ދ. މީދޫގެ ހާލަތު: ކަރަންޓު ބިލާއި ތަކެތީގެ އަގުބޮޑުވުމާއި މަސްވެރިކަމުގެ ދަތިތަކާއެކު ރައްޔިތުންގެ ކަންބޮޑުވުން އިންތިހާއަށް!
3 އޮކްޓޯބަރު 2026 | ހޮނިހިރު 08:17ދ. މީދޫގެ ތަރައްގީގެ މަޝްރޫއުތައް ހުއްޓި، ތަކެތީގެ އަގާއި ކަރަންޓު ބިލު ބޮޑުވުމުގެ އިތުރުން މަސްވެރިކަމަށް ދިމާވެފައިވާ ގޮންޖެހުންތަކާ ގުޅިގެން އެ ރަށުގެ ރައްޔިތުން ސަރުކާރަށް ބޮޑެތި ފާޑުކިޔުންތަކެއް ވަނީ އަމާޒުކޮށްފައި. ސިއްހީ ޚިދުމަތާއި އާސަންދަ ހޯދުމުގައި ތަފާތުކުރުންތައް ގެންގުޅޭކަމުގެ ޝަކުވާ އާންމުން ކޮށްފައިވޭ. އަދި ރަށުގެ ހާލަތާ ގުޅޭގޮތުން މައުލޫމާތު ދެމުންދަނިކޮށް ސަރުކާރަށް ތާއީދުކުރާ ބަޔަކު ވަނީ ހަމަނުޖެހުން ހިންގަން މަސައްކަތް ކޮށްފައިވޭ
ދ.މީދޫގައި ކުރިއަށް ގެންދިޔަ ހާލު ކިހިނެތް ޕްރޮގްރާމްގެ ތެރެއިން | ރާއްޖެއެމްވީ
ދ. މީދޫގެ އާއްމު ހާލަތު ވަރަށް ބޮޑަށް ގޯސްވެ، ކަރަންޓު ބިލާއި ތަކެތީގެ އަގުބޮޑުވުމާއި މަސްވެރިކަމުގެ ދަތިތަކާއެކު ރައްޔިތުންގެ ކަންބޮޑުވުން އިތުރުވެފައިވާއިރު ރައީސް ޑރ.މުހައްމަދު މުއިއްޒުގެ ވެރިކަން ބަދަލުނުކޮށް ރަނގަޅުނުވާނެ ކަމަށް އެ ރަށުގެ ގިނަ ރައްޔިތުން ބުނެފި އެވެ.
ރާއްޖެޓީވީން ގެނެސްދޭ ހާލު ކިހިނެއް ޕްރޮގްރާމްގައި އެ ރަށުގެ ގިނަ ރައްޔިތުން ވަނީ މި ސަރުކާރަށް ވަރަށް ބޮޑަށް ފާޑު ކިޔާފަ އެވެ. އަދި މިވެރިކަން ބަދަލު ކުރަންޖެހޭ ކަމަށް ބުނެފައިވެ އެވެ.
މީދޫގެ ތަރައްގީގެ މަޝްރޫއުތައް މަޑުޖެހި، އަސާސީ ޚިދުމަތްތަކާއި ސިއްހީ އެހީތެރިކަން ހޯދުމުގައި ބޮޑެތި ދަތިތަކާ ކުރިމަތިލާންޖެހިފައިވާ ކަމަށް ބުނެ އެ ރަށުގެ ގިނަ ރައްޔިތުން ކަންބޮޑުވުންފާޅު ކޮށްފައިވާއިރު، ރައީސް މުއިއްޒުގެ ވެރިކަމާއެކު އެރަށަށް ވަރަށް ބޮޑަށް ތަރައްގީ ލިބޭނެ ކަމަށް ކުރިން އުންމީދު ކުރި ކަމަށް އެމީހުން ބުނެ އެވެ.
ނަމަވެސް އުންމީދުކުރި ގޮތާ ހިލާފަށް ތަރައްގީގެ މަޝްރޫއުތައް މަޑުޖެހި، ރަށުގެ އާއްމު ހާލަތު ހުރިހާ ގޮތަކުން ވެސް ގޯސްވަމުންކަން އެމީހުން ފާހަގަކުރި އެވެ.
