ޑރ. އަޒްމިރާލްދާ އާއި މަހާޒުގެ މައްޗަށް ކުރީ ސިޔާސީ ތުހުމަތުތަކެއް، ބަދަލު ދޭންޖެހޭ: އަލީ ހުސެއިން
10 އޮކްޓޯބަރު 2026 | ހޮނިހިރު 06:54ސުޕްރީމް ކޯޓުގެ ކުރީގެ ދެ ފަނޑިޔާރުން ކަމަށްވާ ޑރ. އަޒްމިރާލްދާ އާއި މަހާޒްގެ މައްޗަށް ކުރި ތުހުމަތުތަކުގައި ޖިނާއީ ކުށެއް ނެތް ކަމަށް ނިންމައި ފުލުހުން މައްސަލަ ފައިލްކުރުމާ ގުޅިގެން، އެ ބޭފުޅުންނަށް ލިބުނު ގެއްލުމުގެ ބަދަލު ދައުލަތުން ދޭންޖެހޭނެ ކަމަށް ގާނޫނީ ވަކީލު އަލީ ހުސައިން ވިދާޅުވި. މިއީ ސިޔާސީ ނުފޫޒުން ހިންގާފައިވާ ކަމެއްކަން ފާހަގަކުރައްވައި، އެ ފަނޑިޔާރުންގެ މަގާމު އިޔާދަކޮށްދޭން ޖެހޭނެ ކަމަށްވެސް އޭނާ ވިދާޅުވި.
ރާއްޖެޓީވީގެ ފަލަސުރުހީ ޕްރޮގްރާމްގައި ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެންބަރު އަދި ގާނޫނީ ވަކީލު އަލީ ހުސެއިން ވާހަކަ ދައްކަވަނީ. | ރާއްޖެއެމްވީ
ސުޕްރީމް ކޯޓުގެ ކުރީގެ ދެ ފަނޑިޔާރުން ކަމަށްވާ ޑރ. އަޒްމިރާލްދާ ޒާހިރު އަދި މަހާޒް އަލީ ޒާހިރަށް ކުރީ ސިޔާސީ ތުހުމަތުތަކެއް ކަމަށާއި، ދައުލަތުން އެ ދެ ބޭފުޅުންނަށް ގެއްލުމުގެ ބަދަލު ދޭންޖެހޭ ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެންބަރު އަދި ގާނޫނީ ވަކީލު އަލީ ހުސެއިން ވިދާޅުވެއްޖެ އެވެ.
ދެ ފަނޑިޔާރުން މަގާމުގެ ނުފޫޒު ނާޖާއިޒު ގޮތުގައި ބޭނުންކުރެއްވި ކަމަށް ތުހުމަތުކޮށް ހުށަހެޅުނު މައްސަލައިގައި ޖިނާއީ ކުށުގެ އަމަލެއް ހިނގާފައިވާ ކަމަށް ބެލެވެން ނެތް ކަމަށް ނިންމައި، މި މަހުގެ 8 ވަނަ ދުވަހު ފުލުހުން ވަނީ އެ މައްސަލަ ފައިލްކޮށްފަ އެވެ.
މިމައްސަލަ އަށް އިޝާރާތް ކުރައްވައި ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަ ދައްކަވަމުން އަލީ ހުސެއިން ވިދާޅުވީ، ރާއްޖޭގެ މިހާރުގެ ހާލަތަށް ބަލާއިރު ކުޑަ ނަމަވެސް ހެއްކެއް އޮތް ނަމަ ދައުލަތުން ދައުވާ ކުރާނެ ކަމަށާއި، މި މައްސަލަ ފައިލްކުރަން ޖެހުމުން ސިޔާސީ ނުފޫޒު ފޯރާފައިވާ މިންވަރު ސާފުވާ ކަމަށެވެ. އަދި މިނިވަން މުއައްސަސާތަކުގެ މަގާމުތަކަކީ ސިޔާސީ މީހުންނަށް ދަންނަވައިގެން ހޯދާ މަގާމުތަކަކަށް ވެފައިވާތީ، ސިޔާސީ މީހުން ބުނާ ގޮތަށް ދައުވާކުރުން ފަދަ ކަންކަން ހިނގަމުންދާ ކަމަށް އޭނާ ވިދާޅުވި އެވެ.
މީގެއިތުރުން އަލީ ހުސެއިން ވިދާޅުވީ ކޮންމެ ސަރުކާރަކުން ވެސް ސުޕްރީމް ކޯޓުގެ ބާރު ކަނޑުވާލަން މަސައްކަތްކުރާ ކަމަށާއި، މި ސަރުކާރުން އެކަން އެހެން ހަރުފަތަކަށް ގެންގޮސްފައިވާ ކަމަށެވެ.
އެގޮތުން މައްސަލައެއް ނިންމަން ތާވަލުކޮށްފައި އޮއްވައި، މައްސަލައިގެ މެދުތެރެއިން ފަނޑިޔާރުން ސަސްޕެންޑު ކުރި ކަމަށް އޭނާ ފާހަގަކުރެއްވި އެވެ.
