ސައުދީ އަރަބިއްޔާގެ ސްކޫލަކަށް ހޫޘީންގެ ހަމަލާއެއް، ޔަމަނު ސިފައިން ހޫޘީންނާ ދެކޮޅަށް ވަރުގަދަ އޮޕަރޭޝަންތަކެއް

ޔަމަނުގެ ހޫޘީ ޖަމާއަތުން ފޮނުވާލި މިސައިލެއް ސައުދީ އަރަބިއްޔާގެ ދެކުނުގައި އޮންނަ ނަޖްރާން ސިޓީގެ ސްކޫލަކަށް ހުކުރު ދުވަހު އަމާޒުވެ، ގެއްލުންތަކެއް ލިބިފައިވާކަމަށް، އެ ގައުމުގެ ސިވިލް ޑިފެންސްގެ ތަރުޖަމާނަކާ ހަވާލާދީ ސައުދީ ޕްރެސް އޭޖެންސީން (އެސްޕީއޭ) ރިޕޯޓުކޮށްފި އެވެ.

ހޫޘީން ފޮނުވާލި "ހަތުރުވެރި ޕްރޮޖެކްޓައިލް" ނުވަތަ މިސައިލް އެ ސަރަހައްދަށް ވެއްޓުމާއެކު ކުއްލި ހާލަތްތަކުގައި ހަރަކާތްތެރިވާ ޓީމުތަކުން އެތަނަށް ގޮސްފައިވާ ކަމަށް ސިވިލް ޑިފެންސްގެ ތަރުޖަމާނު ވިދާޅުވި އެވެ. މި މިސައިލް ނަޖްރާންގެ ސްކޫލަކަށް އަމާޒުވެ އެ ތަނުުގެ އިމާރާތަށް ގެއްލުންތައް ލިބުނު ކަމަށް އޭނާ ވިދާޅުވި އެވެ. މިއާއެކު، މި ފަދަ ހާދިސާތަކުގައި އަމަލުކުރާ އާންމު އުސޫލުތަކާ އެއްގޮތަށް ފިޔަވަޅުތައް އަޅާފައިވާނެ ކަން ވެސް އޭނާ ފާހަގަކުރެއްވި އެވެ.

Advertisement

ބައިނަލްއަގުވާމީ ގޮތުން ބަލައިގަނެފައިވާ ޔަމަނުގެ ސަރުކާރަށް ތާއީދުކުރާ ސައުދީ އަރަބިއްޔާ އިސްވެ އުފައްދާފައިވާ އަސްކަރީ އިއްތިހާދުން ބުނީ، ހޫޘީން ސައުދީ އަރަބިއްޔާގެ ދެކުނުގެ ސިޓީއެއް ކަމަށްވާ ޚަމީސް މުޝައިޠަށް އަމާޒުކޮށް ފޮނުވާލި ތިން ބެލިސްޓިކް މިސައިލެއް ވައްޓާލައި ނައްތާލާފައިވާ ކަމަށެވެ. 2014 ވަނަ އަހަރުގެ ސެޕްޓެންބަރު މަހުން ފެށިގެން ޔަމަނުގެ ވެރިރަށް ޞަންޢާއާއި އިތުރު ބައެއް ޕްރޮވިންސްތައް ހޫޘީންގެ ކޮންޓްރޯލްގެ ދަށުގައި އޮތްއިރު، 2015 ވަނަ އަހަރުގެ މާރިޗް މަހުން ފެށިގެން ސައުދީ އަރަބިއްޔާއިން ަދނީ ހޫޘީންނާ ދެކޮޅަށް ޔަމަނު ސަރުކާރަށް ތާއީދުކޮށް އަސްކަރީ އޮޕަރޭޝަނެއް ހިންގަމުންނެވެ.

މި ދަނޑިވަޅުގައި، ޔަމަނުގެ އަސްކަރިއްޔާއިން ހުކުރު ދުވަހު ބުނީ، ފާއިތުވި 24 ގަޑިއިރުގެ ތެރޭގައި ތަފާތު އެކި ފްރަންޓުތަކުގައި ހޫޘީންނަށް އަމާޒުކޮށް 474 އޮޕަރޭޝަން ހިންގާފައިވާ ކަމަށާއި، މި އޮޕަރޭޝަންތަކުގައި އެ ޖަމާއަތުގެ 1،540 މެންބަރުން މަރާލާ ނުވަތަ ޒަޚަމްކޮށްލާފައިވާ ކަމަށެވެ. އަސްކަރިއްޔާގެ ތަރުޖަމާނު މާޖިދު ޢަބްދުﷲ އަލް-ނަޒީލީ ވިދާޅުވީ، މި އޮޕަރޭޝަންތަކުގައި އަސްކަރީ މަތިންދާބޯޓާއި، ޑްރޯނާއި، އާޓިލަރީ ބަޑިއާއި، މިސައިލް އަދި ރޮކެޓް ލޯންޗަރުތައް ބޭނުންކޮށްގެން ހޫޘީންގެ މަރުކަޒުތަކަށާއި، ހަރަކާތްތަކަށާއި، އެހީތެރިވާ ފައުޖުތަކަށް އަދި އަސްކަރީ ގާބިލުކަމަށް ހަމަލާދީފައިވާ ކަމަށެވެ.

