ސައުދީން މަދަދުދޭ ޔަމަނުގެ ސިފައިން ފަހަތައް ޖައްސާ، އީރާނުގެ މަދަދު ލިބޭ ހޫޘީން ކުރިއެރުންތައް ހޯދާ ބާބުލް މަންދަބް ހިފުމާ ގާތައް
11 ސެޕްޓެމްބަރު 2026 | ހުކުރު 10:39ޔަމަނުގެ ހުޅަނގު އައްސޭރީގައިވާ އިސްތިރާތީޖީ ގޮތުން މުހިންމު ސަރަހައްދުތަކާއި މުޚާ ބަނދަރުގެ ކޮންޓްރޯލް އަންސާރުﷲ ފައުޖުތަކުން ހޯދައި، އެ ސަރަހައްދުތަކުގައި އާންމު ހިދުމަތްތައް ދޭން ފަށައިފި. ބާބުލް މަންދަބު ކަނޑުއޮޅީގެ ބާރުވެރިކަން ހޯދުމާއެކު، ކަނޑުދަތުރުފަތުރުގެ ސަލާމަތްތެރިކަން ކަށަވަރުކޮށްދޭނެ ކަމުގެ ޔަގީންކަން ސަންޢާ ސަރުކާރުން ވަނީ ދީފައި
ސައުދީ އަރަބިއްޔާއަށް ތާއީދުކުރާ ހަނގުރާމަވެރި ޖަމާއަތަކަށް ނިސްބަތްވާ ޑްރޯނެއް، އަލް ޖައުފް ސަރަހައްދުގައި މިސައިލް ހަމަލާއެއް ދީ ވައްޓާލުމަށްފަހު، އޭގެ ބައިތައް ފެންނަ ވީޑިއޯއެއް ވަނީ އާންމުކޮށްފައި | ސޯޝަލް މީޑިއާ
ހޫޘީންގެ ނަމުން އާންމުކޮށް މުޚާތަބު ކުރެވޭ އަންސާރުﷲ އިސްވެ އޮންނަ ޔަމަނުގެ ހަތިޔާރުއެޅި ފައުޖުތަކުން އެ ގައުމުގެ ހުޅަނގު އައްސޭރިފަށުގައި ހަލުވިކަމާއެކު ކުރިއަށްޖެހި، ބާބުލް މަންދަބު ކަނޑުއޮޅި ފެންނަ ހިސާބުގައިވާ މުހިންމު ސަރަހައްދުތަކެއްގެ ކޮންޓްރޯލް ނަގައިފި އެވެ.
ޔަމަނުގެ އަންސާރުﷲ ގެ ފައުޖުތަކުން މުޚާ ސިޓީ ހިފުމަށްފަހު ޝުކުރުގެ ސަޖިދަ ޖަހަނީ
ބުރާސްފަތި ދުވަހު ލިބުނު ރިޕޯޓްތައް ބުނާގޮތުން، ޔަމަނުގެ ފައުޖުތަކުން ވަނީ ރަތްކަނޑުގެ ބައެއް ރަށްތަކަށް އަރައި، އިސްތިރާތީޖީ ގޮތުން މުހިންމު ބާބުލް މަންދަބު ކަނޑުއޮޅީގެ ދޮރުމައްޗާ ހަމައަށް ކުރިއަށް ޖެހިފަ އެވެ.
މީގެ ކުރިން ޔަމަނުގެ ފައުޖުތަކުން ވަނީ ސައުދީ އަރަބިއްޔާއިން ވާގިވެރިވާ ހަނގުރާމަވެރިންގެ އަތުން މުޚާ ސިޓީ ހިފާފަ އެވެ. އަދި އެ ފައުޖުތަކުން ހަނީޝް ރަށްތަކަށް ފޯރައި، ޒުގަރު ރަށުގެ ކޮންޓްރޯލް ވެސް ނަގާފައިވާ ކަމަށް ރިޕޯޓްތައް ބުނެ އެވެ.
