މޮރޮކޯގެ ބޮޑުވަޒީރު ކަމުގެ މަގާމަށް ފުރަތަމަ ފަހަރަށް އަންހެން ބޭފުޅެއް!

މޮރޮކޯގައި ސެޕްޓެންބަރު 23 ގައި ބޭއްވި ގާނޫނުހަދާ މަޖިލީހުގެ އިންތިޚާބު ލިބަރަލް-ސެންޓްރިސްޓް ޕާޓީ ކާމިޔާބު ކުރުމާ ގުޅިގެން، ބޮޑުވަޒީރު ކަމުގެ މަގާމަށް އެ ޕާޓީގެ ވެރިޔާ ފާތިމާ އައްޒަހްރައު އަލް-މަންސޫރީ އައްޔަންކޮށްފި އެވެ. މިއާއެކު، އަލް-މަންސޫރީ ވަނީ މި މަގާމަށް އައްޔަންކުރެވުނު ފުރަތަމަ އަންހެން ބޭފުޅާއަށް ވެވަަޑައިގަންނަވާފަ އެވެ.

ބޮޑުވަޒީރު ކަމުގެ މަގާމަށް އަލް-މަންސޫރީ އައްޔަންކުރެއްވުމަށް ނިންމެވީ ރަސްގެފާނު މުޙައްމަދު ހަވަނަ އެވެ. އާ ސަރުކާރެއް އެކުލަވައިލެއްވުމަށް ރަސްގެފާނު އަލް-މަންސޫރީގެ ކިބައިން އެދިވަޑައިގަންނަވާފައިވާ ކަމަށް މޮރޮކޯގެ ޝާހީ ގަނޑުވަރުން ނެރުނު ބަޔާނެއްގައި ބުނެފައިވެއެވެ.

Advertisement

އަލް-މަންސޫރީ ނިސްބަތްވެވަޑައިގަންނަވާ އޮތެންޓިސިޓީ އެންޑް މޮޑާނިޓީ ޕާޓީއަކީ (ޕީއޭއެމް)، ރަސްގެފާނުގެ މުޝީރަކު 2008 ވަނަ އަހަރު އުފެއްދެވި ޕާޓީއެކެވެ. އިޖުތިމާއީ ގޮތުން ޒަމާނީ ބަދަލުތަކަށާއި ސެކިއުލާ ފިކުރަށް ވަކާލާތުކުރާ މި ޕާޓީން އޭރުއްސުރެ މަސައްކަތް ކުރަމުން އަންނަނީ، އިސްލާމިސްޓް ޖަސްޓިސް އެންޑް ޑިވެލޮޕްމަންޓް ޕާޓީގެ (ޕީޖޭޑީ) ބާރުތައް ހިފެހެއްޓުމަށެވެ. މޮރޮކޯއަކީ ދުސްތޫރީ ރަސްކަމެއް އޮންނަ ގައުމަކަށް ވާއިރު، ޚާރިޖީ ސިޔާސަތާއި ދިފާއީ ކަންކަން ހިމެނޭހެން މުހިންމު ދާއިރާތަކުގެ ފުރިހަމަ ބާރުތައް ރަސްގެފާނު ދަމަހައްޓަވަ އެވެ.

މޮރޮކޯގެ ޤާނޫނުއަސާސީގައިވާ ގޮތުން، ސަރުކާރުގެ ވެރިޔާގެ މަގާމަށް ރަސްގެފާނު ބޭފުޅަކު އައްޔަންކުރައްވަނީ ގާނޫނުހަދާ މަޖިލީހުގެ އެންމެ ގިނަ ގޮނޑި ކާމިޔާބުކުރާ ސިޔާސީ ޕާޓީއަކުންނެވެ. އިންތިޚާބަށްފަހު ވެރިކަމުން ވަކިވާ އިއްތިހާދު ސަރުކާރުގެ ދެވަނައަށް އެންމެ ބޮޑު ޕާޓީގެ ގޮތުގައި އޮތް ޕީއޭއެމް އިންތިޚާބުގައި ކުރިއަށް ޖެހިލީ، އިންތިޚާބުގެ މަދު ހަފުތާތަކެއް ކުރިން އެ ޕާޓީއާ ގުޅިވަޑައިގެންނެވި މޮރޮކޯގެ ފުޓްބޯޅަ ފެޑެރޭޝަންގެ ވެރިޔާ އަދި ދެ ފަހަރެއްގެ މަތިން ސަރުކާރުގެ ބަޖެޓް މެނޭޖަރުކަން ކުރެއްވި ފައުޒީ ލަޤްޖައުގެ ސަބަބުން ލިބުނު ތާއީދާއެކުގަ އެވެ.

