ހަޔާތުގެ އެންމެ މުހިންމު އެއް ސިއްރުގެ ހަގީގަތް ހާމަ ކުރި ސައިންސްވެރިންނަށް ނޮބެލް އިނާމް

ހަޔާތުގެ އެންމެ މުހިންމު އެއް ސިއްރުގެ ހަގީގަތް ހޯދި ތިން ސައިންސްވެރިންނަށް މިއަހަރު ބޭސްވެރިކަމުގެ ދާއިރާއިން ނޮބެލް އިނާމު ދިނުމަށް ނިންމައިފިއެވެ. މި ތިން ސައިންސްވެރިންގެ ދިރާސާ އިން ހާމަ ކޮށްފައިވަނީ، އިންސާނާގެ "ބަޔޮލޮޖިކަލް ކްލޮކް" ގެ ނިޒާމް މަސައްކަތް ކުރާ ގޮތާ ބެހޭ ގޮތެވެ. ރޭދުވާލާ އެކު ހަށިގަނޑަށް ބަދަލުތައް އަންނަނީ ކިހިނެއް، ކޮން ގޮތަކުންކަން މި ދިރާސާގެ ނަތީޖާ ތަކާ ހަމައަށް އޮތީ ބޮޑު ސުވާލު މާކެއްގެ ތެރޭގައެވެ. ރޭ ވުމުން ނިދި އަންނަނީ ކީއްވެތޯ އާއި ނިދި އިންސާނާ އަށް ބޭނުންވަނީ ކީއްވެތޯ އެއީ ޒަމާންތަކަކަށް ސައިންސްވެރިންގެ ހިތުގައި ޖަވާބު ހޯދުމަށް ޝައުގުވެރިވެފައިވާ ސުވާލުތަކެވެ.

ސައިންސްވެރިންގެ ބަހުން "ސާކޭޑިއަން ރިދަމް" އަކީ ފާއިތުވަމުންދާ ދުވަހުގެ ވަގުތާއެކު ހަށިގަނޑަށް އަންނަ ބަދަލެވެ. އެ ބަދަލުތަކާއެކު، ނިދި އައުމާއި، ނިދި ފިލުމާއި، ހަށިގަނޑުގެ ފިނިހޫނުމިނަށް ބަދަލު އައުމާއި، ހޯމޯން އިތުރުވެ މަދުވުން ފަދަ އެތައް ކަމެއް ހަށިގަނޑުގައި ހިނގާކަން ކުރިން ސައިންސްވެރިން އޮތީ ދެނެގަނެފައެވެ. އެކަމަކު ޖެފްރީ ހޯލް އާއި މައިކަލް ރޮސްބާޝް އަދި މައިކަލް ޔަންގް ގެ މި ދިރާސާގެ ނަތީޖާ ތަކާ ހަމައަށް، އެއީ ކިހިނެއް ހިނގާ ކަމެއް ކަމެއް ނޭނގެއެވެ. މި ތިން ސައިންސްވެރިންގެ ހޯދުންތަކުން އިރު ދައުރުވަމުންދާ ދިއުން ހަށިގަނޑުން ދެނެގަންނަނީ ކިހިނެއްކަން ސާފުވެއްޖެއެވެ. އިރުގެ ހަރަކާތާއެކު ހަށިގަނޑަށް އަންނަ ބަދަލުތައް އަންނަނީ ކީއްވެގެން ކަން ވިސްނައިގަނެވިއްޖެއެވެ.

ނިދާފައި އޮންނަން ޖެހޭ ވަގުތުތަކުގައި ހޭލާ ހުރުމުގެ ސަބަބުން ހަށިގަނޑަށް ކުރިމަތިވާ އުނދަގޫތަކާއި، އަދި ހޭލާ ހުންނަން ޖެހޭ ވަގުތު ނިދާފައި އޮވެއްޖެނަމަ، ހަށިގަނޑުގެ އެތެރޭގެ ނިޒާމްތަކަށް ބުރޫ އަރާ ގޮތް މި ދިރާސާއިން މި ތިން ސައިންސްވެރިން ހާމަ ކޮށްދީފިއެވެ. މިހާރު އެނގޭ އެއްޗަކީ ރޭދުވާލަށް އަންނަ ބަދަލުތަކާއެކު ހަށިގަނޑު އެކަން ދެނެގަނެ، ހަށިގަނޑަށް ގެންނަ ބަދަލުތަކަކީ އެއްވެސް މީހެއްގެ އިޚްތިޔާރުގައި އޮތް އަދި އަމިއްލަ އަށް އެކަން ކޮންޓްރޯލް ކުރެވޭނެ ކަންކަމަށް ނުވާ ކަމެވެ. އެކަން ކޮންޓްރޯލް ކުރަނީ އިރު ދައުރުވުމާއި ގުޅިފައިވާ، ސެލްތަކުގައި މޮލެކިއުލް ލެވެލްގައި ހިނގާ ކަންތައްތަކުންނެވެ.

