"ކެނެޑާއަކީ ދުވަހަކު ވެސް އެމެރިކާގެ 51 ވަނަ ސްޓޭޓަކަށް ނުވާނެ": އެމެރިކާގެ ތުހުމަތުތަކަށް ކެނެޑާގެ ބޮޑުވަޒީރުގެ ރައްދު!
23 އޮކްޓޯބަރު 2026 | ހުކުރު 09:41އެމެރިކާގެ އިންތިޚާބަށް ނުފޫޒު ފޯރުވާ ކަމަށް ކުރާ ތުހުމަތުތައް ކެނެޑާގެ ބޮޑުވަޒީރު މާކް ކާނީ ދޮގުކުރައްވައި، އެއީ އެއްވެސް އަސާސެއް ނެތް ވާހަކަތަކެއް ކަމަށް ވިދާޅުވެއްޖެ. ކެނެޑާއަކީ މިނިވަން ވަރުގަދަ ޤައުމެއްގެ ގޮތުގައި އޮންނާނެ ކަމަށާއި، އެމެރިކާގެ 51 ވަނަ ސްޓޭޓަށް އެ ޤައުމު ދުވަހަކު ވެސް ނުވާނެ ކަމަށް އޭނާ ވިދާޅުވި. އޭނާ އިތުރަށް ފާހަގަކުރެއްވީ ސިޔާސީ ނުފޫޒުތަކަށްވުރެ ބޮޑަށް އިސްކަންދޭނީ ޤައުމުގެ އިގުތިސާދު ވަރުގަދަކުރުމަށް ކަމަށް
ކެނެޑާގެ ބޮޑުވަޒީރު މާކް ކާނީ ބައްދަލުވުމެއްގައި ވާހަކަފުޅު ދައްކަވަނީ | އަނަދޮލު އޭޖެންސީ
އެމެރިކާގެ އިންތިޚާބުތަކަށް ކެނެޑާއިން ނުފޫޒު ފޯރުވަމުންދާ ކަމަށް ބުނެ އެމެރިކާއިން ކުރި ތުހުމަތުތަކަކީ އެއްވެސް އަސާސެއް ނެތް ވާހަކަތަކެއް ކަމަށް ވިދާޅުވެ، އެ ވާހަކަތައް ކެނެޑާގެ ބޮޑުވަޒީރު މާކް ކާނީ ދޮގުކުރައްވައިފި އެވެ. މިއާއެކު، އޭނާގެ ޤައުމަކީ ދުވަހަކު ވެސް އެމެރިކާގެ 51 ވަނަ ސްޓޭޓަށް ނުވާނެ ކަމަށް ކާނީ ތަކުރާރުކޮށް ވިދާޅުވި އެވެ.
އެމެރިކާގެ ޑިމޮކްރެޓިކް ހިންގުމުގެ ނިޒާމުގެ ތެރެއަށް އޮޓަވާއިން ނުފޫޒު ފޯރުވަމުންދާ ކަމަށް ކުރެވޭ ތުހުމަތުތަކާ ގުޅިގެން އަންކަރާގައި ނޫސްވެރިންނާ ވާހަކަފުޅު ދައްކަވަމުން، "މި ތުހުމަތުތަކުގައި އެއްވެސް އަސާސެއް ނެތް،" ކަމަށް ކާނީ ވިދާޅުވި އެވެ. ކެނެޑާއިން އެމެރިކާއާއެކު ބާއްވާ ޚާރިޖީ ގުޅުންތަކުގައި ވަރަށް ބޮޑަށް ސަމާލުވާ ކަމަށާއި، އެ ޤައުމުގެ އިންތިޚާބުތަކަށް ނުފޫޒު ފޯރުވުމުގެ އެއްވެސް ނިޔަތެއް ނެތް ކަމަށް ވެސް ބޮޑުވަޒީރު ފާހަގަކުރެއްވި އެވެ.
