ޖޫން 4 ގެ ނިޔަލަށް ދައުލަތުގެ ބަޖެޓުން 110.6 މިލިއަން ރުފިޔާގެ ޑެފިސިޓެއް

މި އަހަރުގެ ޖޫން މަހުގެ 4 ވަނަ ދުވަހުގެ ނިޔަލަށް ދައުލަތަށް އާމްދަނީ އާއި ހިލޭ އެހީގެ ގޮތުގައި 19,089.3 މިލިއަން ރުފިޔާ ލިބިފައިވާ ކަމަށް މިނިސްޓްރީ އޮފް ފައިނޭންސް އެންޑް ޕަބްލިކް އެންޓަޕްރައިޒަސް އިން އާންމުކޮށްފައިވާ ހަފުތާގެ މާލީ ތަފާސްހިސާބުތަކުން ދައްކައިފި އެވެ.

މި މުއްދަތުގައި ދައުލަތުގެ ޖުމްލަ ޚަރަދު ހުރީ 19,199.8 މިލިއަން ރުފިޔާގަ އެވެ. މިއާއެކު ދައުލަތުގެ ބަޖެޓުން މިހާތަނަށް 110.6 މިލިއަން ރުފިޔާގެ ޑެފިސިޓެއް ނުވަތަ ދަރަނި ހުރިކަން ފާހަގަކުރެވެ އެވެ. މިދިޔަ އަހަރުގެ މި މުއްދަތާ އަޅާބަލާއިރު، މިއަހަރު ލިބުނު އާމްދަނީ އާއި ކުރި ޚަރަދު ވެސް ވަނީ އިތުރުވެފަ އެވެ.

ދައުލަތަށް ލިބުނު އާމްދަނީގެ ތަފްސީލަށް ބަލާއިރު، އެންމެ ބޮޑު ބައެއް ހިއްސާކުރަނީ ޓެކްސްގެ ގޮތުގައި ލިބުނު އާމްދަނީ އެވެ. އެގޮތުން ޓެކްސް އާމްދަނީގެ ގޮތުގައި 14,842.9 މިލިއަން ރުފިޔާ ލިބިފައިވާއިރު، މީގެ ތެރެއިން އެންމެ ބޮޑު އާމްދަނީއެއް ލިބިފައިވަނީ މުދަލާއި ޚިދުމަތުގެ އަގުން ނަގާ ޓެކްސް ނުވަތަ ޖީއެސްޓީންނެވެ. ޖީއެސްޓީގެ ގޮތުގައި 8,552.4 މިލިއަން ރުފިޔާ ލިބިފައިވާއިރު، އޭގެ ތެރޭގައި ޓޫރިޒަމް ދާއިރާގެ ޖީއެސްޓީގެ ގޮތުގައި ލިބުނު 6,018.5 މިލިއަން ރުފިޔާ ހިމެނެ އެވެ. މީގެ އިތުރުން ޓެކްސް ނޫން އާމްދަނީގެ ގޮތުގައި 3,851.9 މިލިއަން ރުފިޔާ އަދި ހިލޭ އެހީގެ ގޮތުގައި 393.6 މިލިއަން ރުފިޔާ ވަނީ ލިބިފަ އެވެ.

ޚަރަދުތަކުގެ ތަފްސީލަށް ބަލާއިރު، ދައުލަތުގެ ހިންގުމުގެ ޚަރަދު ނުވަތަ ރިކަރަންޓް ޚަރަދުގެ ގޮތުގައި 16,874.1 މިލިއަން ރުފިޔާ ވަނީ ހޭދަކޮށްފަ އެވެ. މީގެ ތެރެއިން އެންމެ ބޮޑު ހޭދައެއް ކޮށްފައިވަނީ މުވައްޒަފުންގެ މުސާރަ އާއި އިނާޔަތްތަކަށެވެ. އެގޮތުން މުސާރަ އާއި ޕެންޝަނަށް 6,616.9 މިލިއަން ރުފިޔާ ހޭދަކޮށްފައިވާއިރު، އިދާރީ އަދި ހިންގުމުގެ ޚަރަދުތަކަށް 10,188.3 މިލިއަން ރުފިޔާ ވަނީ ހޭދަކޮށްފަ އެވެ. މީގެ ތެރޭގައި ސަބްސިޑީއަށް ހޭދަކުރި 2,300.5 މިލިއަން ރުފިޔާ އާއި އާސަންދައަށް ހޭދަކުރި 971.3 މިލިއަން ރުފިޔާ ހިމެނެ އެވެ.

