ސައުދީން ހޫޘީންނަށް ވަރުގަދަ އިންޒާރެއް ދީފި

ޔަމަނުގެ ހޫޘީން ސައުދީ އަރަބިއްޔާއާ ދެކޮޅަށް އެންމެ ފަހުން ދީފައިވާ ބަޔާންތައް ސައުދީން ހޮނިހިރު ދުވަހު ވަރުގަދަ ރައްދެއް ދީފި އެވެ. ސައުދީން ބުނެފައިވަނީ އެ ބަޔާނަކީ ހަގީގަތް އޮޅުވާލުމަށްޓަކައި ދައްކާ ވާހަކަތަކެއް ކަމަށެވެ.

ޔަމަނުގެ ގާނޫނީ ސަރުކާރަށް އެހީތެރިވުމަށް ސައުދީ އިސްވެ އޮވެ އުފައްދާފައިވާ ކޯލިޝަންގެ ތަރުޖަމާނު މޭޖަރ ޖެނެރަލް ތުރުކީ އަލް މާލިކީ ނެރުއްވި ބަޔާނެއްގައި ވިދާޅުވީ، ހުކުރު ދުވަހު ހޫޘީން ސައުދީއާ ދެކޮޅަށް ދިން ބަޔާންތަކަކީ، ޔަމަނުގެ އަޚުވަންތަ ރައްޔިތުންނާ ދެކޮޅަށް އެ ޖަމާއަތުން ހިންގަމުންދާ ބޮޑެތި ޖަރީމާތަކުން މީހުންގެ ސަމާލުކަން އަނބުރާލުމަށް ކުރި މަސައްކަތެއް ކަމަށެވެ. އަދި އެއީ ހޫޘީންގެ ސަބަބުން ޔަމަނުގެ ރައްޔިތުން އުފުލަމުންދާ އިގްތިސާދީ ތަދާއި ތަކުލީފުތަކުގެ ޒިންމާއިން ރެކުމަށް ކުރާ ކަމެއް ކަމަށްވެސް އޭނާ ވިދާޅުވި އެވެ.

އަލް މާލިކީ އިތުރަށް ވިދާޅުވީ، ހޫޘީންގެ މި ބަޔާންތަކަކީ އެ ޖަމާއަތުން ސަރަހައްދީ އަދި ބައިނަލްއަގުވާމީ ސަލާމަތާއި ރައްކާތެރިކަން ނަގާލުމަށް ކުރަމުންދާ މަސައްކަތްތަކާއި، ދެމުންދާ ހަމަލާތަކުގެ އިތުރު ބޮޅެއް ކަމަށެވެ.

މީގެ އިތުރުން، ސައުދީ އަރަބިއްޔާއަށާއި، އެ ގައުމުގެ ރައްޔިތުންނާއި، އެ ގައުމުގައި ދިރިއުޅޭ މީހުންނާއި، ގައުމީ މުދަލަށް އަމާޒުކޮށްދޭ ކޮންމެ ހަމަލާއަކަށް ނުވަތަ ޔަމަނުގެ ސިޔާދަތަށް އަރައިގަތުމަށް ކުރާ ކޮންމެ މަސައްކަތަކަށް، މީގެ ކުރިން ދުވަހަކުވެސް ފެނިފައިނުވާ ފަދަ ވަރުގަދަ އަދި ހަރުކަށި ރައްދެއް ދޭނެ ކަމުގެ އިންޒާރުވެސް އޭނާ ވަނީ ދެއްވާފަ އެވެ.