ޖާވާ ކަނޑަށް ފަސިންޖަރު ބޯޓެއް ބަންޑުން ޖަހާލާ 129 މީހުން ގެއްލިއްޖެ، މޫސުން ގޯސްވުމުން ހޯދުމަށް ބޮޑެތި ހުރަސްތަކެއް

އިންޑޮނޭޝިޔާގެ ޖާވާ ކަނޑަށް މިދިޔަ ހަފުތާ ބަންދުގައި ބަންޑުން ޖަހާލި ފަސިންޖަރުން އުފުލާ ބޯޓުން ގެއްލުނު 129 މީހުން ހޯދުމުގެ މަސައްކަތުގައި، އެ ގައުމުގެ ކޯސްޓްގާޑާއި ނޭވީ ހިމެނޭހެން ސަތޭކައަށް ވުރެ ގިނަ ރެސްކިޔު އޮފިސަރުން ކުރަމުން އެބަދެ އެވެ. މި ހާދިސާގައި މިހާތަނަށް ހަ މީހަކު މަރުވެފައިވާކަން ކަށަވަރުވެފައިވާ ކަމަށް ކަމާބެހޭ އިދާރާތަކުން ހާމަކުރެ އެވެ.

ޖުމްލަ 243 މީހުންނާ އެކު ދަތުރުކުރި 'ވަރގޯ ޓްރާންސްޕޯޓް 8' ނަމަކަށް ކިޔާ މި ބޯޓު ބަންޑުން ޖަހާލައި ގެއްލިފައި ވަނީ އާދީއްތަ ދުވަހުގެ ފަތިހުގެ ވަގުތެއްގައި މޫސުން ގޯސްވުމުގެ ސަބަބުން ކަމަށް ރެސްކިޔު އެޖެންސީން ބުނެ އެވެ. އިރުމަތީ ޖާވާގެ ސުރަބާޔާއިން ފުރައިގެން ދެކުނު ކަލިމަންޓާންގެ ބަންޖަރުމާސިންއަށް ދަތުރުކުރި މި ބޯޓުން މިހާތަނަށް 108 މީހުން ވަނީ ސަލާމަތްކޮށްފަ އެވެ.

Advertisement

ކަނޑުގަދަވެ ބޮޑެތި ރާޅުތަކާއެކު ބާރުގަދަ ވައިޖެހެމުން ދާތީ، ގެއްލިފައިވާ މީހުން ހޯދުމުގެ މަސައްކަތްތަކަށް ބޮޑެތި ހުރަސްތަކެއް ކުރިމަތިވެފައިވާ ކަމަށް ގައުމީ ރެސްކިޔު އެޖެންސީގެ ވެރިޔާ މުހައްމަދު ޝާފިޢީ ވިދާޅުވި އެވެ. ގެއްލިފައިވާ ފަސިންޖަރުން ހޯދުމަށް ޓަކައި އެ އެޖެންސީން ގާތްގަނޑަކަށް 622 މުވައްޒަފުންނާއި، 17 އުޅަނދާއި، ފަސް ހެލިކޮޕްޓަރުގެ އިތުރުން މަތިންދާބޯޓުތައް ވެސް މިހާރު ދަނީ ބޭނުން ކުރަމުންނެވެ.

ބައެއް އުޅަނދުތައް ހާދިސާ ހިނގި ސަރަހައްދަށް ދަތުރުކޮށްފައިވީ ނަމަވެސް، ބަންޑުން ޖަހާލާފައިވާ ބޯޓުގެ އެތެރެއަށް ވަނުމަށް ރެސްކިޔު ޓީމުގެ މެންބަރުންނަށް ބޮޑެތި ދަތިތަކެއް ކުރިމަތިވަމުންދާ ކަމަށް ޝާފިޢީ ފާހަގަކުރެއްވި އެވެ. "އަޅުގަނޑުމެން ފެނު އަޑީގައި ހަރަކާތްތެރިވާނެ ފަންނީ މުވައްޒަފުން ވެސް ފޮނުވަން ބޭނުންވޭ، ނަމަވެސް މިހާރު މޫސުން ހުރި ގޮތުން އެ ކަން ކުރެވޭކަށް ނެތް،" އޭނާ ވިދާޅުވި އެވެ. މޫސުން ރަނގަޅުވަންދެން އިންތިޒާރުކުރަމުންދާއިރު، އިތުރު ފަންނީ މުވައްޒަފުން ދެނެގަނެ ތައްޔާރުކުރަމުންދާ ކަމަށާއި މިހާތަނަށް މަރުވި މީހުންގެ އަދަދަކީ ހައެއް ކަމަށް ވެސް އޭނާ ވިދާޅުވި އެވެ.