ތަރައްގީގެ މަޝްރޫއުތަކަށް ކުރާ ކެޕިޓަލް ޚަރަދުގެ ގޮތުގައި ޖޫން 4 ގެ ނިޔަލަށް 2,325.7 މިލިއަން ރުފިޔާ ވަނީ ހޭދަކޮށްފަ އެވެ. މީގެ ތެރެއިން ބިނާވެށި ތަރައްގީކުރުމުގެ މަޝްރޫއުތަކަށް 1,329.6 މިލިއަން ރުފިޔާ ހޭދަކޮށްފައިވެ އެވެ. މި މުއްދަތުގައި ޕަބްލިކް ސެކްޓަރ އިންވެސްޓްމަންޓް ޕްރޮގްރާމް ނުވަތަ ޕީއެސްއައިޕީ މަޝްރޫއުތަކަށް ޖުމްލަ 2,310.4 މިލިއަން ރުފިޔާ ވަނީ ހޭދަކޮށްފަ އެވެ. ޕީއެސްއައިޕީގެ ދަށުން އެންމެ ބޮޑު ހޭދައެއް ކޮށްފައިވަނީ ދަތުރުފަތުރުގެ ނިޒާމު ގާއިމުކުރުމަށާއި ބިން ހިއްކުމާއި ބޯހިޔާވަހިކަމުގެ މަޝްރޫއުތަކަށެވެ.

އޮފީސްތަކުގެ ބަޖެޓް ބޭނުންކޮށްފައިވާ މިންވަރަށް ބަލާއިރު، އެންމެ ބޮޑު ބަޖެޓެއް ހޭދަކޮށްފައިވަނީ މިނިސްޓްރީ އޮފް އެޑިއުކޭޝަން، ހަޔަރ އެޑިއުކޭޝަން އެންޑް ސްކިލްސް ޑިވެލޮޕްމަންޓުންނެވެ. އެ މިނިސްޓްރީން 1,985.7 މިލިއަން ރުފިޔާ ބޭނުންކޮށްފައިވެ އެވެ. ދެން އެންމެ ބޮޑު ހޭދައެއް ކޮށްފައިވަނީ މިނިސްޓްރީ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓުންނެވެ. އެއީ 1,661.4 މިލިއަން ރުފިޔާ އެވެ. މީގެ އިތުރުން ނޭޝަނަލް ސޯޝަލް ޕްރޮޓެކްޝަން އެޖެންސީން 1,516.2 މިލިއަން ރުފިޔާ އަދި ދިވެހި ފުލުހުންގެ ޚިދުމަތުން 1,097.4 މިލިއަން ރުފިޔާ ވަނީ ބޭނުންކޮށްފަ އެވެ.

ދައުލަތުގެ ދަރަނީގެ ހާލަތަށް ބަލާއިރު، ޖޫން މަހުގެ 1 ވަނަ ދުވަހުގެ ނިޔަލަށް ދައުލަތުން ދޫކޮށްފައިވާ ސެކިއުރިޓީޒްގެ ޖުމްލަ އަދަދު ހުރީ 97,152.5 މިލިއަން ރުފިޔާގަ އެވެ. މީގެ ތެރެއިން އެންމެ ބޮޑު ބައެއް ހިއްސާކުރަނީ އެތެރޭގެ ބާޒާރަށް ދޫކޮށްފައިވާ އިންސްޓްރޫމަންޓްތަކެވެ. އެގޮތުން ޓްރެޜަރީ ބިލްގެ ގޮތުގައި 43,927.0 މިލިއަން ރުފިޔާ އަދި ޓްރެޜަރީ ބޮންޑުގެ ގޮތުގައި 28,641.8 މިލިއަން ރުފިޔާ ހިމެނެ އެވެ. އިސްލާމީ މާލީ ނިޒާމުގެ ތެރެއިން ދޫކޮށްފައިވާ އިންސްޓްރޫމަންޓްތަކުގެ އަދަދު ހުރީ 6,142.4 މިލިއަން ރުފިޔާގަ އެވެ.