ހުރްމުޒް ކަނޑުއޮޅީގެ ކޮންޓްރޯލް އޮތީ އީރާނަކަށް ނޫން، އެ މަގު އޮތީ ދަތުރުފަތުރަށް ހުޅުވާލާފައި: ސެންޓްކޮމް
17 ސެޕްޓެމްބަރު 2026 | ބުރާސްފަތި 05:08ހުރްމުޒް ކަނޑުއޮޅީގެ ކޮންޓްރޯލް އޮތީ އީރާނަށް ކަމަށް ބުނާ ވާހަކަތައް އެމެރިކާގެ ސެންޓްކޮމުން ދޮގުކޮށް، އެ ސަރަހައްދުގެ ސަލާމަތީ ކަންކަން ބަލަހައްޓަމުންދާ ކަމަށް ބުނެފި. އެމެރިކާއިން ބުނި ގޮތުގައި އީރާނުގެ އަސްކަރީ ގާބިލުކަން ދަށްކޮށްލާފައިވާއިރު، ބައިނަލްއަގުވާމީ ގާނޫނުތަކާ އެއްގޮތަށް ވިޔަފާރި އުޅަނދުފަހަރަށް ރައްކާތެރިކަން ފޯރުކޮށްދިނުމުގައި އެ ގައުމުގެ ސިފައިން ދަނީ ހަރަކާތްތެރިވަމުން
އީރާނުގެ ހުއްދަނެތި ހުރްމުޒް ކަނޑުއޮޅި ހުރަސްކުރުމަށް މަސައްކަތްކުރި ކަމަށް އައިއާރްޖީސީން ބުނާ އުޅަނދަކަށް މައްސަލައެއް ކުރިމަތިވެފައިވާ މަންޒަރުތައް | އެކްސް
އީރާނުގެ ކަނޑުގެ ވިޔަފާރި ބަންދުކޮށް، އެ ގައުމުގެ އަސްކަރިއްޔާއިން މުދާ އުފުލާ އުޅަނދުފަހަރަށް ހަމަލާދެމުންދާ ދަނޑިވަޅެއްގައި ވެސް، ހުރްމުޒް ކަނޑުއޮޅި މުދާ އުފުލާ އުޅަނދުފަހަރަށް ހުޅުވާލާފައި ބޭއްވުމަށް މަސައްކަތް ކުރަމުންދާ ކަމަށް އެމެރިކާގެ އަސްކަރިއްޔާއިން ބުނެފި އެވެ. މީގެ އިތުރުން، އިސްތިރާތީޖީ ގޮތުން މުހިންމު މި ކަނޑުއޮޅި މެދުވެރިކޮށް އެތައް މިލިއަން ފީފާ ތެޔޮ އުފުލުމަށް އެމެރިކާގެ އަސްކަރިއްޔާއިން އެހީތެރިކަން ފޯރުކޮށްދީފައިވާ ކަމަށް ވެސް އެމެރިކާއިން ބުނެ އެވެ.
ގަލްފް ސަރަހައްދުގައި އޮންނަ، ދުނިޔޭގެ ވިޔަފާރިއަށް މުހިންމު ހުރްމުޒް ކަނޑުއޮޅީގެ ކޮންޓްރޯލް އެންމެ ބޮޑަށް އޮތީ ކޮން ގައުމަކަށްތޯ ބުނެ، އެމެރިކާއާއި އީރާނާ ދެމެދު ދަނީ ބަހުގެ ހަމަލާތަކެއް ބަދަލުކުރެވެމުންނެވެ. އެމެރިކާގެ ސެންޓްރަލް ކޮމާންޑުގެ (ސެންޓްކޮމް) ތަރުޖަމާނު، ޔޫއެސް ނޭވީ ކެޕްޓަން ޓިމް ހޯކިންސް ބުދަ ދުވަހު ވިދާޅުވީ، ހުރްމުޒް ކަނޑުއޮޅީގެ ކޮންޓްރޯލް އޮތީ އީރާނަށް ކަމަށް ބުނާ ވާހަކަތައް ދޮގުކުރާ ކަމަށާއި، އެ ސަރަހައްދުން އުޅަނދުފަހަރު ދަތުރުކުރުން މެދުނުކެނޑި ކުރިއަށްދާ ކަމަށެވެ.
