލާދިނުމުގެ ފުރިހަމަ ޕްލޭންތަކެއް އެކުލަވާލާފައިވާ ކަމަށް އީރާނުގެ ސަލާމަތީ އިދާރާތަކުގެ އިސް ދެ އޮފިޝަލަކު ހާމަކުރެއްވި އެވެ.
މަސްދަރު: ރޮއިޓަރސް
