އެއްބަސްވުމާ ޚިލާފުވެ އިސްރާއީލްގެ ސިފައިން ޣައްޒާއަށް ދިން އާ ހަމަލާތަކެއްގައި ދެ މީހުން ޝަހީދުކޮށްލައިފި

2025 ވަނަ އަހަރުގެ އޮކްޓޫބަރު މަހުން ފެށިގެން ޣައްޒާގައި ގާއިމުކޮށްފައިވާ ހަމަލާބަދަލުކުރުން ހުއްޓާލުމުގެ އެއްބަސްވުމާ އިސްރާއީލްގެ ސިފައިން ތަކުރާރުކޮށް ޚިލާފުވަމުންގޮސް، މި ހޯމަ ދުވަހު ދިން ހަމަލާތަކުގައި ފަލަސްތީނުގެ ދެ މީހަކު ޝަހީދުކޮށްލައި، ހަތަރު ކުޑަކުދިން ހިމެނޭހެން 28 މީހަކު ވަނީ ޒަޚަމްކޮށްލައިފި އެވެ. އިސްރާއީލްގެ މި ހަމަލާތައް ޣައްޒާ ސިޓީއާއި، ޚާން ޔޫނިސްގެ އިތުރުން އަލް-ޒަވައިދާއަށް ވަނީ އަމާޒުކޮށްފަ އެވެ. މި އުދުވާނުގައި ރެފިއުޖީން ދިރިއުޅޭ ފޭލިގެތަކަށާއި އާންމުން އެއްވެ އުޅޭ ތަންތަނަށް ވައިގެ މަގުން ހަމަލާދިނުމުގެ އިތުރުން، އަސްކަރީ އުޅަނދުތަކުން ބަޑީގެ ހަމަލާތައް ވެސް ވަނީ ދީފަ އެވެ.

ޣައްޒާގެ ދެކުނުގައި އޮންނަ ޚާން ޔޫނިސްގެ އަލް-މަވާސީ ސަރަހައްދުގައި ހުރި ރެފިއުޖީ ފޭލިގެއަކަށް އިސްރާއީލްގެ ޑްރޯންއަކުން ދިން ހަމަލާއެއްގައި ޝަހީދުވި މީހެއްގެ ހަށިގަނޑާއި ޒަޚަމްވި ހަތް މީހަކު ނާސިރު ހަސްފަތާލަށް ގެންގޮސްފައިވާ ކަމަށް، އެ ހަސްފަލާތުގެ ސިއްހީ މަސްދަރަކުން ވަނީ ކަށަވަރުކޮށްދީފަ އެވެ. އަލް-މަވާސީ ސަރަހައްދުގައި ހުރި ރެފިއުޖީ ފޭލިގެއަކަށް އިސްރާއީލްގެ ޑްރޯންއަކުން މިސައިލް ހަމަލާތަކެއް ދީފައިވާކަމަށާއި، މި ހަމަލާގައި ފަލަސްތީނުގެ މީހަކު ޝަހީދުވެ އިތުރު ބަޔަކު ޒަޚަމްވި ކަމަށް، އަނަދޯލް ނޫސް އޭޖެންސީއަށް މައުލޫމާތު ދިން މަންޒަރު ދުށް މީހުން ވަނީ ބުނެފަ އެވެ. މީގެ ކުރިން، ހަމަ އެ ސަރަހައްދުގައި ހުރި އެހެން ރެފިއުޖީ ފޭލިގެއަކަށް އިސްރާއީލްގެ ޑްރޯންއަކުން ދިން އެހެން ހަމަލާއެއްގައި ވެސް ފަލަސްތީނުގެ އަށް މީހަކު ވަނީ ޒަޚަމްކޮށްލާފަ އެވެ.

Advertisement

އަލް-މަވާސީ ސަރަހައްދުގައި ރެފިއުޖީ ފޭލިގެއެއްގެ ކައިރިއަށް އެއްވެ ތިބި އާންމުންނަށް އަމާޒުކޮށް އިސްރާއީލްގެ ޑްރޯންއަކުން ދެ މިސައިލް ފޮނުވާލައިގެން ދިން ހަމަލާގައި، ހަތަރު ކުޑަކުދިން ހިމެނޭހެން އަށް މީހަކު ވަނީ ޒަޚަމްކޮށްލާފަ އެވެ. މި ހަމަލާގައި ޒަޚަމްވި މީހުންގެ ތެރެއިން ދެ މީހެއްގެ ހާލު ވަރަށް ސީރިޔަސް ކަމަށާއި، އެ މީހުންނަށް ނާސިރު ހަސްފަލާތުގެ އައިސީޔޫގައި ފަރުވާ ދެމުންދާ ކަމަށް ސިއްހީ މަސްދަރުތަކުން މައުލޫމާތު ދީފަ އެވެ. މީގެ އިތުރުން، ޚާން ޔޫނިސްގެ އިރުމަތީ ފަރާތުގައި ހަރަކާތްތެރިވަމުންދިޔަ އިސްރާއީލްގެ އަސްކަރީ އުޅަނދުތަކުން ދިން ބަޑީގެ ހަމަލާތަކެއްގައި ޒުވާނަކަށް އެކިވަރުގެ އަނިޔާ ލިބިފައިވާ ކަމަށް އަލް-އަމަލް ހަސްފަލާތުގެ ސިއްހީ މަސްދަރަކުން ވަނީ ބުނެފަ އެވެ. އިސްރާއީލްގެ އަސްކަރީ އުޅަނދުތަކުން ވަނީ ޚާން ޔޫނިސްގެ އިރުމަތީ އަދި ދެކުނު ސަރަހައްދުތަކުގައި ހުރި އާންމުންގެ ގެދޮރަށާއި ރެފިއުޖީ ފޭލިގެތަކަށް އަމާޒުކޮށް ނުރައްކާތެރި ބަޑީގެ ހަމަލާތަކެއް ދީފައި ކަމަށް މަންޒަރު ދުށް މީހުން ވަނީ ރިޕޯޓްކޮށްފަ އެވެ.

