ކަރަންޓު ކޭބަލްތަކަށް ގެއްލުންދޭ ފަރާތްތަކުން މަރާމާތުގެ ހުރިހާ ޚަރަދެއް ކުރަންޖެހޭ ގޮތަށް ސްޓެލްކޯގެ ފިޔަވަޅުތައް ހަރުކަށިކޮށްފި
30 ސެޕްޓެމްބަރު 2026 | ބުދަ 04:57މަގު ކޮނުމުގެ ތެރޭގައި ކަރަންޓު ކޭބަލްތަކަށް ގެއްލުންވެ، ޚިދުމަތް މެދުކެނޑޭ މައްސަލަ އިތުރުވަމުންދާތީ، އެފަދަ އިހުމާލުތަކުން ހިނގާ ހުރިހާ ޚަރަދެއް މަސައްކަތްކުރި ފަރާތަކުން ނަގާގޮތަށް ސްޓެލްކޯއިން ނިންމައިފި. މި ފިޔަވަޅަކީ އާންމުންނަށް ދިމާވާ ދަތިތައް ހައްލުކޮށް، މަސައްކަތްކުރާ ފަރާތްތައް ޒިންމާދާރުކުރުވުމަށް އެޅި ފިޔަވަޅެއް ކަމަށް އެ ކުންފުނިން ބުނޭ
ސްޓެލްކޯ | ސްޓެލްކޯ
މަގު ކޮނުމުގެ އެކި މަސައްކަތްތައް ކުރިއަށްގެންދާއިރު، އިހުމާލުން ކަރަންޓު ކޭބަލްތަކަށް ގެއްލުންވެ، ޚިދުމަތް މެދުކެނޑޭ މައްސަލަ ހައްލުކުރުމަށްޓަކައި ހަރުކަށި ފިޔަވަޅުތަކެއް އެޅުމަށް ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން ނިންމައިފި އެވެ.
އެ ކުންފުނިން ބުނީ މަގު ކޮނުމުގެ ތެރެއިން ކަރަންޓު ވިއުގައަށް ގެއްލުންދޭ ފަރާތްތައް ޒިންމާދާރުކުރުވައި، އެފަދަ ހާދިސާތަކުގެ ސަބަބުން ހިނގާ ހުރިހާ ޚަރަދެއް އެ މަސައްކަތެއް ކުރި ފަރާތަކުން ނަގަންޖެހޭނެ ކަމަށެވެ.
ސްޓެލްކޯ އިން ބުދަ ދުވަހު ބުނީ، މަގު ކޮނުމުގެ މަސައްކަތްތަކުގެ ތެރެއިން ކަރަންޓު ވިއުގައިގައި ހިމެނޭ ކޭބަލްތަކަށް ގެއްލުންވުމުގެ ސަބަބުން ކަރަންޓުގެ ޚިދުމަތް މެދުކެނޑި، އާންމު ރައްޔިތުންނަށް ބޮޑެތި ތަކުލީފުތަކަކާއި ދަތިތަކަކާ ކުރިމަތިވަމުންދާ ކަމަށެވެ. އަދި މިފަދަ ހާދިސާތައް ދުވަހެއް ދުވަހަކަށް އިތުރުވަމުންދާކަން އެ ކުންފުނިން ވަނީ ފާހަގަކޮށްފަ އެވެ.
މި މައްސަލައަށް ދާއިމީ ހައްލެއް ހޯދުމުގެ ގޮތުން، މަގު ކޮނުމުގެ މަސައްކަތް ކުރިއަށްގެންދާ ފަރާތްތަކުގެ އިހުމާލުން ކަރަންޓު ވިއުގައަށް ގެއްލުމެއް ލިބިއްޖެ ހާލަތެއްގައި، އެ މައްސަލަ ހައްލުކޮށް އަލުން ޚިދުމަތް ދިނުމަށް ހިނގާ ހުރިހާ ޚަރަދެއް އެ ފަރާތަކުން ނެގުމަށް މިހާރު ވަނީ ނިންމާފަ އެވެ. ސްޓެލްކޯ އިން ބުނި ގޮތުގައި މި ނިންމުމަކީ ކަރަންޓުގެ ޚިދުމަތް މެދުކެނޑުމުގެ ސަބަބުން އާންމު ރައްޔިތުންނަށް ދިމާވާ ދަތި އުނދަގޫތަކުން ސަލާމަތްކޮށް، ޚިދުމަތުގެ ފެންވަރު ދެމެހެއްޓެނިވި ގޮތެއްގައި ފޯރުކޮށްދިނުމަށްޓަކައި ނިންމި ނިންމުމެކެވެ.
މީގެ އިތުރުން، މަގު ކޮނުމުގެ އެންމެހައި މަސައްކަތްތައް ކުރިއަށްގެންދާ ފަރާތްތަކުން ސްޓެލްކޯގެ ކަރަންޓު ވިއުގައަށް ގެއްލުން ނުވާނެހެން، މިހާރަށްވުރެ ބޮޑަށް ޒިންމާދާރުކަމާއެކު މަސައްކަތްތައް ރާވައި ކުރިއަށްގެންދިއުމަށް އެ ކުންފުނިން ވަނީ އިލްތިމާސްކޮށްފަ އެވެ.
މާލެ ސަރަހައްދުގައި އެކި ބޭނުންތަކަށް މަގު ކޮނުމުގެ ތެރޭގައި ކަރަންޓު ކޭބަލްތަކަށް ގެއްލުންވެ، މުޅި ސަރަހައްދުން ކަރަންޓު ކެނޑޭ ހާދިސާތައް ދޭތެރެ ދޭތެރެއިން ހިނގަމުންދެ އެވެ. މިފަދަ ހާދިސާތަކުގެ ސަބަބުން ގޭބިސީތަކަށާއި ވިޔަފާރިތަކަށް ބޮޑެތި ގެއްލުންތަކެއް ލިބެމުންދާތީ، އާންމުންގެ ޝަކުވާތައް ވެސް ވަނީ އިތުރުވެފަ އެވެ.
