ފްލައިދުބާއީއިން އިސްރާއީލަށް ކުރާ ދަތުރުތައް މެދުކަނޑާލައިފި
1 އޮކްޓޯބަރު 2026 | ބުރާސްފަތި 06:52ދުބާއީން ފުރައިގެން އިސްރާއީލަށް ދަތުރުކުރި ފްލައިދުބާއީގެ ބޯޓެއްގެ ކޮކްޕިޓްގައި ހިނގި ހަމަނުޖެހުމަކާ ގުޅިގެން، އެ އެއާލައިނުން އިސްރާއީލަށް ކުރާ ދަތުރުތައް ވަގުތީ ގޮތުން މެދުކަނޑާލައިފި. މި ހާދިސާއާ ގުޅިގެން ބޯޓު ސައޫދީ އަރަބިއްޔާއަށް ކުއްލި ގޮތަކަށް ޖައްސާފައިވާއިރު، ކަމާބެހޭ ފަރާތްތަކުން ދަނީ މިކަން އިތުރަށް ތަހުގީގު ކުރަމުން
ފްލައިދުބާއީގެ މަތިންދާބޯޓެއް އެއާޕޯޓެއްގައި ޖެއްސުމަށް ތިރިކުރަމުންދާ މަންޒަރު | އަނަދޮލު އޭޖެންސީ
ދުބާއީގެ ބަޖެޓް އެއަރލައިން، ފްލައިދުބާއީއިން ދުބާއީއާއި އިސްރާއީލުގެ ތެލް އަވީވާ ދެމެދު ކުރާ ދަތުރުތައް ވަގުތީ ގޮތުން މެދުކަނޑާލައިފި އެވެ. އެ އެއާލައިނުން މި ގޮތަށް އަމަލުކުރަން ނިންމާފައި ވަނީ، ދުބާއީއިން ފުރައިގެން ތެލް އަވީވްއަށް ދަތުރުކުރި އެ އެއާލައިންގެ އެފްޒެޑް1073 ފްލައިޓުގައި ހިނގި ހާދިސާއާކާ ގުޅިގެންނެވެ.
"ސެޕްޓެންބަރު 30 ވަނަ ދުވަހު ފްލައިޓް އެފްޒެޑް1073 އަށް ދިމާވި ހާދިސާއާ ގުޅިގެން، އަދި ކަމާބެހޭ ފަރާތްތަކާ ގުޅިގެން، ތަހުގީގު ކުރިއަށްދާ ވަގުތު ފްލައިދުބާއީއިން އިސްރާއީލަށް ކުރާ އަދި އެ ގައުމުން ކުރާ ދަތުރުތައް ވަނީ މެދުކަނޑާލެވިފައި،" ފްލައިދުބާއީއިން ނެރުނު ބަޔާނެއްގައި ބުނެފައި ވެއެވެ.
މި ވަގުތީ މެދުކަނޑާލުމުގެ ސަބަބުން ކަމާބެހޭ ފަރާތްތަކަށް ތަހުގީގު ކުރިއަށް ގެންދިއުމަށާއި، އަދި "މި ހާދިސާއާ ގުޅޭ ހުރިހާ ހަގީގަތްތަކެއް ހޯދުމަށް" ފުރުސަތު ލިބިގެންދާނެ ކަމަށް އެ އެއާލައިނުން ބުންޏެވެ. "އަޅުގަނޑުމެންގެ ފަސިންޖަރުންނާއި، ފަޅުވެރިން އަދި އޮޕަރޭޝަންތަކުގެ ސަލާމަތާއި ރައްކާތެރިކަމަކީ އަޅުގަނޑުމެން އެންމެ އިސްކަންދޭ ކަންތައް،" އެ އެއާލައިނުން ބަޔާންކުރި އެވެ.
