ސައުދީ އަރަބިއްޔާއާއި ގަތަރަށް އެމެރިކާގެ އިތުރު ދެ ޕޭޓްރިޔަޓް މިސައިލް ސިސްޓަމް ފޮނުވައިފި
2 އޮކްޓޯބަރު 2026 | ހުކުރު 04:06އީރާނާ ދެކޮޅަށް އަސްކަރީ ފިޔަވަޅުތަކެއް އެޅުމަށް އެމެރިކާއިން ތައްޔާރުވަމުންދާއިރު، ސައުދީ އަރަބިއްޔާއާއި ގަތަރުގެ ހަކަތައިގެ ވަސީލަތްތައް ހިމާޔަތްކުރުމަށް އެމެރިކާގެ އަސްކަރިއްޔާއިން ވަނީ އިތުރު މިސައިލް ސިސްޓަމްތަކެއް އެ ގައުމުތަކަށް ފޮނުވާފައި. މީގެ އިތުރުން، މެދުއިރުމަތީގެ މަސްރަހު ހޫނުވަމުންދާތީ އެމެރިކާގެ އަސްކަރީ މަނަވަރުތަކާއި ގިނަ އަދަދެއްގެ ސިފައިން އެ ސަރަހައްދަށް ފޮނުވުމުގެ މަސައްކަތްވެސް މިހާރު ދަނީ ކުރަމުން
އީރާނާ ދެކޮޅަށް ކުރަމުންދާ ހަނގުރާމައިގެ ދިފާއީ ގޮތުން ބޭނުންކުރާ ޕޭޓްރިޔަޓް މިސައިލް ސިސްޓަމެއް ކައިރީގައި އެމެރިކާ ސިފައިންގެ ދެ މީހުން ހަރަކާތްތެރި ވަނީ | އަނަދޮލު އޭޖެންސީ
އީރާނާ ދެކޮޅަށް އެމެރިކާއިން އަލުން އަސްކަރީ އޮޕަރޭޝަންތަކެއް ފެށުމަށް ތައްޔާރުވަމުންދާ ކަމަށް ބެލެވިފައިވާ ދަނޑިވަޅެއްގައި، ސައުދީ އަރަބިއްޔާއާއި ގަތަރުގެ ހަކަތައިގެ ވަސީލަތްތައް ހިމާޔަތްކުރުމަށް އެމެރިކާގެ އަސްކަރިއްޔާއިން އިތުރު ދެ ޕޭޓްރިޔަޓް މިސައިލް ސިސްޓަމް ފޮނުވައިފި އެވެ. އެމެރިކާގެ ދެ އޮފިޝަލަކާއި ސަރަހައްދީ މަސްދަރަކާ ހަވާލާދީ، މި ކަން އެންމެ ފުރަތަމަ ރިޕޯޓުކޮށްފައި ވަނީ އެމެރިކާގެ ނޫހެއް ކަމަށްވާ އެކްސިއޮސްއިންނެވެ. އެ ނޫހުގެ ރިޕޯޓުގައިވާ ގޮތުން ތެލުގެ މުހިންމު މަރުކަޒެއް ހިމާޔަތްކުރުމަށް މިދިޔަ މަހު ސައުދީ އަރަބިއްޔާއަށް އެއް ސިސްޓަމް ފޮނުވާފައިވެ އެވެ. އަދި, ގުދުރަތީ ގޭހުގެ މަރުކަޒެއް ދިފާއުކުރުމަށް އަނެއް ސިސްޓަމް ގަތަރަށް ފޮނުވާފައިވާ ކަމަށް ވެސް ރިޕޯޓުގައި ބުނެފައިވެ އެވެ.
މި ހަތިޔާރުތައް ފޮނުވުމުގެ މައިގަނޑު މަގުސަދަކީ، އީރާނާ ދެކޮޅަށް އެމެރިކާގެ ރައީސް ޑޮނަލްޑް ޓްރަމްޕް ބޮޑެތި އަސްކަރީ އޮޕަރޭޝަންތަކެއް އަލުން ފަށްޓަވައިފިނަމަ، އެ ދެ ގައުމުގެ ހަކަތައިގެ މުހިންމު އުމްރާނީ ވަސީލަތްތައް ވޮޝިންގޓަނުން ހިމާޔަތްކުރާނެކަމުގެ ޔަގީންކަން ދިނުން ކަމަށް މަސްދަރުތަކުން ބުނެފައިވެ އެވެ. ކުރިއަށް އޮތް ހަފުތާތަކުގެ ތެރޭގައި އަލުން ބޮމުގެ ހަމަލާތަކެއް ދިނުމަށް ވިސްނަވަމުން ގެންދަވާ ކަމަށް ބުރާސްފަތި ދުވަހު ޓްރަމްޕް ވަނީ ވިދާޅުވެފަ އެވެ. "މިހާރު އަޅުގަނޑު މި ވަނީ ގޮތެއް ނިންމަން ޖެހިފައި: އެއްގޮތަކީ އީރާނުން އެއްބަސްވުމުގައި ސޮއިކުރުން، ނޫންނަމަ އެ ގައުމު ދެން ވުޖޫދުގައި ނޯންނާނެ،" އޭނާ ވިދާޅުވި އެވެ.
