މައްކާއާއި މަދީނާ ސަރަހައްދަށް ހޫޘީން ދިން "ނުރައްކާތެރި" ހަމަލާތައް އޯއައިސީން ކުށްވެރިކޮށްފި
16 ސެޕްޓެމްބަރު 2026 | ބުދަ 06:08ޔަމަނުގެ ހޫޘީން މައްކާއާއި މަދީނާ ސަރަހައްދަށް އަމާޒުކޮށް ދޭ ހަމަލާތަކަކީ މުސްލިމުންގެ މުގައްދަސް ބިނާތަކުގެ ހުރުމަތް ކެނޑުން ކަމަށް ބުނެ އޯއައިސީން އެކަން ހަރުކަށި އިބާރާތުން ކުށްވެރިކޮށްފި. މި ފަދަ ޓެރަރިޒަމްގެ އަމަލުތަކާ ދެކޮޅަށް ސައުދީ އަރަބިއްޔާއިން އަޅާ ފިޔަވަޅުތަކަށް ފުރިހަމައަށް ތާއީދުކުރާނެ ކަމުގެ ޔަގީންކަން އެ ޖަމުއިއްޔާއިންދޭ
އޯއައިސީގެ ސެކްރެޓަރީ-ޖެނެރަލް އިސްލާއީލް ވަލަދު އަލް-ޝައިޚް އަހްމަދު | އެކްސް
ޔަމަނުގެ ހޫޘީ ޖަމާއަތުން އިސްލާމްދީނުގެ އެންމެ މުގައްދަސް ދެ ބިނާ ހުރި މައްކާއާއި މަދީނާ ސަރަހައްދަށް އަމާޒުކޮށް ދިން "ނުރައްކާތެރި" ހަމަލާތައް، އޯގަނައިޒޭޝަން ފޯ އިސްލާމިކް ކޯޕަރޭޝަނުން (އޯއައިސީ) އެންމެ ހަރުކަށި އިބާރާތުން ކުށްވެރިކޮށްފަ އެވެ.
އިސްލާމީ ގައުމުތައް ތަމްސީލުކުރާ އެންމެ ބޮޑު ޖަމުއިއްޔާ ކަމަށްވާ އޯއައިސީގެ ޖެނެރަލް ސެކްރެޓޭރިއަޓުން ނެރުނު ރަސްމީ ބަޔާނެއްގައި، ސައުދީ އަރަބިއްޔާގެ ރަސްކަމަށް އަމާޒުކޮށް ހޫޘީން މެދުނުކެނޑި ދެމުންދާ ހަމަލާތަކާއި އުދުވާންތައް ވަނީ ކުށްވެރިކޮށްފަ އެވެ. އޯއައިސީގެ ބަޔާނުގައި ފާހަގަކޮށްފައިވަނީ، ހޫޘީ ޖަމާއަތުން މައްކާއާއި މަދީނާ ސަރަހައްދަށް އަމާޒުކޮށް ދިން ނުރައްކާތެރި ހަމަލާތަކާއި، ސައުދީ އަރަބިއްޔާއަށް އަމާޒުކޮށް މެދުނުކެނޑި ދެމުންދާ އުދުވާނީ އަމަލުތައް އެ ޖަމިއްޔާއިން އެންމެ ހަރުކަށި އިބާރާތުން ކުށްވެރިކުރާ ކަމަށެވެ.
މުގައްދަސް ބިނާތަކުގެ ހުރުމަތް ކެނޑުން
މި ފަދަ ހަމަލާތަކުގެ ސަބަބުން އާންމު ރައްޔިތުންގެ މެދުގައި ބިރުވެރިކަން އުފެދި، މުގައްދަސް ބިނާތަކާއި މިސްކިތްތަކުގެ ހުރުމަތް ކެނޑިގެންދާ ކަމަށް އެ ޖަމިއްޔާއިން ފާހަގަކުރި އެވެ. ހަމަމިއާއެކު، މިއީ މުޅި ދުނިޔޭގެ މުސްލިމުންގެ ޝުއޫރުތަކާ ކުޅެލުން ކަމަށް ވެސް އޯއައިސީން ބުނެފައިވެ އެވެ.