އެގޮތުން ކާނު ވަޅުލުމުގެ މަސައްކަތް ފަދަ ކަންކަން ވެސް އެތައް އަހަރެއް ވީއިރު ނުނިމޭ ކަމަށާއި، ރަށުގެ ޕޮލިސް ސްޓޭޝަންގެ މަސައްކަތް ހުއްޓިފައިވާ ކަމަށް ރަށު ރައްޔިތުން ބުނެ އެވެ. އިންތިޚާބުތަކާ ދިމާކޮށް ވަޒީފާތައް ދިން ނަމަވެސް، ހަގީގީ އެއްވެސް އުފާވެރިކަމެއް އެރަށު ތެރޭގައި ނެތް ކަމަށް ގިނަ މީހުން ބުނެފައިވެ އެވެ. އަދި ތަކެތީގެ އަގު އިންތިހާއަށް އުފުލި، އާންމުންގެ ދިރިއުޅުމުގެ ޚަރަދުތައް ބޮޑުވުމުގެ ސަބަބުން ކުދި ވިޔަފާރިތަކުގެ ވިޔަފާރި ވަރަށް ބޮޑަށް ދަށްވެ، މާލީ ގޮތުން ދެކޮޅުނުޖެހޭ ހާލަތަށް ކަންކަން ގޮސްފައިވާ ކަމަށް ރަށުގެ ރައްޔިތުން ފާހަގަކުރެ އެވެ.
ދ.މީދޫގައި ކުރިއަށް ގެންދިޔަ ހާލު ކިހިނެތް ޕްރޮގްރާމްގެ ތެރެއިން
ދ.މީދޫގައި ކުރިއަށް ގެންދިޔަ ހާލު ކިހިނެތް ޕްރޮގްރާމްގެ ތެރެއިން
އެ ރަށުން ވާހަކަ ދެއްކި ލަތީފް ބުނީ ދުވަހަކު ވެސް މި ރާއްޖެއަށް މިހައި ނުލަފާ ވެރިކަމެއް ނާންނާނެ ކަމަށާއި، ހުރިހާ ގޮތަކުން ވެސް ހާލަތު ވަރަށް ގޯސް ކަމަށެވެ.
އޭނާ ބުނީ، ސިޔާސީ ފިކުރަށް ބަލައި އާސަންދައިގެ ޚިދުމަތް ދިނުމުގައި ވެސް ތަފާތުކުރުންތައް ގެންގުޅޭ ކަމަށެވެ.
ދ.މީދޫގައި ކުރިއަށް ގެންދިޔަ ހާލު ކިހިނެތް ޕްރޮގްރާމްގެ ތެރެއިން | ރާއްޖެއެމްވީ
އެގޮތުން ތެރަޕީ ދޭންޖެހޭ އޭނާގެ ދެ ދަރިން މާލޭގައި ކުއްޔަށް ތިބެން ޖެހިފައިވާއިރު، ނުކުޅެދުންތެރިކަން ހުންނަ ފަރާތްތަކަށް ސަރުކާރުން ދޭން ކަނޑައަޅާފައިވާ އެލަވަންސް ވެސް ނުލިބޭ ކަމަށް އޭނާ ފާހަގަކުރި އެވެ.
މީގެ އިތުރުން އޭނާ ވަނީ ލޯކަލް ކައުންސިލް އިންތިޚާބުގައި އެ ރަށުގެ ތެރޭގައި ކަންކަން ހިނގާދިޔަ ގޮތަށް ވެސް ވަރަށް ބޮޑަށް ފާޑު ކިޔާފަ އެވެ.
