ރަސްމާލެ: ދިވެހިރާއްޖެއަކީ ވިއްކާލަން އޮތް ރައީސް މުއިއްޒުގެ އަމިއްލަ މުދަލެއް ނޫން!
1 އޮކްޓޯބަރު 2026 | ބުރާސްފަތި 11:56ރަސްމާލެ މަޝްރޫއުގެ ދަށުން ބޭރުގެ ކުންފުނިތަކަށް ދިގު މުއްދަތަށް ބިންތައް ދޫކުރުމަކީ ރާއްޖޭގެ ސިޔާދަތާއި އިގްތިސާދީ މިނިވަންކަމަށް އޮތް ނުރައްކަލެއް ކަމަށް ބުނެ ސަރުކާރަށް ބޮޑެތި ފާޑުކިޔުންތަކެއް ވަނީ އަމާޒުވެފައި. މިކަމުގެ ސަބަބުން ގައުމުގެ އިޖުތިމާއީ އަދި ދީނީ އެއްބައިވަންތަކަން ގެއްލިދާނެ ކަމުގެ ބިރު އޮތްއިރު، މިއީ އަންނަން އޮތް ޖީލުތަކުގެ ހައްގުތަކަށް އަރައިގަތުން ކަމަށްވެސް ދިވެހިން ދެކޭ
އަބޫދާބީގެ އީގަލް ހިލްސްއަށް ރައްޔިތުންގެ ފައިސާއިން ހިިއްކި ރަސްމާލޭގެ ބޮޑު ބިމެއް އެއްވެސް އެއްޗެއް ދައުލަތަށް ނުލިބި ހެދި އެއްބަސްވުމުގައި ސޮއިކުރެއްވުމަށްފަހު ހައުސިންގ މިނިސްޓަރ އަބްދުﷲ މުއްތަލިބް އީގަލް ހިލްސްގެ ވެރިޔާ އާ ސަލާމްކުރައްވަނީ. | ރާއްޖެ އެމްވީ
ރައީސް ޑރ. މުޙައްމަދު މުޢިއްޒު ގެންދަވަނީ ހުރިހާ ދާއިރާއަކުން ރާއްޖެ ނިކަމެތިކުރަމުންނެވެ. އެމަނިކުފާނުގެ ސަރުކާރުން "އީގަލް ހިލްސް" މަޝްރޫއު ކުރިއަށްގެންދަން މަސައްކަތް ކުރަމުންދާއިރު، އެ މަޝްރޫއާ ދެކޮޅަށް އަޑުއުފުލި 15 ދިވެއްސަކު ބްލެކްލިސްޓް ކޮށްފައިވާ ކަމުގެ ރިޕޯޓުތައް ވަނީ ފެންމަތިވެފަ އެވެ. ޚިޔާލު ފާޅުކުރުމުގެ ސަބަބުން ރައްޔިތުންނަށް އަމާޒުކޮށް މިފަދަ ފިޔަވަޅުތައް އެޅުމަކީ، ދުސްތޫރީ ގޮތުން ލިބިދީފައިވާ ޚިޔާލު ފާޅުކުރުމުގެ މިނިވަންކަމަށް އަރައިގަތުމެކެވެ. އެހެން އެކަން އޮތަސް ސަރުކާރުން ދިވެހި ރައްޔިތުންގެ ހައްގުތައް ހިމާޔާތްކުރުމުގައި ތެދުވެވޭކަށް ނެތެވެ. އޭގެ ބަދަލުގައި މުއިއްޒުގެ ސަރުކާރަށް މަޖުބޫރުވެފައިވަނީ، ޔަހޫދީންނަށް ފާޅުގައި ތާއީދު ކުރާ އީގަލް ހިލްސްގެ ވެރިޔާ ދިފާއުކޮށް އެ ކުންފުނީގެ މަސްލަހަތުތައް ހިމާޔަތް ކުރުމަށެވެ. އެކަމުގެ އެންމެ ސާފު ހެތްކަކީ ރައީސް މުއިއްޒުގެ ޕޭ ރޯލުގައި ތިބި އެންމެން ކަހަލަ ގޮތަކަށް، އޭގެ ތެރޭގައި ވަޒީރުންނާއި ކުންފުނިތަކުގެ ވެރިންވެސް ހިމެނޭ ގޮތަށް، ރަސްމީ ގަޑިއެއް އެހެން ގަޑިއެއް ބެލުމެއްނެތި، އީގަލް ހިލްސްގެ ދިފާއުގައި މީސް މީޑިއާގައި ކުރަމުންގެންދާ ހަނގުރާމަ އެވެ. މިއީ ސީދާ ރައީސް މުއިއްޒުގެ އޯޑަރަށް ކުރަމުން ގެންދާ މަސައްކަތެއް ކަމަށް އާންމުންގެ ތެރޭގައި ވަނީ އަޑު ފެތުރިފަ އެވެ.
