ހޫޘީންގެ އަލަށް ހިފި ސަރަހައްދުތަކަށް ސައުދީ އަރަބިއްޔާ އިން ބޮން އަޅައިފި
13 ސެޕްޓެމްބަރު 2026 | އާދީއްތަ 11:12ޔަމަނުގެ މާރިބް ސިޓީ ހިމެނޭހެން ހޫޘީން އަލަށް ހިފި ސަރަހައްދުތަކަށް އަމާޒުކޮށް ސައުދީ އަރަބިއްޔާއިން ވަރުގަދަ ވައިގެ ހަމަލާތަކެއް ދީފި. ސައުދީ އަރަބިއްޔާގެ މަދަދު ލިބޭ ޔަމަނު ސިފައިން ފަހަތަށް ޖެހިފައިވާތީ ހޫޘީންގެ ކުރިއެރުންތައް ހުއްޓުވުމަށް ސައުދީން 129 ހަމަލާ ދީފައިވާއިރު، ހޫޘީން ވަނީ ސައުދީގެ އަސްކަރީ މަރުކަޒަކަށް މިސައިލް ހަމަލާއެއް ދީފަ
ސައުދީ އަރަބިއްޔާގެ އަސްކަރީ މަތިންދާބޯޓުތަކުން ޔަމަނުގެ ހޫތީންގެ މަރުކަޒުތަކަށް ވަރުގަދަ ހަމަލާތަކެއް ދީފި | ސޯޝަލް މީޑިއާ
ޔަމަނުގެ ހޫޘީން އެ ގައުމުން އަލަށް ހިފި ސަރަހައްދުތަކަށް ސައުދީ އަރަބިއްޔާ އިން ބޮން އަޅައި ވަރުގަދަ ހަމަލާތަކެއް ދީފި އެވެ.
އަލްޖަޒީރާ އިން ރިޕޯޓުކޮށްފައިވާ ގޮތުގައި ސައުދީ އަރަބިއްޔާއިން ދެމުންދާ ވައިގެ ހަމަލާތައް މައިގަނޑު ގޮތެއްގައި އަމާޒުކޮށްފައިވަނީ ހޫޘީން އަލަށް ހިފާފައިވާ ސަރަހައްދުތަކަށެވެ. ވަކި ސަރަހައްދެއް ނުވަތަ ރަށެއްގެ ކޮންޓްރޯލް ހޯދުމަށްފަހު، އެ ތަނެއް ދަމަހައްޓަން އަސްކަރީ އެހީތެރިކަމާއި އިތުރު ފައުޖުތައް ބޭނުންވާނެ ކަމަށާއި ސައުދީ އަރަބިއްޔާގެ ވައިގެ ހަމަލާތަކުގެ މައިގަނޑު ބޭނުމަކީ ހޫޘީންގެ އެފަދަ އަސްކަރީ ހަރަކާތްތަކަށް ހުރަސްއެޅުން ކަމަށް ވެސް ރިޕޯޓުކޮށްފައިވެ އެވެ.
ޔަމަނުގެ ސަރުކާރުގެ ބާރުގެ ދަށުގައި އޮންނަ މާރިބް ސިޓީއަށް ހޫޘީންގެ އަންސާރުﷲ ޖަމާއަތުން އަތްގަދަކުރަން މަސައްކަތް ކުރަމުންދާ އުތުރުގެ ސަރަހައްދުތައް ހިމެނޭހެން، އެ ޖަމާއަތުގެ ބާރުގެ ދަށަށް ދާދިފަހުން ދިޔަ ސަރަހައްދުތަކަށް މިހާތަނަށް 129 ވައިގެ ހަމަލާ ސައުދީ އަރަބިއްޔާ އިން ވަނީ ދީފަ އެވެ.
އެހެން ނަމަވެސް މި ހަމަލާތަކާ ގުޅިގެން ހޫޘީން ފަހަތަށް ޖެހިފައިވާ މަންޒަރެއް އަދި ފެންނާކަށް ނެތެވެ. އަދި ދެ ފަރާތުގެ މެދުގައި ސީދާ ކުރިމަތިލުންތަކެއް މިހާރު ހިނގަމުން ނުދާއިރު، މިވަގުތު މައިގަނޑު ގޮތެއްގައި ކުރިއަށްދަނީ ވައިގެ ހަމަލާތަކެވެ. މުޚާ ބަނދަރާއި ބާބުލް މަންދަބް ކައިރީގައި ހުރި ސަރަހައްދުތަކުން ޔަމަނުގެ ސަރުކާރު ސިފައިން ވަރަށް ބޮޑަށް ފަހަތަށް ޖެހިފައިވާތީ، އެ ސަރަހައްދުގައި ބަޑީގެ ހަމަލާތައް ބަދަލުކުރުން ފަދަ އެއްވެސް ކުރިމަތިލުމެއް މިހާރު ނުހިނގާ ކަމަށްވެސް އަލްޖަޒީރާގެ ރިޕޯޓަރު ބުނެފައިވެ އެވެ.
އެ ސަރަހައްދުގެ އެއްވެސް ހިސާބަކުން ޔަމަނު ސަރުކާރުގެ ސިފައިން ފެންނަން ނެތުމުގެ ސަބަބުން، ހޫޘީންގެ އަސްކަރީ ކުރިއެރުންތައް ހުއްޓުވުމަށް މިހާރު މައިގަނޑު ގޮތެއްގައި ބަރޯސާވަނީ ސައުދީ އަރަބިއްޔާގެ ވައިގެ ހަމަލާތަކަށެވެ.
އަނެއްކޮޅުން، ޔަމަނުގެ ހޫޘީން ފޮނުވާލި މިސައިލެއް ނުވަތަ ރޮކެޓެއްގެ ސަބަބުން މިސްކިތަކަށާއި، އާންމުން ދިރިއުޅޭ ގެތައް ހިމެނޭހެން ބައެއް އިމާރާތްތަކަށް ލިބިފައިވާ ގެއްލުންތައް ފެންނަ ވީޑިއޯއެއް ސައުދީ އަރަބިއްޔާއިން ވަނީ އާންމުކޮށްފަ އެވެ.
ނަމަވެސް ހޫޘީން ބުނަމުންދަނީ އެމީހުން ހަމަލާ އަމާޒުކުރީ ސައުދީ އަރަބިއްޔާގެ އަސްކަރީ މަރުކަޒަކަށް ކަމަށެވެ.
މަސްދަރު: އަލްޖަޒީރާ