މި މައްސަލައާ ގުޅިގެން ދެ ފަނޑިޔާރުންގެ އަބުރު ކިލަނބުކޮށް، ފަޟީހަތްކޮށްފައިވާތީ ދައުލަތުން ގެއްލުމުގެ ބަދަލު ދޭންޖެހޭނެ ކަމަށް އަލީ ހުސެއިން ވިދާޅުވި އެވެ. އަދި އެ ބޭފުޅުންނާ ދެކޮޅަށް ދައުވާ ކުރެވޭ މިންވަރުގެ ހެއްކެއް ނެތް ކަމަށް ދައުލަތުން ބުނާއިރު، އެ ބޭފުޅުންގެ މަގާމު ވެސް އަނބުރާ އިޔާދަކޮށްދޭން ޖެހޭނެ ކަމަށް އަލީ ހުސެއިން ވިދާޅުވި އެވެ.
އެހެންވީމަ އަޅުގަނޑުމެންނަށް މިފެނުނީ ސުޕްރީމް ކޯޓަކީ އެ ކޮންމެ ސަރުކާރެއް ވެސް ކޮށާލަންޖެހޭ ތަނެއް. ކޮށާލާ ހަމަ ތިރިކޮށްލާނެ. ދެން މި ސަރުކާރުން އެހެން ލެވެލްއަކަށް ކޮށާލީ އެނގޭތޯ. އެއީ މައްސަލައެއް ބަލަބަލަ ތިއްބަ މައްސަލައެއްގެ މެދުތެރޭ މައްސަލަ ނިންމަން ނިންމަ އޮއްވައި އެނގޭތޯ. ހެނދުނު 10:30 އަށް ތާވަލުކޮށްފައި އޮއްވާ 10 އެއް، 9:30 ހާއިރު ، 10:00 ހާއިރު އެންމެން ސަސްޕެންޑް ކުރީ. އެހެންވީމާ އައު ލެވެލްއަކަށްއަލީ ހުސެއިން
މި މައްސަލައަކީ ސުޕްރީމް ކޯޓުގެ ކުރީގެ ތިން ފަނޑިޔާރުން ކަމަށްވާ ޑރ. އަޒްމިރާލްދާ ޒާހިރާއި މަހާޒު އަލީ ޒާހިރު އަދި ހުސްނުއްސުއޫދުގެ މައްޗަށް ޖިނާއީ ތަހުގީގެއް ހިންގާ ކަމަށް ބުނެ އޭސީސީ އިން ޖޭއެސްސީ އަށް އެންގުމާ ގުޅިގެން ބަލަން ފެށުނު މައްސަލައެކެވެ. ސަރުކާރުގެ މަސްލަހަތު އޮތް މުހިންމު ދުސްތޫރީ މައްސަލައެއް ސުޕްރީމް ކޯޓުން ބަލަމުން ދަނިކޮށް، މީގެ ދޮޅު އަހަރެއްހާ ދުވަސް ކުރިން ފެބްރުއަރީ މަހުގެ 27 ވަނަ ދުވަހު ލިބުނު އެ އެންގުމާ ގުޅިގެން ޖޭއެސްސީން ވަގުތުން އެ ތިން ފަނޑިޔާރުން ސަސްޕެނޑު ކުރި އެވެ.
އޭގެ ފަހުން، މާރިޗު މަހުގެ 6 ވަނަ ދުވަހު ފަނޑިޔާރު ސުއޫދު އަމިއްލަފުޅަށް އިސްތިއުފާ ދެއްވިއިރު، އަޒްމިރާލްދާ އާއި މަހާޒު ވަކިކޮށްފައި ވަނީ 2026 ވަނަ އަހަރު މެއި މަހުގެ 14 ވަނަ ދުވަހު ރައްޔިތުންގެ މަޖިލީހުން ފާސްކޮށްގެންނެވެ. ދެ ބޭފުޅުން ވެސް ވަކިކޮށްފައި ވަނީ ޖަވާބުދާރީވާން އެކަށީގެންވާ ފުރުސަތު ނުދީ ކަމަށް ބުނެ ގިނަ ބަޔަކު ވަނީ ކަންބޮޑުވުން ވެސް ފާޅުކޮށްފަ އެވެ.
ފާހަގަ ކޮށްލެވޭ ގޮތުގައި މިއީ އޭސީސީ އިން ހިންގި ތަހުގީގެކެވެ. އެހެން ނަމަވެސް މައްސަލަ ބަލާފައިވަނީ ދިވެހި ފުލުހުންގެ ޚިދުމަތުންނެވެ. މައުލޫމާތު ލިބޭ ގޮތުގައި 2026 ވަނަ އަހަރު އޭސީސީ އާއި ފުލުހުން ގުޅިގެން މި މައްސަލައިގައި ޖޮއިންޓް އޮޕަރޭޝަނެއް ވަނީ ކުރިއަށް ގެންގޮސްފަ އެވެ.
މި ތިން ފަނޑިޔާރުން ސަސްޕެންޑުކުރީ، މަޖިލީހުގެ މެންބަރުން ޕާޓީ ބަދަލުކުރުމުން ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހާ ދެކޮޅަށް ސުޕްރީމް ކޯޓަށް ހުށަހެޅި މައްސަލަ ބައްލަވަމުން ގެންދަވަނިކޮށެވެ. މިކަމާ ގުޅިގެން ސުއޫދު އާއި އަޒްމިރާލްދާ ވަނީ، ސަރުކާރުން ސުޕްރީމް ކޯޓަށް ނުފޫޒު ފޯރުވައިގެން އެ ދުސްތޫރީ މައްސަލަ ހުއްޓުވުމަށް މަސައްކަތް ކުރި ކަމަށް ތުހުމަތު ކުރައްވާފަ އެވެ. ނަމަވެސް، ސަރުކާރުން ވަނީ އެ ހުރިހާ ތުހުމަތުތަކެއް ދޮގުކޮށްފަ އެވެ.
