ޔަމަނު ހަނގުރާމަ ވަރުގަދަވެ 82،000 އަށްވުރެ ގިނަ މީހުން ގެދޮރު ދޫކޮށްފި, އެތައް ހާސް ބަޔަކު ޖިބޫޓީއަށް
14 ސެޕްޓެމްބަރު 2026 | ހޯމަ 02:52ޔަމަނުގެ ހުޅަނގު އައްސޭރީގައި ހޫޘީންނާއި ސަރުކާރު ސިފައިންގެ މެދުގައި ހަމަލާތައް ވަރުގަދަވުމާ ގުޅިގެން، ގިނަ އަދަދެއްގެ ބަޔަކު ގެދޮރު ދޫކޮށް އަވަށްޓެރި ޖިބޫޓީއަށް ހިޖުރަކުރަން ފަށައިފި. މި އިންސާނީ ކާރިސާއާ ގުޅިގެން އދ. ގެ މައިގްރޭޝަން އެޖެންސީން ދަނީ ރެފިއުޖީންނަށް ބޭނުންވާ ކާބޯތަކެއްޗާއި ސިއްހީ އެހީތެރިކަން ފޯރުކޮށްދެމުން. ހަނގުރާމަ މެދުނުކެނޑި ކުރިއަށްދާތީ، ކުރިއަށް އޮތް ދުވަސްތަކުގައި ހާލުގައިޖެހޭ މީހުންގެ އަދަދު އިތުރުވާނެ ކަމަށް އައިއޯއެމްއިން އިންޒާރުދޭ
ޔަމަނުގައި ހަރަކާތްތެރިވާ ހަތިޔާރު އެޅި ހަނގުރާމަވެރިން | އަނަދޮލޫ
ޔަމަނުގެ ހުޅަނގު އައްސޭރީގެ ޕްރޮވިންސްތަކުގައި ހިނގަމުންދާ ހަނގުރާމައިގެ ސަބަބުން، ސެޕްޓެންބަރު މަހުގެ ކުރީކޮޅުން ފެށިގެން މިހާތަނަށް 82،000 އަށްވުރެ ގިނަ މީހުން ގެދޮރު ދޫކޮށް ގޮސްފައިވާ ކަމަށާއި، އޭގެ ތެރެއިން 2،000 އަށްވުރެ ގިނަ މީހުން ޖިބޫޓީއަށް ގޮސްފައިވާ ކަމަށް އދ. ގެ އިންޓަނޭޝަނަލް އޯގަނައިޒޭޝަން ފޯ މައިގްރޭޝަނުން (އައިއޯއެމް) އާދީއްތަ ދުވަހު ބުނެފި އެވެ.
އައިއޯއެމުން ނެރުނު ބަޔާނެއްގައި ބުނީ، ޔަމަނުގެ ހުޅަނގު އައްސޭރީގައި ހިމެނޭ ތާއިޒް، އަލް-ހުދައިދާ އަދި ލަހްޖް ޕްރޮވިންސްގައި ހިނގަމުންދާ ހަނގުރާމައާ ގުޅިގެން، ހަމައެކަނި ސެޕްޓެންބަރު މަހުގެ ކުރީކޮޅުން ފެށިގެން މިހާތަނަށް 82،164 މީހުން ގެދޮރު ދޫކޮށް ގޮސްފައިވާ ކަމަށް ރެކޯޑު ކުރެވިފައިވާ ކަމަށެވެ. މީގެ ތެރެއިން ހަނގުރާމައިގެ ނުރައްކަލުން ސަލާމަތްވުމަށް މަސައްކަތްކުރާ 2،000 އަށްވުރެ ގިނަ މީހުން މިހާތަނަށް ޖިބޫޓީގެ އުތުރު އައްސޭރިއަށް ފޯރާފައިވެ އެވެ. މި މީހުން އެ ގައުމަށް އެތެރެވަމުން ދަނީ އުބޫޚް ސަރަހައްދުގެ އައްސޭރިފަށުގެ އެކި ސަރަހައްދުތަކުންނެވެ.
ޔަމަނުގެ ހުޅަނގު އައްސޭރީގައި ހަމަލާތައް ވަރުގަދަވުމާ ގުޅިގެން، ސައުދީ އަރަބިއްޔާގައި ހުންނަވާ ޖިބޫޓީގެ ސަފީރު ޟިޔާއުއްދީން ބާމަޚްރަމާ އާދީއްތަ ދުވަހު ވިދާޅުވީ، ފާއިތުވި 24 ގަޑިއިރު ނުވަނީސް ޔަމަނުގެ 1،400 އެއްހާ މީހުން ޖިބޫޓީއަށް އައިސްފައިވާ ކަމަށެވެ. މި ހާލަތާ ގުޅިގެން، އދ. ގެ ހިޖުރަކުރާ މީހުންނާބެހޭ އޭޖެންސީން ބުނީ، ޖިބޫޓީގެ ކަމާބެހޭ އިދާރާތަކުން އިސްނަގައިގެން މަސައްކަތް ކުރަމުންދާ ކަމަށެވެ. މި ގޮތުން އައިއޯއެމްއާއި އދ. ގެ އެހީތެރިކަމާއެކު، އެ ގައުމުގެ ކަނޑުގެ ސިފައިންނާއި، އެއްގަމު ސިފައިންނާއި، ފުލުހުންގެ އިތުރުން ސިއްހީ ޚިދުމަތްތެރިން ދަނީ ހަރަކާތްތެރިވަމުންނެވެ.