މޮރޮކޯގެ ބޮޑުވަޒީރު ކަމުގެ މަގާމަށް އައްޔަންކޮށްފައިވާ ފުރަތަމަ އަންހެން ބޭފުޅާ، ފާތިމާ އައްޒަހްރައު އަލް-މަންސޫރީ ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަނީ | ގެޓީ އިމޭޖަސް

ވެރިކަމުން ފައިބާ ސަރުކާރުގެ ގެދޮރުވެރިކަމާބެހޭ ވަޒީރުގެ މަގާމާއި ހައުސިންގ މިނިސްޓަރުކަމާއި މުއްރާކަޝްގެ މޭޔަރުކަން ކުރެއްވި އަދި ޤާނޫނީ ވަކީލެއް ކަމަށްވާ އަލް-މަންސޫރީ، އިއްތިހާދު ސަރުކާރެއް އެކުލަވައިލެއްވުމުގެ މަޝްވަރާތައް އިސްވެ ކުރިއަށް ގެންދަވާނެ އެވެ. އަދި، ކެބިނެޓަށް އައްޔަންކުރައްވާ ބޭފުޅުންގެ ލިސްޓު ރަސްގެފާނުގެ ރުހުމަށް އޭނާ ހުށަހަޅުއްވާނެ އެވެ.

މަޝްވަރާކުރުމުގައި އެއްވެސް ރަތް ރޮނގެއް ނޯންނާނެ

އާ ސަރުކާރުން އިސްނަގައިގެން ކުރިއަށް ގެންދާނެ މައިގަނޑު އެއް މަސައްކަތަކީ، ޕޯޗުގަލް އަދި ސްޕެއިނާ ގުޅިގެން މޮރޮކޯއިން ބާއްވާ 2030 ވަނަ އަހަރުގެ ވޯލްޑް ކަޕަށް ތައްޔާރުވުމަށް ހިންގާ 20 ބިލިޔަން އެމެރިކާ ޑޮލަރުގެ މަޝްރޫއުގެ ފަހު މަރުހަލާތައް ވިލަރެސްކުރުމެވެ. މިއާއެކު، ޒުވާނުންގެ މެދުގައި އޮތް ހިތްހަމަނުޖެހުންތަކަށް ހައްލު ހޯދުމަށް އަމާޒުކޮށް އިގްތިސާދީ ސިޔާސަތުތައް އެ ސަރުކާރުން ތަންފީޒުކުރާނެ އެވެ. މިއީ، ޖުލައި މަހު ސްޕެއިންގެ ސަރަހައްދެއް ކަމަށްވާ ސެއޫތާގެ ބޯޑަރު ހުރަސްކުރުމަށް ގިނަ ބަޔަކު ކުރި މަސައްކަތާއި، ޒުވާނުން އިސްވެ މިދިޔަ އަހަރު ކުރިއަށް ގެންދިޔަ ނުރައްކާތެރި މުޒާހަރާތަކުން ފާހަގަވެގެން ދިޔަ ކަމެއްގެ ގޮތުގައި ބެލެވެ އެވެ.

