ރަޝިޔާ-ޔޫކްރެއިން ހަމަލާތަކުގައި ދިހަ މީހަކު ޒަޚަމުވެ، އާންމު އަދި ސިނާއީ ވަސީލަތްތަކަށް ގެއްލުން ލިބިއްޖެ

ހުކުރު ދުވަހުގެ ފަތިހުގެ ވަގުތުތަކުގައި ރަޝިޔާއާއި ޔޫކްރެއިނުން ވަރުގަދަ ހަމަލާތަކެއް ބަދަލުކޮށްފިއެވެ. މި ހަމަލާތަކުގެ ސަބަބުން 10 މީހަކު ޒަޚަމުވެ، އިމާރާތްތަކަށާއި އުމްރާނީ ވަސީލަތްތަކަށް އެކިވަރުގެ ގެއްލުންތައް ލިބިފައިވާކަމަށް ދެ ޤައުމުގެ އޮފިޝަލުން ވިދާޅުވި އެވެ.

ޔޫކްރެއިންގެ އުމާން ސިޓީއަށް ރަޝިޔާއިން ދިން ހަމަލާއެއްގައި ފަސް މީހަކު ޒަޚަމުވެފައިވެ އެވެ. އަދި، މި ހަމަލާގެ ސަބަބުން 10 ފަންގިފިލާގެ މީހުން ދިރިއުޅޭ އިމާރާތެއްގައާއި އެއްގަމު އުޅަނދެއްގައި އަލިފާން ރޯވިކަމަށް، ޔޫކްރެއިންގެ ސްޓޭޓް އިމަޖެންސީ ސާވިސްއިން ބުންޏެވެ. މީގެއިތުރުން، އައްސޭރިފަށުގެ އޮދެއްސާ ސަރަހައްދަށް ރަޝިޔާއިން ދިން ހަމަލާތަކުގައި ހަތަރު މީހަކު ޒަޚަމުވެފައިވާ ކަމަށް، އެ ސަރަހައްދުގެ ގަވަރުނަރު އޮލެހް ކިޕަރް ވިދާޅުވި އެވެ. މި ހަމަލާތަކުގައި އާންމުން ދިރިއުޅޭ ހަތް ގެޔަކަށާއި، ހަކަތަ ފޯރުކޮށްދޭ މަރުކަޒަކަށާއި، ގޭތެރޭ ސާމާނު އުފައްދާ ކާރުޚާނާއަކަށް ގެއްލުން ލިބުނު ކަމަށާއި، ހަމަލާތަކުގެ ސަބަބުން ރޯވި އަލިފާންގަނޑު މިހާރު ނިއްވާލާފައިވާ ކަމަށް ވެސް އޭނާ ވިދާޅުވިއެވެ.

Advertisement

ރަޝިޔާގެ ދިފާޢީ ވުޒާރާއިން ބުނީ، އެ ޤައުމުގެ ސިފައިން އޮދެއްސާ ސަރަހައްދުގެ ޓެޕްލޮދަރްގައި ހުންނަ ބްލޫމް ލޮޖިސްޓިކްސް ސެންޓަރަށް ހަމަލާދީފައިވާ ކަމަށެވެ. އެ ސެންޓަރަކީ ޔޫކްރެއިންގެ އަސްކަރިއްޔާއަށް ބޭނުންވާ އަސްކަރީ އަދި މަދަނީ ބޭނުންތަކަށް ބޭނުންކުރާ ސާމާނު ރައްކާކޮށްފައި ހުރި ތަނެއް ކަމަށް ރަޝިޔާއިން ތުހުމަތުކުރެ އެވެ. އަދި، އޮދެއްސާގެ ބަނދަރަށް އަސްކަރީ ސާމާނު އުފުލި މުދާ އުފުލާ ބޯޓަކަށް ވެސް ހަމަލާދީފައިވާ ކަމަށް އެ ވުޒާރާއިން ބުންޏެވެ. ރޭގަނޑުގެ ވަގުތުތަކުގައި ރަޝިޔާއިން ފޮނުވާލި 149 ޑްރޯންގެ ތެރެއިން 114 ޑްރޯން ވައިގެ ދިފާޢީ ނިޒާމުތަކުން ވައްޓާލައި ނުވަތަ ހުއްޓުވާފައިވާ ކަމަށް، ޔޫކްރެއިންގެ ވައިގެ ސިފައިން ހާމަކުރި އެވެ. ނަމަވެސް، 27 ޑްރޯނެއް 24 ތަނަކަށް އަމާޒުވެފައިވާ ކަމަށާއި، ވައްޓާލި ޑްރޯންތަކުގެ ބައިތައް 14 ސަރަހައްދަކަށް ވެއްޓިފައިވާ ކަމަށް ވެސް އެ ފަރާތުން ބުންޏެވެ.