އަލް-އަރަބީ ޓީވީއަށް މަޢުލޫމާތު ދިން މަސްދަރުތަކުން ބުނި ގޮތުގައި، އަންސާރުﷲ އިސްވެ އޮންނަ ފައުޖުތަކުން ވަނީ ބާބުލް މަންދަބު ކަނޑުއޮޅީގައި އޮންނަ އިސްތިރާތީޖީ ރަށެއް ކަމަށްވާ މައްޔޫންގެ ކޮންޓްރޯލް ނަގާފަ އެވެ. ރިޕޯޓްތައް ބުނާ ގޮތުގައި ޔުނައިޓެޑް އަރަބް އެމިރޭޓްސް (ޔޫއޭއީ) އިން ވަނީ އިސްރާއީލާ ގުޅިގެން މައްޔޫންގެ އިތުރުން ޔަމަނުގެ އެހެން ބައެއް ރަށްތަކުގައި އަސްކަރީ އަދި ޖާސޫސީ މަރުކަޒުތަކެއް ގާއިމުކޮށްފަ އެވެ.
ތަސްނީމް ނިއުސް އެޖެންސީން ސަންޢާގައި ހުންނަ އެ އެޖެންސީގެ ރިޕޯޓަރާ ހަވާލާދީ ބުނި ގޮތުގައި، ޔަމަނުގެ ހަތިޔާރުއެޅި ފައުޖުތަކުން މިހާރު ވަނީ ބާބުލް މަންދަބުގައި އޮންނަ މުހިންމު އަލް-އަރުޟީ ބަނދަރު ސަރަހައްދު ހިފާފަ އެވެ.
މި ކުރިއެރުމާއެކު، އިސްތިރާތީޖީ ގޮތުން މުހިންމު މި ކަނޑުއޮޅި ފެންނަ ގޮތަށް އޮތް ޔަމަނުގެ އައްސޭރިފަށުގެ ކޮންޓްރޯލް ޔަމަނުގެ ފައުޖުތަކަށް ލިބިގެންދާނެ އެވެ. މީގެ އިތުރުން، ސައުދީގެ ކުލީ ސިފައިންނާ ދެކޮޅަށް ހަނގުރާމަކުރާ ފައުޖުތަކަށް، ރަތްކަނޑާއި އަދަން ކަނޑުއޮޅިއާ ދެމެދު ދަތުރުކުރާ އުޅަނދުފަހަރުގެ މައްޗަށް ބޮޑު ބާރެއް ހިންގުމުގެ ފުރުސަތު މިކަމުގެ ސަބަބުން ފަހިވެގެންދާނެ އެވެ.
"ކަރުނައިގެ ދޮރު" ގެ ނަމުން ނަންދެވިފައިވާ ބާބުލް މަންދަބު ހިފުމުން، ރަތްކަނޑަށް ވަދެ ނުކުމެވާ އުޅަނދުފަހަރުގެ މައްޗަށް ސަންޢާގައި އޮތް ސަރުކާރަށް ބޮޑު ބާރެއް ލިބިގެންދާނެ އެވެ.
"ކަނޑުދަތުރުފަތުރުގެ ނިޒާމު އޮތީ އަމާންކޮށް. ކަނޑުދަތުރުފަތުރުގެ ސަލާމަތާ، ހުޅަނގު އައްސޭރީގެ އަވަށްތަކުގައި ހިނގި އަދި މިހާރު ހުއްޓުވާފައިވާ ކުރިމަތިލުންތަކާ އެއްވެސް ގުޅުމެއް ނެތް،" ސަންޢާ ސަރުކާރުގެ ޑެޕިއުޓީ ފޮރިން މިނިސްޓަރު އަބްދުލް ވާހިދު އަބޫ ރަސް ބުރާސްފަތި ދުވަހު ސަބާ ނިއުސް އެޖެންސީއަށް ދެއްވި ބަޔާނެއްގައި ވިދާޅުވި އެވެ.
ޔަމަނުގެ އިސް މަޝްވަރާވެރިޔާ އަދި ތަރުޖަމާނު މުހައްމަދު އަބްދުއްސަލާމް ވެސް ވިދާޅުވީ "ރަތްކަނޑުގެ ދަތުރުފަތުރު އޮތީ އަމާންކޮށް" ކަމަށާއި، "އުދުވާނީ ހަމަލާތައް ހުއްޓާލުމުން އަސްކަރީ އޮޕަރޭޝަންތައް ވެސް ހުއްޓާލާނެ" ކަމަށެވެ.
އޭނާ އިތުރަށް ވިދާޅުވީ، ޔަމަނުގެ ފައުޖުތަކުން އައްސޭރިފަށުގެ ބައެއް ސަރަހައްދުތަކުގައި ހިންގި އޮޕަރޭޝަންތަކަކީ ޔަމަނުގެ ސިޔާދަތު ދެމެހެއްޓުމަށާއި، ގައުމުގެ ސުލްހައަށް ހުރި ގޮންޖެހުންތަކާއި ނުރައްކާތަކާ ދެކޮޅަށް ހިންގި ގައުމީ މަސައްކަތެއް ކަމަށެވެ.