މުގައްދަސް ބިނާތަކާއި، އަޅުކަންކުރާ ތަންތަނުގެ އިތުރުން އާންމު އުމްރާނީ ވަސީލަތްތަކަށް އަމާޒުކޮށް ހިންގާ މިފަދަ އަމަލުތަކަކީ އިސްލާމީ އަގުތަކާއި، ބައިނަލްއަގުވާމީ އުސޫލުތަކާއި ގާނޫނުތަކާ މުޅިން ހިލާފު "ޓެރަރިޒަމްގެ އަމަލުތަކެއް" ކަމަށް ޖެނެރަލް ސެކްރެޓޭރިއަޓުގެ ބަޔާނުގައި ބުނެފައިވެ އެވެ.
އޯއައިސީން ބުނީ، މުގައްދަސް ބިނާތަކުގެ ހުރުމަތް ކެނޑުމަކީ އެއްވެސް ހާލެއްގައި ބަލައިގަނެވޭނެ ކަމެއް ނޫން ކަމަށެވެ. އަދި، މި ފަދަ އަމަލުތައް ހިންގާ ފަރާތްތައް ހުއްޓުވައި، އެ ފަދަ ތަންތަނަށް ގެއްލުންދޭން މަސައްކަތްކުރާ ކޮންމެ ފަރާތަކަށް ހުރަސްއެޅުމަކީ ކޮންމެހެން ކުރަންޖެހޭ ކަމެއް ކަމަށް ވެސް އެ ޖަމުއިއްޔާއިން ފާހަގަކުރި އެވެ.
ސައުދީ އަރަބިއްޔާއާއެކު ފުރިހަމައަށް ސާބިތުވެ އޮތްކަން ހާމަކުރަމުން، އެ ގައުމަށް ދޭ ހަމަލާތައް ހުއްޓުވުމަށާއި، ގައުމީ ސަލާމަތާއި ސިޔާދަތު ރައްކާތެރިކުރުމަށާއި، މުގައްދަސް ބިނާތަކުގެ ހުރުމަތް ހިމާޔަތްކުރުމަށް ރިޔާޟުން އަޅާ ކޮންމެ ފިޔަވަޅަކަށް ތާއީދުކުރާނެ ކަމުގެ ޔަގީންކަން އޯއައިސީން ވަނީ ދީފަ އެވެ.
އަންގާރަ ދުވަހު މައްކާ ކައިރިއަށް ހޫޘީން ފޮނުވާލި ޑްރޯނެއް ސައުދީ އަރަބިއްޔާގެ ވައިގެ ދިފާއީ ނިޒާމުން ހުއްޓުވައި ވައްޓައިލާފައިވާ ކަމަށް ސައުދީ އަރަބިއްޔާއިން އިސްވެ އޮންނަ އަސްކަރީ އިއްތިހާދުންވަނީ ހާމަކޮށްފަ އެވެ.
އެ އިއްތިހާދުގެ ތަރުޖަމާނު ތުރުކީ އަލް-މާލިކީ ވިދާޅުވީ، އެ ޑްރޯން ހުއްޓުވާފައިވަނީ ސައުދީ އަރަބިއްޔާ ގަޑިން އިރުއޮއްސި 6:50 ހާއިރު، މަނާ ސަރަހައްދަކަށް ވަނުމުގެ ކުރިން ކަމަށެވެ. އަދި، އެ ޑްރޯންގެ ބައިތައް ވެއްޓިފައިވަނީ މައްކާގެ ދެކުނު ސަރަހައްދަށް ކަމަށް ވެސް އޭނާ ވިދާޅުވި އެވެ.
މިއީ މައްކާއަށް އަމާޒުކޮށް ހޫޘީން ހަމަލާދޭން މަސައްކަތްކުރި ދެވަނަ ފަހަރު ކަން އަލް-މާލިކީ ފާހަގަކުރެއްވި އެވެ. މީގެ ކުރިން 2017 ޖުލައި 27 ވަނަ ދުވަހު ވެސް ހޫޘީން ވަނީ މައްކާއަށް އަމާޒުކޮށް ބެލިސްޓިކް މިސައިލެއް ފޮނުވާލާފަ އެވެ.
މަސްދަރު: އޯއައިސީ
