އިސްރާއީލްގެ ޗެކްޕޮއިންޓްތަކުގެ ސަބަބުން ފަލަސްތީނުގެ ރައްޔިތުންގެ ދިރިއުޅުމަށް ހުރަސްއެޅިފައި: އަލްބަނޭޒޭ
3 އޮކްޓޯބަރު 2026 | ހޮނިހިރު 06:25ހުޅަނގު އައްސޭރީގައި އިސްރާއީލުން 925 އަށްވުރެ ގިނަ ޗެކްޕޮއިންޓް ގާއިމުކުރުމާ ގުޅިގެން، ފަލަސްތީނުގެ 3.4 މިލިޔަން މީހުންގެ ދަތުރުފަތުރަށް ބޮޑެތި ހުރަސްތަކެއް ކުރިމަތިވެފައިވާ ކަމަށް އދ. އިން ވަނީ ހާމަކޮށްފައި. މި ހުރަސްތަކުގެ ސަބަބުން ސިއްހީ ފަރުވާ ހޯދުމަށް ދަތިވެ ކުޑަކުދިން މަރުވަމުންދާއިރު، މިއީ ފާއިތުވި 20 އަހަރުގެ ތެރޭގައި މި ފަދަ ހުރަސްތައް 43 އިންސައްތަ އިތުރުވި ފުރަތަމަ ފަހަރު. އެހެންކަމުން، މި ނިޒާމުގެ ސަބަބުން ފަލަސްތީނުގެ ރައްޔިތުންގެ އިންސާނީ ހައްގުތަކަށް ބޮޑެތި ގެއްލުންތަކެއް ލިބެމުންދާކަން އދ. ގެ ރެޕޯޓާ ވަނީ ފާހަގަކުރައްވާފައި
ހުޅަނގު އައްސޭރީގެ ރަށެއްގައި އިސްރައީލު ސިފައިން ޗެކްޕޮއިންޓެއް އަޅައި، ދަތުރުފަތުރަށް ހުރަސް އަޅަނީ | އަނަދޮލު އޭޖެންސީ
އިސްތިއުމާރު ކޮށްފައިވާ ހުޅަނގު އައްސޭރީގައި އިސްރާއީލުން އިތުރުކުރަމުންދާ ޗެކްޕޮއިންޓްތަކާއި މަގުތައް ބަންދުކުރުމުގެ ސަބަބުން ފަލަސްތީން ރައްޔިތުންގެ އާންމު ދިރިއުޅުމަށް ހުރަސްއެޅި، އެ ސަރަހައްދު ބައިބައިވަމުންދާ ކަމަށް އދ. ގެ ޚާއްސަ ރެޕޯޓާ ފްރަންޗެސްކާ އަލްބަނޭޒޭ ހުކުރު ދުވަހު ވިދާޅުވެއްޖެ އެވެ. އިސްތިއުމާރު ކޮށްފައިވާ ފަލަސްތީން ސަރަހައްދުތަކުގެ ހާލަތާ ގުޅޭ އަލްބަނޭޒޭ ނެރުއްވި ބަޔާނެއްގައި ވިދާޅުވީ، ފަލަސްތީނުގެ ރައްޔިތުން އެއްތަނުން އަނެއްތަނަށް ދަތުރުކުރުމަކީ، ޑޮކްޓަރަށް ދެއްކުމަށް ދިޔުމަކީ، ގާތްތިމާގެ މީހުންނަށް ޒިޔާރަތްކުރުމަށް އޮތް ހުރަހަކީ ޗެކްޕޮއިންޓުތަކާއި ގޭޓުތައް ހެދުމަކީ އޭގެ ޒާތުގައި އަނިޔާވެރިކަމެއް ކަމަށެވެ. އިސްރާއީލުން ކުރިމަތިކޮށްފައިވާ ހުރަސްތަކުގެ ސަބަބުން ފަލަސްތީނުގެ އާންމުންގެ ނިކަމެތިކަން އިތުރުވެފައިވާ ކަމަށް ވެސް އޭނާ ވިދާޅުވި އެވެ.