ސައުދީން ވާގިވެރިވާ ފައުޖުތަކަށް ބޮޑެތި ގެއްލުންތަކެއް
މި ފަހުގެ ކުރިއެރުންތައް ލިބިފައިވަނީ ޔަމަނުގެ ހަތިޔާރުއެޅި ފައުޖުތަކާއި، އަދަންގައި މަރުކަޒުވެފައިވާ "ޕްރެޒިޑެންޝަލް ލީޑަރޝިޕް ކައުންސިލް" (ޕީއެލްސީ) ގެ ނަމުގައި ހަރަކާތްތެރިވާ ސައުދީގެ މަދަދުލިބޭ ފައުޖުތަކާ ދެމެދު ދުވަސްތަކެއް ވަންދެން ހިނގި ވަރުގަދަ ކުރިމަތިލުންތަކަށް ފަހުގަ އެވެ.
ސައުދީ އަރަބިއްޔާ އިން ވާގިވެރިވާ ސިފައިން ސަރަހައްދު ދޫކޮށް ފައިބައިގެންދަނީ
މީގެ އިތުރުން، ޔަމަނުގެ ފައުޖުތަކުން ވަނީ ޔޫއޭއީގެ މަދަދުލިބޭ ހަނގުރާމަވެރި ޖަމާއަތްތަކުގެ ބާކީ ތިބި މީހުންނަށް ވެސް އަމާޒުކޮށް ހަމަލާދީފަ އެވެ.
"ހުޅަނގު އައްސޭރީގެ ކުރިމަތިލުންތައް ވަނީ ވަރުގަދަވެފައި. ސައުދީގެ މަދަދުލިބޭ ފައުޖުތަކުގެ ހަރަކާތްތަކާ ގުޅިގެން، ޔަމަނުގެ ފައުޖުތަކުން ވަނީ ޑްރޯންއާއި ބެލިސްޓިކް މިސައިލް ބޭނުންކޮށްގެން އެ ސަރަހައްދުގައި ހުރި އެ ފައުޖުތަކުގެ މަރުކަޒުތަކަށް ހަމަލާދީފައި،" ބުރާސްފަތި ދުވަހުގެ ރޭ އަލް-މަސީރާ ޓީވީން ބުންޏެވެ.
ޔަމަނުގެ ސުޕްރީމް ޕޮލިޓިކަލް ކައުންސިލުން ފަހުން އިއުލާންކުރި ގޮތުގައި، ހުޅަނގު އައްސޭރީގައި ކުރަމުންދިޔަ ހަނގުރާމަ މިހާރު ވަނީ ނިމުމަކަށް އައިސްފަ އެވެ. އަދި ސައުދީގެ މަދަދުލިބޭ ސިފައިން އެ ސަރަހައްދުން "ބޭރުކޮށްލާފައިވާ" ކަމަށް ވެސް އެ ކައުންސިލުން ބުންޏެވެ.
މިހާލަތުގައި، ޔަމަނުގެ އަސްކަރީ ތަރުޖަމާނު ބްރިގޭޑިއާ ޖެނެރަލް ޔަހްޔާ ސަރީޢު އިއުލާންކުރެއްވި ގޮތުގައި، ސައުދީން ބޭނުންކުރާ "ވެސްޓެލް ކަރަޔަލް" މަރުކާގެ ޖާސޫސީ ޑްރޯންއެއް ޔަމަނުގެ ވައިގެ ދިފާއީ ބާރުތަކުން ވަނީ ވައްޓާލާފަ އެވެ.
މި ޑްރޯން ވައްޓާލާފައިވަނީ ހައްޖާ ޕްރޮވިންސްގެ މަތިން "އުދުވާނީ ހަރަކާތްތަކެއް" ހިންގަމުން ދަނިކޮށް، ބިމުން ވައިގެ ތެރެއަށް ފޮނުވާލި މިސައިލަކުން ހަމަލާދީގެންނެވެ.
އަލް-މަސީރާ ޓީވީން ރިޕޯޓްކުރި ގޮތުގައި، ޔަމަނުގެ ފައުޖުތަކުން ވަނީ އައްސޭރިފަށުގައި ހުރި ޕީއެލްސީގެ ޖަލުތަކަށް ވަދެ، އެތަނުގައި ބަންދުކޮށްފައި ތިބި ޔަމަނުގެ ސިފައިންނާއި ހަނގުރާމަވެރިން މިނިވަންކޮށްފަ އެވެ.
