ސައުދީން ވާގިވެރިވާ ފައުޖުތައް ބަލިކޮށް ހޫޘީން ރަތްކަނޑުގެ ސަރަހައްދުގެ ކޮންޓްރޯލު އަތުލައިފި

ޔަމަނުގެ ހުޅަނގުގެ މުހިންމު ދެ ޕްރޮވިންސް ކަމަށްވާ ހުދައިދާ އާއި ތާއިޒްގެ އެތައް ސަތޭކަ ކިލޯމީޓަރެއްގެ ސަރަހައްދެއް އެ ގައުމުގެ ހޫޘީންގެ ކޮންޓްރޯލްގެ ދަށަށް ގެނެސްފައިވާ ކަމަށް އެ ޖަމާއަތުގެ ތަރުޖަމާނު ވިދާޅުވެއްޖެ އެވެ. ސައުދީ އަރަބިއްޔާއިން ވާގިވެރިވާ ފައުޖުތަކަށް ލިބުނު ބޮޑު ނާކާމިޔާބީއަކާއެކު، ހޫޘީން މިހާރު ދަނީ އިސްތިރާތީޖީ ގޮތުން މުހިންމު ބާބުލް މަންދަބު ކަނޑުއޮޅިއާ ދިމާލަށް ހަލުވިކަމާއެކު ކުރިއަރަމުންނެވެ.

ހޫޘީންގެ ބްރިގޭޑިއާ ޖެނެރަލް ޔަހްޔާ ސަރީއު ހުކުރު ދުވަހުގެ މެންދުރުފަހު ޓީވީ މެދުވެރިކޮށް ދެއްވި ބަޔާނެއްގައި ވިދާޅުވީ، ހޫޘީންގެ ހަނގުރާމަވެރިންނާއި ރައްޔިތުންގެ ކޮމިޓީތަކަށް ނިސްބަތްވާ ހަނގުރާމަވެރިން ގުޅިގެން ހިންގި އޮޕަރޭޝަންތަކުގައި، ހުދައިދާ އާއި ތާއިޒްގެ ހަ ޑިސްޓްރިކްޓަކުން ސައުދީގެ މަދަދުލިބޭ ހަނގުރާމަވެރިން ބޭރުކޮށްލާފައިވާ ކަމަށެވެ. އަދި މި ހަމަލާތަކުގައި 5،400 އަކަކިލޯމީޓަރުގެ ސަރަހައްދެއް ހަނގުރާމަވެރިންގެ ކިބައިން މިނިވަންކޮށްފައިވާ ކަމަށްވެސް އޭނާ ވިދާޅުވި އެވެ.

މި ކާމިޔާބީތަކަކީ "ﷲ އިޒް ސްޓްރޯންގާ އިން މައިޓް އެންޑް ސްޓްރޯންގާ އިން އިންފްލިކްޓިންގ ޕަނިޝްމަންޓް" ގެ ނަމުގައި ފެށި ފުޅާ ދާއިރާއެއްގެ އަސްކަރީ އޮޕަރޭޝަނެއްގެ ދަށުން ހޯދި ކާމިޔާބީތަކެއްކަން ސަރީއު ފާހަގަކުރެއްވި އެވެ.

ސަރީއު އިތުރަށް ވިދާޅުވީ، ހޫޘީ ފައުޖުތަކާއި އެ ފަރާތްތަކާ ގުޅިފައިވާ ލަޝްކަރުތަކުން ސައުދީގެ މަދަދުލިބޭ ސިފައިންގެ 38 ބްރިގޭޑްގެ މައްޗަށް އެކުލެވޭ ހަތް ޑިވިޜަނެއް ބަލިކޮށްފައިވާ ކަމަށެވެ. މި ކުރިމަތިލުންތަކުގައި އެތައް ސަތޭކަ ހަނގުރާމަވެރިންނެއް މަރުވެ، ޒަޚަމްވެފައިވާއިރު، ގިނަ އަދަދެއްގެ ބަޔަކު ވަނީ އަސީރުންގެ ގޮތުގައި ހައްޔަރުކޮށްފަ އެވެ.

މީގެ އިތުރުން، ސައުދީގެ މަދަދުލިބޭ ހަނގުރާމަވެރިންގެ ބެލުމުގެ ދަށުގައި ހުރި ޖަލުތަކުގައި އިންސާނިއްޔާތާ ޚިލާފު ހާލަތްތަކުގައި ބަންދުކޮށްފައި ތިބި ގިނަ އަދަދެއްގެ ގައިދީން ހޫޘީން ވަނީ މިނިވަންކޮށްފަ އެވެ.