ސައުދީ އަރަބިއްޔާގެ ސަރުކާރުގެ ކަމާބެހޭ ފަރާތްތަކާއި، ރެގިއުލޭޓަރުން އަދި އެއާޕޯޓުގެ ސްޓޭކްހޯލްޑަރުންނާ ވަރަށް ގާތުން ގުޅިގެން މަސައްކަތްކުރަމުންދާ ކަމަށާއި، އިތުރު މައުލޫމާތު ލިބެމުންދާ ވަރަކަށް މި ކަމާމެދު ގޮތެއް ނިންމާނެ ކަމަށް ފްލައިދުބާއީއިން ބުންޏެވެ. ދަތުރުތަކަށް ބުރޫއެރި ފަސިންޖަރުންގެ ކިބައިން މައާފަށް އެދެމުން، ވެވެން އޮތް މިންވަރަކުން އެހީތެރިކަން ފޯރުކޮށްދީ ބަދަލުގައި ދަތުރުކުރެވޭނެ އެހެން އިންތިޒާމުތައް ހަމަޖެއްސުމަށް މަސައްކަތް ކުރަމުންދާނެ ކަމަށް ވެސް އެ އެއާލައިނުން ބުންޏެވެ.
ކޮކްޕިޓްގައި ހިނގި ހަމަނުޖެހުން
ދުބާއީއިން ފުރައިގެން ތެލް އަވީވްއަށް 174 ފަސިންޖަރުންނާއެކު ދަތުރުކުރި ފްލައިޓް ބުދަ ދުވަހުގެ ކުރީކޮޅު ވަނީ، ކޮކްޕިޓްގައި ހިނގި ހަމަނުޖެހުމަކާ ގުޅިގެން ސައޫދީ އަރަބިއްޔާގެ ހުޅަނގުއުތުރުގެ ރަށެއް ކަމަށްވާ ތަބޫކްގައި އޮންނަ އަމީރު ސުލްތާން ބިން ޢަބްދުލްޢަޒީޒް އިންޓަނޭޝަނަލް އެއާޕޯޓަށް ކުއްލި ހާލަތުގައި ޖައްސާފަ އެވެ.
"ފްލައިޓް ޑެކްގައި ހަމަނުޖެހުމެއް ހިނގާފައިވާ" ކަމަށް ފްލައިދުބާއީއިން ކުރިން ބުނެފައިވާއިރު، ބޯޓުގައި ތިބި ފަޅުވެރިން ބޯޓުގެ ސަލާމަތްތެރިކަން ކަށަވަރުކޮށް، ރައްކާތެރިކަމާއެކު ސައުދީ އަރަބިއްޔާއަށް ބޯޓު އަނބުރާލާފައިވާ ކަމަށް ވެސް އެ އެއާލައިނުން ބުނެފައިވެ އެވެ.
މި ހާދިސާއާ ގުޅިގެން ފްލައިޓުގެ ކެޕްޓަނާއި ފަސްޓް އޮފިސަރަށް އަނިޔާވެ ހަސްފަތާލަށް ގެންގޮސްފައިވާ ކަމަށް އެއާޕޯޓުގެ އޮފިޝަލުން ބުނެފައިވެ އެވެ. އަދި, ހުރިހާ ފަސިންޖަރުންނާއި ފަޅުވެރިން ތިބީ ސަލާމަތުން ކަމަށާއި އެންމެންގެ ހާލަތު ވެސް ބަލާފައިވާ ކަމަށް ރިޕޯޓުކޮށްފައިވެ އެވެ.
ސައުދީ އަރަބިއްޔާގެ ސޭފްޓީ އިންވެސްޓިގޭޝަން ޓީމުން މި ހާދިސާއާ ގުޅޭ ތަހުގީގުގެ މަސައްކަތް ފަށާފައިވާ ކަމަށާއި، ހާދިސާ ހިނގަން މެދުވެރިވި ސަބަބުތައް ދެނެގަތުމަށާއި، އޭވިއޭޝަން ސޭފްޓީއާ ގުޅޭ ކަންކަން ބެލުމަށާއި، ގުޅުންހުރި މައުލޫމާތާއި ހެކި އެއްކުރުމަށް ކަމާބެހޭ ފަރާތްތަކާ ގުޅިގެން މަސައްކަތް ކުރަމުންދާ ކަމަށް އެ ގައުމުގެ ނޭޝަނަލް ޓްރާންސްޕޯޓް ސޭފްޓީ ސެންޓަރުން ވަނީ ހާމަކޮށްފަ އެވެ.
މަސްދަރު: އަނަދޮލު އޭޖެންސީ
