ހޫޘީންގެ ހަމަލާއެއްގައި ސައުދީ އަރަބިއްޔާގެ މިސްކިތަކަށް ގެއްލުންވެ، ދެ މީހުން ޒަޚަމްވެއްޖެ
13 ސެޕްޓެމްބަރު 2026 | އާދީއްތަ 08:16ޔަމަނުގެ ހޫޘީން ސައުދީ އަރަބިއްޔާގެ އަސްކަރީ މަރުކަޒުތަކަށް އަމާޒުކޮށް ވަރުގަދަ ހަމަލާތަކެއް ދީފައިވާއިރު، މި ހަމަލާތަކުގައި ގިނަ ބަޔަކު ޒަޚަމްވެ އާންމު ތަންތަނަށް ބޮޑެތި ގެއްލުންތަކެއް ވަނީ ލިބިފައި. ޔަމަނުގެ އަހުލީހަނގުރާމަ އަލުން ވަރުގަދަވެ، މަސްރަހު ނުރައްކާތެރި މަރުހަލާއަކަށް ގޮސްފައިވާ ކަމުގެ އިންޒާރު އދ. އިން ވަނީ ދީފައި
ސައުދީ އަރަބިއްޔާއަށް ހޫތީން ދިން ހަމަލާތަކާ ގުޅިގެން، ގެއްލުން ލިބިފައިވާ ސަރަހައްދުތަކުގައި ސަލާމަތީ ބާރުތަކާއި ކުއްލި ހާލަތްތަކުގައި ހަރަކާތްތެރިވާ ފަރާތްތަކުން ހަރަކާތްތެރިވަނީ. | ރޮއިޓާސް
ޔަމަނުގެ ހަތިޔާރު އެޅި ހޫޘީ ޖަމާއަތުން ސައުދީ އަރަބިއްޔާގެ ދެކުނުގެ ސަރަހައްދެއް ކަމަށްވާ ޖާޒާންއަށް އަމާޒުކޮށް ފޮނުވާލި ހަމަލާއެއްގައި ދެ މީހަކު ޒަޚަމްވެ، މިސްކިތަކަށާއި ބައެއް އިމާރާތްތަކަށް ބޮޑެތި ގެއްލުންތަކެއް ލިބިފައިވާ ކަމަށް ސައުދީ ސިވިލް ޑިފެންސުން ހާމަކޮށްފި އެވެ. ހޮނިހިރު ދުވަހު ޖާޒާންގެ އަލް-ތުވާލު ގަވަރުނަރޭޓަށް ދިން މި ހަމަލާގެ ސަބަބުން އެ ސަރަހައްދުގައި ހުރި ގިނަ އަދަދެއްގެ އުޅަނދުފަހަރަށް ވެސް ގެއްލުން ލިބިފައިވާ ކަމަށް އެ އިދާރާއިން އިތުރަށް ހާމަކޮށްފައިވެ އެވެ. މި ހާދިސާއާ ގުޅިގެން ސިވިލް ޑިފެންސްގެ ތަރުޖަމާނު ވިދާޅުވީ އާންމުން ދިރިއުޅޭ ތަންތަނަށް އަމާޒުކޮށް މި ފަދަ ހަމަލާތައް ދިނުމަކީ "ބައިނަލްއަގުވާމީ އިންސާނީ ގާނޫނުތަކާ ކަނޑައެޅިގެން ޚިލާފު އަމަލެއް" ކަމަށާއި، މި ހާދިސާއާ ގުޅިގެން ކަނޑައެޅިފައިވާ ކުއްލި ހާލަތުގެ އުސޫލުތަކަށް މިހާރު އަމަލުކުރަން ފަށާފައިވާ ކަމަށެވެ.
ޔަމަނުގެ ސަރުކާރާ ދެކޮޅަށް ހަނގުރާމަކުރާ، އީރާނުން މަދަދުދޭ ހޫޘީން ބުނީ، ސައުދީ އަރަބިއްޔާގެ ދެކުނުގެ ނަޖްރާން ޕްރޮވިންސްގެ ޝަރޫރާގައި ހުންނަ ސައުދީ އަސްކަރީ މަރުކަޒަކަށް ބެލިސްޓިކް މިސައިލާއި ޑްރޯން ބޭނުންކޮށްގެން ހަމަލާދީފައިވާނެ ކަމަށެވެ. ހޫޘީންގެ އަސްކަރީ ތަރުޖަމާނު ޔަހްޔާ ސަރީއު ބުނީ، މި ހަމަލާ އަމާޒުކުރީ "ހަތިޔާރު ގުދަންތަކަށާއި ކޮމާންޑް އެންޑް ކޮންޓްރޯލް ސެންޓަރުތަކަށް" ކަމަށާއި، އެ ތަންތަނަކީ ހޫޘީންގެ ގައުމާއި ރައްޔިތުންނާ ދެކޮޅަށް ހިންގާ އުދުވާނުތައް ރާވައި ހިންގާ މަރުކަޒުތައް ކަމަށެވެ. މި ހަމަލާ ދިން ވަގުތެއް ސަރީއު ހާމަކޮށްފައި ނުވި ނަމަވެސް، ސައުދީ އަރަބިއްޔާއިން އަސްކަރީ ހަރަކާތްތައް ކުރިއަށްގެންދާނަމަ، އެ ގައުމުގެ އެތެރެއަށް މިއަށްވުރެ ވަރުގަދަ އަދި ބޮޑެތި ހަމަލާތައް ދޭނެ ކަމުގެ އިންޒާރު އޭނާ ދިނެވެ. ސައުދީ ސިވިލް ޑިފެންސުން ބުނީ، ޚަމީސް މުޝައިޠު ގަވަރުނަރޭޓްގެ ރައްޔިތުންނަށް ދީފައިވާ އިންޒާރަށްފަހު، މިހާރު އެ ސަރަހައްދަށް އޮތް ނުރައްކާ ފިލާފައިވާ ކަމަށެވެ.
