ޓްރަމްޕް އަޔަލޭންޑަށް ވަޑައިގެން ރަސްމީ ބައްދަލުވުންތައް ބާއްވަވަނީ
12 ސެޕްޓެމްބަރު 2026 | ހޮނިހިރު 10:26އެމެރިކާގެ ރައީސް ޑޮނަލްޑް ޓްރަމްޕް އަޔަލޭންޑަށް ކުރައްވާ މި ދަތުރުފުޅުގައި އެ ގައުމުގެ ބޮޑުވަޒީރާ ބައްދަލުކުރައްވައި އިގްތިސާދީ އެއްބާރުލުމާއި ވިޔަފާރީގެ ފުރުސަތުތަކާ ގުޅޭގޮތުން ރަސްމީ މަޝްވަރާތައް ބާއްވަވާނެ. މީގެ އިތުރުން ވިޔަފާރިވެރިންނާ ބައްދަލުކުރެއްވުމަށްފަހު، އެމަނިކުފާނުގެ އަމިއްލަ ގޯލްފް ކްލަބުގައި ބާއްވާ މުބާރާތެއްގައި ބައިވެރިވެވަޑައިގަތުމަށް ވަނީ ހަމަޖެހިފައި
އެމެރިކާގެ ރައީސް ޑޮނަލްޑް ޓްރަމްޕް އަޔަލޭންޑްގެ ޑަބްލިންއަށް ވަޑައިގެންފި | ސްކްރީން އިމޭޖް
އެމެރިކާގެ ރައީސް ޑޮނަލްޑް ޓްރަމްޕް ހޮނިހިރު ދުވަހުގެ ހެނދުނުގެ ވަގުތެއްގައި އަޔަލޭންޑަށް ވަޑައިގެންފި އެވެ. މި ދަތުރުފުޅުގައި އެ ގައުމުގެ ލީޑަރުންނާ އެކު ރަސްމީ މަޝްވަރާތައް ބޭއްވެވުމަށްފަހު، ޓްރަމްޕްގެ އަމިއްލަ ގޯލްފް ކޯހެއްގައި ބާއްވާ މުބާރާތެއްގައި އެމަނިކުފާނު ބައިވެރިވެވަޑައިގަންނަވާނެ އެވެ.
ޓްރަމްޕަށް އެއަރޕޯޓުން މަރުހަބާ ދެންނެވީ އަޔަލޭންޑްގެ ފިނޭންސް މިނިސްޓަރު ސައިމަން ހަރިސް އާއި، ފޮރިން މިނިސްޓަރު އަދި ޑިފެންސް މިނިސްޓަރު ހެލެން މެކެންޓީ އާއި، އަޔަލޭންޑަށް ކަނޑައަޅާފައި ހުންނަވާ އެމެރިކާގެ ސަފީރު އެޑްވަރޑް ވޮލްޝް އާއި އޭނާގެ އަނބިކަނބަލުން ލިންގެ އިތުރުން، އެމެރިކާއަށް ކަނޑައަޅާފައި ހުންނަވާ އަޔަލޭންޑްގެ ސަފީރު ޖެރަލްޑިން ބައިން ނޭސަން އަދި ޗީފް އޮފް ޕްރޮޓޮކޯލް ޕެޓްރިޝިއާ އޯބްރަޔަން އެވެ.
ރައީސްކަމުގެ މަގާމުގައި ހުންނަވައިގެން ޓްރަމްޕް އެންމެ ފަހުން އަޔަލޭންޑަށް ޒިޔާރަތް ކުރެއްވީ އެމަނިކުފާނުގެ ފުރަތަމަ ދައުރުގައި، 2019 ވަނަ އަހަރުގެ ޖޫން މަހުގަ އެވެ.
ވައިޓް ހައުސްގެ އޮފިޝަލަކާ ހަވާލާދީ ސީއެންއެންއިން ރިޕޯޓުކޮށްފައިވާ ގޮތުގައި، މި ދަތުރުފުޅުގައި ޓްރަމްޕް އަޔަލޭންޑްގެ ބޮޑުވަޒީރު މައިކަލް މާޓިންއާ އެކު ދެ ގައުމުގެ ދެމެދުގައި ރަސްމީ މަޝްވަރާތައް ބާއްވަވާނެ އެވެ. އަދި އެމެރިކާގެ ސަފީރު އެޑްވަރޑް ވޮލްޝްގެ ގެކޮޅުގައި ވިޔަފާރިވެރިންނާ ބައްދަލުކުރައްވައި ވާހަކަފުޅު ދައްކަވާނެ އެވެ.
އަޔަލޭންޑްގެ ސިޔާސީ ލީޑަރުންނާއެކު ބާއްވާ ބައްދަލުވުންތަކުގައި، ދެ ގައުމުގެ އިގްތިސާދީ އެއްބާރުލުމާއި، އެމެރިކާގެ ސިނާއަތްތަކަށް ވިޔަފާރީގެ ފުރުސަތުތައް ހޯދައިދިނުމާއި، ދެ ގައުމުގެ މަސްލަހަތު ހިމެނޭ ބައިނަލްއަގުވާމީ މައްސަލަތަކާ ގުޅޭގޮތުން މަޝްވަރާ ކުރައްވާނެ ކަމަށް އޮފިޝަލް ވިދާޅުވި އެވެ.
ހޮނިހިރު ދުވަހު ޑަބްލިންގައި ބާއްވާ ބައްދަލުވުންތަކަށްފަހު، އާދީއްތަ ދުވަހު ޓްރަމްޕް ވަޑައިގަންނަވާނީ އެ ގައުމުގެ ހުޅަނގަށެވެ. އެތަނުގައި އޮންނަ ޓްރަމްޕްގެ އަމިއްލަ ގޯލްފް ކްލަބް، "ޑޫންބެގް" ގައި ބާއްވާ އަޔަލޭންޑްގެ އޯޕަން ގޯލްފް މުބާރާތުގައި އެމަނިކުފާނު ބައިވެރިވެވަޑައިގަންނަވާނެ އެވެ.
