މޮރޮކޯ ބަލިކޮށް ސެމީ ފައިނަލްގެ ފުރަތަމަ ޖާގަ ފްރާންސް އަށް

ފީފާ ވޯލްޑް ކަޕްގެ ކުއާޓާ ފައިނަލްގައި މޮރޮކޯއާ ދެކޮޅަށް ކުޅުނު މެޗުން މޮޅުވެ، ފްރާންސް އިން މުބާރާތުގެ ސެމީ ފައިނަލް އިން ޖާގަ ހޯދައިފި އެވެ.

ބުރާސްފަތި ދުވަހުގެ ރޭ ދަންވަރު ކުޅުނު މެޗު ފްރާންސް އިން ކާމިޔާބު ކުރީ 2-0 އިންނެވެ. މެޗުގައި ފްރާންސް އިން އެ ޓީމުގެ ދެ ލަނޑު ވެސް ޖެހީ ދެ ވަނަ ހާފުގައި އެވެ. 

މެޗު ފަށައިގެން 28 ވަނަ މިނެޓުގައި ފްރާންސް އަށް ވަނީ ލީޑު ނަގައިދޭން ރަނގަޅު ފުރުސަތެއް ލިބިފައި އެވެ. އެގޮތުން ފްރާންސް އަށް ލިބުނު ޕެނަލްޓީ ކެޕްޓަން ކީލިއަން އެމްބާޕޭ ފޮނުވާލި ނަމަވެސް، މޮރޮކޯގެ ގޯލު ކީޕަރު ޔަސީން ބޯނޯ ވަނީ އެ ބޯޅަ މަތަކޮށްފައި އެވެ. 

ނަމަވެސް މެޗުގެ ދެ ވަނަ ހާފު ފަށައިގެން 14 ވަނަ މިނެޓުގައި އެމްބާޕޭ ވަނީ ލަނޑު ޖަހައި ފްރާންސް އަށް ލީޑު ނަގައިދީފައި އެވެ. އެއީ ޑިސެއޭ ޑޯއޫ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. 

އޭގެ ފަހުން މެޗުގެ 66 ވަނަ މިނެޓުގައި އޮސްމާން ޑެމްބެލޭ ވަނީ ފްރާންސްގެ ދެ ވަނަ ލަނޑު ޖަހައި ލީޑު ފުޅާ ކޮށްފައި އެވެ. އެ ލަނޑު ޖަހަން ޑެމްބެލޭ އަށް ފުރުސަތު ތަނަވަސްކޮށްދިނީ އެމްބާޕޭ އެވެ. 

މީގެ ކުރިން 2022 ވަނަ އަހަރު ޤަތަރުގައި ކުރިއަށް ދިޔަ ވޯލްޑް ކަލްގެ ސެމީ ފައިނަލްގައި ވާދަކުރީ ފްރާންސް އާއި މޮރޮކޯ އެވެ. އެފަހަރުގެ މެޗު ވެސް ފްރާންސް އިން ކާމިޔާބު ކުރީ 2-0 އިންނެވެ. 

މުބާރާތުގެ ސެމީ ފައިނަލްގައި ފްރާންސް ނިކުންނާނީ ސްޕެއިން އާއި ބެލްޖިއަމް ކުޅޭ މެޗުން މޮޅުވާ ޓީމަކާ ދެކޮޅަށެވެ.