ރެސްކިޔު އެޖެންސީން އާންމުކޮށްފައިވާ ވީޑިއޯއަކުން ފެންނަ ގޮތުގައި، ރަތާއި ކަޅު ކުލައިގެ ބޮޑު އެ ބޯޓު އޮތީ ބަންޑުން ޖަހާލާފަ އެވެ. އަދި، ބޯޓުގެ ބައެއް ފެނުގެ އަޑީގައި އޮތް އިރު، ބޯޓުގެ ފުލުގައި ލާފައިވާ ރަތް ކުލައިގެ ދަވާދު ފެންނަން އޮތީ ލޮނުގަނޑުން މައްޗަށެވެ. މީގެ އިތުރުން، ބަންޑުން ޖަހާލާފައިވާ ބޯޓު ކައިރީގައި، މީހުން ތިބި ދެ ކުޑަ ބޯޓެއް ގަދަ ކަނޑުގެ ތެރޭގައި އޮޔާދަނިކޮށް ވެސް އެ މަންޒަރުތަކުން ފެނެ އެވެ.

ގެއްލިފައިވާ މީހުން ދިރިތިއްބާ ފެންނާނެ ކަމުގެ އުންމީދު ފަނޑު

ބަންޑުން ޖަހާލި ބޯޓު އޮތް ސަރަހައްދަކީ ބަންޖަރުމާސިންގެ ތްރިސަކްތީ ބަނދަރުގައި ގާއިމުކޮށްފައިވާ ކޮމާންޑް ސެންޓަރާ ގާތްގަނޑަކަށް 80 ނޯޓިކަލް މޭލު ދުރު ސަރަހައްދެއް ކަމަށް ރެސްކިޔު އެޖެންސީގެ އޮފިޝަލަކު ވިދާޅުވި އެވެ. "އެ ސަރަހައްދުގައި ވަރަށް ބާރަށް ވައިޖެހެމުންދާތީ، އުޅަނދުތައް އެ ސަރަހައްދަށް ކައިރިކުރުމަށް ވަނީ ދަތިވެފައި،" އަރިއަންޓޯ އާޑީ ވިދާޅުވި އެވެ.

ހާދިސާ ހިނގި ވަގުތު މޫސުން ގޯސްވެ، ތިން މީޓަރުގެ އުސް ރާޅުތައް ބޯޓަށް ބިންދަމުން ދިޔަ ކަމަށް ޝާފިޢީ ވިދާޅުވި އެވެ. މޫސުން ރަނގަޅު ނަމަ ތްރިސަކްތީ ބަނދަރުން އެ ސަރަހައްދަށް ދިއުމަށް ފަސް ގަޑިއިރު ހޭދަވި ނަމަވެސް، މިހާރު އޮތް ގޯސް ހާލަތުގެ ސަބަބުން އެ ސަރަހައްދަށް ދިއުމަށް ނުވަ ގަޑިއިރު ހޭދަވާ ކަން އޭނާ ފާހަގަކުރެއްވި އެވެ.

ބޯޓުގެ ކަނާތްފަރާތަށް ބާރުގަދަ ރާޅުތަކެއް ބިންދާލުމާ ގުޅިގެން ބޯޓު އެއްފަރާތަކަށް ވަރަށް ބޮޑަށް އަރިވެގެން ދިޔަ ކަމަށް އެ އެޖެންސީގެ އޮފިޝަލެއް ކަމަށްވާ އެޑީ ޕްރަކޯސޯ އާދީއްތަ ދުވަހު ވިދާޅުވި އެވެ. ނަމަވެސް، ބަންޑުން ޖަހާލި ބޯޓަކީ 500 މީހުންގެ ޖާގައިގެ ބޯޓެއް ކަމަށާއި، ބޯޓުގައި މީހުން އުފުލާފައި ވަނީ ކަނޑައެޅިފައިވާ މިންގަނޑަށް ވުރެ އިތުރަށް ނޫން ކަމަށް ޓްރާންސްޕޯޓް މިނިސްޓަރު ޑޫޑީ ޕުރްވަގަންދީ ވިދާޅުވި އެވެ.

އިންޑޮނޭޝިޔާގެ 17,000 އަށް ވުރެ ގިނަ ރަށްތަކުގެ މެދުގައި ދަތުރުފަތުރު ކުރުމަށް އެ ގައުމުން ބޮޑަށް ބަރޯސާވަނީ ފެރީތަކަށެވެ. ވައިގެ މަގުން ދަތުރުކުރުމަށް ވުރެ ކަނޑު ދަތުރުފަތުރުގެ އަގު ހެޔޮވެފައި ފަސޭހައިން ލިބެން ހުންނާތީ ގިނަ ބަޔަކު ކަނޑުދަތުރު އިޚްތިޔާރު ކުރި ނަމަވެސް، މި ފަދަ ނުރައްކާތެރި ހާދިސާތައް ހިނގުން ވަނީ އާންމުވެފަ އެވެ. މިދިޔަ މަހު ހިނގި ވަކިވަކި ހާދިސާތަކެއްގައި، އެތައް ސަތޭކަ ފަސިންޖަރުންނާއެކު ދަތުރުކުރި ދެ ފެރީއެއްގައި ވަނީ އަލިފާން ރޯވެފަ އެވެ. މަދޫރާ ޖަޒީރާ ކައިރިން ފެރީއެއްގައި ރޯވި ހާދިސާގައި ފަސް މީހުން މަރުވި އިރު، ފަތުރުވެރިކަމަށް މަޝްހޫރު ބާލީން ދަތުރުކުރި ފެރީއެއްގައި ރޯވެ އެކަކު ވަނީ މަރުވެފަ އެވެ.