އަސީރުންގެ ކަންތައްތަކާ ބެހޭ ގައުމީ ކޮމިޓީގެ ރައީސް އަބްދުލް ގާދިރު އަލް-މުރުތަޟާ ވިދާޅުވީ، ހުޅަނގު އައްސޭރީގައި ހުރި ސައުދީގެ ޖަލުތަކުގައި ތިބި ޔަމަނުގެ ހުރިހާ އަސީރުން މިނިވަންކުރުމުގައި ޔަމަނުގެ ފައުޖުތަކުން ކާމިޔާބީ ހޯދާފައިވާ ކަމަށެވެ.
މުޚާ ބަނދަރުގެ މަސައްކަތްތައް އަލުން ފަށައިފި
ރަތްކަނޑުގެ އައްސޭރީގައި އޮންނަ މުޚާ ބަނދަރުގެ ކޮންޓްރޯލް ޔަމަނުގެ ހޫޘީންގެ ފައުޖުތަކުން ނެގިތާ މަދު ގަޑިއިރުތަކެއްގެ ތެރޭގައި، އެ ބަނދަރުގެ މަސައްކަތްތައް އަލުން ފަށާފައިވާ ކަމަށް ސަންޢާ ސަރުކާރުން ވަނީ އިއުލާންކޮށްފަ އެވެ.
ހޫޘީންގެ ފިނޭންސް، އިކޮޮނޮމީ އަދި ޓްރާންސްޕޯޓް މިނިސްޓްރީން ނެރުނު ގުޅިފައިވާ ބަޔާނެއްގައި ބުނެފައިވަނީ، ކުރިއަށް އޮތް ދުވަސްތަކުގައި މޮކާ ބަނދަރު ހިމެނޭހެން ރަތްކަނޑުގެ ބަނދަރުތަކަށް އަންނަ ކޮންޓެއިނަރު އުޅަނދުފަހަރާއި މުދަލަށް ހާއްސަ ލުއިތަކެއް ދޭނެ ކަމަށެވެ.
މި ލުއިތަކުގެ ތެރޭގައި އުޅަނދުފަހަރާއި ކޮންޓެއިނަރުތަކުން ނަގާ ފީއާއި، ޓެކްސް އަދި ޑިއުޓީން 50 އިންސައްތައާ ހަމައަށް އުނިކޮށްދިނުން ހިމެނެ އެވެ.
ސަރުކާރުން ބުނި ގޮތުގައި މި ފިޔަވަޅުގެ ބޭނުމަކީ، ސައުދީގެ މަދަދުލިބޭ ގްރޫޕްތަކުގެ ކޮންޓްރޯލްގެ ދަށުގައިވާ ސަރަހައްދުތަކުން ނަގާ ބޮޑެތި އަދި ޣައިރު ގާނޫނީ ފީތަކުން ސަލާމަތްވުމަށްޓަކައި، ޝިޕިން ކުންފުނިތަކުން މި ބަނދަރުތައް ބޭނުންކުރުމަށް ހިތްވަރު ދިނުމެވެ. އަދި ވިޔަފާރިވެރިންނާއި ޝިޕިން ކުންފުނިތަކުން މި ލުއިތަކުގެ ބޭނުން ހިފުމަށް ސަރުކާރުން ވަނީ ގޮވާލާފަ އެވެ.
ސަލާމަތާއި ހިދުމަތްތައް ކަށަވަރުކޮށްދޭނެ ކަމުގެ ވައުދު
ސައުދީގެ ކުލީ ސިފައިން ބޭރުކޮށް ހޯދި "ތާރީޚީ ކާމިޔާބީ" އާ ގުޅިގެން، ސަންޢާ ސަރުކާރުން ބުރާސްފަތި ދުވަހު ވަނީ ޔަމަނުގެ ވެރިންނަށާއި ރައްޔިތުންނަށް، އަދި ޔަމަނުގެ ފައުޖުތަކުގެ ހަނގުރާމަވެރިންނަށް މަރުހަބާ ކިޔާފަ އެވެ.
