ހިޒްބުالله ބިންގަރާސްތަކަށް އިސްރާއީލުން ބާރުގަދަ ހަމަލާތަކެއް ދީފި

ލުބުނާނުގެ ދެކުނުގައި އީރާނުގެ މަދަދުލިބޭ ހިޒްބުالله ޖަމާއަތުން ހަދާފައިވާ ބޮޑެތި ބިންގަރާސްތަކެއް ބާރުގަދަ ގޮއްވުންތަކަކާއެކު ސުންނާފަތިކޮށްލުމަށްފަހު، އެ ޖަމާއަތަށް އަމާޒުކޮށް އިތުރު ހަމަލާތަކެއް ދިނުމަށް ތައްޔާރަށް އޮތް ކަމަށް އިސްރާއީލުން ހުކުރު ދުވަހު ބުނެފި އެވެ.

އިސްރާއީލުގެ ޑިފެންސް މިނިސްޓަރު އިސްރާއީލް ކަޓްޒް އާންމުކުރެއްވި ވީޑިއޯ މެސެޖެއްގައި ވިދާޅުވީ، ހިޒްބުاللهއާ ދެކޮޅަށް ކުރިއަށްގެންދާ އަސްކަރީ ކެމްޕޭން މެދުކަނޑާނުލައި ކުރިއަށް ގެންދިއުމަށާއި، އެ ޖަމާއަތުގެ އިތުރު މަރުކަޒުތަކަށް ހަމަލާދިނުމަށް އިސްރާއީލުން އޮތީ ފުރިހަމައަށް ތައްޔާރުވެގެން ކަމަށެވެ.

ބުރާސްފަތި ދުވަހުގެ ފަހުގެ ވަގުތެއްގައި އިސްރާއީލުން ވަނީ ސްޓްރެޓީޖިކް ގޮތުން މުހިންމު ސަރަހައްދެއް ކަމަށްވާ އަލީ އަލް-ތާހިރު ފަރުބަދައިގެ އަޑީގައި ހަދާފައިވާ ބޮޑު ބިންގަރާސް ނެޓްވޯކެއް ގޮއްވާލާފަ އެވެ. އިސްރާއީލުން ބުނާ ގޮތުގައި އެއީ ހިޒްބުاللهގެ ކޮމާންޑް ސެންޓަރުތަކާއި، ހަނގުރާމަވެރިން ދިރިއުޅޭ ތަންތަނުގެ އިތުރުން، އިސްރާއީލުގެ އުތުރުގެ ސަރަހައްދުތަކަށާއި އެ ގައުމަށް އަރައިގަންނަ އިސްރާއީލު ސިފައިންނަށް ހަމަލާދިނުމަށް ބޭނުންކުރާ ހަތިޔާރު ގުދަންކޮށްފައިވާ ތަނެކެވެ.

މި ގޮއްވުމާއެކު އެ ސަރަހައްދުން ބޮޑު އަލިފާންގަނޑެއް ފެނިފައިވާއިރު، އެމެރިކާގެ ޖިއޮލޮޖިކަލް ސާވޭއިން ރެކޯޑްކޮށްފައިވާ ގޮތުގައި މި ގޮއްވުމުގެ ސަބަބުން 4.1 މެގްނިޓިއުޑްގެ ބިންހެލުމަކާ އެއްވަރުގެ ލޮޅުމެއް އެ ސަރަހައްދަށް އަރާފައިވެ އެވެ.

މި ބާރުގަދަ ހަމަލާ ކުރިއަށް ގެންގޮސްފައި މިވަނީ، ލުބުނާނުގެ ދެކުނުގައި އިސްރާއީލުން ކަނޑައަޅާފައިވާ "ސެކިއުރިޓީ ޒޯން" ނުވަތަ ރައްކާތެރިކަމުގެ ސަރަހައްދުގެ ކޮންޓްރޯލް ވަރުގަދަކުރުމުގެ ގޮތުން ކަމަށް ބުނެ، އެ ސަރަހައްދުގެ އުސްބިންތައް އިސްރާއީލު ސިފައިންގެ ބާރުގެ ދަށަށް ގެނައިތާ ހަފުތާއެއް ފަހުންނެވެ.

ޔަހޫދީންގެ އާ އަހަރާ ދިމާކޮށް އަދި އިސްރާއީލުގެ އިންތިޚާބަށް މަދު ހަފުތާތަކެއް ބާކީ އޮއްވައި ކަޓްޒް ދެއްވި މެސެޖުގައި ވިދާޅުވީ، އިސްރާއީލުގެ އުތުރުގެ ރައްޔިތުންނަށް ރައްކާތެރިކަން ހޯދައިދޭނެ ކަމަށް ވީ ވައުދު ފުއްދައިދީފައިވާ ކަމަށެވެ.

