އީޔޫގެ 'އެސޯސިއޭޓް މެންބަރުކަން' ކެނެޑާއަށް ދީފި ނަމަ ޓެރިފްތައް ބޮޑުކުރުމުގެ ފުރުސަތު އޮންނާނެ: ޓްރަމްޕް
17 ސެޕްޓެމްބަރު 2026 | ބުރާސްފަތި 07:41ވިލާތުގެ އިއްތިހާދުގެ އެސޯސިއޭޓް މެންބަރަކަށް ކެނެޑާ ހެދުމަށް ހުށަހެޅި ހުށަހެޅުމާ ގުޅިގެން، އީޔޫގެ މުދަލުން ބޮޑު ޓެރިފެއް ނަގާނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދެއްވައިފި. ކެނެޑާއިން ވިލާތާއެކު ގާތް ގުޅުމެއް ބޭނުންވަނީ އެމެރިކާއަށް ބަރޯސާވާ މިންވަރު ކުޑަކުރުމަށް ކަމަށްވާއިރު، މިކަމާ ގުޅޭ އިތުރު މަޝްވަރާތައް އަންނަ މަހު ބާއްވާ ސަމިޓުގައި ކުރިއަށްދާނެ
އެމެރިކާގެ ރައީސް ޑޮނަލްޑް ޓްރަމްޕް އުތުރު ކޮރެލައިނާގައި ނޫސްވެރިންނާ ވާހަކަފުޅު ދައްކަވަނީ | އޭއެފްޕީ
ވިލާތުގެ އިއްތިހާދުގެ (އީޔޫ) ފުރަތަމަ 'އެސޯސިއޭޓް މެންބަރު' ގައުމަކަށް ކެނެޑާ ހެދުމަށް އެ އިއްތިހާދުން ހުށަހެޅި ހުށަހެޅުމާ ގުޅިގެން، އީޔޫއަށް އާ ޓެރިފްތަކެއް ނުވަތަ އިމްޕޯޓް ޑިއުޓީތަކެއް ކުރިމަތިކުރާނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދެއްވައިފި އެވެ. މި ނިންމުމަކީ އެމެރިކާއާ ދެކޮޅަށް ކުރެވޭ "ދުޝްމަންކަމުގެ އަމަލެއްގެ" ގޮތުގައި ބެލެވިދާނެ ކަމެއް ކަމަށް ވެސް ޓްރަމްޕް ސިފަކުރެއްވި އެވެ.
އެމެރިކާގެ ފަރާތުން ދޭނެ ރައްދު ބިނާވެގެންވަނީ ވިލާތުގެ ލީޑަރުން އެ ކަމުން ހާސިލްކުރަން ބޭނުންވާ މަގްސަދެއްގެ މައްޗަށް ކަމަށް، ބުދަ ދުވަހު އުތުރު ކެރޮލައިނާގެ ޝާލޮޓްގައި ނޫސްވެރިންނާ ވާހަކަފުޅު ދައްކަވަމުން ޓްރަމްޕް ވިދާޅުވި އެވެ. "އެއީ ރަނގަޅު ނިޔަތެއްގައި ކުރާ ކަމެއް ނަމަ މައްސަލައެއް ނެތް. އެކަމަކު އެއީ ގޯސް ނިޔަތެއްގައި ކުރާ ކަމެއް ނަމަ، އަޅުގަނޑުމެން ވަރަށް ބޮޑެތި ޓެރިފްތަކެއް ކުރިމަތިކުރާނަން،" ޓްރަމްޕް ވިދާޅުވި އެވެ. މީގެ އިތުރުން ގިނަ ބާވަތްތަކެއްގެ މުދާ ވިލާތާއެކު ވިޔަފާރިކުރުން އެމެރިކާއިން ހުއްޓާލަފާނެ ކަމުގެ އިޝާރާތެއް ވެސް އޭނާ ކުރެއްވި އެވެ.
ކެނެޑާ އީޔޫއާ ގުޅުމުގެ ފުރުސަތު އޮތް ކަމަށް ދެކެވޭ ވާހަކަތަކަކީ "މަޖާ" ވާހަކައެއްގެ ގޮތުގައި ޓްރަމްޕް ސިފަކުރެއްވި އެވެ. އަދި، އެމެރިކާގެ އުތުރުގެ އަވައްޓެރި ގައުމު ކަމަށްވާ ކެނެޑާއަކީ ވިޔަފާރީގެ މުއާމަލާތްތަކުގައި "ވަރަށް ގޯސް ބައިވެރިއެއް" ކަމަށް ވެސް އޭނާ ވިދާޅުވި އެވެ.