މި އިންތިޚާބުގައި ޕީއޭއެމް އިން 97 ގޮނޑި ކާމިޔާބުކުރި އެވެ. ވެރިކަމުން ފައިބާ ސަރުކާރުގެ ބައިވެރިއެއް ކަމަށްވާ ލިބަރަލް-ސެންޓްރިސްޓް ނެޝަނަލް ރެލީ އޮފް އިންޑިޕެންޑެންޓްސްއިން (އާރުއެންއައި) 66 ގޮނޑި ކާމިޔާބުކުރިއިރު، ކޮންޒަވެޓިވް ނޭޝަނަލިސްޓް އިސްތިޤްލާލް ޕާޓީއަށް 65 ގޮނޑި ލިބިފައިވެ އެވެ. އިންތިޚާބުގެ ކެމްޕޭން ދުވަސްވަރު، ކާބޯތަކެތީގެ އަގު އުފުލުން ހުއްޓުވުމުގައި ފޭލުވުން ފަދަ ސިޔާސަތުތަކުގެ ކުށް އެއް ބަޔަކު އަނެއް ބަޔަކަށް އަޅުވައި، އާރުއެންއައިއާއެކު އިއްތިހާދެއްގައި ދެމިއޮތުމުގެ ފުރުސަތު ޕީއޭއެމް އިން އޮތީ ދޫކޮށްލާފަ އެވެ. ނަމަވެސް، މަޝްވަރާތަކަށް ދާއިރު އެއްވެސް "ރަތް ރޮނގެއް" ނުގެންގުޅުއްވާނެ ކަމަށް ބުރާސްފަތި ދުވަހު އަލް-މަންސޫރީ ވިދާޅުވި އެވެ. "އަޅުގަނޑުމެން އާ ސަފުހާއަކުން ފަށައިފިން."

އިންތިޚާބުގައި 54 ގޮނޑި ކާމިޔާބުކުރި ޕީޖޭޑީގެ ލީޑަރު އަދި ކުރީގެ ބޮޑުވަޒީރު ޢަބްދުއްލިالله އިބްނުކީރާން ވިދާޅުވީ، ނާކާމިޔާބީއަށްފަހު އިދިކޮޅު ޕާޓީގެ ގޮތުގައި އޭނާގެ ޕާޓީން ދެމިއޮންނާނެ ކަމަށެވެ. މީގެ އިތުރުން، ވާތުފިޔައިގެ ތިން ޕާޓީއަކުން ވެސް މަދު އަދަދެއްގެ ގޮނޑިތައް ހޯދާފައިވެ އެވެ. އިންތިޚާބީ މުއައްސަސާތަކަށް ރައްޔިތުން ކުރާ އިތުބާރު ދައްކުވައިދޭ މިންގަނޑެއްގެ ގޮތުގައި ބެލެވޭ ވޯޓުލީ މީހުންގެ ނިސްބަތް ވަނީ ގާތްގަނޑަކަށް %38 އަށް ދަށަށް ގޮސްފަ އެވެ. މިއީ، ވެރިކަމުގައި ދިހަ އަހަރު ހޭދަކުރުމަށްފަހު މެދުމިނުގެ އިސްލާމިސްޓް ޕީޖޭޑީ ބޮޑު ނާކާމިޔާބީއަކާ ކުރިމަތިލާން ޖެހުނު ފަސް އަހަރު ކުރީގެ އިންތިޚާބުގައި ގާތްގަނޑަކަށް %50 ގައި ހުރި ނިސްބަތެކެވެ. ފަހަކަށް އައިސް ރަސްގެފާނު މުޙައްމަދު ވަނީ އަންހެން މުޝީރަކު އައްޔަންކުރައްވާފައި ކަމަށްވާއިރު، މޮރޮކޯގެ އިސް މަގާމުތަކުން އަންހެނުން އަންނަނީ ފުރުސަތު ހޯދަމުން ކަމަށް ފާހަގަކުރެވެ އެވެ. މި ގޮތުން، ވެރިކަމުން ފައިބާ ސަރުކާރުގެ ކެބިނެޓުގައި ވެސް ހަތަރު އަންހެން ވަޒީރުން ތިއްބެވި އެވެ.