އުތުރު ކޮރެޔާއިން މިސައިލް ޓެސްޓެއް ހެދުމުން ދެކުނު ކޮރެޔާއާއި ޖަޕާނުގައި އެލާޓު ނެރެފި

އުތުރު ކޮރެޔާގެ އަސްކަރިއްޔާއިން އެ ގައުމުގެ އިރުމަތީ އައްސޭރިފަށާ ދިމާލަށް ބެލިސްޓިކް މިސައިލެއް ފޮނުވާލާފައިވާ ކަމަށް ދެކުނު ކޮރެޔާގެ އަސްކަރިއްޔާއިން ހާމަކޮށްފި އެވެ. މިއީ، މިސައިލް ޓެސްޓެއް ކަމަށް ބެލެވެ އެވެ.

ކޮރެޔާ ޕެނިންސިއުލާގެ އިރުމަތީ އައްސޭރީގައި އޮންނަ ވޮންސަން ބަނދަރު މަތިން އުތުރު ކޮރެޔާއިން ބެލިސްޓިކް މިސައިލެއް ފޮނުވާލާފައި ވަނީ ހޮނިހިރު ދުވަހުގެ ހެނދުނުގެ ވަގުތެއްގައި ކަމަށް، ދެކުނު ކޮރެޔާގެ ޖޮއިންޓް ޗީފްސް އޮފް ސްޓާފުން ބުންޏެވެ. އަދި, މި މިސައިލް 700 ކިލޯމީޓަރަށް ވުރެ ދުރަށް އުދުހިފައިވާ ކަމަށް ވެސް އެ ފަރާތުން ބުންޏެވެ.

Advertisement

މި ހާދިސާއާ ގުޅިގެން ނުރައްކަލުގެ ހާލަތު ވަޒަންކުރުމަށް ދެކުނު ކޮރެޔާގެ ގައުމީ ސަލާމަތާ ބެހޭ އިދާރާއިން ކުއްލި ބައްދަލުވުމެއް ބާއްވާފައިވާ ކަމަށް، އެ ގައުމުގެ ރައީސްގެ އޮފީހުން ނެރުނު ބަޔާނެއްގައި ބުނެފައިވެ އެވެ. އަދި، އިތުރު މިސައިލްތަކެއް ފޮނުވާލަފާނެ ކަމަށް ބަލައި ދެކުނު ކޮރެޔާގެ އަސްކަރިއްޔާއިން ވަނީ އިންޒާރު ނެރެފަ އެވެ. މި ހާދިސާއާ ގުޅޭ ޖާސޫސީ މައުލޫމާތު އެމެރިކާއާއި ޖަޕާނާ ހިއްސާކުރާނެ ކަމަށް ވެސް ދެކުނު ކޮރެޔާގެ ރިޔާސީ އޮފީހުން ބުންޏެވެ.

އުތުރު ކޮރެޔާއިން އަނެއްކާ ވެސް މިސައިލް ޓެސްޓެއް ހެދުމާ ގުޅިގެން ޖަޕާނުން ވެސް ވަނީ ނުރައްކަލުގެ އިންޒާރު ނެރެފަ އެވެ. އެ އެލާޓުގައި ބުނެފައި ވަނީ، "އުތުރު ކޮރެޔާއިން ބެލިސްޓިކް މިސައިލެއް ކަމަށް ޝައްކުކުރެވޭ އެއްޗެއް ފޮނުވާލާފައިވާ" ކަމަށެވެ.

މި ހާދިސާގެ މައުލޫމާތު ލިބިފައިވާ ކަމަށާއި، އެމެރިކާގެ ބައިވެރިންނާއި ގުޅިފައިވާ ގައުމުތަކާ ގާތުން މަޝްވަރާކުރަމުންދާ ކަމަށް އެމެރިކާގެ ޕެސިފިކް ކޮމާންޑުން ވެސް ވަނީ ބުނެފަ އެވެ. "މިހާރު ކުރެވިފައިވާ ވަޒަންކުރުންތަކަށް ބަލާއިރު، މިއީ އެމެރިކާގެ ރައްޔިތުންނަށް ނުވަތަ ސަރަހައްދަށް، އަދި އަޅުގަނޑުމެންގެ ބައިވެރިންނަށް ކުރިމަތިވެފައިވާ ކުއްލި ނުރައްކަލެއް ނޫން،" ޕެސިފިކް ކޮމާންޑުން ބުންޏެވެ.

