ސައުދީ އަރަބިއްޔާގެ ދެ އެއާޕޯޓަކަށް ހޫޘީން ދިން ހަމަލާތަކެއްގައި ތިން މީހުން ޒަޚަމްވެއްޖެ
6 އޮކްޓޯބަރު 2026 | އަންގާރަ 09:15ސައުދީގެ ޖީޒާން އަދި ނަޖްރާން އެއާޕޯޓަށް އަމާޒުކޮށް ހޫޘީން ދިން ހަމަލާތަކުގައި ތިން މީހަކަށް އަނިޔާވެ، އެ ތަންތަނުގެ ވަސީލަތްތަކަށް ބޮޑެތި ގެއްލުންތަކެއް ވަނީ ލިބިފައެވެ. މި ހަމަލާތަކާ ގުޅިގެން ސަލާމަތީ ފިޔަވަޅުތައް ވަރުގަދަކޮށްފައިވާއިރު، މިއީ ސައުދީގެ އިގުތިސާދީ އަދި މަދަނީ މަރުކަޒުތަކަށް އަމާޒުކޮށް ހޫޘީން ދެމުންދާ ސިލްސިލާ ހަމަލާތަކެއް ކަމަށް އެ ގައުމުން ބުނޭ
ޔަމަނުގެ ދާޚިލީ ހަނގުރާމަ އަލުން ފެށުނު ފަހުން، ހޫޘީން ދަނީ އަވައްޓެރި ސައުދީ އަރަބިއްޔާއަށް އަމާޒުކޮށް ހަމަލާތައް ދެމުން | އޭއެފްޕީ
ސައުދީ އަރަބިއްޔާގެ ދެކުނުގައިވާ ދެ އެއަރޕޯޓަކަށް އަމާޒުކޮށް ޔަމަނުގެ ހަތިޔާރުއެޅި ހޫޘީ ޖަމާއަތުން ދިން ހަމަލާތަކެއްގައި ތިން މީހަކަށް އަނިޔާވެ، މާއްދީ ގެއްލުންތަކެއް ލިބިފައިވާ ކަމަށް އަންގާރަ ދުވަހު އެ ގައުމުން ބުނެފި އެވެ.
ޖީޒާންގައި އޮންނަ ކިންގ ޢަބްދުﷲ ބިން ޢަބްދުލްޢަޒީޒް އިންޓަނޭޝަނަލް އެއާޕޯޓާއި ނަޖްރާން އިންޓަނޭޝަނަލް އެއާޕޯޓުގެ ވަސީލަތްތަކަށް އަމާޒުކޮށް ހަމަލާތަކެއް ދީފައިވާ ކަމަށް، ޖެނެރަލް އޮތޯރިޓީ އޮފް ސިވިލް އޭވިއޭޝަން (ގާކާ) އިން ނެރުނު ބަޔާނެއްގައި ބުނެފައިވެ އެވެ. އަދި, ކުއްލި ހާލަތްތަކުގައި ހަރަކާތްތެރިވާ ޓީމުތަކާއި ކަމާބެހޭ ފަރާތްތަކުން ވަގުތުން ފިޔަވަޅުތައް އަޅާފައިވާ ކަމަށް ވެސް އެ ބަޔާނުގައި ބުނެފައިވެ އެވެ.
މި ހަމަލާތަކުގައި ތިން މީހަކަށް ކުދި އަނިޔާތަކެއް ލިބިފައިވާއިރު، ފަރުވާދިނުމަށް ޓަކައި އެ މީހުން ވަނީ ހަސްފަތާލަށް ގެންގޮސްފަ އެވެ. ހަމަމިއާއެކު، އެއާޕޯޓުތަކަށް މާއްދީ ގެއްލުންތަކެއް ލިބިފައިވާ ކަމަށް ވެސް ރިޕޯޓުކޮށްފައިވެ އެވެ. ލިބުނު ގެއްލުންތައް ވަޒަންކުރުމަށާއި ފަސިންޖަރުންނާއި މުވައްޒަފުންގެ އިތުރުން ރަސްކަމުގެ މަދަނީ ވައިގެ ދަތުރުފަތުރުގެ ނިޒާމުގެ ރައްކާތެރިކަން ކަށަވަރުކުރުމަށް ބޭނުންވާ ފިޔަވަޅުތައް އެޅުމަށް ކަމާބެހޭ ސަލާމަތީ އިދާރާތަކާ ގުޅިގެން މަސައްކަތްކުރަމުންދާ ކަމަށް އޭވިއޭޝަން އޮތޯރިޓީން ބުނެފައިވެ އެވެ. މި ހަމަލާތައް ދިނީ ކޮން ބައެއްކަން މި ބަޔާނުގައި ހާމަކޮށްފައެއް ނުވެ އެވެ.