ވޭތުވެދިޔަ މަދު ދުވަސްތަކެއްގެ ތެރޭގައި ހޫޘީން ވަނީ ސައުދީ އަރަބިއްޔާގެ ދެކުނުގެ ސަރަހައްދުތަކަށް މިސައިލާއި ޑްރޯން ބޭނުންކޮށްގެން ގިނަ ހަމަލާތަކެއް ދީފަ އެވެ. މި ގޮތުން މިދިޔަ އަންގާރަ ދުވަހު ވެސް އެ ގްރޫޕުން ވަނީ ސައުދީ އަރަބިއްޔާގެ އަބްހާ، ޚަމީސް މުޝައިޠު، ޖާޒާން (جَازَان) އަދި ނަޖްރާންގެ އާންމު ތަންތަނަށާއި އިގްތިސާދީ މަރުކަޒުތަކަށް ހަމަލާދީފަ އެވެ. މި ހަމަލާތަކުގައި އަންހެނުންނާއި ކުޑަކުދިން ހިމެނޭހެން 73 މީހަކު ޒަޚަމްވި އެވެ.
ސައުދީ އަރަބިއްޔާއަށް އަމާޒުކޮށް ދެމުންދާ މި ހަމަލާތަކަކީ ޔަމަނުގެ ދިގުލީ އަހުލީހަނގުރާމައިގެ ތެރެއިން އައިސްފައިވާ ވަރުގަދަ ކުރިމަތިލުންތަކެކެވެ. އދ. މެދުވެރިވެގެން ގާއިމުކުރި ސުލްހައިގެ އެއްބަސްވުމުގެ ދަށުން ހަތަރު އަހަރެއްހާ ދުވަހު މަޑުޖެހިފައި އޮތުމަށްފަހު، މިދިޔަ ޖުލައި މަހުން ފެށިގެން މި ހަނގުރާމަ ވަނީ އަލުން ވަރުގަދަވެފަ އެވެ. ހޫޘީ ހަނގުރާމަވެރިން މިހާރު ވަނީ ރަތް ކަނޑުގެ އައްސޭރިފަށުގައި އޮތް ޔަމަނުުގެ ހުރިހާ ސަރަހައްދުތަކެއް އެ ޖަމާއަތުގެ ބާރުގެ ދަށަށް ގެންގޮސްފަ އެވެ. މީގެ ތެރޭގައި، އިސްތިރާތީޖީ ގޮތުން މުހިންމު ބަނދަރު ރަށެއް ކަމަށްވާ އަލް-މުޚާ ހިމެނެ އެވެ. ހަމަމިއާއެކު، ޔަމަނުގެ ސަރުކާރު ސިފައިން ވެސް ދަނީ އަލް-ޖައުފު، މާރިބު އަދި އަލް-ބައިޟާގައި ހޫޘީންގެ ބާރުގެ ދަށުގައި އޮތް ސަރަހައްދުތަކަށް ހަމަލާ ދެމުންނެވެ. އިންޓަނޭޝަނަލް އޯގަނައިޒޭޝަން ފޯ މައިގްރޭޝަންއާއި (އައި.އޯ.އެމް) ރަސްމީ އިދާރާތަކުން ބުނީ، މި ކުރިމަތިލުންތަކުގައި މިހާތަނަށް 500 އަށްވުރެ ގިނަ މީހުން މަރުވެ، އެތައް ހާސް ބަޔަކު ގެދޮރު ދޫކޮށް ގޮސްފައިވާ ކަމަށެވެ.
މި މައްސަލައާ ގުޅިގެން އދ. ގެ ސަލާމަތީ މަޖިލީހުން މި މަހު ކުއްލި ބައްދަލުވުމެއް ބާއްވާފައިވާއިރު، އދ. އިން ޔަމަނަށް ކަނޑައަޅާފައި ހުންނަ ހާއްސަ މަންދޫބު ހާންސް ގްރުންޑްބާގް ވަނީ ޔަމަނުގެ ހަނގުރާމަ "އާ އަދި މިއަށްވުރެ ނުރައްކާތެރި މަރުހަލާއަކަށް" ގޮސްފައިވާ ކަމުގެ އިންޒާރު ދެއްވާފަ އެވެ.
މަސްދަރު: އަލް ޖަޒީރާ
