ސައުދީ ފައުޖުތަކުން ޔަމަނުގެ ވެރިރަށާއި ހޫޘީންގެ މަގާމުތަކަށް ވަރުގަދަ ހަމަލާތަކެއް ދީފި
2 އޮކްޓޯބަރު 2026 | ހުކުރު 04:46ޔަމަނުގެ ތަޢިއްޒު ޕްރޮވިންސްގައި ހުރި ހޫޘީންގެ މިސައިލް ގުދަންތަކާއި އަސްކަރީ މަރުކަޒުތަކަށް އަމާޒުކޮށް ދިން ވަރުގަދަ ވައިގެ ހަމަލާތަކެއްގައި އެ ޖަމާއަތުގެ ގިނަ އަދަދެއްގެ ހަނގުރާމަވެރިން މަރުވެ، އަސްކަރީ އުޅަނދުތަކެއް ވަނީ ހަލާކުވެފައި. މި ހަމަލާތައް ދީފައި ވަނީ ސައުދީ އަރަބިއްޔާގެ ސިޓީތަކަށް އަމާޒުކޮށް ހޫޘީން ފޮނުވާލި ޑްރޯންތަކާއި މިސައިލްތަކެއް ސައުދީ އިއްތިހާދުން ނައްތާލާފައިވާ ދަނޑިވަޅެއްގައި
ސައުދީ އަރަބިއްޔާގެ ވައިގެ ސިފައިން ޔަމަނުގެ ވެރިރަށް ސަންޢާގައި ހޫޘީން ހަރަކާތްތެރިވަމުންދާ ސަރަހައްދުތަކަށް ދިން ކަމަށް ބުނާ ހަމަލާގެ މަންޒަރުތައް | އެކްސް
ޔަމަނުގެ ވެރިރަށް ޞަންޢާއާއި، ޞަޢުދާއާއި، ތަޢިއްޒު އަދި ޢަމްރާން ޕްރޮވިންސަށް ސައުދީ އަރަބިއްޔާގެ އަސްކަރިއްޔާއިން ވައިގެ ހަމަލާތަކެއް ދީފައިވާ ކަމަށް، ޔަމަނުގެ ހަތިޔާރުއެޅި ހޫޘީ ޖަމާއަތުން ބުރާސްފަތި ދުވަހު ބުނެފި އެވެ. ސައުދީ އަރަބިއްޔާއަށް ނިސްބަތްވާ ކަމަށް ބެލެވޭ އަސްކަރީ މަތިންދާބޯޓުތަކުން ޞަންޢާއާއި އެ ތިން ޕްރޮވިންސްގެ އެކި ސަރަހައްދުތަކަށް ހަމަލާދީފައިވާ ކަމަށް ރިޕޯޓުކޮށްފައި ވަނީ ހޫޘީން ހިންގާ ސަބާ ނޫސް އޭޖެންސީންނެވެ.
ހަމަލާތައް އަމާޒުކޮށްފައިވާ ސީދާ ސަރަހައްދުތަކާއި، ލިބުނު ގެއްލުންތަކުގެ އިތުރުން މީހަކަށް އަނިޔާއެއް ލިބުނު ކަމުގެ އެއްވެސް ތަފްސީލެއް އެ ނޫހުން ރިޕޯޓުކޮށްފައެއް ނުވެ އެވެ. މި ދަނޑިވަޅުގައި، ޔަމަނުގެ ހުޅަނގު ދެކުނުގައި އޮންނަ ތަޢިއްޒު ޕްރޮވިންސްގައި ހޫޘީންގެ މަރުކަޒުތަކަށާއި އެ ޖަމާއަތުގެ ހަނގުރާމަވެރިން އެއްވެ އުޅޭ ސަރަހައްދުތަކަށް 27 ވައިގެ ހަމަލާއެއް ދީފައިވާ ކަމަށް ޔަމަނުގެ އަސްކަރިއްޔާއިން ވެސް ވަނީ ބުނެފަ އެވެ.
މި ހަމަލާތައް އަމާޒުކޮށްފައިވަނީ މިސައިލް ގުދަނަކަށާއި، ކޮމާންޑް އެންޑް ކޮންޓްރޯލް ސެންޓަރުތަކަށާއި، ސަޕްލައި އަދި ހަތިޔާރު ރައްކާކުރާ ތަންތަނުގެ އިތުރުން ހޫޘީ ހަނގުރާމަވެރިން އެއްވެ ތިބި ސަރަހައްދުތަކާއި އަސްކަރީ އުޅަނދުތަކަށް ކަމަށް، ޔަމަނުގެ އަސްކަރިއްޔާގެ ތަރުޖަމާނު ކާނަލް މަޖީދު ޢަބްދުﷲ އަލް-ނުޒައިލީ ވިދާޅުވި އެވެ. އަދި, މި ހަމަލާތަކުގައި އަސްކަރީ އެތައް އުޅަނދަކާއި އެހެނިހެން ތަކެތި ހަލާކުކޮށްލާފައިވާ ކަމަށާއި، ހޫޘީންގެ ގިނަ އަދަދެއްގެ ހަނގުރާމަވެރިން މަރުވެ ނުވަތަ ޒަޚަމްވެފައިވާ ކަމަށް ވެސް އޭނާ ވިދާޅުވި އެވެ.
ސައުދީ އަރަބިއްޔާގެ އަސްކަރީ މަތިންދާބޯޓެއް | އަނަދޮލު އޭޖެންސީ
ސައުދީ އަރަބިއްޔާގެ ޚަމީސު މުޝައިޠު އަދި ޖާޒާން ސިޓީއަށް އަމާޒުކޮށް ފޮނުވާލި ޑްރޯންތަކަކާއި ބެލިސްޓިކް މިސައިލްތަކެއް ވައިގެ ދިފާއީ ނިޒާމުން ހުއްޓުވައި ނައްތާލާފައިވާ ކަމަށް، ސައުދީ އިސްވެ އެކުލަވާލާފައިވާ އަސްކަރީ އިއްތިހާދުގެ ތަރުޖަމާނު ބްރިގޭޑިއާ ޖެނެރަލް ތުރުކީ އަލް-މާލިކީ ވެސް ވަނީ ހާމަކުރައްވާފަ އެވެ. މީގެ ދެ ދުވަސް ކުރިން ސައުދީ އަރަބިއްޔާގެ މަދީނާގައި ހުންނަ ޠައިބާ އިންޖީނުގެއަށް ވެސް ޑްރޯނެއް މެދުވެރިކޮށް ހޫޘީން ހަމަލާދީފައިވާ ކަމަށް އަލް-މާލިކީ ވިދާޅުވި އެވެ.
2014 ސެޕްޓެންބަރުގައި ހޫޘީން ޞަންޢާއާއި އިތުރު ޕްރޮވިންސްތަކެއް ހިފި ފަހުން ޔަމަނު ވަނީ ދާހިލީ ހަނގުރާމައެއްގެ ތެރެއަށް ވެއްޓިފަ އެވެ. ބައިނަލްއަޤުވާމީ ގޮތުން ބަލައިގަނެފައިވާ ޔަމަނުގެ ސަރުކާރަށް ސައުދީ އިސްވެ އޮވެ އުފައްދާފައިވާ އަރަބި ކޯލިޝަނުން މަދަދުވެރިވާން ފަށާފައި ވަނީ 2015 ވަނަ އަހަރުގެ މާރިޗު މަހު އެވެ.
މަސްދަރު: އަނަދޮލު އޭޖެންސީ