މިއީ ރައީސް އަނބިކަބަލުންގެ މަންމަގެ ބޮޑު ރަށް. މިރަށަށް ކަމެއް ނުވިއްޔާ ދެން ކޮން ރަށަކަށްވާނީ. އެއް ކަމެއް ވެސް ނުވޭ. ދެން އިންތިޚާބަށް ކަންކަން ރަނގަޅަށް ދިޔަ. 67 މީހުންނަށް ވަޒީފާ ދިން. އެހެންވީމަ އިންތިޚާބު ކާމިޔާބު ކުރާނެއްނު. އާސަންދަ އެއްކޮށް އޮތީ މިރަށު. ހުރިހާ މިނިސްޓަރު ތިބީ މިރަށު. ހުރިހާ ކުންފުނިތަކުގެ މެނޭޖަރުން ތިބީ މިރަށު. ތިބެގެެން އެމީހެއްގެ ދުލުން ބުނި ކަމެއް ލާރި ވިއްޔާ ލާރި. ވަޒީފާ ވިއްޔާ ވަޒީފާ. އާސަންދަ ވިއްޔާ އާސަންދަ. އެހެންވީމަ އެމީހުންނަށް ގޮނޑި ލިބޭނެއްނުލަތީފް
މީގެ އިތުރުން އާރުޑީސީގެ މުވައްޒަފުންނާއި ބިދޭސީން ބައިތިއްބައިގެން މަސައްކަތެއް ނުކޮށް މުސާރަ ދެމުންދާ ކަމަށާއި، މަގުތައް ކޮނުމަށްފަހު މަރާމާތުނުކޮށް ދޫކޮށްލާފައިވާ ކަމަށް ވެސް އޭނާ ބުންޏެވެ.
މަސްވެރިކަމުގެ ދާއިރާއަށް ދިމާވެފައިވާ ގޮންޖެހުންތަކާ ގުޅޭގޮތުން ވާހަކަދެއްކި ޒުވާން މަސްވެރިޔަކު ބުނީ، ކުރީގެ ސަރުކާރުތަކުގައި ކަންނެލި ކިލޯއެއްގެ އަގު 90 އާއި 100 ރުފިޔާއަށް ހުރި ނަމަވެސް މިހާރު އެ އަގު 35 އާއި 40 ރުފިޔާއަށް ދަށްވެފައިވާ ކަމަށެވެ. އަދި މިފްކޯގެ އައިސް ޕްލާންޓް ނިމިފައި ހުރި ނަމަވެސް ގިނަ ދުވަސްތަކުގައި އައިސް ނުލިބޭ ކަމަށާއި، ކައިރި ރަށްރަށާ އަޅާބަލާއިރު ރަށުން ތެޔޮ ލިބޭ އަގު ބޮޑުވުމުގެ ޝަކުވާ ވެސް އޭނާ ވަނީ ފާހަގަކޮށްފަ އެވެ.
ދ.މީދޫގައި ކުރިއަށް ގެންދިޔަ ހާލު ކިހިނެތް ޕްރޮގްރާމްގެ ތެރެއިން | ރާއްޖެއެމްވީ
އެކަމަކު ތަކެތީގެ އަގު މިދަނީ އިންތިހާއަށް މައްޗަށް. އަޅުގަނޑަށް ކޯއްޗެއް ލިބޭނީޒުވާން މަސްވެރިއެއް
ކަރަންޓު ބިލުތައް ބޮޑު މައްސަލައާ ގުޅޭގޮތުން އެރަށުގެ އުމުރުން ދުވަސްވީ އަންހެނަކު ބުނި ގޮތުގައި ކުރިން 1،500 ރުފިޔާއަށް އަރަމުންދިޔަ ކަރަންޓު ބިލު މިހާރު ހުންނަނީ 3،000 އާއި 4،000 ރުފިޔާއާ ދެމެދުގަ އެވެ. އޭނާ ފާހަގަކުރި ގޮތުގައި އެއްވެސް އިތުރު ވަސީލަތެއް ނުވަތަ އިތުރު ކަރަންޓެއް ބޭނުން ނުކުރި ނަމަވެސް ބިލުތައް ދަނީ އިންތިހާއަށް ބޮޑުވަމުންނެވެ.