ރަޝިޔާގެ ރަސްތޯފް ސަރަހައްދަށް ޔޫކްރެއިނުން ދިން ޑްރޯން ހަމަލާއެއްގައި އަކްސައި ޑިސްޓްރިކްޓުން މީހަކު ޒަޚަމުވެފައިވާ ކަމަށް، އެ ސަރަޙައްދުގެ ގަވަރުނަރު ޔޫރީ ސިލުސައި ވިދާޅުވި އެވެ. އަދި، ވެއްޓުނު ޑްރޯންގެ ބައިތަކުގެ ސަބަބުން ސިނާއީ އިމާރާތަކާއި ގުދަނަކަށް ގެއްލުންވެ އަލިފާން ރޯވި ކަމަށާއި، ކުއްލި ހާލަތްތަކުގައި ހަރަކާތްތެރިވާ ޚިދުމަތްތަކުން އެ ސަރަހައްދުގައި މަސައްކަތް ކުރަމުންދާ ކަމަށް އޭނާ ވިދާޅުވިއެވެ. މީގެއިތުރުން، ވްލަދީމިއާ ސަރަހައްދުގެ ވެރިރަށުގެ ތަރމަލް ބިނާރަށް އަމާޒުކޮށް ޔޫކްރެއިނުން ދިން ޑްރޯން ހަމަލާއެއް ރަޝިޔާގެ ވައިގެ ދިފާޢީ ބާރުތަކުން ހުއްޓުވާފައިވާ ކަމަށް، ގަވަރުނަރު އަލެކްސާންދްރަ އަވްދޭޔެވް ވިދާޅުވި އެވެ. މި ހަމަލާގެ ސަބަބުން ކުދިކުދި ގެއްލުންތައް ލިބުނު ނަމަވެސް، އެއްވެސް މީހަކަށް އަނިޔާވި ކަމުގެ ރިޕޯޓެއް ލިބިފައިނުވާ ކަމަށް އޭނާ ވިދާޅުވިއެވެ.

ރަޝިޔާގެ އެކި ސަރަހައްދުތަކާއި، 2014 ވަނަ އަހަރު މޮސްކޯއިން އަތްގަދަކޮށްފައިވާ ކްރައިމިޔާގެ އިތުރުން ކަޅު ކަނޑުގެ މަތިން ޔޫކްރެއިންގެ ފިކްސްޑް-ވިންގ 644 ޑްރޯން ހުއްޓުވައި ހަލާކުކޮށްލާފައިވާ ކަމަށް، ރަޝިޔާގެ ދިފާޢީ ވުޒާރާއިން ބުންޏެވެ. ހިނގަމުންދާ ހަނގުރާމައިގެ ސަބަބުން، ދެ ފަރާތުން ދައްކަމުންދާ މި ވާހަކަތަކުގެ ތެދުދޮގު މިނިވަންކަމާއެކު ކަށަވަރުކުރުން އަދިވެސް އޮތީ ދަތި ކަމެއްގެ ގޮތުގައި ކަމަށް މީޑިއާ ރިޕޯޓުތައް ބުނެ އެވެ.