ކުށް ކޮށްގެން ހޯދާ މުދާ ދައުލަތަށް ނެގޭ ބިލެއް ސަރުކާރުން ހުށަހަޅައިފި
25 އޯގަސްޓު 2026 | އަންގާރަ 16:41ޖިނާއީ ބޮޑެތި ކުށްތައް ކޮށްގެން ހޯދާ މުދާ ދައުލަތަށް ނެގުމަށްޓަކައި ހަރުދަނާ ގާނޫނީ އޮނިގަނޑެއް ގާއިމުކުރުމަކީ މި ބިލުގެ މައިގަނޑު މަގުސަދު. މި ބިލުގެ ސަބަބުން ކުށްކޮށްގެން ނުހައްގު މާލީ މަންފާ ހޯދުން ހުއްޓުވުމަށާއި ދައުލަތުން ގެއްލިފައިވާ މުދާ އަނބުރާ ހޯދުމުގައި މިހާރު ކުރިމަތިވާ ގާނޫނީ ހުރަސްތަކަށް ހައްލެއް ލިބިގެންދާނެ
ރައީސް ޑރ. މުއިއްޒު އާއި މަޖިލީހުގެ ރައީސް އަބްދުއްރަހީމް | ރައީސް އޮފީސް
ކުށް ކޮށްގެން ހޯދާ މުދަލާގުޅޭ ބިލެއް އެކުލަވާލައި ސަރުކާރުގެ ފަރާތުން ރައްޔިތުންގެ މަޖިލީހަށް ފޮނުވާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އަންގާރަ ދުވަހު "އެކްސް" ގައި ކުރެއްވި ޕޯސްޓެއްގައި ރައީސް ވިދާޅުވީ މި ބިލު ހުށަހެޅުމުގެ މައިގަނޑު އެއް ބޭނުމަކީ، ޖިނާއީ ބޮޑެތި ކުށްތައް ކުރާ ފަރާތްތަކުން ނުހައްގުން ހޯދާ މުދާ އެ ފަރާތްތަކުގެ ކިބައިން ނަގައި، އެ މުދަލުން އިތުރު މަންފާ ހޯދޭނެ މަގުތައް ބަންދުކުރުމަށްޓަކައި، ކުށް ކޮށްގެން ހޯދާ މުދާ ދައުލަތަށް ނެގުމާބެހޭ ގާނޫނީ އޮނިގަނޑެއް ތައާރަފު ކުރުން ކަމަށެވެ.
މީގެ ސަބަބުން ޖިނާއީ ބޮޑެތި ކުށްތައް ކުރާ ފަރާތްތަކުން އެފަދަ ކުށް ކޮށްގެން ހޯދާ މުދަލުން މާލީ މަންފާ ހޯދުން ހުއްޓުވޭނެ ކަމަށާއި އެކި ފަރާތްތަކުން ޖިނާއީ ބޮޑެތި ކުށްކޮށްގެން ހޯދާފައިވާ ދައުލަތުގެ މުދާ ދައުލަތަށް ނެގުމުގައި މިހާރު ދިމާވެފައިވާ ގާނޫނީ މައްސަލައަށް ވެސް މި ބިލުން ހައްލެއް ލިބިގެންދާނެ ކަމަށް އެމަނިކުފާނު ވިދާޅުވި އެވެ.
މި ބިލުގެ ތަފްސީލު މަޖިލީހުގެ ވެބްސައިޓުން އަދި ފެންނާކަށް ނެތެވެ.
ފާހަގަ ކޮށްލެވޭ ގޮތުގައި މިފަދަ ބިލެއް މަޖިލީހަށް ފޮނުވާފައިވާ ކަމަށް ރައީސް ވިދާޅުވި އިރު، ނުހައްގު މުއްސަނދިކަމާ ގުޅޭ ބިލެއްގެ މަސައްކަތް ވެސް މީގެ ކުރިން މަޖިލީހުން ކޮށްފައިވެ އެވެ.
