ޔޫކްރެއިނާއެކު ސުލްހައިގެ ވާހަކަތައް އަލުން ފަށަން ރަޝިޔާ ތައްޔާރު: "ދޮންބާސްއަކީ ތާރީޚީ ގޮތުން ރަޝިޔާގެ ބިމެއް"

ޔޫކްރެއިން ހަނގުރާމަ ނިމުމަކަށް ގެނައުމަށް ކުރިއަށް އޮތް ތަނުގައި ބާއްވާ ސުލްހައިގެ މަޝްވަރާތައް އަމާޒުކުރަން ވާނީ ދެ ޤައުމުގެ ސަލާމަތީ ރައްކާތެރިކަން ކަށަވަރުކުރުމަށާއި މުޅި ވިލާތުގެ ސަލާމަތީ އޮނިގަނޑެއް އެކުލަވައިލުމަށް ކަމަށް ރަޝިޔާގެ ރައީސް ވްލަޑިމިޔަރ ޕުޓިން ބުރާސްފަތި ދުވަހު ވިދާޅުވެއްޖެ އެވެ.

އެމެރިކާގެ ޚާއްސަ މަންދޫބު ސްޓީވް ވިޓްކޮފްއާ ބައްދަލުކުރެއްވިތާ އެއް ދުވަސް ފަހުން، ރަޝިޔާގެ ދައުލަތުގެ ޓީވީއަކަށް ދެއްވި ބަސްދީގަތުމެއްގައި ޕުޓިން ވަނީ، އެމެރިކާ މެދުވެރިވެގެން ޔޫކްރެއިނާއެކު ކުރިއަށްގެންދާ މަޝްވަރާތައް ކުރިއަށް އޮތް މަހު އަލުން ފެށުމަށް މޮސްކޯއިން ތައްޔާރަށް އޮތް ކަން ހާމަކުރައްވާފަ އެވެ. މޮސްކޯއިން އަބަދު ވެސް ގެންގުޅޭ ސިޔާސަތު ތަކުރާރު ކުރައްވަމުން އޭނާ ވިދާޅުވީ، ރަޝިޔާއިން ދުވަހަކު ވެސް ހަނގުރާމައެއް ފަށަން ބޭނުންނުވި ކަމަށާއި، ނަމަވެސް މޮސްކޯއިން ކަންބޮޑުވާ މުހިންމު ކަންކަމުގައި ޔޫކްރެއިނުން ދިނީ ދެކޮޅުވެރި ރައްދެއް ކަމަށެވެ.

Advertisement

އެކި ދާއިރާތަކުން ކުރިއަށްގެންދާ މަޝްވަރާތަކުން އެދެވޭ ނަތީޖާއެއް ނެރެވިދާނެ ކަން ފާހަގަކުރައްވަމުން ޕުޓިން ވިދާޅުވީ، ރަޝިޔާގެ އަމާޒަކީ ވަގުތީ ގޮތުން ހަނގުރާމަ ހުއްޓައިލުމެއް ނޫން ކަމަށާއި، ހަނގުރާމަ އެއްކޮށް ނިމުމަކަށް ގެނައުމުގެ ދާއިމީ ހައްލެއް ހޯދުން ކަމަށެވެ.

"މި ވާހަކަތަކުގެ ލަނޑުދަނޑިއަކަށް ވާން ވާނީ، ކުޑަ ދުވަސްކޮޅަކަށް ވަގުތީ ގޮތުން ހަނގުރާމަ ހުއްޓައިލުމެއްގެ ނަތީޖާއެއްގެ ބަދަލުގައި، ސުލްހައިގެ އެއްބަސްވުންތަކުގެ އެންމެ ފަހުގެ ބައްޓަމަށް ވާސިލުވެ، ޔޫކްރެއިނާއި ރަޝިޔާގެ ސަލާމަތާއި ރައްކާތެރިކަން ކަށަވަރުކުރުން،" ޕުޓިން ވިދާޅުވި އެވެ. "މި ލަނޑުދަނޑި ހާސިލުކުރުމަށް ޓަކައި އަޅުގަނޑުމެން މި ތިބީ އަލުން ގުޅުންތައް ބަދަހިކޮށް ވާހަކަތައް ކުރިއަށްގެންދަން ތައްޔާރަށް."

