ޔަމަނުގެ ހޫޘީން ސައުދީގެ ކިންގް ޚާލިދު އެއާބޭހަށް ހަމަލާދީފި
14 ސެޕްޓެމްބަރު 2026 | ހޯމަ 16:07ސައުދީ އަރަބިއްޔާގެ ޚަމީސް މުޝައިތުގައި ހުންނަ ކިންގް ޚާލިދު އެއާބޭހަށް އަމާޒުކޮށް، ޔަމަނުގެ ހޫޘީން ބެލިސްޓިކް މިސައިލާއި ޑްރޯން ބޭނުންކޮށްގެން ވަރުގަދަ ހަމަލާތަކެއް ދީފި. ޔަމަނަށް ކުރިމަތިކޮށްފައިވާ ހިސާރު އުވާލަންދެން ސައުދީގެ މުހިންމު ތަންތަނަށް ހަމަލާދޭނެ ކަމުގެ އިންޒާރު ހޫޘީން ދީފައިވާއިރު، ރަތްކަނޑުން ދަތުރުކުރާ ސައުދީގެ އުޅަނދުތަކަށްވެސް ހަމަލާދޭނެ ކަމަށް ވަނީ ބުނެފައި
މި ފޮޓޯއިން ފެންނަނީ ސައުދީ އަރަބިއްޔާގެ ވެރިރަށް ރިޔާޟާ ގާތްގަނޑަކަށް 884 ކިލޯމީޓަރު ދުރުގައި އޮންނަ ޚަމީސް މުޝައިތު ކައިރީގައި އޮންނަ ކިންގް ޚާލިދު އެއާބޭސްއަށް، އެ ގައުމުގެ އެފް-15 މަރުކާގެ ހަނގުރާމަމަތީ ބޯޓެއް ޖައްސާ މަންޒަރު | އޭއެފްޕީ
ޔަމަނުގެ ހޫޘީންނާ ދެކޮޅަށް ސައުދީ އަރަބިއްޔާއިން ދެމުންދާ އަސްކަރީ ހަމަލާތަކާއި، ކުރިމަތިކުރުވާފައިވާ ހިސާރުގެ އަމަލުތަކަށް ރައްދު ދިނުމުގެ ގޮތުން، ސައުދީގެ ދެކުނު ސަރަހައްދެއް ކަމަށްވާ އަސީރުގައި ހުންނަ މުހިންމު ވައިގެ ބޭހަކަށް ޔަމަނުގެ ހަތިޔާރު އެޅި ފައުޖުތަކުން މިސައިލާއި ޑްރޯން ބޭނުންކޮށްގެން ވަރުގަދަ ހަމަލާތަކެއް ދީފި އެވެ.
ހޫޘީންގެ އަސްކަރީ ތަރުޖަމާނު ބްރިގޭޑިއާ ޖެނެރަލް ޔަހްޔާ ސަރީޢު ހޯމަ ދުވަހު ޓީވީ މެދުވެރިކޮށް ދެއްވި ބަޔާނެއްގައި ވިދާޅުވީ، ސައުދީގެ ވެރިރަށް ރިޔާޟްއާ ގާތްގަނޑަކަށް 884 ކިލޯމީޓަރު ދުރުގައި އޮންނަ ޚަމީސް މުޝައިތު ސިޓީ ކައިރީގައި އޮންނަ ކިންގް ޚާލިދު އެއާބޭސްއަށް އަމާޒުކޮށް، އެ ގައުމުގެ އަސްކަރީ ފައުޖުތަކުން ފުޅާ ދާއިރާއެއްގެ އަސްކަރީ އޮޕަރޭޝަނެއް ހިންގާފައިވާ ކަމަށެވެ.
އޭނާ ފާހަގަކުރެއްވި ގޮތުގައި، ޔަމަނުގައި އަމިއްލައަށް އުފައްދާފައިވާ އެތައް ބެލިސްޓިކް މިސައިލަކާއި އަސްކަރީ ޑްރޯންތަކެއް ބޭނުންކޮށްގެން ދިން މި ހަމަލާތަކުގައި، އެ ވައިގެ ބޭސްގެ އަސްކަރީ ވަސީލަތްތަކާއި، އުމްރާނީ ވަސީލަތްތަކާއި، މަތިންދާބޯޓު ބާއްވާ ހޭންގަރުތަކާއި، ރޭޑާ ނިޒާމުތަކާއި، ރަންވޭތަކުގެ އިތުރުން ހަތިޔާރު ގުދަންތަކަށާއި ކަނޑައެޅިފައިވާ އެހެނިހެން އަމާޒުތަކަށް ވަނީ ހަމަލާދީފަ އެވެ.