އަލްބަނޭޒޭގެ ބަޔާނުގައި ހަވާލާދީފައިވާ އދ. ގެ ތަފާސްހިސާބުތަކުން ދައްކާ ގޮތުގައި، 2025 ޑިސެންބަރުގެ ނިޔަލަށް އިރުމަތީ ގުދްސު ހިމެނޭހެން ހުޅަނގު އައްސޭރީގައި 925 ޗެކްޕޮއިންޓާއި ދަތުރުފަތުރަށް ހުރަސްއެޅޭ އެހެނިހެން ވަސީލަތްތައް ގާއިމުކޮށްފައިވެ އެވެ. މި ކަމުގެ ސަބަބުން ފަލަސްތީންގެ 3.4 މިލިޔަން މީހުންގެ ދަތުރުފަތުރަށް ވަނީ އަސަރުކޮށްފައިވެ އެވެ. އދ. އިން ބުނީ، މިއީ ވޭތުވެދިޔަ ދެ ދަހަރުގެ ތެރޭގައި ރެކޯޑުކުރެވުނު އެންމެ މަތީ އަދަދު ކަމަށާއި، އަދި ވޭތުވެދިޔަ 20 އަހަރުގެ އެވްރެޖަށްވުރެ %43 އިތުރު އަދަދެއް ކަމަށެވެ.
2023 އޮކްޓޫބަރުން ފެށިގެން ދަތުރުފަތުރުކުރުމަށް އަޅާފައިވާ ހުރަސްތައް އިތުރަށް ގޯސްވެފައިވާ ކަމަށް އަލްބަނޭޒޭ ފާހަގަކުރެއްވި އެވެ. މި ގޮތުން، ނާބްލުސް ވަށައިގެންވާ ސަރަހައްދުތަކުގެ ހާލަތު ވަރަށް ގޯސްވެފައިވާ ކަމަށް އޭނާ ވިދާޅުވި އެވެ. ގާތްގަނޑަކަށް 16،000 މީހުން ދިރިއުޅޭ އަދި ހަމައެކަނި އެއް ގޭޓުން ޚިދުމަތްދޭ ބައިތު ފޫރީކްގައި އާންމުގޮތެއްގައި އެއްގަމު އުޅަނދެއްގައި 15 މިނެޓުން ކުރެވޭ ދަތުރެއް ބައެއް ފަހަރު ފަސް ގަޑިއިރާއި 10 ގަޑިއިރާ ދެމެދުގެ ވަގުތަކަށް ދިގުލައިގެންގޮސްފައިވާ ކަން ވެސް އޭނާ ފާހަގަކުރެއްވި އެވެ.
އަދި، އަނެއް ފަރާތުގައި އޮތް އެމްބިއުލާންސަކާ ހަމައަށް ދިއުމަށް މަސައްކަތްކުރަނިކޮށް، އިސްރާއީލް ސިފައިން ޗެކްޕޮއިންޓެއްގައި އެއް ގަޑިއިރަށްވުރެ ގިނައިރު ވަންދެން އާއިލާއެއް ހިފެހެއްޓުމުން، އެ އާއިލާގެ ހަތަރު މަހުގެ ތުއްތު ކުއްޖަކު ޝަހީދުވެފައިވާ ކަން ވެސް އަލްބަނޭޒޭގެ ބަޔާނުގައި ފާހަގަކުރެއްވި އެވެ. އޭނާ ވިދާޅުވީ، "އަޙްމަދު [ޒައިދު] ޝަހީދުވުމަކީ އިންސާނީ ހާލަތު ގޯސްވެފައިވާ މިންވަރު ހާމަކޮށްދޭ ހެއްކެއް،" އަލްބަނޭޒޭ ވިދާޅުވި އެވެ.
މީގެ އިތުރުން، ޗެކްޕޮއިންޓްތައް އިތުރުވަމުން މި ދަނީ، އިސްރާއީލުގެ ޓެރެރިސްޓު ވަޒަންވެރިން ހިންގާ "ބިރުވެރިކަމާއި"، ވަޒަންވެރިން އާބާދުކުރުން އިތުރުވުމާއި، ފަލަސްތީނުގެ ރައްޔިތުންގެ ގެދޮރު ސުންނާފަތިކުރުމާއި، ގެދޮރުނެތިކޮށްލުން އިތުރު ކުރަމުންދާ ދަނޑިވަޅެއްގައި ކަން ވެސް އަލްބަނޭޒޭ ފާހަގަކުރެއްވި އެވެ. އަދި، ފަލަސްތީނުގެ ދަނޑުވެރިންނަށް އިސްރާއީލުގެ ސިފައިންނާއި ޓެރެރިސްޓު ވަޒަންވެރިން ހުރަސްއަޅަމުންދާ ކަން ވެސް އޭނާ ފާހަގަކުރެއްވި އެވެ.
މަސްދަރު: އަނަދޮލު އޭޖެންސީ
