ފަލަސްތީނުގެ ބިންތައް ފޭރުމާއި އިސްރާއީލުގެ އާބާދީ ފުޅާކުރުމާ ދެކޮޅަށް އެމެރިކާގެ ހައުސްއަށް ބިލެއް ހުށަހަޅަނީ
1 އޮކްޓޯބަރު 2026 | ބުރާސްފަތި 07:47ފަލަސްތީނުގެ ބިންތަކުގައި އިސްރާއީލުން ހިންގާ އާބާދީތައް ފުޅާކުރުން ހުއްޓުވުމަށް ޓަކައި، އެ ކަމުގައި ބައިވެރިވާ ފަރާތްތަކާ ދެކޮޅަށް ދަތިކުރުމުގެ ފިޔަވަޅު އެޅުމަށް އެމެރިކާގެ ހައުސްގެ ޑިމޮކްރެޓިކް މެންބަރުން ގޮވާލައްވައިފި. މި ބިލުގެ މަގުސަދަކީ ފަލަސްތީނުގެ ރައްޔިތުންގެ ބިންތައް ފޭރުން ހުއްޓުވައި، ސުލްހަވެރި ސިޔާސީ ހައްލަކަށް މަގުފަހިކުރުން ކަމަށް ބިލު ހުށަހެޅުއްވި މެންބަރުން ވިދާޅުވި
ހުޅަނގު އައްސޭރިއަށް އިސްރާއީލު ސިފައިން ވަދެ، ފަލަސްތީނުގެ ރައްޔިތަކު ހައްޔަރުކުރަނީ | ގުދުސް ނިއުސް ނެޓްވޯކް
އިސްރާއީލުން އިސްތިއުމާރު ކޮށްފައިވާ ފަލަސްތީނުގެ ހުޅަނގު އައްސޭރިއާއި ޣައްޒާގައި އިސްރާއީލްގެ އާބާދީތަކާއި ޕޯސްޓުތައް ބިނާކޮށް، ފުޅާކުރުމުގައި ބައިވެރިވާ ފަރުދުންނާއި ޖަމާއަތްތަކާ ދެކޮޅަށް ދަތިކުރުމުގެ ފިޔަވަޅު އެޅުމަށް ގޮވާލާ ބިލެއް، އެމެރިކާގެ ގާނޫނު ހަދާ މަޖިލީހުގެ ތިރީގޭގެ ހަ ޑިމޮކްރެޓިކް މެންބަރަކު ބުރާސްފަތި ދުވަހު ހުށަހެޅުމަށް ތައްޔާރުވެއްޖެ އެވެ.
'ސްޓޮޕް ދި ސެޓްލްމަންޓްސް އެކްޓް' ގެ ނަމުގައި ހުށަހަޅާ މި ބިލު ސްޕޮންސަރ ކުރައްވަނީ ހައުސް އޮފް ރެޕްރެޒެންޓެޓިވްސްގެ މެންބަރުން ކަމަށްވާ ހުއަކީން ކާސްޓްރޯ، މެޑެލިން ޑީން، ޑޮން ބޭޔާ، ގްރެގް ކަސާރް، ސާރާ ޖޭކަބްސް އަދި ވެރޯނިކާ އެސްކޮބާ އެވެ. މި ބިލުގެ މަގުސަދަކީ، އަމާޒުކުރެވިފައިވާ ދަތިކުރުމުގެ ފިޔަވަޅުތަކާއި، އާބާދީތަކާއި ޕޯސްޓުތަކުގައި އުފައްދާ މުދާ އެތެރެކުރުން މަނާކުރުމުގެ ތެރެއިން، އާ އާބާދީތައް ބިނާކުރުމާއި މިހާރު ހުރި އިސްރާއީލްގެ އާބާދީތަކާއި ޕޯސްޓުތައް ފުޅާކުރުން ހުއްޓުވުމެވެ.
މި ބިލަށް ތާއީދުކުރާ ފަރާތްތަކުން ބުނީ، މި ހުށަހެޅުންތަކުގެ ބޭނުމަކީ ފަލަސްތީންގެ ރައްޔިތުން އިތުރަށް މަގުމަތިވުން ހުއްޓުވުމާއި، އިސްރާއީލް އަދި ފަލަސްތީންގެ ރައްޔިތުންނަށް އަމިއްލަ އިޚުތިޔާރުގެ ހައްގު ލިބިދޭނެ ސިޔާސީ ހައްލަކަށް މަގުފަހިކުރުން ކަމަށެވެ.
މި ބިލު ސްޕޮންސަރ ކުރެއްވި އެއް މެންބަރު ކަމަށްވާ ކާސްޓްރޯ ވަނީ، އިސްރާއީލްގެ ސަރުކާރަށާއި ހުޅަނގު އައްސޭރީގައި އާބާދީތައް ހެދުމުގެ ހަރަކާތްތަކަށް ވަރަށް ބޮޑަށް ފާޑުވިދާޅުވެފަ އެވެ. "[އިސްރާއީލްގެ ބޮޑުވަޒީރު ބެންޖަމިން] ނަތަންޔާހޫގެ ސަރުކާރުގެ ދަށުން، އާބާދީތަކުގައި ދިރިއުޅޭ މީހުން ދަނީ ފަލަސްތީންގެ ރައްޔިތުންގެ ބިންތައް ނިގުޅައިގަނެ، އަނިޔާވެރިކަމާއެކު ބިންތައް ފޭރުމުގެ އަމަލުތަކެއް ހިންގަމުން،" އޭނާ ވިދާޅުވި އެވެ.
އިސްރާއީލްގެ އާބާދީތައް މެދުކެނޑުމެއްނެތި ފުޅާކުރަމުން ދިއުމަކީ ސުލްހައަށް އޮތް ވަރަށް ބޮޑު ހުރަހެއް ކަމަށް އޭނާ ސިފަކުރެއްވި އެވެ. އަދި، އާބާދީތައް ބިނާކުރުމުގެ މައްސަލަ ހައްލުކުރުމަށް، ކޮންގްރެސްއިން ދަތިކުރުމުގެ ފިޔަވަޅުތައް ހަތިޔާރެއްގެ ގޮތުގައި ބޭނުންކުރުމަށް އޭނާ ގޮވާލެއްވި އެވެ.
"ޑިމޮކްރެޓުން މި ކަމާ ކުރިމަތިލާންޖެހޭނީ ވަރަށް އަވަސް މައްސަލައެއްގެ ގޮތުގައި،" ކާސްޓްރޯ ވިދާޅުވި އެވެ. "މިހާރުންމިހާރަށް ފިޔަވަޅު އަޅާ... ނޫންނަމަ ޖެހޭނީ ފަލަސްތީންގެ ރައްޔިތުންނަށް އަމިއްލަ އިޚުތިޔާރުގެ ހައްގު ލިބުމުގެ ފުރުސަތު އަބަދަށް ޓަކައި ގެއްލިގެންދާ މަންޒަރު ބަލަން ތިބެން."
މަސްދަރު: އަނަދޮލު އޭޖެންސީ
