އެކުވެރި ގައުމުތަކުގެ ރައްޔިތުންނަށް ރަޝިޔާއިން ވިސާ ހޯދަން ލުއިތަކެއް ދެނީ
10 ސެޕްޓެމްބަރު 2026 | ބުރާސްފަތި 08:51ރަޝިޔާއާއި ސައުދީ އަރަބިއްޔާ އަދި ޗައިނާއާ ދެމެދު ވިސާގެ ލުއިތަކެއް ދިނުމަށް ނިންމާފައިވާއިރު، މީގެ ސަބަބުން ފަތުރުވެރިކަމާއި އިންސާނީ އެހީތެރިކަމުގެ ގުޅުންތައް ވަރުގަދަވާނެ ކަމަށް ރަޝިޔާއިން ބުނޭ. ހަމަމިއާއެކު، އާކްޓިކް ސަރަހައްދުގައި ނޭޓޯއިން ހިންގާ އަސްކަރީ ހަރަކާތްތަކަކީ ރަޝިޔާގެ ސަލާމަތަށް އޮތް ނުރައްކަލެއް ކަމަށާއި، އެ ކަމާ ދެކޮޅަށް އަސްކަރީ އަދި ފަންނީ ހުރިހާ ވަސީލަތެއް ބޭނުންކުރުމަށް ތައްޔާރަށް އޮތް ކަމަށް ވެސް ރަޝިޔާއިން ބުނޭ
ރަޝިޔާގެ ޚާރިޖީ ވުޒާރާގެ ތަރުޖަމާނު މާރިއާ ޒަޚަރްވާ ނޫސްވެރިންގެ ބައްދަލުވުމެއްގައި ވާހަކަދައްކަވަނީ | ވިކިމީޑިއާ ކޮމަންސް
ރަޝިޔާއާއެކު ގާތް ގުޅުން ބާއްވާ ގައުމުތަކުގެ ރައްޔިތުންނަށް އެ ގައުމަށް ދަތުރު ކުރުމުގައާއި ވިސާ ހޯދުމުގައި އިތުރު ލުއިތަކެއް ދިނުމަށް ގިނަ މަސައްކަތްތަކެއް ކުރަމުންދާ ކަމަށް، އެ ގައުމުގެ ޚާރިޖީ ވުޒާރާގެ ތަރުޖަމާނު މާރިއާ ޒަޚަރްވާ ވިދާޅުވެއްޖެ އެވެ. ރަޝިޔާގެ ކޯމީ ސަރަހައްދުގެ ސިކްޓިވްކާރުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ޒަޚަރްވާ ވިދާޅުވީ، އޭޝިއާ، އެފްރިކާ، މެދުއިރުމަތި އަދި ލެޓިން އެމެރިކާގެ ގައުމުތަކުގެ ތެރެއިން މި ކަމަށް ޝައުގުވެރިކަން ހުރި ގައުމުތަކާއެކު ރަޝިޔާއިން މަޝްވަރާތައް ކުރިއަށްގެންދާ ކަމަށެވެ.
މީގެ އިތުރުން "ރަޝިޔާއާއެކު ގާތް ގުޅުން ބާއްވާ ގައުމުތަކުގެ ރައްޔިތުންނަށް ދަތުރުފަތުރުގެ ކަންކަން އިތުރަށް ލުއިފަސޭހަކޮށްދިނުމަށް ޓަކައި، އެ ގައުމުތަކުގެ ކަމާބެހޭ ފަރާތްތަކާ ގުޅިގެން އަޅުގަނޑުމެން ދަނީ ހަރުދަނާ އަދި މެދުކެނޑުމެއް ނެތް މަސައްކަތްތަކެއް ކުރަމުން،" ޒަޚަރްވާ ވިދާޅުވި އެވެ.
