ޖޫލިޔާނީއަކީ "މުސްލިމުންނާ ދެކޮޅު، ހަރުކަށި ފިކުރުގެ" މީހެއް!

އެމެރިކާގެ ނިއު ޔޯކް ސިޓީގެ ކުރީގެ މޭޔަރު ރޫޑީ ޖޫލިޔާނީއަކީ "މުސްލިމުންނާ ދެކޮޅު ހަރުކަށި ފިކުރުގެ މީހެއް" ގެ ގޮތުގައި ކައުންސިލް އޮން އިސްލާމިކް ރިލޭޝަންސްއިން ކަނޑައަޅައިފި އެވެ. އެ ޖަމުއިއްޔާއިން މި ގޮތަށް ނިންމީ، މި ހަފުތާގެ ކުރީކޮޅު ޓީވީ އިންޓަވިއުއެއްގައި އޭނާ ދެއްކެވި ވާހަކަތަކަކީ ނަސްލީ ތަފާތުކުރުންތަކުން ފުރިގެންވާ "ބިގޮޓެޑް" ވާހަކަތަކެއް ކަމަށް ބުނެ އެވެ.

ހުކުރު ދުވަހު ބާއްވާ ސެޕްޓެމްބަރު 11 ގެ ހަނދާނީ ރަސްމިއްޔާތުގައި މޭޔަރު ޒަހްރާން މަމްދާނީ ބައިވެރިވެވަޑައިގަތުމަކީ އޭނާ ގަބޫލުކުރައްވާ ކަމެއް ނޫން ކަމަށް، 'ނިއުސްމެކްސް' އަށް ދެއްވި އިންޓަވިއުގައި ޖޫލިޔާނީ ވިދާޅުވި އެވެ. އަދި، މަމްދާނީ އެ ރަސްމިއްޔާތަށް ވަޑައިގަތުމަކީ އޭނާއަށް ލިބޭ ވަރަށް ބޮޑު އިހާނެތްތެރިކަމެއް ކަމަށް ވެސް މި ހަފުތާގެ ކުރީކޮޅު ޖޫލިޔާނީ ވިދާޅުވި އެވެ. އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ފުރަތަމަ ދައުރުގައި އޭނާގެ އިސް މުޝީރެއްގެ ގޮތުގައި ޚިދުމަތް ކުރެއްވި ޖޫލިޔާނީ ވިދާޅުވީ، އެމެރިކާއާއި ވިލާތުގެ ގިނަ ގައުމުތަކެއް މުސްލިމުންގެ ބާރުގެ ދަށަށް ވެއްޓެމުންދާ ކަމަށެވެ.

މުސްލިމުން ބޭނުން ވަނީ އެމެރިކާގެ މައްޗަށް ގަދަވެގަންނަން ކަމަށާއި، އެއީ އެ މީހުންގެ "ހަރުކަށި" ދީނީ ތައުލީމު ފަށާ ދުވަހުން ފެށިގެން ދަސްކޮށްދޭ ކަމެއް ކަމަށް، ނަސްލީ ތަފާތުކުރުންތަކަށް ބާރުދޭ ފަދަ ވާހަކަތައް ކުރިއަށް ގެންދަވަމުން ޖޫލިޔާނީ ވިދާޅުވި އެވެ. އަދި، މަމްދާނީއަކީ އެ ކަމަށް ތާއީދުކުރައްވާ ބޭފުޅެއް ކަމަށާއި، އޭނާއަށް ތާއީދުކުރާ ހުރިހާ މުސްލިމުންނަކީ ގާތިލުން ކަމަށް ވެސް ޖޫލިޔާނީ ތުހުމަތު ކުރެއްވި އެވެ.

ޖޫލިޔާނީގެ މި ހަރުކަށި ބަސްތައް ކުށްވެރިކޮށް ކައުންސިލް އޮން އިސްލާމިކް ރިލޭޝަންސްއިން ނެރުނު ބަޔާނެއްގައި ބުނީ، ޖޫލިޔާނީއަކީ ދީނާ ގުޅުވައި މުސްލިމުންނަށް އަމާޒުކޮށް އަބަދު ވެސް ބަދުބަސް ވިދާޅަމުން ގެންދަވާ، ބަހުގެ ހަމަލާތައް އަމާޒު ކުރައްވަމުން ގެންދަވާ ބޭފުޅެއް ކަމަށެވެ. އެ ޖަމުއިއްޔާގެ ރިސާޗް އެންޑް އެޑްވޮކަސީ ޑިރެކްޓަރު ކޯރީ ސޭލާ ވިދާޅުވީ، ޖޫލިޔާނީއަކީ "މުސްލިމުންނާ ދެކޮޅު ހަރުކަށި ފިކުރުގެ މީހެއް" ކަމަށް ކަނޑައަޅާފައި ވަނީ، އޭނާ ގެންގުޅުއްވާ ނަފުރަތުން ފުރިގެންވާ ޚިޔާލުތަކުގެ ސަބަބުން ކަމަށެވެ.

ހޯމަ ދުވަހު ޖޫލިޔާނީ ދެއްކެވި ވާހަކަތަކާ ގުޅޭ ގޮތުން ސުވާލު ކުރުމުން، އޭނާގެ ފާޑުކިޔުންތަކަށް ސީދާ ރައްދު ދެއްވަން މަމްދާނީ ވަނީ ދެކޮޅު ހައްދަވާފަ އެވެ. އަދި، މި ހަފުތާގައި ބޭނުންވަނީ މީގެ 25 އަހަރު ކުރިން ސެޕްޓެމްބަރު 11 ގައި ދިން ހަމަލާގައި މަރުވި މީހުންގެ އާއިލާތަކަށާއި، އެ ހާދިސާގައި އެހީތެރިކަން ފޯރުކޮށްދިނުމުގައި ހަރަކާތްތެރިވި ފަރާތްތަކަށް ސަމާލުކަން ދިނުމަށް ކަމަށް މަމްދާނީ ވިދާޅުވި އެވެ.

މަމްދާނީ އެ ރަސްމިއްޔާތުގައި ބައިވެރިވެވަޑައިނުގަތުމަށް ގޮވާލައި 100،000 އަށް ވުރެ ގިނަ މީހުން ސޮއިކޮށްފައިވާ ޕެޓިޝަނެއްގައި ޖޫލިޔާނީ ވެސް ވަނީ ބައިވެރިވެވަޑައިގަންނަވާފަ އެވެ. އެ ޕެޓިޝަނުގައި ބުނެފައި ވަނީ، މަމްދާނީ ކުރިން ދައްކަވާފައިވާ ވާހަކަތަކާއި އޭނާގެ ސިޔާސީ ގުޅުންތަކާއި ޚިޔާލުތައް އެ ހަނދާނީ ރަސްމިއްޔާތުގެ މަގުސަދާ ފުށުއަރާ ކަމަށެވެ.