ސާފުކޮށް ފެންނަން އޮތް ގޮތުގައި ރައީސް މުޢިއްޒު ވަނީ ގައުމުގެ އިގްތިސާދު ހީނަރުކޮށް، ރައްޔިތުންގެ މިލްކިއްޔާތުގައިވާ އަގުބޮޑު ބިންތައް ބޭރުގެ ކުންފުންޏަކަށް ދީ، ރާއްޖޭގެ ސިޔާދަތު ނުރައްކަލުގެ ތެރެއަށް ވައްޓާލާފަ އެވެ. އެތައް އަހަރަކަށް ދެމިގެންދާ ގޮތަށް، ހިއްކާފައިވާ އެތައް ސަތޭކަ ހެކްޓަރެއްގެ ބިން ބޭރުގެ ފަރާތްތަކަށް ދިނުމަކީ "ތަރައްގީ" އެއް ނޫނެވެ. މިއީ ރާއްޖޭގެ މުސްތަގުބަލުގެ ކޮންޓްރޯލް ބޭރުގެ އަތްމައްޗަށް ދޫކޮށްލުމެވެ.
މީގެ އިތުރުން، ބޭރުގެ ފަރާތްތަކަށް ހިފެހެއްޓުމެއް ނެތި ރާއްޖޭގައި ވަޒަންވެރިވުމުގެ ފުރުސަތު ދިނުމުގެ ސަބަބުން، ގައުމުގެ އިޖުތިމާއީ، ދީނީ އަދި ސިޔާސީ ސިފަތައް ބަދަލުވެގެން ހިނގައިދާނެ ކަމުގެ ބިރުވެރިކަން މިއަދު ވަނީ އުފެދިފަ އެވެ. ބައެއް ފަރާތްތަކުން އިންޒާރު ދޭ ގޮތުގައި، މީގެ ސަބަބުން ރާއްޖޭގެ އިސްލާމީ ވަންތަކަން ގެއްލި، ރާއްޖެއަކީ "ޒަޔަނިސްޓުންގެ" މަރުކަޒަކަށް ވެގެން ހިނގައިދާނެ އެވެ. ދިވެހި ބިމުގައި "ޣައްޒާ" އެއް ނުވަތަ "ހުޅަނގު އައްސޭރި" އެއް އުފެދިދާނެ އެވެ. މިކަންކަމަށް ރައީސް މުޢިއްޒު ޖަވާބުދާރީ ކުރުވަން ޖެހެ އެވެ. ދިވެހިރާއްޖެއަކީ އެމަނިކުފާނު ބޭނުންހާ ގޮތަކަށް ވިއްކާލަން އޮތް އަމިއްލަ މުދަލެއް ނޫނެވެ. ރާއްޖޭގެ ބިމާއި، ދީނާއި، ސިޔާދަތަކީ ދިވެހި ރައްޔިތުންގެ ހައްގުތަކެކެވެ.
ރައީސް މުޢިއްޒު ރާއްޖޭގެ މުސްތަގުބަލު ރަހުނު ކުރަނީތަ؟
ގައުމުގެ އިގްތިސާދު ރަނގަޅު ކުރައްވާނެ ކަމަށް ރައީސް މުޢިއްޒު ވައުދުވެވަޑައިގެންނެވި ނަމަވެސް، މިއަދު ފެންނަނީ އީގަލް ހިލްސް ފަދަ ބިޔަ މަޝްރޫއުތަކުގެ ނަމުގައި، ބޭރުގެ ފަރާތްތަކަށް ދިގު މުއްދަތަށް ބިންތައް ދޫކޮށްލަން މަސައްކަތް ކުރާ މަންޒަރެވެ. އެމަނިކުފާނު ވަނީ ގައުމުގެ އިގްތިސާދު ބެލެހެއްޓުމުގައާއި، ރައްޔިތުންގެ ބިންތައް ހިމާޔަތްކުރުމުގައި ފެއިލްވެފަ އެވެ.
ރަސްމާލެ މަޝްރޫއުގެ ސަބަބުން ގައުމުގެ ސިޔާދަތާއި، ދެފުށް ފެންނަ އުސޫލުތަކާއި، އަންނަން އޮތް ޖީލުތަކުގެ ހައްގުތަކާ މެދު ސީރިއަސް ސުވާލުތަކެއް އުފެދެ އެވެ. ސައްތަ އިންސައްތަ މުސްލިމް ގައުމެއްގައި، އަޅުގަނޑުމެންގެ ބިމާއި ސިޔާދަތަކީ ބޭރުގެ އިންވެސްޓްމަންޓްތަކާއި ހޮޅި ވައުދުތަކުގެ ނަމުގައި މުއާމަލާތް ކުރަން އޮތް މުދަލެއް ނޫނެވެ.
ރައީސް މުޢިއްޒު ވަނީ ދައުލަތް ހިންގުމުގައާއި އިގްތިސާދު ބެލެހެއްޓުމުގައި ނުކުޅެދިފަ އެވެ. ރައްޔިތުންގެ ބިންތައް ހިމާޔަތްކުރުމުގައި އެމަނިކުފާނު ވަނީ ފެއިލްވެފަ އެވެ. އަދި މިހާރު އެމަނިކުފާނު އެ މަސައްކަތް ކުރައްވަނީ ރާއްޖޭގެ މުސްތަގުބަލު ބާޒާރަށް ނެރެ، އެއާ މެދު މާލީ މުއާމަލާތް ކުރެއްވުމަށެވެ.
ދަންނަވަންތޯ އެވެ. ދިވެހިރާއްޖެއަކީ ވިއްކާލަން އޮތް ރައީސް މުއިއްޒުގެ އަމިއްލަ މުދަލެއް ނޫނެވެ.