ރަޝިޔާއާއި ސައުދީ އަރަބިއްޔާއާ ދެމެދު ވެފައިވާ ވިސާއާ ނުލައި ދަތުރުކުރެވޭނެ އެއްބަސްވުމަށް މެއި މަހުގެ 1 ވަނަ ދުވަހުން ފެށިގެން އަމަލުކުރަން ފަށާފައިވާ ކަން ފާހަގަކުރައްވަމުން ޒަޚަރްވާ ވިދާޅުވީ، އޮގަސްޓް މަހުގެ 31 ވަނަ ދުވަހު ބިޝްކެކްގައި ޗައިނާގެ ރައީސް ޝީ ޖިންޕިންގއާއެކު ބޭއްވި މަޝްވަރާތަކުގައި، ރަޝިޔާއާއި ޗައިނާއާ ދެމެދު މިހާރު އޮތް ވިސާއާ ނުލައި ދަތުރުކުރެވޭ އުސޫލަކީ ދާއިމީ އުސޫލަކަށް ބަދަލުކުރުމުގެ ފުރުސަތާ ގުޅޭގޮތުން ރައީސް ވްލަޑިމިއާ ޕުޓިން ވާހަކަފުޅު ދައްކަވާފައިވާ ކަމަށެވެ. އަދި، ކަނޑައެޅޭ ވަކި ބާވަތްތަކުގެ ދަތުރުތަކަށް ވިސާގެ ޝަރުތުތައް ވަގުތީ ގޮތުން ލުއިކޮށްދިން ފަހުން، ޗައިނާއާއެކު އޮންނަ ފަތުރުވެރިކަމުގެ ގުޅުމާއި އިންސާނީ އެހީތެރިކަން ބަދަލުކުރުންތައް ވަރަށް ބޮޑަށް އިތުރުވެފައިވާ ކަމަށް ވެސް އޭނާ ވިދާޅުވި އެވެ.
ނޭޓޯއާ ދެމެދު އުފެދިފައިވާ ނުތަނަވަސްކަމަށް އަލިއަޅުވާލައްވަމުން ޒަޚަރްވާ ވިދާޅުވީ، އާކްޓިކް ސަރަހައްދުގައި ނޭޓޯގެ ފަރާތުން ކުރިމަތިކުރަމުންދާ ނުރައްކާތަކާ ދެކޮޅަށް ރަޝިޔާގެ އަސްކަރީ އަދި ފަންނީ ހުރިހާ ވަސީލަތްތަކެއް ބޭނުންކުރުމަށް އެ ގައުމު އޮތީ ތައްޔާރަށް ކަމަށެވެ. މި ގޮތުން "މަސްލަހަތު ރައްކާތެރިކުރުމަށް ކޮންމެހެން ބޭނުންވެއްޖެ ހާލަތެއްގައި، ކުރިމަތިވާ ނުރައްކާތަކާ ދެކޮޅަށް މަސައްކަތްކޮށް އެ ނުރައްކާތައް ނައްތާލުމަށް ޓަކައި، ރަޝިޔާއިން އަސްކަރީ އަދި ފަންނީ ހުރިހާ ވަސީލަތްތަކެއްގެ ބޭނުން ހިފާނެ،" ކަމަށް ނޫސްވެރިންނަށް މައުލޫމާތު ދެއްވަމުން އޭނާ ވިދާޅުވި އެވެ.
ޒަޚަރްވާ ވިދާޅުވީ، ރަޝިޔާގެ ޚާރިޖީ އަދި ދިފާޢީ ވުޒާރާގެ އިތުރުން ކަމާބެހޭ އެހެނިހެން އިދާރާތައް ގުޅިގެން އާކްޓިކް ސަރަހައްދުގައި ނޭޓޯއިން ހިންގާ ހަރަކާތްތައް ވަރަށް ގާތުން ބަލަމުންދާ ކަމަށާއި، އެ ކަންކަމަށް ރައްދު ދިނުމަށް އަޅަންޖެހޭ ފިޔަވަޅުތައް ދުރާލައި ތައްޔާރުކުރަމުންދާ ކަމަށެވެ. އަދި، ރަޝިޔާގެ އުތުރުގެ ބޯޑަރުތައް ކައިރީގައި ނޭޓޯއިން އަސްކަރީ ހަރަކާތްތައް ވަރުގަދަކޮށް، ބޮޑެތި ތަމްރީނުތައް ބާއްވާ، އެ އިއްތިހާދުގެ ކޮމާންޑް އެންޑް ކޮންޓްރޯލް އޮނިގަނޑަށް ބަދަލުތައް ގެންނަމުންދާކަން ފާހަގަކުރައްވައި، އެއީ ރަޝިޔާގެ ސަލާމަތަށް އޮތް "ސީދާ ނުރައްކަލެއް" ގެ ގޮތުގައި އޭނާ ވަނީ ސިފަކުރައްވާފަ އެވެ. ނަމަވެސް، އާކްޓިކް ސަރަހައްދުގެ ތަރައްގީއަށް މަސައްކަތްކުރާ އަދި އެ ސަރަހައްދުގެ ސުލްހަޔާއި ހަމަޖެހުން ދެމެހެއްޓުމަށް ބޭނުންވާ ގައުމުތަކާއެކު، ސަލާމަތީ ކަންކަމާ ގުޅޭގޮތުން މަޝްވަރާކުރުމުގެ ފުރުސަތު މޮސްކޯއިން އަދިވެސް ހުޅުވާލާފައިވާ ކަމަށް ޒަޚަރްވާ ވިދާޅުވި އެވެ.
މަސްދަރު: އަނަދޯލް އޭޖެންސީ