ހޯކިންސް ވިދާޅުވީ، މެއި މަހުގެ ކުރީކޮޅުން ފެށިގެން، ދުނިޔޭގެ ހަކަތައިގެ ބާޒާރަށް ބޭނުންވާ 900 މިލިއަނަށްވުރެ ގިނަ ފީފާ ސާފުނުކުރާ ތެޔޮ ހުރްމުޒް ކަނޑުއޮޅި މެދުވެރިކޮށް އުފުލުމުގައި، މުދާ އުފުލާ އުޅަނދުފަހަރަށް އެމެރިކާއިން އެހީތެރިކަން ފޯރުކޮށްދީފައިވާ ކަމަށެވެ. ސެންޓްކޮމުން މި މޭރުމުން ވާހަކަދައްކާފައި މި ވަނީ، ދުނިޔޭގެ ހަކަތަ ފޯރުކޮށްދިނުމުގައި މުހިންމު ދައުރެއް އަދާކުރާ ހުރްމުޒް ކަނޑުއޮޅީގެ ދަތުރުފަތުރާ ގުޅޭގޮތުން މަސްރަހު ގޯސްވެފައިވާ ދަނޑިވަޅެއްގަ އެވެ.
ސެންޓްކޮމްގެ ތަރުޖަމާނު ވިދާޅުވީ، އެމެރިކާގެ ސިފައިން އެއްފަހަރާ ދެ މަސައްކަތެއް ކުރަމުންދާ ކަމަށެވެ. އެއީ، ވިޔަފާރި އުޅަނދުފަހަރަށް މަގުފަހިކޮށްދިނުމާއި، އީރާނާ ދެކޮޅަށް އަޅާފައިވާ ވަރުގަދަ ހިސާރު ނުވަތަ ދަތުރުފަތުރު ހުއްޓުވުމުގެ ފިޔަވަޅުތައް ތަންފީޒުކުރުމެވެ. "މި ބްލޮކޭޑާ ޚިލާފުވާން މަސައްކަތް ކުރި 100 އަށްވުރެ ގިނަ އުޅަނދެއްގެ މިސްރާބު އަޅުގަނޑުމެން ވާނީ ބަދަލުކޮށްލާފައި،" ހޯކިންސް ވިދާޅުވި އެވެ.
އީރާނުން ބުނަނީ ހުރްމުޒް އޮތީ އެ ގައުމުގެ ބާރުގެ ދަށުގައި ކަމަށް
ހޯކިންސް ވިދާޅުވީ، ބައިނަލްއަގުވާމީ ގޮތުން ބަލައިގަނެފައިވާ ހުރްމުޒް ކަނޑުއޮޅީގެ މައި ދަތުރުފަތުރުގެ މަގުތަކުގައި ހުރި މައިން ނުތަވަ ބޮންތައް ނަގާ ސާފުކުރުމުގެ މަސައްކަތް އެމެރިކާ ސިފައިން ނިންމާލާފައި ވަނީ މީގެ ހަފުތާތަކެއް ކުރިން ކަމަށެވެ. އޭނާ ވިދާޅުވީ، އެމެރިކާ ސިފައިން ތިބީ ވަރަށް ސަމާލުވެގެން ކަމަށާއި، އެ މަގުތަކަކީ އުޅަނދުފަހަރަށް ރައްކާތެރި ތަންތަނުގެ ގޮތުގައި ބޭއްވުމަށް ޓަކައި އަބަދުވެސް ފާރަވެރިވަމުންދާ ކަމަށެވެ.
"ކަނޑުއޮޅި އޮތީ ހުޅުވާލެވިފައި. އެ މަގުތަކަކީ ދަތުރުކުރެވޭނެ މަގުތަކެއް. މުދާ އުފުލާ އުޅަނދުފަހަރު މެދުނުކެނޑި އެ ސަރަހައްދުން ދަތުރުކުރަމުންދަނީ އެ ސަބަބަށް ޓަކައި،" ހޯކިންސް ވިދާޅުވި އެވެ. ނަމަވެސް، ހުރްމުޒްގެ ފުރިހަމަ ކޮންޓްރޯލް އޮތީ އީރާނުގެ އަތްދަށުގައި ކަމަށް ތެހްރާނުން ދަނީ ތަކުރާރުކޮށް ބުނަމުންނެވެ.