އީރާނުގެ ހަކަތައިގެ ވަސީލަތްތަކަށް އަމާޒުކޮށް ބޮޑު ހަމަލާއެއް ނުދިނުމަށް އޮގަސްޓް މަހުގެ ކުރީކޮޅު ސައުދީ އަރަބިއްޔާއާއި ގަތަރުގެ އިސްވާރުން ޓްރަމްޕްގެ އަރިހުން އެދިވަޑައިގެންނެވި ކަމަށް އެކްސިއޮސްއިން ރިޕޯޓުކުރި އެވެ. މި ގޮތުން، އޭގެ ބަދަލުހިފުމުގެ ގޮތުން އެ ދެ ގައުމުގެ ތެލާއި ގޭހުގެ ވަސީލަތްތަކަށް ހަމަލާއެއް އަތުވެދާނެކަމުގެ ބިރު އޮތްކަން އެ ފަރާތްތަކުން ފާހަގަކުރި އެވެ. އަސްކަރީ ހަމަލާއެއްގެ ބަދަލުގައި އީރާނަށް އިގްތިސާދީ ފިއްތުންތައް ކުރިމަތިކުރުމަށް ޓްރަމްޕް ނިންމެވި މައިގަނޑު ސަބަބަކީ އެ ގައުމުތަކުގެ އެދުންތައް ކަމަށް އެމެރިކާގެ އޮފިޝަލުން ވިދާޅުވި އެވެ.
އަލުން ބޮޑު އަސްކަރީ އޮޕަރޭޝަންތަކެއް ފެށުމަށް ސައުދީ އަރަބިއްޔާގެ ވައިގެ ސަރަހައްދު ބޭނުންކުރުމުގެ ހުއްދަ ވޮޝިންގޓަނަށް ބޭނުންވާނެ ކަމަށް މަސްދަރުތަކުން ބުންޏެވެ. ނަމަވެސް، ތެލުގެ މަރުކަޒުތައް ހިމާޔަތްކޮށްދޭނެކަމުގެ ޔަގީންކަން ނުލިބެނީސް ރިޔާޟުން އެ ކަމަށް އެއްބަސްވުމަކީ ނާދިރު ކަމެއް ކަމަށް މާހިރުން ދެކެ އެވެ. މި ކަމާ ގުޅޭގޮތުން އެމެރިކާގެ ސެންޓްރަލް ކޮމާންޑުގެ ތަރުޖަމާނު ކެޕްޓަން ޓިމް ހޯކިންސް ވަކި އެއްޗެއް ވިދާޅުވާން ވަނީ ދެކޮޅުހައްދަވާފަ އެވެ.
އެމެރިކާއިން މި ދަނޑިވަޅުގައި، މެދުއިރުމައްޗަށް އިތުރު މަނަވަރުތަކާއި، އަސްކަރީ މަތިންދާބޯޓުގެ އިތުރުން ސިފައިން ފޮނުވަމުންދާ ކަމަށް އެކްސިއޮސްއިން ރިޕޯޓުކޮށްފައިވެ އެވެ. މި ގޮތުން، އަސްކަރީ މަތިންދާބޯޓު އުފުލާ މަނަވަރު، ޔޫއެސްއެސް ތިއޮޑޯ ރޫސެވެލްޓްއާއި އޭގެ ސްޓްރައިކް ގްރޫޕް އާދީއްތަ ދުވަހު ސެން ޑިއޭގޯއިން ފުރާފައިވާ ކަމަށާއި، ނޮވެންބަރު މަހުގެ މެދުތެރޭގައި އެ ސަރަހައްދަށް ފޯރާނެކަމަށް ލަފާކުރެވޭ ކަމަށް އެމެރިކާގެ އޮފިޝަލަކު ވަނީ ވިދާޅުވެފަ އެވެ.
އެ މަނަވަރު ފޮނުވަނީ މިހާރު އެ ސަރަހައްދުގައި އޮތް މަނަވަރެއްގެ ބަދަލުގައި ކަމެއް ނުވަތަ އެމެރިކާގެ ކެރިއާ ސްޓްރައިކް ގްރޫޕްތަކުގެ އަދަދު ތިނަކަށް އިތުރުކުރުމަށް ކަމެއް ސާފުނޫން ކަމަށް މަސްދަރުތަކުން ބުންޏެވެ. 13 ވަނަ މެރިން އެކްސްޕެޑިޝަނަރީ ޔުނިޓުގެ އެތައް ހާސް ސިފައިންނާއެކު 'މާކިން އައިލެންޑް އެމްފިބިއަސް ރެޑީ ގްރޫޕް' ވެސް ހޯމަ ދުވަހު އެ ސަރަހައްދަށް ފުރާފައިވާ ކަމަށް ރިޕޯޓުތައް ބުނެ އެވެ. އަދި, ނޮވެންބަރު މަހުގެ ނިޔަލަށް އެ ގްރޫޕް އެ ސަރަހައްދަށް ފޯރާނެ ކަމަށް ބެލެވޭ ކަމަށް މަސްދަރުތަކުން ބުނެ އެވެ.
މަސްދަރު: އަނަދޮލު އޭޖެންސީ
