ޗައިނާގެ މުދާ އުފުލާ ބޯޓެއްގައި އަލިފާން ރޯވެ، މަދުވެގެން 25 މީހުން މަރުވެއްޖެ

ޗައިނާގެ ކިންގްޑާއޯ ބަނދަރުގައި އޮތް މުދާ އުފުލާ ބޯޓެއްގައި އަލިފާން ރޯވެ، މަދުވެގެން 25 މީހުން މަރުވެއްޖެއެވެ.

ޗައިނާގެ ދައުލަތުގެ މީޑިއާތަކުން ރިޕޯޓްކޮށްފައިވާ ގޮތުގައި، މި ހާދިސާ ހިނގާފައިވަނީ އެ ގައުމުގެ ބަނދަރެއްގައި ބޭރު ގައުމެއްގެ ދިދަ ޖަހާފައިވާ މުދާ އުފުލާ ބޯޓެއް ބަނދަރުކޮށްފައި އޮއްވަ އެވެ.

ޗައިނާގެ ދައުލަތުގެ ބްރޯޑްކާސްޓަރު ސީ.ސީ.ޓީ.ވީ އިން ބުރާސްފަތި ދުވަހު ރިޕޯޓްކޮށްފައިވާ ގޮތުގައި، މި ބޯޓުން ދަތުރުކުރި 42 މީހުންގެ ތެރެއިން 12 މީހަކު ވަނީ ރައްކާތެރިކަމާއެކު ސަލާމަތްކޮށްފަ އެވެ. އަދި އަނިޔާވި ފަސް މީހަކަށް ހޮސްޕިޓަލުގައި ފަރުވާދެމުންދާއިރު، އެ މީހުންގެ ހާލު މިހާރު އަންނަނީ ރަނގަޅުވަމުންނެވެ.

ޗައިނާގެ އިރުއުތުރު އައްސޭރީގެ މުހިންމު ޝިޕިންގް ހަބެއް ކަމަށްވާ ކިންގްޑާއޯ ބަނދަރުގެ ބެއިހައި ޝިޕްބިލްޑިންގް ކުންފުނީގައި މަރާމާތަށް ބޯޓު ބާއްވާފައި އޮއްވައި، މި އަލިފާނުގެ ހާދިސާ ހިނގާފައިވަނީ އެ ގައުމުގެ ގަޑިން ހެނދުނު 11:15 (ޖީ.އެމް.ޓީ އިން 03:15) ހާއިރު ކަމަށް ދައުލަތުގެ ނިއުސް އެޖެންސީ ޝިންހުއާ އިން ބުނެ އެވެ.

މި އަލިފާން ރޯވާން މެދުވެރިވި ސަބަބެއް އަދި ސާފުވެފައި ނުވެ އެވެ.

ޒިންހުއާ އިން އާންމުކޮށްފައިވާ ފޮޓޯއަކުން އެނގޭ ގޮތުގައި، އަލިފާން ރޯވެފައިވަނީ "އޯޝަން މެލޯޑީ" ނަމަކަށް ކިޔާ ބޯޓެއްގަ އެވެ. އާންމުކޮށް އުޅަނދުފަހަރު ޓްރެކްކުރާ ވެބްސައިޓެއް ކަމަށްވާ "ވެސެލް ފައިންޑާ" އިން ދައްކާ ގޮތުގައި މިއީ ލައިބީރިއާގެ ދިދަ ޖަހާފައިވާ ބޯޓެކެވެ.

މި ހާދިސާއާ ގުޅިގެން ޗައިނާގެ ރައީސް ޝީ ޖިންޕިންގް ވަނީ މީހުން ހޯދުމާއި ސަލާމަތްކުރުގެ މަސައްކަތް އަވަސް ކުރުމަށް ގޮވާލައްވާފަ އެވެ.

ގެއްލިފައިވާ މީހުން ހޯދުމުގެ މަސައްކަތް އަވަސްކުރުމަށާއި، މި ހާދިސާގައި އިހުމާލުވާ ފަރާތްތައް ހޯދައި ހަރުކަށި ފިޔަވަޅު އެޅުމަށް ރައީސް ޝީ ބާރުއަޅުއްވާފައިވާ ކަމަށް ޒިންހުއާ އިން ރިޕޯޓްކުރެ އެވެ.

ޗައިނާގެ ބޮޑުވަޒީރު ލީ ކިއާންގް ވަނީ ބޯޓުގެ ތެރޭގައި ތާށިވެފައި ތިބި މީހުން ސަލާމަތްކުރުމަށާއި، އަނިޔާވި މީހުންނަށް ބޭނުންވާ ސިއްހީ ފަރުވާ ފޯރުކޮށްދިނުމަށް އިރުޝާދު ދެއްވާފަ އެވެ.

މީގެ އިތުރުން، މި ހާދިސާގެ ސަބަބުން ކުރިމަތިވެދާނެ އިތުރު ނުރައްކާތަކުން ރައްކާތެރިވުމަށް ހަރުދަނާ ފިޔަވަޅުތައް އެޅުމަށްވެސް ކަމާބެހޭ ފަރާތްތަކަށް ބޮޑުވަޒީރު ވަނީ ގޮވާލައްވާފަ އެވެ.

ރައީސް ޝީ ވިދާޅުވީ، ހުރިހާ ސަރަހައްދުތަކަކުންނާއި ކަމާބެހޭ އިދާރާތަކުން މި ހާދިސާއިން އިބުރަތް ހާސިލްކުރަންޖެހޭ ކަމަށާއި، އަލިފާނުގެ ހާދިސާތައް ހިނގަން މެދުވެރިވެދާނެ ހުރިހާ ކަމެއް ފުރިހަމައަށް ތަހުގީގުކޮށް އިސްލާހުކުރަން ޖެހޭނެ ކަމަށެވެ.