މީގެ އިތުރުން، އެމެރިކާގެ މަންދޫބު ވިޓްކޮފް ވެސް ބާރުއަޅުއްވާފައި ވަނީ މަޝްވަރާތައް މުޅި ވިލާތުގެ ސަލާމަތީ އޮނިގަނޑާ ހަމައަށް ފުޅާކުރުމަށް ކަމަށް ރަޝިޔާގެ ރައީސް ވިދާޅުވި އެވެ. "ވިލާތުގެ ސަލާމަތީ ނިޒާމު އެއްކޮށް ހިމެނޭހެން މި މަޝްވަރާތައް ފުޅާވާންޖެހޭނެ ކަމަށް ވިޓްކޮފް ފާހަގަކުރެއްވި. އަދި އަޅުގަނޑު ވެސް އެ ކަމަށް އެއްބަސްވަން. ކުރިއަށް އޮތް ދުވަސްތަކުގައި ކަންކަން ހިނގާ ގޮތް ބަލަމާ،" ޕުޓިން ވިދާޅުވިއެވެ.

އަނެއްކޮޅުން، އަންގާރަ ދުވަހު ނޯވޭގައި ވިޓްކޮފްއާ ބައްދަލުކުރެއްވި ޔޫކްރެއިންގެ ރައީސް ވޮލޮދްމީރް ޒެލެންސްކީ ވިދާޅުވީ، ކުރިއަށް އޮތް މަހުގެ ކުރީކޮޅު ފެށޭނެ ކަމަށް ބެލެވޭ މަޝްވަރާތަކަށް ޔޫކްރެއިން އޮތީ ތައްޔާރަށް ކަމަށެވެ. މި ގޮތުން ޔޫކްރެއިނުން ތާއީދުކުރަނީ "ހަނގުރާމަ ހުއްޓައިލުމަށާއި، ހަނގުރާމަ އެއްކޮށް ނިންމުމަށާއި، ހަކަތައިގެ ވަސީލަތްތަކަށް ހަމަލާދިނުން ހުއްޓައިލުމުގެ އިތުރުން އިންސާނީ އެހީތެރިކަމުގެ އިސްނެގުންތަކާ ގުޅޭ ކޮންމެ ހުށަހެޅުމަކަށް" ކަމަށް ޒެލެންސްކީ ވިދާޅުވިއެވެ.

މަޝްވަރާތައް ކުރިއަށްގެންދިއުމަށް އެމެރިކާ އިސްވެ ކުރަމުންދިޔަ މަސައްކަތްތައް ހުއްޓުމަކަށް އައީ، އެމެރިކާއާއި އިސްރާއީލުން އީރާނާ ދެކޮޅަށް ފެބުރުވަރީ 28 ގައި ޣައިރުގާނޫނީ ހަނގުރާމައެއް ފެށުމާ އެކުގަ އެވެ.

ޔޫކްރެއިން ހަނގުރާމައާ ގުޅިގެން އުފެދިފައިވާ މައްސަލަތަކުގެ މައިގަނޑު އެއް އަސާސަކީ ބިމުގެ މިލްކުވެރިކަމުގެ މައްސަލަ އެވެ. މި ގޮތުން، އިރުމަތީ ޔޫކްރެއިންގެ ދޮންބާސް ސަރަހައްދު އެއްކޮށް ދޫކޮށްލުމަށް ރަޝިޔާއިން ދަނީ ޑިމާންޑް ކުރަމުންނެވެ. ނަމަވެސް، މިހާރު ޔޫކްރެއިންގެ ބާރުގެ ދަށުގައި އޮތް އެއްވެސް ބިމެއް ދޫކޮށްލުމުގެ ވިސްނުމަކަށް ކީވްއިން ސީދާ ދެކޮޅު ހަދަ އެވެ.

މި މައްސަލައިގައި ވާހަކަފުޅު ދައްކަވަމުން ޕުޓިން ވިދާޅުވީ، އިރުމަތީ ޔޫކްރެއިންގެ ބިމާ ގުޅޭ އެއްވެސް މަޝްވަރާއެއް ކުރިއަށްދާން ވާނީ އެ ސަރަހައްދަކީ "ތާރީޚީ ގޮތުން ރަޝިޔާގެ ބިމެއް" ކަމަށް ބަލައިގެން ކަމަށެވެ. ހަމަމިއާއެކު، މޮސްކޯއިން ހަނގުރާމަ ފެށިތާ ހަތް މަސް ފަހުން އެ ސަރަހައްދުގައި ނެގި ފެންނަ ނުފެންނަ ވޯޓުގައި، ރަޝިޔާގެ ބައެއްގެ ގޮތުގައި ހިމެނުމަށް އެ ސަރަހައްދުގެ ރައްޔިތުން ވޯޓު ދީފައިވާ ކަން ވެސް އޭނާ ފާހަގަކުރެއްވި އެވެ.