ޣައްޒާގެ އުތުރު ސަރަހައްދުގެ ހާލަތަށް ބަލާއިރު، ޣައްޒާ ސިޓީގެ ހުޅަނގު ފަރާތުގައި ހުރި ގެއެއްގެ ފުރާޅުމަތީގައި ޖަހާފައި ހުރި ފޭލިގެއަކަށް އިސްރާއީލްގެ ޑްރޯންއަކުން ދިން ހަމަލާއެއްގައި ލިބުނު ސީރިއަސް އަނިޔާތަކަށް ފަރުވާ ދެމުންދަނިކޮށް، އުމުރުން 50 އަހަރުގެ މުހައްމަދު ޚަދަރު އަޖޫރު ޝަހީދުވެފައިވާ ކަމަށް އަލް-ޝިފާ ހަސްފަތާލުން ވަނީ ބުނެފަ އެވެ. އެ ސަރަހައްދުގެ މަސްދަރުތަކުން ވަނީ، އިސްރާއީލްގެ ޑްރޯންއަކުން އަލް-ޝިފާ ހަސްފަތާލް ކައިރީގައި ހުރި އަޖޫރު އާއިލާގެ ގޭގެ ފުރާޅުމަތީގައި ހުރި ފޭލިގެއަށް ދެ މިސައިލް ފޮނުވާލާފައިވާ ކަމަށް ބުނެފަ އެވެ. މި ހަމަލާގައި އޭނާއަށް ލިބުނު ފުރާނައަށް ނުރައްކާވާ ފަދަ އަނިޔާތަކުގެ ސަބަބުން ފަހުން ވަނީ ޝަހީދުވެފަ އެވެ.

މީގެ އިތުރުން، ޣައްޒާ ސިޓީގެ މެދުތެރޭގައި އޮންނަ އަލް-ވަހްދާ މަގުގައި ހުރި ފޭލިގެއަކަށް އިސްރާއީލްގެ ސިފައިން ދިން ހަމަލާއެއްގައި ފަލަސްތީނުގެ 10 މީހަކު ޒަޚަމްކޮށްލާފައިވާ ކަމަށް ސިއްހީ މަސްދަރުތަކުން ބުނެ އެވެ. މި ހަމަލާގައި ޒަޚަމްވި މީހުންގެ ތެރެއިން ދެ މީހެއްގެ ހާލު ސީރިޔަސް ކަމަށް މަސްދަރުތަކުން ބުނާއިރު، މި ހަމަލާ އަމާޒުކޮށްފައި ވަނީ އަލް-ވަފާ ހަސްފަތާލް ކައިރީގައި ގިނަ އަދަދެއްގެ ރެފިއުޖީން އެއްވެފައި އޮތް ސަރަހައްދަކަށް ކަމަށް މަންޒަރު ދުށް މީހުން ވަނީ ބުނެފަ އެވެ. އަނެއްކޮޅުން، ޣައްޒާގެ މެދުތެރޭ ސަރަހައްދުގައި، އަލް-ޒަވައިދާ އަވަށުގެ އިރުމަތީގައި އޮންނަ ސަލާހުއްދީން މަގުގައި އެއްވެ ތިބި އާންމުންނަށް އަމާޒުކޮށް ޑްރޯންއަކުން ދިން ހަމަލާއެއްގައި ޒަޚަމްވި ދެ މީހަކު އަލް-އަގްސާ މާޓިއާސް ހަސްފަތާލަށް ގެނެސްފައިވާ ކަމަށް އެ ހަސްފަތާލުން ވަނީ ރިޕޯޓްކޮށްފަ އެވެ.

ހަމަލާބަދަލުކުރުން ހުއްޓާލުމުގެ އެއްބަސްވުމާ އިސްރާއީލްގެ ފަރާތުން ޚިލާފުވެ މި ހޯމަ ދުވަހާ ހަމައަށް ދިން ހަމަލާތަކުގައި ފަލަސްތީނުގެ 1,372 މީހުން ޝަހީދުކޮށްލައި، 4,659 މީހުން ޒަޚަމްކޮށްލާފައިވާ ކަމަށް ޣައްޒާގެ ސިއްހަތާ ބެހޭ ވުޒާރާގެ އެންމެ ފަހުގެ ތަފާސްހިސާބުތަކުން ދައްކަ އެވެ. މީގެ އިތުރުން، 2023 ވަނަ އަހަރުގެ އޮކްޓޫބަރު މަހުން ފެށިގެން އިސްރާއީލްގެ ސިފައިން ދެމުންދާ ހަމަލާތަކުގައި ފަލަސްތީނުގެ 73,000 އަށްވުރެ ގިނަ މީހުން ޝަހީދުކޮށް، 174,000 އަށްވުރެ ގިނަ މީހުން ވަނީ ޒަޚަމްކޮށްލާފަ އެވެ. އަދި، އިސްރާއީލްގެ އުދުވާނުގައި ޣައްޒާގެ އާންމު އުމްރާނީ ވަސީލަތްތަކުގެ ގާތްގަނޑަކަށް 90 އިންސައްތަ ވަނީ ބިމާ ހަމަކޮށްލައިފަ އެވެ.