މީގެ އިތުރުން، އެމެރިކާގެ އަސްކަރީ ހަރަކާތްތަކުގެ ސަބަބުން އާންމުންނަށް ލިބޭ ގެއްލުންތަކާއި އާންމުންގެ މުދަލަށް ލިބޭ ގެއްލުންތަކާ ގުޅޭގޮތުން ކުރެވުނު ސުވާލުތަކަށް ވެސް ހޯކިންސް ވަނީ ޖަވާބު ދެއްވާފަ އެވެ. މި މަހުގެ ކުރީކޮޅު، ހުރްމުޒް ކަނޑުއޮޅިއާ ކައިރީގައި އޮންނަ އީރާނުގެ ދެކުނު ހުރްމުޒްގާން ޕްރޮވިންސްގެ ސިރީކް ކައުންޓީގައި ހިމެނޭ ކުހެސްތަކް ސިޓީއަށް އެމެރިކާގެ އަސްކަރިއްޔާއިން ވަނީ ނިރުބަވެރި ހަމަލާތަކެއް ދީފަ އެވެ. އެ ސަރަހައްދުގެ މަސްދަރުތަކާއި އޮފިޝަލުން ބުނީ، އެމެރިކާގެ ހަމަލާތައް ކައިވެނި ހަފުލާއަކަށް އަމާޒުވެ، އެތައް ބަޔަކު ޝަހީދުވެ، އެތައް ބަޔަކު ޒަޚަމްވެފައިވާ ކަމަށެވެ.
ނަމަވެސް ހޯކިންސް ވިދާޅުވީ، އެމެރިކާގެ އަސްކަރިއްޔާއިން ހަނގުރާމައިގެ ބައިނަލްއަގުވާމީ ގާނޫނުތަކަށް ފުރިހަމައަށް ބޯލަނބާ ކަމަށާއި، އެމެރިކާގެ ހަމަލާތައް އަމާޒުކުރީ އީރާނުގެ އިސްލާމިކް ރިވޮލޫޝަނަރީ ގާޑް ކޯގެ (އައިއާރުޖީސީ) މަރުކަޒުތައް ހިމެނޭހެން، ހަމައެކަނި އަސްކަރީ އަމާޒުތަކަށް ކަމަށެވެ. "އަޅުގަނޑުމެންގެ އެއްވެސް އޮޕަރޭޝަނެއްގައި އާންމު ރައްޔިތުންނަށް އަމާޒުކޮށް ހަމަލާއެއް ދީފައެއް ނުވާނެ،" އޭނާ ވިދާޅުވި އެވެ.
އީރާނުން ދިން ހަމަލާތަކުގައި އެމެރިކާގެ އަސްކަރީ މަރުކަޒުތަކަށް ލިބުނު ގެއްލުންތަކާ ގުޅޭގޮތުން ހޯކިންސް ވިދާޅުވީ، އެ ކަމުގެ ސަބަބުން އެމެރިކާގެ އަސްކަރީ ގާބިލުކަމަށް އެއްވެސް އަސަރެއް ކޮށްފައިނުވާ ކަމަށެވެ. އަދި، އެމެރިކާގެ ސިފައިން ވަނީ އީރާނުގެ މިސައިލް ހަމަލާދިނުމުގެ ގާބިލުކަން ވަރަށް ބޮޑަށް ދަށްކޮށްލާފައި ކަމަށާއި، އީރާނުގެ ކަނޑުގެ ސިފައިންގެ ބާރު މިހާރު ވަނީ މުޅިން ކަނޑުވާލާފައި ކަމަށް ވެސް އޭނާ ދައުވާ ކުރެއްވި އެވެ.
މަސްދަރު: އަލް ޖަޒީރާ