ޓްރަމްޕް މި ފަދަ މޭރުމަކުން ވާހަކަފުޅު ދެއްކެވީ، ކެނެޑާއަކީ އީޔޫގެ ފުރަތަމަ 'އެސޯސިއޭޓް މެންބަރު' ގައުމަށް ވުމުގެ ފުރުސަތު ހުޅުވާލުމަށް ޔޫރަޕިއަން ކޮމިޝަންގެ ރައީސާ އުރުސުލާ ފޮން ޑެ ލަޔަން ހުށަހެޅުއްވިތާ މަދު ގަޑިއިރުތަކެއްގެ ތެރޭގަ އެވެ. ކެނެޑާގެ އޮޓަވާއިން ވިލާތާއެކު ގާތް ގުޅުމެއް ބޭނުންވަނީ، ވޮޝިންގޓަނާއެކު އޮތް ގުޅުން ގޯސްވަމުންދާ ދަނޑިވަޅެއްގަ އެވެ.
ނަމަވެސް، މި 'އެސޯސިއޭޓް މެންބަރޝިޕް' އަކީ ސީދާ ކޮން ކަހަލަ ދަރަޖައެއް ކަމެއް އަދި ސާފެއް ނުވެ އެވެ. ވިލާތުގެ އިއްތިހާދުގެ މިހާރުގެ މުއާހަދާތަކުގެ ދަށުން މި ފަދަ ދަރަޖައެއް ނޯވެ އެވެ. އަދި، މި ފަދަ މެންބަރަކަށް ވުމުން ލިބޭނެ ހައްގުތަކާއި އުފުލަންޖެހޭ ޒިންމާތަކަކީ ކޮބައިކަން ފޮން ޑަ ލަޔަން ތަފްސީލުކޮށްދެއްވާފައެއް ނުވެ އެވެ. މީގެ އިތުރުން، މި ފަދަ އެއްވެސް ހުށަހެޅުމަކަށް އީޔޫގެ މެންބަރު ގައުމުތަކުގެ ތާއީދު ބޭނުންވާނެ އެވެ.
ކެނެޑާގެ ބޮޑުވަޒީރު މާކް ކާނީގެ އޮފީހުން ވަނީ ކުރިމަގުގައި "މިއަށްވުރެ ވަރުގަދަ، އުންމީދީ އިއްތިހާދެއް" އުފެދުމުގެ ފުރުސަތަށް މަރުހަބާ ކިޔާފަ އެވެ. ނަމަވެސް، 'އެސޯސިއޭޓް މެންބަރޝިޕް' އެ ބަހަށް އެ އޮފީހުން ސީދާ ތާއީދުކޮށްފައެއް ނުވެ އެވެ. ކެނެޑާއިން ބޭނުންވަނީ އީޔޫގެ މެންބަރަކަށް ވުމުގެ ބަދަލުގައި، ވިލާތާއެކު އޮންނަ "ޚާއްސަ އިއްތިހާދެއް" ކަމަށް ކާނީ މީގެ ކުރިން ވަނީ ވިދާޅުވެފަ އެވެ.
ކެނެޑާއާއި އީޔޫއިން މިހާރު ވެސް ދަނީ ވިޔަފާރި، ޓެކްނޮލޮޖީ، ދިފާއީ ކަންކަން، ހަކަތަ، މުހިންމު މައުދަނުތައް އަދި އާކްޓިކް ސަރަހައްދާ ގުޅޭގޮތުން ގާތުން މަސައްކަތް ކުރުމަށް މަޝްވަރާ ކުރަމުންނެވެ. މިކަމާ ގުޅޭ އިތުރު ތަފްސީލީ ވާހަކަތައް އަންނަ މަހު މޮންޓްރެއާލްގައި ބޭއްވުމަށް ހަމަޖެހިފައިވާ ކެނެޑާ-އީޔޫ ސަމިޓުގައި ކުރިއަށްދާނެ ކަމަށް ބެލެވެ އެވެ. ކެނެޑާއިން މި ފަދަ ފިޔަވަޅުތަކެއް އަޅަމުން މި ދަނީ، އަވައްޓެރި އެމެރިކާއާއެކު އުފެދިފައިވާ ވިޔަފާރީގެ މައްސަލަތައް އިތުރުވަމުންދާތީ، އެމެރިކާގެ އިގްތިސާދަށް ބަރޯސާވާ މިންވަރު ކުޑަކުރުމުގެ މަގްސަދުގަ އެވެ.
މަސްދަރު: އަލް ޖަޒީރާ