މި ގޮތުން، މި އޮޕަރޭޝަންތައް ދެކުނު ހަރަޟު އަދި އައްސޭރިފަށުން ފެށިގެން ކިތާފް، އަލް-ޖައުފް، މައުރިބް، އަލް-ބައިޟާ، ލަހްޖު، ޞަންޢާ އަދި ސަޢުދާއާ ހަމައަށް ކުރިއަށްގެންދިޔަ ކަމަށާއި، ޚާއްސަ ގޮތެއްގައި ތަޢިއްޒުއަށް އަމާޒުކުރެވުނުކަމަށް ނަޒީލީ ވިދާޅުވި އެވެ. އަދި, އަސްކަރިއްޔާއިން ނުރައްކަލުގެ މަސްދަރުތައް ކަމަށް ސިފަކުރާ ތަންތަނާއި، ހޫޘީން އެއްވެ ތިބޭ ސަރަހައްދުތަކާއި، އެހީތެރިވާ ފައުޖުތަކާއި، ކޮމާންޑް އެންޑް ކޮންޓްރޯލް ސެންޓަރުތަކުގެ އިތުރުން އަސްކަރީ އެހެނިހެން ވަސީލަތްތަކަށް ހަމަލާތައް އަމާޒުކުރި ކަމަށް އޭނާ ވިދާޅުވި އެވެ.

މަރާލެވުނު ނުވަތަ ޒަޚަމްވި 1،540 ހޫޘީ ހަނގުރާމަވެރިންގެ ތެރެއިން ގިނަ މީހުންނަކީ ތަޢިއްޒު ފްރަންޓަށް ނިސްބަތްވާ މީހުންކަމަށް ނާޒިލީ ވިދާޅުވި އެވެ. މިއާއެކު، އަސްކަރީ 216 އުޅަނދާއި އެހެނިހެން މުދާތައް ހަލާކުކޮށްލާ ނުވަތަ ގެއްލުންދީފައިވާ ކަމަށް ވެސް އޭނާ ވިދާޅުވި އެވެ. މީގެ އިތުރުން، މި އޮޕަރޭޝަންތަކުގެ ސަބަބުން ތަޢިއްޒުގައި ހޫޘީން ކުރިއަށް އެރުން ހުއްޓުވިފައިވާ ކަމަށާއި، ބިމުގެ ގޮތުން އެ ޖަމާއަތަށް އެއްވެސް ކުރިއެރުމެއް ހޯދުމަށް ހުރަސްއެޅުނު ކަން ވެސް އޭނާ ފާހަގަކުރެއްވި އެވެ.

މި ކަން ހާމަކޮށްފައި މި ވަނީ ޔަމަނުގެ އެކި ކަންކޮޅުތަކުގައި ހަނގުރާމަ އިތުރަށް ވަރުގަދަވެފައިވާ ދަނޑިވަޅެއްގަ އެވެ. ހުކުރު ދުވަހުގެ ކުރީކޮޅު، އަސްކަރިއްޔާއިން ބުނީ ތަޢިއްޒުގައި ހޫޘީންގެ ހަރަކާތްތަކާއި އެހީތެރިވާ ފައުޖުތަކަށް އަމާޒުކޮށް އަސްކަރީ މަތިންދާބޯޓުތަކުން 20 ހަމަލާއެއް ދީފައިވާ ކަމަށެވެ. މީގެ އިތުރުން، ޞަންޢާއާއި ސަޢުދާގައި ހުރި މުހިންމު އަމާޒުތަކެއް ކަމަށް ސިފަކުރާ ތަންތަނަށް ހަމަލާދީފައިވާ ކަމަށް ސަރުކާރުގެ ފައުޖުތަކުން ވެސް ވަނީ ރިޕޯޓުކޮށްފަ އެވެ.

ބުދަ ދުވަހު އަސްކަރިއްޔާއިން ބުނީ ތިން ފްރަންޓެއްގައި ހޫޘީ ހަނގުރާމަވެރިންނާއި އަސްކަރީ އާލާތްތަކަށް އަމާޒުކޮށް 468 އޮޕަރޭޝަނެއް ހިންގާފައިވާ ކަމަށާއި، މީގެ ސަބަބުން އެތައް ސަތޭކަ ހޫޘީންނަކަށް ގެއްލުންވެފައިވާ ކަމަށެވެ. އެންމެ ފަހުގެ މި ހަމަލާބަދަލުކުރުންތަކަކީ ޖުލައި މަހު ފެށުނު އަސްކަރީ ކުރިމަތިލުންތަކުގެ ބައެކެވެ.

މިއީ، 2022 ވަނަ އަހަރުގެ ހަމަލާބަދަލުކުރުން ހުއްޓާލުމުގެ އެއްބަސްވުމަށްފަހު އައި ހަމަނުޖެހުމުގެ ދުވަސްތަކަށްފަހު ފެނުނު އެންމެ ފުޅާ ދާއިރާއެއްގެ ކުރިމަތިލުންތަކެވެ. 2014 ވަނަ އަހަރު ހޫޘީން ޞަންޢާއާއި އެހެނިހެން ބައެއް ޕްރޮވިންސްތައް ހިފުމާ ގުޅިގެން ޔަމަނު ވަނީ ބޮޑު ހަމަނުޖެހުމެއްގެ ތެރެއަށް ވެއްޓިފަ އެވެ. މިކަމާ ގުޅިގެން، ބައިނަލްއަގުވާމީ ގޮތުން ބަލައިގަނެފައިވާ ސަރުކާރަށް ތާއީދުކުރުމަށް 2015 ވަނަ އަހަރު ސައުދީ އަރަބިއްޔާ އިސްކޮށް އޮވެ އިއްތިހާދަކުން ވަނީ އެ ގައުމުގެ މައްސަލައިގެ ތެރެއަށް ވަދެފަ އެވެ.