ސަރުކާރުން ބުނީ، ސައުދީގެ މަދަދުލިބޭ ފައުޖުތައް ފޭބުމާއެކު، އެ ސަރަހައްދުތަކުގެ ސަލާމަތީ ކަންކަން ބެލެހެއްޓުމާއި އާންމު ހިދުމަތްތައް އަލުން ގާއިމުކުރުމުގެ މަސައްކަތް ވަގުތުން ފަށާފައިވާ ކަމަށެވެ.
މި މަސައްކަތްތަކުގެ ތެރޭގައި، ހަނގުރާމައިގެ ސަބަބުން ހާލުގައި ޖެހުނު މީހުންނާއި ގެދޮރު ދޫކޮށް ދިޔަ މީހުންނަށް އެހީތެރިވުމާއި، ޒަޚަމްވި މީހުންނަށް ފަރުވާ ދިނުމާއި، ފެނާއި ކަރަންޓާއި ސިއްހީ ހިދުމަތް ފަދަ ޒަރޫރީ ހިދުމަތްތައް އަލުން ފޯރުކޮށްދިނުން ހިމެނެ އެވެ.
މީގެ އިތުރުން، ހަތިޔާރު ބަހައްޓައި ސައުދީގެ މަދަދުލިބޭ ފަރާތްތަކުގެ އަމުރުތަކަށް ކިޔަމަންވުން ހުއްޓާލާ މީހުންނަށް ސަރުކާރުން ދީފައިވާ ރިޔާސީ މައާފު އަދިވެސް ދެމިއޮތް ކަމަށް ބުނެފައިވެ އެވެ.
ބަދަލުހިފުމުގެ އަމަލުތައް ހިންގާ ކަމަށް ދެކެވޭ ވާހަކަތަކަކީ "ދޮގާއި އޮޅުވާލުން" ކަމަށް ބުނެ ހޫޘީންގެ ސަރުކާރުން އެކަން ދޮގުކުރި އެވެ. އަދި އެފަދަ ކަންކަމަކީ އެއްވެސް އަސާސެއް ނެތް ކަންކަން ކަމަށް ވެސް ބުންޏެވެ.
ބާބުލް މަންދަބާއި އަދަން ކަނޑުއޮޅިން ދަތުރުކުރާ ބައިނަލްއަގުވާމީ އުޅަނދުފަހަރުގެ ސަލާމަތްތެރިކަން ކަށަވަރުކޮށްދޭނެ ކަމަށް ހޫޘީންގެ ސަރުކާރުން ވައުދުވި އެވެ. އަދި ކަނޑުގެ ސަލާމަތާ ގުޅޭގޮތުން ސައުދީއާއި އެމީހުންގެ ބައިވެރިން ދައްކާ ވާހަކަތަކަކީ، ބައިނަލްއަގުވާމީ މުޖުތަމައުގެ މެދުގައި ބިރުވެރިކަން އުފައްދައި ޔަމަނާ ދެކޮޅަށް ޕްރެޝަރު ބޮޑުކުރުމަށް ފަތުރާ ދޮގު ޕްރޮޕަގަންޑާ ކަމަށް ސަރުކާރުން ސިފަކުރި އެވެ.
ސަބާ ނިއުސް އެޖެންސީން ރިޕޯޓްކުރި ގޮތުގައި، ތާއިޒް ގަވަރނަރޭޓް އެގްޒެކެޓިވް އޮފީހުގެ ޓީމެއް ބުރާސްފަތި ދުވަހު ވަނީ މުޚާއަށް ޒިޔާރަތްކޮށް، އެތަނުގެ ހާލަތު ބަލައި، ހަމަޖެހުމާއި އާންމު ހިދުމަތްތައް ގާއިމުކުރުމުގެ މަސައްކަތް ފަށާފަ އެވެ.
އެކި ދާއިރާތަކުގެ އިސްވެރިން ހިމެނޭ މި ޓީމުގެ ޒިޔާރަތުގައި، އެންމެ އަވަހަށް ބޭނުންވާ ކަންކަމާއި އާންމު ހިދުމަތްތަކާ ގުޅޭގޮތުން ލޯކަލް އޮތޯރިޓީތަކާ މަޝްވަރާކުރި އެވެ. އެ ސަރަހައްދުގެ ރައްޔިތުން ވަނީ މި ފިޔަވަޅުތަކަށް މަރުހަބާ ކިޔައި، މީގެ ސަބަބުން އާންމު ހާލަތަށް ރުޖޫއަވުމަށް މަގުފަހިވާނެ ކަމުގެ އުންމީދު ފާޅުކޮށްފަ އެވެ.