"އެ މީހުންގެ [އެމެރިކާ] ޑިމޮކްރެޓިކް ހިންގުމުގެ ނިޒާމުގެ ތެރެއަށް ނުފޫޒު ފޯރުވުމުގެ އެއްވެސް ނިޔަތެއް އަޅުގަނޑުމެންގެ ނެތް،" ކާނީ ވިދާޅުވި އެވެ. އަދި، "އަސާސެއް ނެތް ތުހުމަތުތަކަށް" ފުރުސަތު ނުދިނުމަށް ޓަކައި، އެމެރިކާގެ ފަރާތްތަކާއެކު ބާއްވާ މުއާމަލާތުތަކުގައި ސަމާލުވުމަށް ކެނެޑާގެ ގްލޯބަލް އެފެއާޒް ޑިޕާޓްމަންޓުން އޮފިޝަލުންނަށް އިރުޝާދު ދީފައިވާ ކަމަށް ވެސް އޭނާ ވިދާޅުވި އެވެ.
ކާނީ މި މޭރުމުން ވާހަކަފުޅު ދެއްކެވީ، ސިޔާސީ ގުޅުމާއި ވިޔަފާރީގެ މައްސަލަތަކުގައި އަވައްޓެރި ދެ ޤައުމުގެ ދެމެދުގައި ނުތަނަވަސްކަން އުފެދިފައިވާ ދަނޑިވަޅެއްގަ އެވެ. "އެމެރިކާގެ ރައީސަށް އެއްވެސް ކަމެއް އޮޅިވަޑައިގަންނަވާފައެއް ނެތް. އަޅުގަނޑު ހުރި ހިސާބާއި، ކެނެޑާ އޮތް ހިސާބާއި، ކެނެޑާގެ ރައްޔިތުން ތިބި ހިސާބު ވަރަށް ސާފު. އަޅުގަނޑުމެން ދުވަހަކު ވެސް [އެމެރިކާގެ] 51 ވަނަ ސްޓޭޓަކަށް ނުވާނަން،" ކާނީ ވިދާޅުވި އެވެ.
ކެނެޑާގެ އިގުތިސާދު ވަރުގަދަކޮށް، ބައިނަލްއަގުވާމީ ބައިވެރިވުންތައް ފުޅާކުރުމަށް އެ ޤައުމުން ތައްޔާރުވަމުންދާ ކަމަށާއި، ވަރުގަދަ ކެނެޑާއަކީ ވޮޝިންގޓަނަށް ވެސް ލިބޭނެ މާ ފުރިހަމަ ބައިވެރިއެއް ކަމަށް ކާނީ ފާހަގަކުރެއްވި އެވެ. މި ކަމަށް އިޝާރާތް ކުރައްވައި، "އަޅުގަނޑުމެން ކުރިއަށްދާނީ އަޅުގަނޑުމެންގެ އަމިއްލަ މަގުން. އަޅުގަނޑުމެން މި ދަނީ ތައްޔާރުވަމުން. އަޅުގަނޑުމެންނަކީ ވަރުގަދަ ބައެއް، އަދި އަޅުގަނޑުމެން މި ދަނީ އިތުރަށް ވަރުގަދަވަމުން،" އޭނާ ވިދާޅުވި އެވެ.
ވިޔަފާރީގެ ދާއިރާއިން ދެ ޤައުމުގެ މަސްލަހަތު ހިމެނޭ އެއްބަސްވުމެއް އެކުލަވައިލުމަށް ވޮޝިންގޓަނާއެކު މަޝްވަރާކުރުމަށް އޮޓަވާ އަބަދު ވެސް އޮތީ ތައްޔާރަށް ކަމަށާއި، ނަމަވެސް ސިޔާސީ ސަބަބުތަކަށް ޓަކައި އަވަސްއަރުވާލައިގެން އެއްބަސްވުމެއް ނުހަދާނެ ކަމަށް ވެސް ކާނީ ވިދާޅުވި އެވެ.
މަސްދަރު: އަނަދޮލު އޭޖެންސީ
