އެމެރިކާގެ ސީއައިއޭގެ ވެރިޔާ ކުއްލި ގޮތަކަށް މޮސްކޯއަށް ޒިޔާރަތްކޮށްފި

އެމެރިކާގެ ސެންޓްރަލް އިންޓެލިޖެންސް އެޖެންސީ (ސީއައިއޭ) ގެ ވެރިޔާ، ކުރިން އިޢުލާނުކުރުމަކާ ނުލައި މަޝްވަރާތަކަކަށް ރަޝިޔާގެ މޮސްކޯއަށް ވަޑައިގެންފި ކަމަށް ސީބީއެސް އިން ރިޕޯޓްކޮށްފި އެވެ.

ރިޕޯޓްތައް ބުނާ ގޮތުގައި ޖޯން ރެޓްކްލިފް ރަޝިޔާގެ ވެރިރަށަށް ވަޑައިގަތީ މިދިޔަ އަންގާރަ ދުވަހުގެ ކުރީކޮޅުގަ އެވެ. ނަމަވެސް، މި ދަތުރުފުޅުގެ ބޭނުމަކީ ކޮބައިކަން ނުވަތަ އޭނާ ބައްދަލުކުރައްވަން ހަމަޖެހިފައިވަނީ ކޮން ބޭފުޅުންނަކާ ކަން ވޮޝިންޓަނުން ނުވަތަ މޮސްކޯއިން ވެސް ކަށަވަރުކޮށްދީފައެއް ނުވެ އެވެ.

އެމެރިކާ އާއި ރަޝިޔާގެ މަތީ ފަންތީގެ އޮފިޝަލުން މިގޮތަށް ބައްދަލުކުރައްވައި ކުރިއަށްގެންދަވާ މަޝްވަރާތަކަކީ ވަރަށް މަދުން ނޫނީ ނުފެންނަ ކަމެކެވެ.

ފްލައިޓް ޓްރެކިންގް ޑޭޓާތަކުން ކަށަވަރުވާ ގޮތުގައި، އެމެރިކާގެ އަސްކަރީ ބޮޑު މަތިންދާބޯޓެއް އަންގާރަ ދުވަހު ވަނީ ލެޓްވިއާ މަގުން އެމެރިކާއިން ރަޝިޔާއަށް ދަތުރުކޮށްފަ އެވެ. އަދި އެ ބޯޓު އެނބުރި ފުރާފައިވަނީ އެ ދުވަހުގެ ފަހުގެ ވަގުތެއްގަ އެވެ.

ސޯޝަލް މީޑިއާގައި އާންމުވެފައިވާ ވީޑިއޯތަކުން ފެންނަ ގޮތުގައި، ސީ-17 މަރުކާގެ މުދާ އުފުލާ މަތިންދާބޯޓެއް މޮސްކޯގެ ވްނޫކޯވޯ އިންޓަނޭޝަނަލް އެއާޕޯޓަށް ޖައްސަން ދާތަން ފެނެ އެވެ.

ފްލައިޓް ރޭޑާ24 ގެ ތަފާސްހިސާބުތަކަށް ބަލާއިރު، އެ ބޯޓު ރީގާ އެއާޕޯޓުން ފުރާފައިވަނީ ގްރީނިޗް މީން ޓައިމް (ޖީއެމްޓީ) އިން 05:50 ގައެވެ. އަދި ރަޝިޔާގެ ވެރިރަށަށް އެ ބޯޓު ޖައްސާފައިވަނީ ޖީއެމްޓީ އިން ގާތްގަނޑަކަށް 07:04 ގަ އެވެ. އެއަށްފަހު އެ ބޯޓު އެނބުރި ރީގާއަށް ގޮސްފައިވަނީ ޖީއެމްޓީ އިން 17:00 ގެ ކުޑަވަގުތުކޮޅެއް ކުރިންނެވެ.

މީގެ އިތުރުން، ޑިޕްލޮމެޓިކް މޮޓޯކޭޑެއް މޮސްކޯގެ ތެރޭގައި ދަތުރުކުރާ މަންޒަރު ފެންނަ ވީޑިއޯތަކެއް ވެސް ސޯޝަލް މީޑިއާގައި ވަނީ ދައުރުވެފަ އެވެ.

މި ދަތުރުފުޅުގެ ކުރިން، އެމެރިކާގެ މަތީ ފަންތީގެ ވަފުދެއް މޮސްކޯއަށް ދަތުރުކުރާނެ ކަމަށް އެމެރިކާއިން ޔޫކްރެއިނަށް އަންގާފައިވާ ކަމަށާއި، އެ ވަފުދު އެނބުރި ދަންދެން ހަމަލާތައް މެދުކަނޑާލުމަށް ކީވްގެ ކިބައިން އެދިފައިވާ ކަމަށް ޔޫކްރެއިނުގެ އިސް އޮފިޝަލަކު ސީބީއެސްއަށް މައުލޫމާތު ދީފައިވެ އެވެ.

މިއީ ސީއައިއޭގެ ޑިރެކްޓަރުގެ މަގާމާ ހަވާލުވެވަޑައިގަތުމަށްފަހު ރެޓްކްލިފް ރަޝިޔާއަށް ކުރެއްވި ފުރަތަމަ ދަތުރުފުޅު ކަމަށް ބެލެވުނު ނަމަވެސް، އޭނާ ގެންދަވަނީ މޮސްކޯގެ އިންޓެލިޖެންސް އިދާރާތަކުގެ އިސްވެރިންނާ ގުޅުން ބާއްވަވަމުންނެވެ.