ނަމަވެސް، ޔަމަނުގެ ހޫޘީ ޖަމާއަތުން ހޯމަ ދުވަހު ބުނީ، ސައުދީ އަރަބިއްޔާގެ އެކި ކަންކޮޅުތަކަށް މިސައިލާއި ޑްރޯން ބޭނުންކޮށްގެން ސިލްސިލާ ހަމަލާތަކެއް ދީފައިވާ ކަމަށާއި، އޭގެ ތެރޭގައި ޖީޒާން އަދި ނަޖްރާންގައި ހުރި "ނާޒުކު މަގާމުތަކަށް" ދިން ހަމަލާތައް ހިމެނޭ ކަމަށެވެ. މީގެ އިތުރުން، ވެރިރަށް ރިޔާޟްގައި ހުންނަ ކިންގ ޚާލިދު އިންޓަނޭޝަނަލް އެއާޕޯޓަށާއި، އަބްހާ އެއާޕޯޓަށާއި، ރާބިޣުގައި ހުންނަ އަރަމްކޯ ތެޔޮ ކުންފުނީގެ ތެޔޮ ސާފުކުރާ ކާރުޚާނާއެއްގެ އިތުރުން އަސްކަރީ މަރުކަޒުތަކަށް ހަމަލާދިން ކަމަށް ވެސް އެ ޖަމާއަތުން ވަނީ ދައުވާކޮށްފަ އެވެ.
އެ ގައުމުގެ އެކި ކަންކޮޅުތަކުގައިވާ މަދަނީ އަދި އިގުތިސާދީ ވަސީލަތްތަކަށް އަމާޒުކޮށް ހޫޘީ ޖަމާއަތުން ދިން ހަމަލާތައް ސައުދީ އަރަބިއްޔާ އިން ހޯމަ ދުވަހު ކުށްވެރިކޮށްފައިވާއިރު، އެ ޖަމާއަތުން އަސްކަރީ ކުރިމަތިލުންތައް އިތުރުކުރަން މަސައްކަތްކުރާ ކަމަށް ވަނީ ތުހުމަތުކޮށްފަ އެވެ. މި ހަމަލާތައް ދީފައި ވަނީ ސައުދީ އަރަބިއްޔާއާއި ހޫޘީ ޖަމާއަތާ ދެމެދު އޮތް ނުތަނަވަސްކަން ވަރަށް ބޮޑަށް އިތުރުވެފައިވާ ދަނޑިވަޅެއްގަ އެވެ. މި ގޮތުން، ފާއިތުވި ދުވަސްތަކުގައި އެ ގައުމަށް އަމާޒުކޮށް ފޮނުވާލި ބެލިސްޓިކް މިސައިލްތަކާއި ޑްރޯންތައް ވައިގެ ތެރޭގައި ހުއްޓުވާފައިވާ ކަމަށް ސައުދީން އިސްވެ އޮވެ ހިންގާ އަސްކަރީ އިއްތިހާދުން ވަނީ ރިޕޯޓުކޮށްފަ އެވެ.
ބައިނަލްއަގުވާމީ ގޮތުން ބަލައިގަނެފައިވާ ޔަމަނުގެ ސަރުކާރަށް ތާއީދުކޮށް، ހޫޘީ ޖަމާއަތާ ދެކޮޅަށް ސައުދީ އަރަބިއްޔާއިން އިސްވެ އޮވެ އަސްކަރީ އިސްތިހާދެއް ހިންގަން ފެށީ 2015 ވަނަ އަހަރުގެ މާރިޗު މަހު އެވެ. 2014 ވަނަ އަހަރުގެ ސެޕްޓެންބަރު މަހުން ފެށިގެން ޔަމަނުގެ ވެރިރަށް ޞަންޢާއާއި އެހެނިހެން ބައެއް ސަރަހައްދުތައް އޮތީ ހޫޘީ ޖަމާއަތުގެ ކޮންޓްރޯލްގެ ދަށުގަ އެވެ.
މަސްދަރު: އަނަދޮލު އޭޖެންސީ