މިވަރުގެ ވެރިކަމަކީ ދައްތަމެންނަށް މިލިބޭ އަނިޔާއާ ގެއްލުމާއި ހަލާކު. ކަރަންޓުގެ ކަންްތައް
މަސްވެރިކަމަށް މިޔަރުގެ ނުރައްކަލާއި ލިބޭ އާމްދަނީގެ ދަތިކަން ފާހަގަކޮށް ވާހަކަ ދެއްކި އުމުރުން ދުވަސްވީ ފިރިހެނެއް ބުނީ، ދިރިއުޅުމުގެ ހާލަތު ހުރީ ދެކޮޅުނުޖެހޭ ފަދަ ދަތި ހާލެއްގައި ކަމަށެވެ. ތަކެތީގެ އަގު އިންތިހާއަށް ބޮޑުވެފައިވާއިރު، މަސްވެރިކަން ކުރުމުގައި މިޔަރުގެ އުނދަގޫ ބޮޑުވެ މަހެއް ބޭނޭނެ ގޮތެއް ނެތް ކަމަށް އޭނާ ބުންޏެވެ. ފަރުމަހާއި ކަނޑުމަހުގެ އިތުރުން ކަންނެލީގެ މަސްވެރިކަމަށް ނުކުންނަ އިރު ވެސް މިޔަރުގެ ސަބަބުން ބޮޑެތި ގެއްލުންތައް ވަމުންދާ ކަމަށާއި، މިކަމަށް ހައްލެއް ހޯދައިދިނުމަށް ސަރުކާރުން އެކަށީގެންވާ ހުއްދައެއް ދީފައި ނުވާ ކަމަށް އޭނާ ފާހަގަކުރި އެވެ.
މީގެ އިތުރުން ވެސް އެރަށުގެ ރައްޔިތުން ވަނީ ރަށުގެ ސިއްހީ ހާލަތަށް ބަލާއިރު ބޭނުންވާ ބޭސްފަރުވާގެ ދަތިކަން އެބައޮތް ކަމަށާއި، ބޭސް ހޯދުމަށް އަމިއްލަ ބޭސްފިހާރަތަކަށް ބަރޯސާވާން ޖެހިފައިވާ ކަމަށް ބުނެފަ އެވެ. އަދި އެމްއާރްއައި ހެދުން ފަދަ ޚިދުމަތްތަކަށް 17 ދުވަހުގެ ދިގު އިންތިޒާރެއް ކުރަންޖެހޭ ކަމުގެ ޝަކުވާ ވެސް ވަނީ ފާހަގަކޮށްފަ އެވެ.
ރަށުން ގެވަޅު ދޫކުރުމުގައި އިންސާފުވެރިކަމެއް ނެތް ކަމަށް ބުނެ ހިޔާލުފާޅު ކުރި މީހެއް ބުނީ، ބައެއް އާއިލާތަކުގައި ގިނަ ދަރިން ތިބި ނަމަވެސް ގެވަޅު ލިބިފައި ނުވާ ކަމަށެވެ.
ދ.މީދޫގައި ކުރިއަށް ގެންދިޔަ ހާލު ކިހިނެތް ޕްރޮގްރާމްގެ ތެރެއިން
ދ.މީދޫގައި ކުރިއަށް ގެންދިޔަ ހާލު ކިހިނެތް ޕްރޮގްރާމްގެ ތެރެއިން
މީގެ އިތުރުން މި ޕްރޮގްރާމްގައި މީދޫ ކައުންސިލްގެ ކުރީގެ ރައީސް މުހައްމަދު ޝާހިދު ލޯކަލް ކައުންސިލް އިންތިޚާބާއި، ރަށުގެ ހާލަތާ ގުޅޭގޮތުން ވާހަކަ ދައްކަވަމުން ދަނިކޮށް ޕީއެންސީއަށް ނިސްބަތްވާ ބަޔަކު އެ ސަރަހައްދަށް އެއްވެ އަޑު ގަދަކޮށް މާރާމާރީ ހިންގުމަށް ވެސް ވަނީ މަސައްކަތްކޮށްފަ އެވެ.