2019 އިން 2022 އަށް މޮސްކޯގައި ހުންނަ އިނގިރޭސި އަސްކަރީ އެޓޭޗޭގެ މަގާމު ފުރުއްވި ޖޯން ފޯމަން، ރޭޑިއޯ 4 ގެ ޕީއެމް ޕްރޮގްރާމުގައި ވިދާޅުވީ، ޖަރުމަނުގައި ފަހަކަށް އައިސް ހިންގަމުންދާ ޑްރޯންގެ ހަރަކާތްތަކަކީ ރަޝިޔާއާ ގުޅުންހުރި ކަންތައްތަކެއް ކަމަށް ބެލެވޭތީ، މި ދަތުރުފުޅަކީ މަސްލަހަތު ގޯސްވިޔަނުދީ ހިފެހެއްޓުމަށް (އެސްކަލޭޝަން މެނޭޖްމަންޓް) ކުރެއްވި ދަތުރުފުޅަކަށް ވެދާނެ ކަމަށެވެ.

އޭނާ އިތުރަށް ވިދާޅުވީ، ކަމެއް ގޯސްވެގެން ނޫނީ އެމެރިކާގެ މިފަދަ މަތީ ފަންތީގެ އޮފިޝަލަކު ކުއްލި ގޮތަކަށް، ކުރިން އެންގުމަކާ ނުލައި މޮސްކޯއަށް ވަޑައިނުގަންނަވާނެ ކަމަށެވެ.

ފޯމަން ވިދާޅުވި ގޮތުގައި، މި ދަތުރުފުޅަކީ ރަޝިޔާގައި މިހާރު ބަންދުކޮށްފައި ތިބި އެމެރިކާގެ ރައްޔިތުން މިނިވަންކުރުމާ ގުޅޭގޮތުން ކުރެވޭ ދަތުރުފުޅަކަށް ވުމަކީ ވެސް އެކަށީގެންވާ ކަމެކެވެ.

ޔޫކްރެއިނަށް އެހީތެރިކަން ފޯރުކޮށްދިން ކަމުގެ ތުހުމަތުގައި އަހަރަކަށްވުރެ ގިނަ ދުވަހު ރަޝިޔާގައި ޖަލަށްލާފައި ހުރި ރަޝިޔާ-އެމެރިކާ ރައްޔިތެއް ކަމަށްވާ ކްސޭނިއާ ކަރެލީނާ މިނިވަންކުރުމުގެ މަޝްވަރާތަކުގައި ވެސް ރެޓްކްލިފް ވަނީ މުހިންމު ދައުރެއް އަދާކުރައްވާފަ އެވެ.

މީގެ އިތުރުން، 2024 ވަނަ އަހަރު ރަޝިޔާއާއެކު ވެވުނު ކުށްވެރިން ބަދަލުކުރުމުގެ އެއްބަސްވުމުގެ ދަށުން ވޯލްސްޓްރީޓް ޖާނަލްގެ ރިޕޯޓަރު އީވަން ގާޝްކޮވިޗް އާއި، އެމެރިކާގެ ކުރީގެ މެރިން ޕޯލް ވީލަން އަދި ރަޝިޔާ-އެމެރިކާ ނޫސްވެރިޔާ އަލްސޫ ކުރުމަޝޭވާ މިނިވަންކުރުމުގައި ވެސް ސީއައިއޭ އިން ބައިވެރިވެފައިވެ އެވެ.

2022 ވަނަ އަހަރު ރަޝިޔާއިން ޔޫކްރެއިނަށް އަރާ ހަނގުރާމަ ފެށި ފަހުން، އެމެރިކާ އާއި ރަޝިޔާގެ ގުޅުން ވަނީ ވަރަށް ބޮޑަށް ގޯސްވެފަ އެވެ. އޭގެ ފަހުން ރަޝިޔާ ވަނީ ދުނިޔޭގެ މަސްރަހުގައި އެކަހެރިވެ، ބައިނަލްއަގުވާމީ އިގްތިސާދީ ދަތިކުރުމުގެ ފިޔަވަޅުތަކާ ކުރިމަތިލާން ޖެހިފަ އެވެ.

ރެޓްކްލިފް އަކީ ރައީސް ޑޮނަލްޑް ޓްރަމްޕްގެ ދެވަނަ ދައުރުގައި ރަޝިޔާއަށް ޒިޔާރަތްކުރެއްވި އެމެރިކާގެ އެންމެ މަތީ ފަންތީގެ އެއް އޮފިޝަލެވެ.

ރައީސް ޓްރަމްޕް މިދިޔަ އަހަރު އެލަސްކާގައި ބޭއްވުނު ސަމިޓެއްގައި ރަޝިޔާގެ ރައީސް ވްލަޑިމިއަރ ޕޫޓިންއާ ބައްދަލުކުރެއްވި ނަމަވެސް، އެ ބައްދަލުވުމުން އެދެވޭ ނަތީޖާއެއް ފެނިފައެއް ނުވެ އެވެ. އަދި އޭގެ ފަހުން އެމެރިކާ އިސްވެ އޮވެ ރަޝިޔާ އާއި ޔޫކްރެއިނާ ދެމެދު ކުރިއަށްގެންދަން އުޅުނު ސުލްހައިގެ މަޝްވަރާތައް ވެސް ވަނީ ހުއްޓުމަކަށް އައިސްފަ އެވެ.