ހޫޘީންގެ ވައިގެ ދިފާއީ ބާރުތަކުން 32 އޮޕަރޭޝަނެއް ހިންގައި، ޔަމަނުގެ ވައިގެ ސަރަހައްދަށް ވަން ސައުދީ އަރަބިއްޔާގެ ނުވަ މަތިންދާބޯޓެއް ވައްޓާލާފައިވާކަންވެސް ސަރީއު ފާހަގަކުރެއްވި އެވެ.

ހޫޘީ އަސްކަރިއްޔާގެ ތަރުޖަމާނު އަލުން ކަށަވަރުކޮށްދެއްވި ގޮތުގައި، ރަތްކަނޑުގެ ތެރެއިން ދަތުރުކުރާ އުޅަނދުފަހަރަށް އެ ފުރުސަތު އޮންނާނެ އެވެ. ނަމަވެސް، ކަނޑުގެ މަގުން ބްލޮކޭޑް ނުވަތަ ބަންދުކޮށްފައިވާ ސައުދީ އަރަބިއްޔާގެ މުދާ އުފުލާ އުޅަނދުތަކަށް އެ ފުރުސަތެއް ނޯންނާނެ އެވެ.

ޔަމަނުގެ އަސްކަރިއްޔާއިން ދެމިއޮންނާނީ "ހިސާރުކުރުމުގެ ބަދަލުގައި ހިސާރުކުރުން" ގެ އުސޫލުގައި ކަމަށާއި، ސައުދީގެ އަސްކަރީ މަރުކަޒުތަކަށް އަމާޒުކޮށް ހަމަލާދޭނެ ކަމަށް އޭނާ ވިދާޅުވި އެވެ. އަދި ޔަމަނާ ދެކޮޅަށް ހިންގާ އުދުވާންތައް ހުއްޓާލައި، ހިސާރުކުރުން މުޅިން އުވާލަންދެން، ސައުދީން ހަމަލާތައް ވަރުގަދަކުރާ މިންވަރަކަށް ޔަމަނުން ދޭ ހަމަލާތައްވެސް ވަރުގަދަކުރަމުންދާނެ ކަމަށް އޭނާ ވިދާޅުވި އެވެ.

ޔަމަނަށް ކުރިމަތިވެފައިވާ 12 އަހަރުވީ ބޭއިންސާފު ހިސާރުކުރުމަށް ރައްދު ދިނުމުގެ ގޮތުން، ސައުދީ އަރަބިއްޔާއާ ދެކޮޅަށް ކަނޑުގެ މަގުން ބްލޮކޭޑެއް ހިންގާނެކަން ސަންޢާގެ ސަރުކާރުން އިއުލާނުކުރީ މިދިޔަ ޖުލައި މަހުގެ 20 ވަނަ ދުވަހު އެވެ.

އޭގެ ފަހުން، ރަތްކަނޑުގައި ދަތުރުކުރާ ސައުދީ އަރަބިއްޔާއާ ގުޅުންހުރި އުޅަނދުފަހަރަށް އަމާޒުކޮށް ކާމިޔާބު ގިނަ އޮޕަރޭޝަންތަކެއް ހިންގާފައިވާ ކަމަށް ހޫޘީންގެ ފައުޖުތަކުން ވަނީ ރިޕޯޓްކޮށްފަ އެވެ.

2015 ވަނަ އަހަރުގެ މާރިޗު މަހުން ފެށިގެން ސައުދީ އަރަބިއްޔާއާއި އެ ގައުމުގެ އިއްތިހާދުން ވަނީ ޔަމަނު ހިސާރުކޮށް، އެ ގައުމާ ދެކޮޅަށް ފުޅާ ދާއިރާއެއްގެ އަސްކަރީ އުދުވާނެއް ފަށާފަ އެވެ. މި ހަމަލާތަކުގައި އެމެރިކާއާއި ހުޅަނގުގެ ބައެއް ގައުމުތަކުން ދަނީ އަސްކަރީ، ސިޔާސީ އަދި ލޮޖިސްޓިކް އެހީތެރިކަން ފޯރުކޮށްދެމުންނެވެ.

ހޫޘީން ބުނާ ގޮތުގައި މި ހަނގުރާމައިގައި އެތައް ހާސް ޔަމަނު ރައްޔިތުންނެއްގެ ފުރާނަ ގެއްލިފައިވީ ނަމަވެސް، ސައުދީ އަރަބިއްޔާގެ މަސްލަހަތު ހިމާޔަތްކުރާނެ "ޕަޕެޓް" ނުވަތަ ގޮނޑިކޮއްކޮ ސަރުކާރެއް އަލުން ގާއިމުކުރުމަށް އެ ގައުމުން ހިފާފައިވާ އަމާޒު ހާސިލުކުރުމުގައި ސައުދީ ވަނީ ނާކާމިޔާބުވެފަ އެވެ.