ކަޓްޒް އިތުރަށް ވިދާޅުވީ، މިހާރު އެ ސަރަހައްދުގައި ކުރިއަށްވުރެ ވަރުގަދަ ރައްކާތެރިކަމުގެ ސަރަހައްދެއް ގާއިމުކުރެވިފައިވާ ކަމަށާއި، މީގެ ސަބަބުން އާންމުން ދިރިއުޅޭ ރަށްތަކަށް ދެވޭ ހަމަލާތަކުން ރައްކާތެރިކަން ލިބި، ހިޒްބުاللهގެ މަރުކަޒުތަކަށް ނުރައްކާކުރުމުގެ ގާބިލުކަން އިސްރާއީލަށް ލިބިގެންދާނެ ކަމަށެވެ.

އިސްރާއީލުން ހާމަކުރި ގޮތުގައި، މި ބިންގަރާސް ނެޓްވޯކަކީ ފާއިތުވި ވިހި އަހަރު ދުވަހުގެ ތެރޭގައި ހިޒްބުاللهގެ މައި މަދަދުގާރު އީރާނުގެ އެހީތެރިކަމާއެކު ބިނާކޮށްފައިވާ ތަނެކެވެ. އީރާނުގެ ދީނީ ސަރުކާރަކީ ޣަައްޒާގައި ހަރަކާތްތެރިވާ ހަމާސް ޖަމާއަތަށްވެސް އެހީތެރިކަން ފޯރުކޮށްދޭ ސަރުކާރެކެވެ.

މެދުއިރުމަތީގެ ހަނގުރާމަ އިތުރަށް ފުޅާވެގެންދިޔައީ، ފެބްރުއަރީ މަހުގެ ފަހުކޮޅު އިސްރާއީލާއި އެމެރިކާއިން ގުޅިގެން އީރާނަށް ހަމަލާދިނުމާ ގުޅިގެންނެވެ.

1982 ވަނަ އަހަރު އިސްރާއީލުން ލުބުނާނުގެ ދެކުނަށް އަރައިގަތުމާ ދެކޮޅަށް އުފެދުނު ހިޒްބުالله ޖަމާއަތުން، އީރާނަށް ތާއީދުކޮށް އިސްރާއީލަށް ރޮކެޓް ހަމަލާތައް ދޭން ފެށުމާއެކު، ލުބުނާނު ވަނީ މި ބޮޑު ހަނގުރާމައިގެ ތެރެއަށް ދަމައިގަނެވިފަ އެވެ.

ލުބުނާނުގެ ކަމާބެހޭ އިދާރާތަކުން ބުނާ ގޮތުގައި، މާޗް މަހުން ފެށިގެން އިސްރާއީލުން އެ ގައުމުގައި ހިންގަމުންދާ އަސްކަރީ އޮޕަރޭޝަންތަކުގައި މިހާތަނަށް 4,300 އަށްވުރެ ގިނަ މީހުން ވަނީ މަރުވެފަ އެވެ.

އިސްރާއީލު ސިފައިން ބުނި ގޮތުގައި، އަލީ އަލް-ތާހިރު ސަރަހައްދުން ނައްތާލި ބިންގަރާސް ނެޓްވޯކަކީ ދެ ކިލޯމީޓަރަށްވުރެ ދިގު ސަރަހައްދަކަށް ފެތުރިފައިވާ ތަނެކެވެ. އެތަނުން އީރާނުގައި އުފައްދާފައިވާ އެތައް ރޮކެޓަކާއި، މިސައިލާއި، ޑްރޯންގެ އިތުރުން ގިނަ އަދަދެއްގެ އެހެނިހެން ހަތިޔާރު ފެނިފައިވާ ކަމަށްވެސް އިސްރާއީލުން ބުނެ އެވެ.

މި ފަރުބަދަ އޮންނަނީ އިސްރާއީލުން ކަނޑައަޅާފައިވާ ރައްކާތެރިކަމުގެ ސަރަހައްދުގެ އަރިމަތީގަ އެވެ. އެއީ ޔުނެސްކޯގެ ދުނިޔޭގެ ތަރިކައިގެ ލިސްޓުގައި ހިމެނޭ ބިއުފޯޓް ކާސަލްއާ މަދު ކިލޯމީޓަރުތަކެއް ދުރުގައި އޮންނަ، ފާއިތުވި މަސްތަކުގައި އިސްރާއީލުން ހިފާފައިވާ ސްޓްރެޓީޖިކް ގޮތުން މުހިންމު ސަރަހައްދެކެވެ.