އަރަމްކޯގެ ތެޔޮ ކާރުޚާނާއަކަށް ހަމަލާދީފައިވާނެ ކަމަށް ހޫޘީން ބުނެފި، ނަމަވެސް ސައުދީ އަރަބިއްޔާއިން އެ ކަން ދޮގުކުރޭ
4 އޮކްޓޯބަރު 2026 | އާދީއްތަ 05:29ޔަމަނުގެ ޞަންޢާއަށް ދެމުންދާ ހަމަލާތަކަށް ރައްދުދިނުމުގެ ގޮތުން ސައުދީގެ ތެޔޮ ކުންފުނި، އަރަމްކޯއަށް މިސައިލާއި ޑްރޯން ހަމަލާތަކެއް ދީފައިވާނެ ކަމަށް ހޫޘީން ބުނެފި. ނަމަވެސް، ސައުދީ އިސްވެ އޮންނަ ކޯލިޝަނުން މި ކަން ދޮގުކުރާއިރު، ހޫޘީން މަސައްކަތް ކުރަނީ ހަނގުރާމައިގައި އެ ޖަމާއަތަށް ލިބެމުންދާ ނާކާމިޔާބީތަކުން އާންމުންގެ ސަމާލުކަން އަނބުރާލުމަށް ކަމަށް އެ ކޯލިޝަނުން ބުނޭ
ސައުދީ އަރަބިއްޔާގެ ވެރިރަށް ރިޔާޟުގައި ހުންނަ އަރަމްކޯ ތެޔޮ ކުންފުނީގެ ކާރުޚާނާއަކަށް ދީފައިވާ ކަމަށް ބުނާ ހަމަލާގައި އެ ތަނުގައި ރޯވެ، އަނދަމުންދާ މަންޒަރު | އެކްސް
ޔަމަނުގެ ވެރިރަށް ޞަންޢާއަށް ދިން ހަމަލާތަކަށް ރައްދުދިނުމުގެ ގޮތުން، ރިޔާޟްގައި ހުންނަ ސައުދީ އަރަބިއްޔާގެ ތެޔޮ ކުންފުނި އަރަމްކޯގެ މަރުކަޒަކަށް ބެލިސްޓިކް މިސައިލާއި ޑްރޯން ބޭނުންކޮށްގެން ހަމަލާދީފައިވާނެ ކަމަށް ޔަމަނުގެ ހަތިޔާރުއެޅި ހޫޘީ ޖަމާއަތުން ހޮނިހިރު ދުވަހު ބުނެފި އެވެ. ޓީވީ މެދުވެރިކޮށް ދިން ބަޔާނެއްގައި ހޫޘީންގެ އަސްކަރީ ތަރުޖަމާނު ޔަހްޔާ ސަރީޢު ބުނީ، މި އޮޕަރޭޝަނުން "ކާމިޔާބުކަމާއެކު އޭގެ އަމާޒު ހާސިލުކޮށްފައިވާ" ކަމަށާއި، އަމާޒުކުރެވުނު ތަންތަނުގައި އަލިފާން ރޯވެފައިވާ ކަމަށެވެ.
ފާއިތުވި 24 ގަޑިއިރުގެ ތެރޭގައި ޞަންޢާއަށާއި އެހެނިހެން ޕްރޮވިންސްތަކަށް 60 ވައިގެ ހަމަލާ ދީފައިވާ ކަމަށާއި، މިއާއެކު ހަމަލާތަކުގެ ޖުމްލަ އަދަދު 1،420 އަށް އަރާފައިވާ ކަމަށް ވެސް ސަރީޢު ވިދާޅުވި އެވެ. މި ހަމަލާތަކުގެ ޒިންމާ އޭނާ އެޅުއްވީ ސައުދީ އަރަބިއްޔާގެ ކޮނޑުގަ އެވެ. "ހިސާރަށް ރައްދުދޭނީ ހިސާރުން" ކަމަށާއި، "ހަމަލާތައް ވަރުގަދަކުރުމުން ރައްދުދޭނީ ވެސް ހަމަލާތައް ވަރުގަދަކޮށްގެން" ކަމަށް ސަރީޢު އިންޒާރު ދިނެވެ.
މިއާ ދާދި އެކުއެކީގައި، ޔަމަނުގެ ސަރުކާރަށް ތާއީދުކުރާ އަސްކަރީ އިއްތިހާދުގެ ތަރުޖަމާނު ތުރުކީ އަލް-މާލިކީ ވިދާޅުވީ، ހޮނިހިރު ދުވަހު ރިޔާޟަށް ހަމަލާދިން ކަމަށް ބުނެ ހޫޘީން ކުރާ ދައުވާތަކަކީ "އޮޅުވާލުމެއް" ކަމަށެވެ. އަދި, ހޫޘީން މަސައްކަތްކުރަމުން ދަނީ "އެ ޖަމާއަތަށް ލިބެމުންދާ ގެއްލުންތަކުގެ ބޮޑުކަމާއި، ހަނގުރާމަވެރިންގެ އަމަލުތަކާމެދު އާންމުންގެ ރުޅިވެރިކަން އިތުރުވަމުންދާ ދިއުމާއި، އަދި ޔަމަނަށް ހަލާކާއި ގެއްލުން ގެނުވި ބޭރުގެ އެޖެންޑާތަކާ އެ މީހުންނާ އޮންނަ ގުޅުމުން މީހުންގެ ސަމާލުކަން އަނބުރާލުމަށް" ކަމަށް އަލް-މާލިކީ ވިދާޅުވި އެވެ.
2014 ސެޕްޓެންބަރުން ފެށިގެން ޞަންޢާއާއި އެހެނިހެން ބައެއް ގަވަރުނޭޓްތައް ކޮންޓްރޯލް ކުރަމުންދާ ހޫޘީ ބާރުތަކާ ދެކޮޅަށް، ބައިނަލްއަގުވާމީ ގޮތުން ބަލައިގަނެފައިވާ ޔަމަނުގެ ސަރުކާރަށް ތާއީދުކޮށް 2015 މާރިޗުން ފެށިގެން ހަނގުރާމަ ކުރަމުންދާ އަސްކަރީ ލަޝްކަރުގައި އިސްކޮށް ހަރަކާތްތެރި ވަނީ ސައުދީ އަރަބިއްޔާއިންނެވެ.
މި އަހަރުގެ ޖުލައި މަހު ހޫޘީން ވަނީ ސައުދީ އަރަބިއްޔާއާ ދެކޮޅަށް ކަނޑުގެ ހިސާރެއް އިއުލާންކޮށްފަ އެވެ. އެ ޖަމާއަތުން ބުނީ، މިއީ ޔަމަނުގައި އެ ގުރޫޕުގެ ކޮންޓްރޯލްގެ ދަށުގައިވާ ސަރަހައްދުތަކަށް ސައުދީން ކަނޑާއި ވައިގެ މަގުން އަޅާފައިވާ ހިސާރަށް ރައްދުދިނުމުގެ ގޮތުން އެޅި ފިޔަވަޅެއް ކަމަށެވެ. މިއާއެކު، އެ ޖަމާއަތުން ދަނީ ސައުދީގެ ހަކަތައާބެހޭ އުމްރާނީ ވަސީލަތްތަކަށް ހަމަލާދެމުންނެވެ.
މަސްދަރު: އަނަދޮލު އޭޖެންސީ
