ހަމަނުޖެހުމަކާ ގުޅިގެން ކުއްލި ހާލަތުގައި ފްލައިދުބާއީގެ ބޯޓެއް ސައޫދީ އަރަބިއްޔާއަށް ޖެއްސި ހާދިސާ ތަހުގީގުކުރަނީ

ސައޫދީ އަރަބިއްޔާގެ ހުޅަނގު އުތުރުގެ ސިޓީއެއް ކަމަށްވާ ތަބޫކްގެ އަމީރު ސުލްތާން ބިން އަބްދުލްއަޒީޒް އިންޓަނޭޝަނަލް އެއާޕޯޓަށް ފްލައިދުބާއީގެ މަތިންދާބޯޓެއް ކުއްލި ހާލަތުގައި ޖެއްސި މައްސަލައިގެ ތަހުގީގެއް ފަށާފައިވާ ކަމަށް، އެ ގައުމުގެ ނޭޝަނަލް ޓްރާންސްޕޯޓް ސޭފްޓީ ސެންޓަރުން (އެންޓީއެސްސީ) ބުދަ ދުވަހު ހާމަކޮށްފި އެވެ. އެ ސެންޓަރުން ބުނީ، ބުދަ ދުވަހު އެ އެއާޕޯޓަށް ކުއްލި ހާލަތުގައި ޖެއްސި ފްލައިދުބާއީގެ ފްލައިޓް އެފްޒެޑް1073އާ ގުޅޭ ރިޕޯޓެއް އެ އިދާރާއަށް ލިބިފައިވާ ކަމަށެވެ. ދުބާއީން ފުރައިގެން އިސްރާއީލްގެ ތެލް އަވީވަށް ދަތުރުކުރަމުން ދިޔަ މި ބޯޓުގެ މިސްރާބު، ސައޫދީ އަރަބިއްޔާއަށް ބަދަލުކޮށްފައި ވަނީ ކުއްލި ހާލަތެއް މެދުވެރިވެގެންނެވެ.

ވައިގެ ދަތުރުފަތުރުގެ ރައްކާތެރިކަން ބަލައި ތަހުގީގުކުރާ ޚާއްސަ ޓީމަކުން މިހާރު ވަނީ މި ހާދިސާ ތަހުގީގުކުރުމުގެއަމަލީ މަސައްކަތް ފަށާފަ އެވެ. މި ހާދިސާ ހިނގަން މެދުވެރިވި ހާލަތްތައް ދެނެގަތުމަށާއި، ވައިގެ ދަތުރުފަތުރުގެ ރައްކާތެރިކަމާ ގުޅޭ ކަންކަން ކަށަވަރުކުރުމުގެ އިތުރުން މައުލޫމާތާއި ހެކި އެއްކުރުމަށް ކަމާބެހޭ އިދާރާތަކާ ގުޅިގެން މަސައްކަތް ކުރަމުންދާ ކަމަށް އެ އިދާރާއިން ބުންޏެވެ.

Advertisement

މި ހާދިސާއާ ގުޅިގެން ފްލައިދުބާއީން ބުނީ، ބޯޓުގެ ކޮކްޕިޓް ތެރޭގައި "ހަމަނުޖެހުމެއް ހިނގި" ކަމަށާއި، ރައްކާތެރިކަމާއެކު ސައުދީ އަރަބިއްޔާއަށް ބޯޓުގެ މިސްރާބު ބަދަލުކޮށްފައި ވަނީ ފަޅުވެރިން ކަމަށެވެ. ބޯޓުން ދަތުރުކުރި ހުރިހާ ފަސިންޖަރުންނާއި ފަޅުވެރިންގެ ހާލު ރަނގަޅު ކަމަށާއި އެ އެންމެން ވެސް ތިބީ ސަލާމަތުން ކަމަށް، ދުބާއީއަށް ނިސްބަތްވާ އެ އެއާލައިނުން ކަށަވަރުކޮށްދެ އެވެ. އަދި, މި ހަމަނުޖެހުން ހިނގަން މެދުވެރިވި ސަބަބުތައް ރަސްމީ ތަހުގީގެއްގެ ތެރެއިން ބަލަމުންދާ ކަމަށް އެ އެއާލައިނުން ބުންޏެވެ.

އަމީރު ސުލްތާން ބިން އަބްދުލްއަޒީޒް އިންޓަނޭޝަނަލް އެއާޕޯޓުގެ އެއާ ޓްރެފިކް ކޮންޓްރޯލް ސެންޓަރަށް ފްލައިޓް އެފްޒެޑް1073 އިން ކުއްލި ހާލަތުގައި ޖެއްސުމަށް އެދި ޑިސްޓްރެސް ކޯލެއް ލިބުނީ، ސައުދީ ގަޑިން ހެނދުނު 8:44 ގައި ކަމަށް އެ އެއާޕޯޓުން ބުންޏެވެ. މި ހާދިސާގައި ބޯޓުގެ ކެޕްޓަނަށާއި ފަސްޓް އޮފިސަރަށް އަނިޔާވެފައިވާ ކަމަށާއި، ފަރުވާ ދިނުމަށް ޓަކައި އެ ދެ މީހުން ހަސްފަތާލަށް ބަދަލުކޮށްފައިވާ ކަމަށް ވެސް އެ އެއާޕޯޓުން ބުންޏެވެ. ރިޕޯޓުތައް ބުނާ ގޮތުން، މި ހާދިސާ ހިނގާފައި ވަނީ ޕައިލެޓާއި ފަސްޓް އޮފިސަރާ ދެމެދު ހިނގި ހަމަނުޖެހުމެއްގެ ސަބަބުންނެވެ.

ޖުމްލަ 174 ފަސިންޖަރުންނާއެކު ދަތުރުކުރި މި ފްލައިޓުން، ބައިނަލްއަގުވާމީ ކުއްލި ހާލަތުގެ ކޯޑު '7700' އަދި އޭގެ ފަހުން '7500' ފޮނުވި ކަމަށް ރިޕޯޓްތައް ބުނެ އެވެ. މިއީ، މަތިންދާބޯޓު ހައިޖެކްކުރުން ހިމެނޭހެން، ގާނޫނާ ޚިލާފަށް ބޯޓަށް ނުފޫޒު ފޯރުވުމުގެ އަމަލުތައް ހިނގާކަން އަންގައިދޭން ބޭނުންކުރާ ކޯޑެކެވެ. މި މަތިންދާބޯޓުގައި ދަތުރުކުރި ފަސިންޖަރުން، ފްލައިދުބާއީގެ އެހެން ބޯޓެއްގައި މިހާރު ތެލް އަވީވަށް ފުރުވާލާފައިވާ ކަމަށް އެ އެއާޕޯޓުން ބުންޏެވެ.