އުތުރު ކޮރެޔާއިން ބެލިސްޓިކް މިސައިލް ޓެސްޓެއް ހަދާފައި މި ވަނީ، ދެކުނު ކޮރެޔާއިން ދާދިފަހުން ކޮށްފައިވާ ޑިމާންޑުތަކަށް އުތުރު ކޮރެޔާގެ ޒައީމް ކިމް ޖޮންގ އުންގެ ނުފޫޒު ގަދަ ކޮއްކޮ ކިމް ޔޯ ޖޮންގ މަލާމާތް ކޮށްފައިވާ ދަނޑިވަޅެއްގަ އެވެ. އޭނާ ދެކުނު ކޮރެޔާއަށް މަލާމާތްކޮށްފައި ވަނީ، ދެ ކޮރެޔާ ގުޅޭ ބޯޑަރު ސަރަހައްދުގައި މައިންތަކެއް ގޮވި ހާދިސާގައި މައާފަށް އެދުމަށް ސޯލްއިން ޕްޔޮންގޔެންގގެ ކިބައިން އެދުމުންނެވެ. 

ދެ ކޮރެޔާގެ ވަކިކުރާ ހަތިޔާރު ގެންގުޅުން މަނާ ސަރަހައްދުގައި މައިންތަކެއް ގޮވި ހާދިސާގައި ދެކުނު ކޮރެޔާގެ ސިފައިންގެ ތިން މީހުންނަށް އަނިޔާވި އެވެ. ގޮވާފައި ވަނީ އުތުރު ކޮރެޔާއިން ވަޅުލާފައިވާ މައިންތަކެއް ކަމަށް ސޯލްގެ އިތުރުން އެ ސަރަހައްދުގައި އެމެރިކާއިން އިސްވެ ހަރަކާތްތެރިވާ އދ. ގެ ކޮމާންޑުން ވެސް ވަނީ ބުނެފަ އެވެ. ދެ ކޮރެޔާ ވަކިކުރުމަށް ގާއިމުކޮށްފައިވާ ހަތަރު ކިލޯމީޓަރު ފުޅާ ސަރަހައްދީ ރޮނގުގައި ހަތިޔާރު ގެންގުޅުމަކީ މަނާކަމެކެވެ.

މި ހާދިސާއާ ގުޅުވައި، ސަރަހައްދީ ރޮނގު ކައިރީގައި މައިން ވަޅުލުން ފަދަ އަސްކަރީ ހަރަކާތްތައް ހުއްޓާލުމަށް ވެސް ދެކުނު ކޮރެޔާއިން ވަނީ ގޮވާލާފަ އެވެ. މި ހާދިސާއަށް މައާފަށް އެދުމަށް ދެކުނު ކޮރެޔާއިން އެެދުމުން ކިމް ޔޯ ޖޮންގ ބުނީ، ސޯލްގެ ޑިމާންޑްތަކަކީ "އިންތިހާއަށް ދަށުދަރަޖައިގެ" ކަމެއް ކަމަށާއި، އުތުރު ކޮރެޔާއިން ދެކުނު ކޮރެޔާއާ އޮންނަ ގުޅުން ދާއިމީކޮށް ކަނޑާލަން ގަސްތުކުރާ ކަމަށެވެ.

ހޮނިހިރު ދުވަހުގެ މިސައިލް ޓެސްޓަކީ ފަހުގެ ހަފްތާތަކުގައި އުތުރު ކޮރެޔާއިން ދައްކަމުންދާ އަސްކަރީ ހަރަކާތްތަކުގެ ތެރެއިން އެންމެ ފަހުގެ ހަރަކާތެވެ. މި ގޮތުން، ހައިޕަރސޮނިކް މިސައިލް ނިޒާމެއް ކަމަށް ބުނާ ނިޒާމެއް ޓެސްޓުކުރުމާއި، ލައިވް-ފަޔަރ ތަމްރީނުތަކާއި، އާ ހަނގުރާމަމަތީ މަނަވަރެއް ނެރުން މީގެ ތެރޭގައި ހިމެނެ އެވެ.