ޔޫތު މިނިސްޓްރީން ކުރިއަށްގެންދާ އަރުތަ ޕްރޮގްރާމްގެ ދަށުން ތަމްރީނުވުމުގެ ފުރުސަތު ޒުވާން ޓޭބަލް ޓެނިސް (ޓީޓީ) ކުޅުންތެރިޔާ ފާތިމަތު ދީމާ އަލީ އަށް ދީފި އެވެ.
މިއީ ރާއްޖޭގައި އެކި ކުޅިވަރުތަކުން ޒުވާން ހުނަރުވެރި ކުޅުންތެރިން އުފެއްދުމުގެ މަޤްސަދުގައި ޔޫތު މިނިސްޓްރީން ކުރިއަށްގެންދާ ޕްރޮގްރާމެކެވެ. މިހާތަނަށް އެކިއެކި ކުޅިވަރުތަކުން ގިނަ ކުޅުންތެރިންނަށް ވަނީ އަރުތަ ޕްރޮގްރާމް އިން ފުރުސަތު ދީފަ އެވެ. މިހާތަނަށް ވަނީ ރާއްޖޭގެ ބީޗުވޮލީ ދެ ކުޅުންތެރިން ކަމަށްވާ އިސްމާއީލް ސާޖިދު (ކުޑަކާއްޓޭ) އާއި އާދަމް ނަސީމް (އެޑަމް)، ޒުވާން ފެތުންތެރިޔާ ޢީން ޢައްބާސް ޝަރީފް، ޒުވާން ޓެނިސް ކުޅުންތެެރިޔާ އާރާ އާޞަލް ޢާޘިމް، ބެޑްމިންޓަން ކުޅުންތެރިން ކަމަށްވާ އައިމިނަތު ނަބީހާ (ނަބީ)، ފާތިމަތު ނަބާހާ (ނަބާ)ގެ އިތުރުން ޒުވާން ދުވުންތެރިޔާ އިބާދުﷲ އާދަމް އަށް ފުރުސަތު ދީފަ އެވެ.
އަންގާރަ ދުވަހު ޔޫތު މިނިސްޓަރު އަޙުމަދު މަޚްލޫފް ކުރެއްވި ޓުވީޓެއްގައި ވިދާޅުވީ، އަރުތަ ޕްރޮގްރާމްގެ އެތުލީޓުންގެ ލިސްޓުގައި ރަސްމީކޮށް ދީމާގެ ނަން ހިމަނާފައިވާ ކަމަށެވެ. މީގެ އިތުރުން ރާއްޖެއިން ބޭރުގައި ހަދާ ތަމްރީނުތަކުގެ އިތުރުން މުބާރާތްތަކަށް ދިއުމަށް އެހީތެރިކަން ފޮރުކޮށްދިނުމުގެ ގޮތުން 10 އަހަރު ދުވަހުގެ އެއްބަސްވުމެއްގައި ސޮއިކޮށްފައިވާ ކަމަށެވެ.
ރާއްޖޭގެ ކުޅުންތެރިންނަށް އެންމެ އެކަށީގެންވާ ފުރުސަތުތައް ހޯދައިދީ، ކުޅިވަރުތަކުން ރަން ވަނަ ހޯދުމަކީ ސަރުކާރުން އިސްކަން ދެމުން އަންނަ ކަމެކެވެ.