ނޯބެލް އިނާމު ލިބުނު ސައިންސްވެރިންގެ ދިރާސާގައި މި އާދަޔާ ޚިލާފް ގުދުރަތީ ނިޒާމަށް ބަދަލުތަކެއް ގެނެވެނޭ ގޮތްތަކެއް ނެތްނަމަވެސް، ގަޑިން ގަޑިއަށް ރޭގަނޑު ނިދުމުގެ މުހިއްމުކަން ހާމަވެގެންދެއެވެ. "ފްރުޓް ފްލައި" ބޭނުންކޮށްގެން ކުރިއަށް ގެންދިޔަ މި ދިރާސާގައި ސައިންސްވެރިން ދައްކައިދިނީ "ބަޔޮލޮޖިކަލް ކްލޮކް" މަސައްކަތް ކުރަނީ ހަށިގަނޑުގެ ސެލްތަކުގައި ކުއްލިއަކަށް އުފެދެ އަދި އިސާހިތަކު ނެތި ހަލާކުވެ ދާ ޕްރޮޓީން އެއްގެ ސަބަބުން ކަމުގައެވެ. މި ގޮތުން ބަޔޮލޮޖިކަލް ރިދަމް ކޮންޓްރޯލް ކުރާ ޖީން އެއް ވަކިކޮށް، އެޖީން ދިރާސާކުރިއެވެ. މިދިރާސާއިން ދެއްކި ގޮތުގައި އެސޫފީގެ ބަޔޮލޮޖިކަލް ރިދަމް ބަލަހައްޓާ ޖީންގައި ހިމެނޭ މުހިއްމު އެއް ޕްރޮޓީން އުފެދެނީ ރޭގަނޑުގެ ވަގުތުއެވެ. އަދި އިރުއެރުމުން އެޕްރޮޓީން އަމިއްލަ ޒާތުގައި ނެތި ހަލާކުވެއެވެ. އިރު އޮއްސުމާއެކު ސެލްތަކުގައި އެ ޕްރޮޓީން އަނެއްކާވެސް އުފެދެން ފަށައެވެ. އިރު އެރުމާއެކު އެ ޕްރޮޓީން ހަލާކުވާން ފަށައެވެ. ރޭ ދުވާލާއެކު ދިރި ހުރިހާ ދުވަހަކު ސެލްތަކުގެ ތެރޭގައި މި ނިޒާމް ހުއްޓުމެއްނެތި މި ގޮތުގެ މަތިން ތަކުރާރުވަމުން ދާ ގޮތަށެވެ. މިދިރާސާގައި ހޯދުނު ހޯދުންތަކުގެ އަލީގައި ސައިންސްވެރިން ދެކެނީ ދުނިޔޭގައި ލެއްވި ކޮންމެ ދިރުމެއްގައި މިނިޒާމް އެކުލެވޭ ކަމަށާއި، އަދި އެއެއްޗެއްގެ ބަޔޮލޮޖިކަލް ކްލޮކް މަސައްކަތްކުރަނީ އިރުގެ ދައުރުވުމަށް ބިނާކޮށް ހަށިގަނޑުގައި ލައްވާފައިވާ މި ޚާއްސަ ގުދުރަތީ ޓެކްނޮލޮޖީގެ އެހީގައި ކަމަށެވެ. އެއާއެކު ގުދުރަތީ ނިޒާމް ފަރުމާވެފައިވާ ގޮތައް ދިރިއުޅުމުގެ އާދަތައް ބެހެއްޓުމުގެ މުހިންމު ކަން މިދިރާސާއިން ކިތަންމެ ރަނގަޅަކަށްވެސް ވަނީ ހާމަވެގެން ގޮސްފައެވެ.

މި މުހިންމު ހޯދުން ހޯދި އެމެރިކާގެ މި ތިން ސައިންސްވެރިންނަށް ނޮބެލް އިނާމުގެ ގޮތުގައި 1.1 މިލިއަން އެމެރިކާ ޑޮލަރު ލިބޭނެއެވެ.