މަސްތުވާތަކެތީގެ މައްސަލައެއްގައި 25 އަހަރުގެ ހުކުމެއްގައި ހުރި މީހަކު ޕެރޯލް ބޯޑުން ދޫކޮށްލި މައްސަލައިގައި މިނިސްޓަރު އިހުސާން މަޖިލީހަށް ހާޒިރުކުރަން އެދިއްޖެ
7 އޮކްޓޯބަރު 2026 | ބުދަ 07:46މަސްތުވާތަކެތީގެ ބޮޑު މައްސަލައެއްގައި 25 އަހަރަށް ޖަލަށްލީ މީހަކު ގާނޫނާ ހިލާފަށް ޕެރޯލްގެ ދަށުން ދޫކޮށްލި މައްސަލަ ރައްޔިތުންގެ މަޖިލީހުން ތަހުގީގުކޮށްދިނުމަށް ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް އެދިވަޑައިގެންފި. މި މައްސަލައާ ގުޅިގެން ޕެރޯލް ބޯޑުގެ ހުރިހާ މެންބަރުން ވަކިކޮށްފައިވާއިރު، ބޯޑުގެ ނިންމުންތަކާއި އިދާރީ ލިޔެކިޔުންތައް ދިރާސާކޮށް ކަމާބެހޭ ވަޒީރު ހާޒިރުކުރުމަށް ވެސް މެންބަރު ވަނީ ހުށަހަޅުއްވާފައި
ހޯމް މިނިސްޓަރު އަލީ އިހުސާން | ރާއްޖެ އެމްވީ
މަސްތުވާތަކެތީގެ ބޮޑު މައްސަލައެއްގައި 25 އަހަރަށް ޖަލަށް ލާފައިވާ ކުށްވެރިއަކު ޕެރޯލްގެ ދަށުން ދޫކޮށްލަން ނިންމި ނިންމުން ރައްޔިތުންގެ މަޖިލީހުގެ ކަމާބެހޭ ކޮމިޓީ މެދުވެރިކޮށް ތަހުގީގުކޮށްދިނުމަށް އެދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އަށް, މަޖިލީހުގެ ގަލޮޅު އުތުރު ދާއިރާގެ މެންބަރު، މުހައްމަދު އިބްރާހީމް (ކުޑޫ) ސިޓީ އެއް ފޮނުއްވައިފި އެެވެ.
2025 މެއި 19 ގައި ދިވެހިރާއްޖެއަށް 98 ކިލޯގެ މަސްތުވާތަކެތި އެތެރެކުރަން އުޅުނު މައްސަލައިގައި 25 އަހަރަށް ޖަލަށްލުމަށް ހުކުމްކޮށްފައިވާ ފަރާތެއް، މިދިޔަ 2026 އޮކްޓޫބަރު 1 ގައި ޕެރޯލްގެ ދަށުން ދޫކޮށްލުމަށް ޕެރޯލް ބޯޑުން ނިންމި ނިންމުމަކީ ދިވެހިރާއްޖޭގެ ޖަލުތަކާ ޕެރޯލްގެ ގާނޫނާ ހިލާފު ނިންމުމެއް ކަމަށް އެ ސިޓީގައި ފާހަގަކޮށްފައިވެ އެވެ.
ޖަލުތަކާއި ޕެރޯލްގެ ގާނޫނުގެ 131 ވަނަ މާއްދާގައި ބަޔާންކޮށްފައިވާ ގޮތުގައި، މަސްތުވާތަކެއްޗާ ބެހޭ ގާނޫނުގެ ދަށުން ސާބިތުވެފައިވާ މަސްތުވާތަކެއްޗާ ގުޅޭ ކުށެއްގައި ހުކުމްކޮށްފައިވާ މީހަކަށް ޕެރޯލްގެ ފުރުސަތު ލިބޭނީ، އެމީހެއްގެ މައްޗަށް ކޮށްފައިވާ އެންމެ ދިގު ހުކުމުގެ ދެބައިކުޅަ އެއްބައި ތަންފީޒުކޮށް ނިމުމުން ކަމަށްވީ ނަމަވެސް، އެ ފަރާތް ޕެރޯލްގެ ދަށުން ދޫކޮށްލިއިރު އޭނާގެ މައްޗަށް ކޮށްފައިވާ ހުކުމުގެ ދެބައިކުޅަ އެއްބައި ތަންފީޒުކޮށްފައިނުވާ ކަމަށް ސިޓީގައި ބަޔާންކޮށްފައިވެ އެވެ.