ރެފިއުޖީންނަށް އެހީދޭން ޖިބޫޓީން މަސައްކަތް ކުރަނީ
ޖިބޫޓީއަށް އެތެރެވަމުންދާ މީހުންގެ ތެރޭގައި ގިނަ އަދަދެއްގެ އަންހެނުންނާއި ކުޑަކުދިން ހިމެނޭއިރު، އެ މީހުން މިހާރު ވަނީ އުބޫޚްގައި ހުންނަ މަރުކަޒީ ސައިޓަކަށް ބަދަލުކުރެވިފަ އެވެ. އެ ތަނުން އެ މީހުންނަށް ބޯފެނާއި، ބިސްކޯދު ފަދަ ތަކެތީގެ އިތުރުން ކާނާ ފޯރުކޮށްދެމުންދާ ކަމަށް އައިއޯއެމުން ބުނެ އެވެ. ހަނގުރާމަ އިތުރަށް ވަރުގަދަވަމުންދާތީ، ކުރިއަށް އޮތް ތަނުގައި ގެދޮރު ދޫކޮށްދާ މީހުންގެ އަދަދު އިތުރުވާނެ ކަމުގެ އިންޒާރު ވެސް އެ އިދާރާއިން ވަނީ ދީފަ އެވެ.
"ކޮންމެ އަދަދެއްގެ ފަހަތުގައި ވަނީ ހުރިހާ އެއްޗެއް ގެއްލިފައިވާ އާއިލާއެއް. ގިނަ ބަޔަކު ވަނީ އެކި ފަހަރު މަތިން ގެދޮރުން ބޭރުވާން ޖެހިފައި،" އައިއޯއެމްގެ ޑިރެކްޓަރ ޖެނެރަލް އެއިމީ ޕޯޕް ނެރުއްވި ބަޔާނުގައި ވިދާޅުވި އެވެ. މީހުން ކަނޑު ހުރަސްކޮށް ދަތުރުކުރަމުން ދަނީ އެއްވެސް އެއްޗެއް ނެތި، އެ ނޫން އެހެން ގޮތެއް ނެތުމުން ކަމަށް ވެސް އޭނާ ވިދާޅުވި އެވެ.
އަދި، ޔަމަނަކީ ފަގީރުކަމާއި ދާޚިލީ ހަނގުރާމައިގެ ސަބަބުން ބަނގުރޫޓުވެފައިވާ ގައުމަކަށް ވުމުން، އެކަނިމާއެކަނި މި ކާރިސާއާ ކުރިމަތިލުމުގެ ގާބިލުކަން އެ ގައުމުގައި ނެތް ކަމަށް ވެސް ޕޯޕް ވިދާޅުވި އެވެ. މީގެ އިތުރުން، ޖިބޫޓީއަށް އަންނަ ރެފިއުޖީންނަށާއި، އެ މީހުންނަށް މަރުހަބާ ކިޔާ އުބޫޚްގެ އާންމު ރައްޔިތުންނަށް އެހީތެރިކަން ފޯރުކޮށްދިނުމަށް އެހީދޭ ފަރާތްތަކަށް ޕޯޕް ވަނީ ގޮވާލައްވާފަ އެވެ.