ޝާހިދު ވިދާޅުވީ އިންތިޚާބުގެ ކަންކަން ހިނގައިދިޔަ ގޮތް ސިފަކުރެވެނީ ކުރީ ޒަމާނުގައި ކުދިން ގޭދޮރުމަތީ ކުޅޭއިރު ބޯޅަ އޮންނަ ކުއްޖާ ހުރިހާ ގޮތެއް ނިންމާ އުސޫލުން ކަންކަން ގެންދިޔަ ގޮތަށް ކަމަށެވެ.
ހާލު ކިހިނެތް ޕްރޮގްރާމްއަށް މީދޫ ކައުންސިލްގެ ކުރީގެ ރައީސް މުހައްމަދު ޝާހިދު އިންޓަވިއު ދެއްވަނީ | ރާއްޖެއެމްވީ
ޝާހިދު ފާހަގަކުރެއްވި ގޮތުގައި، އެޕްރީލް 4 ގައި ބޭއްވި އިންތިޚާބުގައި ދައުލަތުން މީދޫ ކައުންސިލްގެ ރައީސް ގޮނޑި ކާމިޔާބު ކުރުމަށް ގިނަ މަސައްކަތްތަކެއް ކުރި ނަމަވެސް، ރައްޔިތުން އޭނާއަށް ކުރި އިތުބާރާއެކު އިންތިޚާބު ކާމިޔާބު ކުރެވުނު ކަމަށެވެ. އަދި އޭނާއަކީ މީގެ ކުރިން ވެސް ރަށުގައި ތަރައްގީގެ ޕްރޮޖެކްޓްތައް ހިންގާފައިވާ، ޕަބްލިކް ޕްރައިވެޓް ޕާޓްނަރޝިޕް އަދި ގާނޫނީ ދާއިރާއިން މާސްޓަރސް ހާސިލްކޮށްފައިވާ ބޭފުޅެއްކަން ފާހަގަކުރެއްވި އެވެ.
ނަމަވެސް، އިލެކްޝަންސް ކޮމިޝަނުން ދާއިމީ ނަތީޖާ އިއުލާނުކުރުމުން، ސަރުކާރު ކެންޑިޑޭޓުގެ ފަރާތުން ހައިކޯޓަށް މައްސަލަ ހުށަހެޅި ކަމަށް ޝާހިދު ވިދާޅުވި އެވެ. ހައިކޯޓުގެ މަރުހަލާގައި، އިލެކްޝަންސް ކޮމިޝަނުންނާއި ފޮށީގެ ވެރިޔާ ބާތިލު ވޯޓެއް ކަމަށް ނިންމި ވޯޓުތަކެއް ސައްހަ ކުރުމަށް މަސައްކަތް ކުރި ކަމަށާއި، ގާނޫނުއަސާސީގެ 170 ވަނަ މާއްދާއާ ޚިލާފަށް އިތުރު ފާހަގަ ހުރި ވޯޓު ސައްހަކޮށް އަލުން އިންތިޚާބަކަށް ދާންޖެހުނު ގޮތުގެ ތަފްސީލު ޝާހިދު ހިއްސާކުރެއްވި އެވެ.
މީދޫގައި ކުރިއަށް ގެންދިޔަ ހާލު ކިހިނެތް ޕްރޮގްރާމްގެ ޝޫޓިން ކުރިއަށް ދަނިކޮށް ޕީއެންސީއަށް ނިސްބަތްވާ ބަޔަކު އެސަރަހައްދަށް ގޮސް އަޑު ގަދަކުރަނީ | ރާއްޖެއެމްވީ
ޝާހިދު މި ވާހަކަތައް ދައްކަވަމުން ގެންދަވަނިކޮށް، ޕީއެންސީއަށް ތާއީދުކުރާ ބަޔަކު ވަނީ އެ ސަރަހައްދަށް އެއްވެ އަޑުގަދަކޮށް، ހަޑިހުތުރު ބަސްތައް ބޭނުންކޮށްފަ އެވެ. އަދި މާރާމާރީ ހިންގުމަށް ވެސް އެ ފަރާތްތަކުން މަސައްކަތް ކުރުމާ ގުޅިގެން، އިންޓަވިއު ވަނީ އެ ހިސާބުން މެދުކަނޑާލަން ޖެހިފަ އެވެ.