"އަޅުގަނޑުމެންގެ ރައްޔިތުންނާ ދެކޮޅަށް ހިންގާ އުދުވާނުތައް ހުއްޓާނުލާހާ ހިނދަކު، ސައުދީ އަރަބިއްޔާގެ އެތެރޭގެ މުހިންމު ތަންތަނަށް އަމާޒުކޮށް ޔަމަނުގެ ހަތިޔާރު އެޅި ފައުޖުތަކުން ދޭ ފެންވަރު ރަނގަޅު އަސްކަރީ ހަމަލާތައް ކުރިއަށް ގެންދާނެ. އަދި އަލަށް ދޭ ކޮންމެ ހަމަލާއަކަށް ވަރުގަދަ އަދި އެއަށްވުރެ ހަރުކަށި ރައްދެއް ދޭނެ،" ސަރީޢު ވިދާޅުވި އެވެ.
ޔަމަނުގެ އިސް އޮފިޝަލް އިތުރަށް ވިދާޅުވީ، "ހިސާރަށް ހިސާރުން އަދި ހަމަލާއަށް ހަމަލާއިން" ރައްދުދިނުމުގެ ސިޔާސަތު ދަމަހައްޓާނެ ކަމަށާއި، ސައުދީގެ އުދުވާނުތައް ހުއްޓާލައި، ލޮބުވެތި ވަތަނަށް ކުރިމަތިކޮށްފައިވާ ހިސާރު އެއްކޮށް އުވާލަންދެން ސައުދީ ސިފައިން ޖަމާވެފައިވާ ތަންތަނަށް ހަމަލާދެމުން ގެންދާނެ ކަމަށެވެ.
ޔަމަނަށް ކުރިމަތިކޮށްފައިވާ ގާތްގަނޑަކަށް 12 އަހަރުވީ ބޭއިންސާފު އަދި އަނިޔާވެރި ހިސާރަށް ރައްދު ދިނުމުގެ ގޮތުންކަމަށް ބުނެ، ސަންއާގައި އޮންނަ ޔަމަނުގެ ސަރުކާރުން ވަނީ ޖުލައި މަހުގެ 20 ވަނަ ދުވަހު ސައުދީ އަރަބިއްޔާއާ ދެކޮޅަށް ކަނޑުގެ މަގުން ހިސާރުކުރުމުގެ އޮޕަރޭޝަނެއް އިއުލާނުކޮށްފަ އެވެ.
މީގެ ނަތީޖާއެއްގެ ގޮތުން، ރަތްކަނޑުގައި ދަތުރުކުރާ ސައުދީ އަރަބިއްޔާއާ ގުޅުންހުރި އުޅަނދުފަހަރަށް އަމާޒުކޮށް ކާމިޔާބު ގިނަ ހަމަލާތަކެއް ދީފައިވާ ކަމަށް ހޫޘީންގެ ހަތިޔާރު އެޅި ފައުޖުތަކުން ވަނީ ރިޕޯޓުކޮށްފަ އެވެ.
މާރިޗު 2015 ގައި ސައުދީ އަރަބިއްޔާއާއި އެ ގައުމުގެ ބައިވެރިން ގުޅިގެން ޔަމަނު ހިސާރުކޮށް، ފުޅާ ދާއިރާއެއްގެ އަސްކަރީ ހަނގުރާމައެއް ހޫޘީންނާ ދެކޮޅަށް ފެށި އެވެ. މި އަމަލުތަކުގައި އެމެރިކާއާއި ހުޅަނގުގެ ބައެއް ގައުމުތަކުން ވަނީ އަސްކަރީ، ސިޔާސީ އަދި ލޮޖިސްޓިކް އެހީތެރިކަން ފޯރުކޮށްދީފަ އެވެ.
މި ހަނގުރާމައިގައި ޔަމަނުގެ އެތައް ހާސް ރައްޔިތުންނެއްގެ ފުރާނަ ގެއްލިފައިވީ ނަމަވެސް، ސައުދީ އަރަބިއްޔާގެ މަސްލަހަތު ހިމާޔަތްކުރާނެ "ޕަޕެޓް" ނުވަތަ ގޮނޑިކޮއްކޮ ސަރުކާރެއް އަލުން ގާއިމުކުރުމަށް އެ ގައުމުން ހިފާފައިވާ މައިގަނޑު މަގްސަދު ހާސިލުކުރުމުގައި ވަނީ ނާކާމިޔާބުވެފައި ކަމަށް ރިޕޯޓުތައް ބުނެ އެވެ.