އައިއޯއެމުން ހޮނިހިރު ދުވަހު ބުނީ، މި ފަހަރުގެ ހަމަލާތަކުގައި އެންމެ ބޮޑު އަސަރެއް ކޮށްފައިވަނީ ތާއިޒް ޕްރޮވިންސަށް ކަމަށެވެ. މި ގޮތުން ޖަބަލް ހަބަޝީ، އަލް-މާއަފިރު، މަގްބަނާ، މަވްޒާ އަދި އަލް-ވަޒީއިއްޔާ ހިމެނޭހެން އެކި ސަރަހައްދުތަކުން 8،300 އާއިލާ ނުވަތަ ގާތްގަނޑަކަށް 50،000 މީހުން ވަނީ ގެދޮރު ދޫކޮށް ގޮސްފަ އެވެ. މީގެ އިތުރުން ލަހްޖުން 2،819 އާއިލާ (ގާތްގަނޑަކަށް 17،000 މީހުން)، އަލް-ހުދައިދާއިން 1،374 އާއިލާ (8،100 މީހުން) އަދި އަދަނުން 191 އާއިލާ (1،100 މީހުން) ގެދޮރު ދޫކޮށް ގޮސްފައިވާ ކަމަށް އެ އިދާރާގެ ތަފާސްހިސާބުތަކުން ދައްކަ އެވެ. ހަނގުރާމަ ވަރުގަދަވަމުންދާ ވަރަކަށް ގެދޮރު ދޫކޮށްދާ މީހުންގެ އަދަދު "ހަލުވިކަމާއެކު އިތުރުވަމުން"ދާ ކަމަށާއި، ކުރިއަށް އޮތް ދުވަސްތަކުގައި މި އަދަދުތައް އަދިވެސް މައްޗަށް ދާނެ ކަމަށް އެ އޭޖެންސީން އިންޒާރު ދިނެވެ.
ހޫޘީ ޖަމާއަތާ ޔަމަނު ސަރުކާރު ފައުޖުތަކާ ދެމެދު ހަމަލާތައް އިތުރުވުން
ޔަމަނު ސަރުކާރުގެ ސިފައިންނާއި ހޫޘީންނާ ދެމެދު ހިނގަމުންދާ ކުރިމަތިލުންތައް، އަހަރުތަކެއްގެ މެދުކެނޑުމަކަށްފަހު 2026 ވަނަ އަހަރުގެ ޖުލައި މަހުގެ ކުރީކޮޅުން ފެށިގެން ވަނީ ވަރަށް ބޮޑަށް ވަރުގަދަވެފަ އެވެ. މި ކުރިމަތިލުންތައް ވަރުގަދަވެ، ޔަމަނުގެ ހަނގުރާމައިގެ މައިދާނަށް ބޮޑެތި ބަދަލުތަކެއް ވަނީ އައިސްފަ އެވެ.
މި ހަމަލާތަކުގެ ތެރޭގައި ސަރުކާރު ސިފައިން ވަނީ ސައުދީ އަރަބިއްޔާގެ ބޯޑަރާ ކައިރީގައި އޮންނަ އުތުރުގެ ޕްރޮވިންސެއް ކަމަށްވާ އަލް-ޖައުފްގައި ކުރިއެރުންތަކެއް ހޯދާފައިވާ ކަމަށް ބުނެފަ އެވެ. އަދި، އެ ޕްރޮވިންސްގެ ވެރިރަށް އަލް-ހަޒްމްއާ ގާތަށް ސިފައިން ޖެހިލާފައިވާ ކަމަށް ބުނެފައި ވާއިރު، އެ ސިޓީގެ ބައެއް ސަރަހައްދުތައް އަދިވެސް އޮތީ ހޫޘީންގެ ކޮންޓްރޯލްގެ ދަށުގަ އެވެ.
ޖުމްލަ ގޮތެއްގައި ބަލާއިރު، ޔަމަނުގެ އުތުރާއި ހުޅަނގުގެ ބޮޑު ބައެއް ކޮންޓްރޯލް ކުރަނީ ހޫޘީންނެވެ. އަނެއްކޮޅުން، ސަރުކާރު ސިފައިންނާއި އެ މީހުންނަށް ތާއީދުކުރާ ގްރޫޕްތަކުގެ ކޮންޓްރޯލްގެ ދަށުގައި އޮތީ ވަގުތީ ވެރިރަށް އަދަނާއި، އަލް-މަހްރާ، ހަޟްރަމައުތު، ޝަބްވާ އަދި އަބްޔާންގެ އިތުރުން ލަހްޖް، ތާއިޒް އަދި އަލް-ޟާލިއުގެ ބޮޑު ބައެކެވެ.
ޔަމަނުގައި ދާޚިލީ ހަނގުރާމަ ފެށުނީ 2014 ވަނަ އަހަރުގެ ސެޕްޓެންބަރު މަހު ހޫޘީން ވެރިރަށް ސަންޢާއާއި ބައެއް ޕްރޮވިންސްތައް ހިފުމާ ގުޅިގެންނެވެ. މިއާއެކު، ބައިނަލްއަގުވާމީ ގޮތުން ބަލައިގަންނަ ޔަމަނު ސަރުކާރަށް އެހީތެރިވުމަށް ސައުދީ އަރަބިއްޔާއިން އިސްވެ އޮވެ އުފެއްދި އަރަބި ކޯލިޝަނުން 2015 ވަނަ އަހަރުގެ މާރިޗް މަހު ވަނީ އެ ގައުމަށް އަސްކަރީ ގޮތުން ވަދެފަ އެވެ.
މަސްދަރު: އަނަދޯލް އޭޖެންސީ