މީގެ އިތުރުން ޖަލުތަކާއި ޕެރޯލްގެ ގާނޫނުގެ 136 ވަނަ މާއްދާގެ (ށ) ގައި ޕެރޯލްގެ ފުރުސަތު ދިނުމުގައި އެ މީހެއްގެ ކުށުގެ ރެކޯޑަށް ބަލަންވާނެ ކަމަށް ބަޔާންކޮށްފައިވީ ނަމަވެސް، އެ ފަރާތުގެ ކުށުގެ ރެކޯޑަށް އެކަށީގެންވާ ގޮތެއްގައި ބަލާފައިވާކަން ކަށަވަރުނުވާކަން ފާހަގަކޮށްފައިވެ އެވެ. އަދި އެ ގާނޫނުގެ ދަށުން ޕެރޯލް ބޯޑުން އެ ފަރާތް ދޫކޮށްލުމުގައި ބަލަންޖެހޭ ކަންކަން ފުރިހަމައަށް ބަލާފައި ނުވާތީ، ބޯޑުގެ ނިންމުން ބަދަލުކޮށް އެ ފަރާތް އަލުން ހައްޔަރުކޮށްފައިވާ ކަމަށް 2026 އޮކްޓޫބަރު 6 ގައި ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ހޯމް މިނިސްޓަރު އަލީ އިހުސާން ވިދާޅުވެފައިވާ ކަމަށާއި، މި ނިންމުމާ ގުޅިގެން ޕެރޯލް ބޯޑުގެ ހުރިހާ މެންބަރުން މަގާމުން ވަކިކޮށްފައިވާ ކަމަށް ވެސް ސިޓީގައި ބަޔާންކޮށްފައިވެ އެެވެ.
މި މައްސަލައިގައި ކަންހިނގައިދިޔަ ގޮތް މަޖިލީހުގެ ކަމާބެހޭ ކޮމިޓީއަކުން ތަހުގީގު ކުރުމަކީ މުޖުތަމައުގެ ސަލާމަތާ ރައްކާތެރިކަން ކަށަވަރު ކުރުމަށާއި މިފަދަ މައްސަލައެއް ތަކުރާރުވުން ހުއްޓުވުމަށްޓަކައި ނުހަނު މުހިންމު ކަމެއް ކަމަށްވާތީ، ޕެރޯލް ދިނުމުގައި އަމަލުކޮށްފައިވާ އިޖުރާތްތަކާއި އެކަމާ ގުޅޭ ކަންކަން ކޮމިޓީ މެދުވެރިކޮށް ތަހުގީގުކޮށްދިނުމަށް މެންބަރު ވަނީ އެދިވަޑައިގެންފަ އެވެ.
މިގޮތުން، މި މައްސަލައާ ގުޅޭ ފުރިހަމަ އިދާރީ ފައިލް މަޖިލީހުގެ ކަމާބެހޭ ކޮމިޓީއަށް ހޯދައި ދިރާސާ ކުރުމަށް އެދިފައިވާއިރު، އޭގެ ތެރޭގައި ޕެރޯލްއަށް އެދި ހުށަހެޅި ފޯމާއި އެއާ ގުޅޭގޮތުން ތައްޔާރުކޮށްފައިވާ ރިކޮމެންޑޭޝަންތަކާއި އެސެސްމަންޓްތަކާއި، ޕެރޯލްގެ ޝަރުތު ހަމަވާ މުއްދަތު ގުނާފައިވާ ގޮތުގެ ތަފްސީލީ ރެކޯޑުތަކާއި، ޖަލުގައި ހުރި ދުވަސްތަކުގެ އަޚުލާގީ ރެކޯޑުތަކާއި ޕެރޯލް ބޯޑުގެ މަސައްކަތު ކަރުދާސްތަކާއި ބައްދަލުވުންތަކުގެ ޔައުމިއްޔާތައް ހިމެނެ އެވެ.
އޭގެ އިތުރުން ބޯޑުގެ ބައްދަލުވުމަށް މެންބަރުން ހާޒިރުވި ގޮތުގެ ރެކޯޑާއި ވޯޓު ދިން ގޮތުގެ ތަފްސީލާއި، ޕެރޯލް ދިނުމަށް ނިންމައި ދޫކޮށްފައިވާ ރަސްމީ ލިޔުން ހޯދުމަށް ވެސް އެދިފައިވެ އެވެ. އަދި މި ނިންމުން ނިންމުމުގައި ބައިވެރިވި އަދި ޒިންމާވާންޖެހޭ ޕެރޯލް ބޯޑުގެ ހުރިހާ މެންބަރުން ކޮމިޓީއަށް ހާޒިރުކޮށް ކަންކަން ސާފު ކުރުމަށާއި، ހޯމް މިނިސްޓަރު އަލީ އިހުސާން އާއި ހޯމް މިނިސްޓްރީގެ އިސްވެރިން މަޖިލީހަށް ހާޒިރުކޮށް މައުލޫމާތު ސާފު ކުރުމަށް ވެސް މެންބަރުގެ ސިޓީގައިވެ އެވެ.
