އިންޑޮނޭޝިޔާގެ މައުންޓް ސެމޭރޫ ތިން ފަހަރަށް ގޮވައި، 1،000 މީޓަރަށް އަޅިއާއި ދުން ފެތުރެނީ
14 ސެޕްޓެމްބަރު 2026 | ހޯމަ 08:50އިންޑޮނޭޝިޔާގެ އިރުމަތީ ޖާވާގައި ހުންނަ މައުންޓް ސެމޭރޫ ތިން ފަހަރެއްގެ މަތިން ގޮވައި، ފަރުބަދައިގެ ކުންނުން 1،000 މީޓަރު އުސްމިނަށް އަޅިތައް ބޭރުވެއްޖެ. މި ހާދިސާއާ ގުޅިގެން އެ ގައުމުގެ ކަމާބެހޭ އިދާރާތަކުން ވަނީ ފަރުބަދައިގެ ނުރައްކަލުގެ ދަރަޖަ ލެވެލް 3 އަށް މަތިކޮށް، ފަރުބަދައިގެ ހަރަކާތްތައް މޮނިޓަރު ކުރަން ފަށާފައި
އިންޑޮނޭޝިޔާގެ މައުންޓް ސެމޭރޫ އަލިފާން ފަރުބަދަ ގޮވަން ފަށާ، އެއިން އަޅިއާއި ދުން އަރަމުންދާ މަންޒަރު | އަނަދޮލޫ
އިންޑޮނޭޝިޔާގެ މައުންޓް ސެމޭރޫ އަލިފާން ފަރުބަދަ މިއަދު ހެނދުނުގެ ވަގުތެއްގައި ތިން ފަހަރެއްގެ މަތިން ގޮވައި، ފަރުބަދައިގެ ކުންނުން ފެށިގެން 1،000 މީޓަރު އުސްމިނަށް އަޅިތައް ބޭރުވެ، ދުން އަރަމުންދާ ކަމަށް އެ ގައުމުގެ ކާރިސާތަކާ ބެހޭ އިދާރާއިން ހާމަކޮށްފި އެވެ. ޖާވާ ޖަޒީރާގައި ހުރި އެންމެ އުސް ފަރުބަދަ ކަމަށްވާ 3،676 މީޓަރު އުސް މި އަލިފާން ފަރުބަދަ މިހާރު އޮތީ، އެ ގައުމުގެ އަލިފާން ފަރުބަދަތަކުގެ ނުރައްކާ އަންގައިދޭ ހަތަރު ދަރަޖައިގެ ތެރެއިން ދެވަނައަށް އެންމެ ނުރައްކާތެރި ދަރަޖަ ކަމަށްވާ ލެވެލް 3 ގަ އެވެ.
މި އަލިފާން ފަރުބަދަ ހުންނަނީ އިންޑޮނޭޝިޔާގެ ޖަޒީރާ ރަށްތަކުގެ ހުޅަނގު ފަރާތުގައިވާ އިރުމަތީ ޖާވާ ޕްރޮވިންސްގެ ލުމަޖަންގ އަދި މަލަންގ ރީޖެންސީ ގުޅޭ ބޯޑަރުގަ އެވެ.
ފަރުބަދަ ގޮވުމުގެ ސަބަބުން އުފެދުނު އަޅިތައް ކުންނުން ފެށިގެން ގާތްގަނޑަކަށް 500 މީޓަރާއި، 800 މީޓަރު އަދި 1،000 މީޓަރުގެ އުސްމިނަށް ބުރައިގެން ގޮސްފައިވާ ކަމަށް، އަނަދޯލް ނޫސް އޭޖެންސީއަށް މައުލޫމާތު ދެއްވަމުން އިންޑޮނޭޝިޔާގެ ނޭޝަނަލް ޑިޒާސްޓަރ މިޓިގޭޝަން އެޖެންސީގެ ތަރުޖަމާނު ބަރްތަން ޕަންޖައިތާން ވިދާޅުވި އެވެ.
އިންޑޮނޭޝިޔާގެ ކަމާބެހޭ ފަރާތްތަކުން އަލިފާން ފަރުބަދަތަކުގެ ހަރަކާތްތައް މޮނިޓަރު ކުރަމުންދާއިރު، މައުންޓް ސެމޭރޫއަކީ މިވަގުތު ލެވެލް 3 ގެ އެލާޓް ނެރެފައިވާ ފަސް ފަރުބަދައިގެ ތެރެއިން އެއް ފަރުބަދަ އެވެ. ސެމޭރޫއަކީ އެ ގައުމުގައި ހުރި އެންމެ ހަރަކާތްތެރި އަލިފާން ފަރުބަދަތަކުގެ ތެރޭގައި ހިމެނޭ ފަރުބަދައަކަށް ވާއިރު، ފާއިތުވި އަހަރުތަކުގައި މި ފަރުބަދަ ވަނީ ތަކުރާރުކޮށް ގޮވާފަ އެވެ.
ސަތާރަ ހާހަށްވުރެ ގިނަ ރަށްތަކުގެ މައްޗަށް އެކުލެވޭ އިންޑޮނޭޝިޔާ އޮންނަނީ، ބިންހެލުންތަކާއި އަލިފާން ފަރުބަދަތަކުގެ ހަރަކާތްތައް ގިނަ 'ޕެސިފިކް ރިންގް އޮފް ފަޔަރ' ސަރަހައްދުގަ އެވެ. އެ ގައުމުގައި ހަރަކާތްތެރި 120 އަށްވުރެ ގިނަ އަލިފާން ފަރުބަދަ ހުރެ އެވެ.
މަސްދަރު: އަންދޯލް އޭޖެންސީ
