އީރާނުގެ ވިޔަފާރި އުޅަނދަކަށް މިސައިލް ހަމަލާއެއް، އެކަކު މަރު
13 ސެޕްޓެމްބަރު 2026 | އާދީއްތަ 11:23ހުރްމުޒް ކަނޑުއޮޅި ކައިރިން ދަތުރުކުރި އީރާނުގެ މުދާ އުފުލާ އުޅަނދަކަށް އެމެރިކާ އާއި އިސްރާއީލުން ދިން މިސައިލް ހަމަލާއެއްގައި މީހަކު މަރުވެ ހަތަރު މީހަކަށް އަނިޔާވެއްޖެ. މި ހަމަލާއާ ގުޅިގެން އަނިޔާވި މީހުންނަށް ދަނީ ފަރުވާ ދެމުން
މެދުއިރުމަތީގެ ވައިގެ ސަރަހައްދު ބެލެހެއްޓުމުގެ މަސައްކަތުގައި ހަރަކާތްތެރިވަމުންދާ އެމެރިކާގެ އެއާ ފޯސްގެ އެފް-35އޭ މަރުކާގެ ސްޓެލްތު ފައިޓަރު ޖެޓްތަކަށް، ކޭސީ-135 ސްޓްރެޓޯޓޭންކަރަކުން ވައިގެ ތެރޭގައި ތެޔޮ އަޅަނީ. | ސެންޓްކޮމް
ގަލްފްގެ ހުރްމުޒް ކަނޑުއޮޅި ކައިރީގައި އޮންނަ ގޭޝްމް ޖަޒީރާ ކައިރިން ދަތުރުކުރަމުންދިޔަ އީރާނުގެ ވިޔަފާރި އުޅަނދަކަށް، އަމިއްލައަށް ދަތުރުކުރާ ކަނޑުއަޑީގެ މިސައިލަކުން ދިން ހަމަލާއެއްގައި، މަދުވެގެން އެކަކު މަރުވެ އިތުރު ބަޔަކަށް އެކިވަރުގެ އަނިޔާތައް ވެއްޖެ އެވެ.
ގޭޝްމް ޖަޒީރާގެ ގަވަރުނަރު ހުސައިން އަމީރު-ތައިމޫރީ އާދީއްތަ ދުވަހު ވިދާޅުވީ، "އެމެރިކާ-ޒަޔަނިސްޓް ދުޝްމަނުން" ފޮނުވާލި މިސައިލް އަރާފައިވަނީ ދަތުރުކުރަމުންދިޔަ މުދާ އުފުލާ އުޅަނދަކަށް ކަމަށެވެ.
މި ހަމަލާގައި އާންމުންގެ އެކަކު މަރުވެފައިވާއިރު، އިތުރު ހަތަރު މީހަކަށް އެކިވަރުގެ އަނިޔާތައް ލިބިފައިވާ ކަމަށް އޭނާ އިތުރަށް ވިދާޅުވި އެވެ.
އަމީރު-ތައިމޫރީ ފާހަގަކުރެއްވި ގޮތުގައި، މި ނުރައްކާތެރި ހަމަލާ ދީފައިވަނީ އެ ގައުމުގެ ގަޑިން ފަތިހު 5:00 (ޖީއެމްޓީން 01:30) ހާއިރު އެވެ. އަދި މި ހާދިސާގައި އަނިޔާވި މީހުންނަށް ފަރުވާ ދިނުމަށް ބޭނުންވާ މުހިންމު ފިޔަވަޅުތައް އަޅާފައިވާ ކަމަށްވެސް އޭނާ ވިދާޅުވި އެވެ.
މީގެ އިތުރުން، މި ހަމަލާއާ ގުޅޭ އިތުރު ތަފްސީލުތަކާއި އަނިޔާވި މީހުންގެ ހާލަތާ ބެހޭ މައުލޫމާތު، މިހާރު ކުރިއަށްދާ ތަހުގީގުތަކަށްފަހު އާންމުކުރާނެ ކަމަށް އޭނާ ވިދާޅުވި އެވެ.
އީރާނާ ދެކޮޅަށް އެމެރިކާ އާއި އިސްރާއީލުން ފަށާފައިވާ މި އުދުވާނީ ހަމަލާތަކުގެ އެންމެ ފަހުގެ ސިލްސިލާ ފެށިފައިވަނީ މިދިޔަ ފެބްރުއަރީ މަހުގެ 28 ވަނަ ދުވަހު އެވެ. އެ ދުވަހު އެމެރިކާ އާއި އިސްރާއީލުގެ ފައުޖުތަކުން ވަނީ އީރާނުގެ ސަރަހައްދުތަކަށް ބޮޑެތި ހަމަލާތަކެއް ދީފަ އެވެ.
މި ހަމަލާތަކުގެ ރައްދުގައި އީރާނުގެ ހަތިޔާރު އެޅި ފައުޖުތަކުން ދަނީ ކޮންމެ ދުވަހަކު އެ ސަރަހައްދުގައި ހުރި އެމެރިކާ އާއި އިސްރާއީލުގެ މަރުކަޒުތަކަށް މިސައިލާއި ޑްރޯން ހަމަލާތައް ދެމުންނެވެ. އަދި އީރާނުން ވަނީ އެމެރިކާ އާއި އެމެރިކާގެ ބައިވެރިންގެ އުޅަނދުފަހަރަށް ހުރްމުޒް ކަނޑުއޮޅި ބަންދުކޮށްފަ އެވެ.
