އީރާނުގައި ހުންނަ ސްވިޑެންގެ ޑިޕްލޮމެޓެއް ފައިބަން ތެހްރާނުން އަމުރުކޮށްފި

ސްވިޑެންގެ ސްޓޮކްހޯމްގައި ހުންނަ އީރާނުގެ އެމްބަސީގެ އޮފިޝަލަކު އެ ގައުމުން ބޭރުކޮށްލިތާ 24 ގަޑިއިރު ނުވަނީސް، އީރާނުގައި ހުންނަވާ ސްވިޑެންގެ ޑިޕްލޮމެޓަކު 48 ގަޑިއިރުގެ ތެރޭގައި އެ ގައުމުން ފުރައިގެން ދިއުމަށް އީރާނުން އަމުރުކޮށްފި އެވެ. ސްވިޑެނުން އީރާނުގެ އޮފިޝަލް ބޭރުކޮށްލުމަށް ނިންމި ނިންމުމަކީ އެއްވެސް އަސާސެއް ނެތް ނިންމުމެއް ކަމަށް، އީރާނުގެ ޚާރިޖީ ވުޒާރާއިން ބުރާސްފަތި ދުވަހު ވަނީ ސިފަކޮށްފައި ވެ އެވެ.

އީރާނުގެ ރަސްމީ ނޫސް އޭޖެންސީ، އައިއާރްއެންއޭއިން ރިޕޯޓްކޮށްފައިވާ ގޮތުގައި، ސްވިޑެން ސަރުކާރުގެ މި އަމަލަކީ ޒަޔަނިސްޓް އިސްރާއީލްގެ ނުފޫޒުން ކޮށްފައިވާ ކަމެއް ކަމަށް އެ ގައުމުގެ ޚާރިޖީ ވުޒާރާއިން ނެރުނު ބަޔާނެއްގައި ވަނީ ބުނެފައި އެވެ. އަދި، މިއީ ސްޓޮކްހޯމްގައި ހުންނަ އިސްލާމީ ޖުމްހޫރިއްޔާ އޮފް އީރާނުގެ އެމްބަސީގެ މަސައްކަތްތަކަށް ހުރަސްއެޅުމަށް ހިންގި އަމަލެއް ކަމަށްވެސް އެ ބަޔާނުގައި ފާހަގަކޮށްފައިވެ އެވެ. މީގެ އިތުރުން، 1961 ވަނަ އަހަރުގެ ވިއެނާ ކޮންވެންޝަނާ އެއްގޮތަށް ބައިނަލްއަގުވާމީ ގާނޫނުތަކަށް ސްވިޑެނުން ބޯލަނބަންޖެހޭނެ ކަމަށް ބުނެ، އީރާނު އެމްބަސީގެ މަސައްކަތްތަކަށް ހުރަސްއެޅުމުގެ ޒިންމާ ސްވިޑެނުން އުފުލަންޖެހޭނެ ކަމުގެ އިންޒާރުވެސް އެ ވުޒާރާއިން ވަނީ ދީފަ އެވެ.

Advertisement

މި މައްސަލައިގައި، އީރާނުގެ ޚާރިޖީ ވުޒާރާގެ ވެސްޓަން ޔޫރަޕްގެ ޑިރެކްޓަރ ޖެނެރަލް އަލީރިޒާ ޔޫސުފީ ވަނީ ތެހެރާންގައި ހުންނަވާ ސްވިޑެންގެ ސަފީރު ބުރާސްފަތި ދުވަހު ހާޒިރުކުރައްވާފަ އެވެ. އީރާނާ ދެކޮޅު ޓެރަރިސްޓް ޖަމާއަތްތަކާއި ފަރާތްތަކަށް ސްވިޑެނުން ހިމާޔަތް ދިނުން ހިމެނޭހެން، އެ ގައުމުން ގެންގުޅޭ ސިޔާސަތުތަކާ މެދު ކަންބޮޑުވުން ފާޅުކުރައްވާ ކަމަށް ޔޫސުފީ ވިދާޅުވި އެވެ. އަދި، އީރާނުގެ ގައުމީ ހައްގުތަކާއި މަސްލަހަތު ހިމާޔަތްކުރުމަށް ޓަކައި، ބަދަލުހިފުމުގެ ގޮތުން އަޅަންޖެހޭ ފިޔަވަޅުތައް ހިމެނޭހެން ބޭނުންވާ ހުރިހާ ފިޔަވަޅެއް އަޅާނެ ކަމަށް އެ ވުޒާރާއިން ވަނީ ބުނެފަ އެވެ. ސަފީރާއެކު ބޭއްވި މި ބައްދަލުވުމުގައި، ސްވިޑެންގެ އަމަލުތަކަށް ރައްދު ދިނުމުގެ ގޮތުން 48 ގަޑިއިރުގެ ތެރޭގައި ސްވިޑެންގެ ޑިޕްލޮމެޓަކު އީރާނުން ފުރައިގެން ދިއުމަށް ވަނީ އަންގާފަ އެވެ.

ސްވިޑެންގެ ޚާރިޖީ ވުޒާރާއިން ބުދަ ދުވަހު ހާމަކުރި ގޮތުގައި، އީރާނުގެ އޮފިޝަލަކު އެ ގައުމުން ބޭރުވުމަށް އެންގީ ޑިޕްލޮމެޓިކް މިޝަންތަކުން އަމަލުކުރަންޖެހޭ އުސޫލުތައް ކަނޑައަޅާ ބައިނަލްއަގުވާމީ މުއާހަދާއެއް ކަމަށްވާ ވިއެނާ ކޮންވެންޝަނާ ޚިލާފު އަމަލުތަކެއް ހިންގުމާ ގުޅިގެންނެވެ. މި ނިންމުމަކީ ސްވިޑެންގެ ރައްޔިތުންނާއި އެ ގައުމުގެ މަސްލަހަތު ހިމާޔަތްކުރުމަށް ޓަކައި ނިންމި ނިންމުމެއް ކަމަށް އެ ގައުމުގެ ޚާރިޖީ ވަޒީރު މަރީއާ މަލްމާ ސްޓެނާގާޑް ވަނީ ވިދާޅުވެފައި އެވެ.

މި ނިންމުމަކީ ޔަހޫދީންނާއި އިސްރާއީލްގެ މަސްލަހަތުތަކާ ދެކޮޅަށް އީރާނުން ހިންގާ ކަމަށް ތުހުމަތުކުރެވޭ އަމަލުތަކާ ގުޅިގެން ނިންމި ނިންމުމެއް ކަމަށް، ސްވިޑެންގެ އިންސާފާ ބެހޭ ވަޒީރު ގުނާ ސްޓްރޮމާ ވިދާޅުވި އެވެ. "އީރާނުން ގިނަ ދުވަސްތަކެއް ވަންދެން ސްވިޑެންގެ ސަލާމަތަށް ނުރައްކާވާ ފަދަ އަމަލުތައް ހިންގަމުންދާކަން އަޅުގަނޑުމެންނަށް އެނގޭ،" ސްޓްރޮމާ ވިދާޅުވި އެވެ. އަދި، އީރާނުގެ މަގްސަދުތައް ހާސިލުކުރުމަށް ޓަކައި އެ ގައުމުން ކުށްވެރިންގެ ނެޓްވޯކްތަކުގެ ބޭނުން ހިފަމުންދާ ކަމަށް ވެސް އޭނާ ވަނީ ތުހުމަތުކުރައްވާފަ އެވެ.