އިންފޮމޭޝަން ކޮމިޝަނަރުގެ މަގާމަށް އަބްދުލްއަޒީޒު އައްޔަނު ނުކުރުމަށް ގޮވާލަމުން ދަނިކޮށް އޭނާއަށް ކޮމިޓީ އިން ރުހުންދީ މައްސަލަ ތަޅުމަށް!
24 އޯގަސްޓު 2026 | ހޯމަ 09:33އިންފޮމޭޝަން ކޮމިޝަނަރުގެ މަގާމަށް އަބްދުލްއަޒީޒް ޖަމާލް އަބޫބަކުރު އައްޔަނުކުރަން ޓްރާންސްޕޭރަންސީ މޯލްޑިވްސްއިން ދެކޮޅުހަދާފައި ވަނިކޮށް، މަޖިލީހުގެ މިނިވަން މުއައްސަސާތަކުގެ ކޮމިޓީން އޭނާއަށް ރުހުން ދީފި. އޭނާ ކުރިން އެ މަގާމުގައި ހުންނެވި އިރު ގާނޫނު ތަންފީޒުކުރުމުގައި އިހުމާލުވެފައިވާ ކަމަށް ބުނެ ޝަކުވާ ހުށަހެޅި ނަމަވެސް، ކޮމިޓީ އިންޓަވިއުއިން 75 އިންސައްތައަށް ވުރެ މަތިން މާކްސް ލިބުމުން އޭނާގެ ނަން ވަނީ ތަޅުމަށް ފޮނުވާފައި
އަބްދުލްއަޒީޒް ޖަމާލް އަބޫބަކުރު: އިންފޮމޭޝަން ކޮމިޝަނަރުގެ މަގާމަށް އޭނާ އައްޔަނުކުރަން ކޮމިޓީ އިން ވަނީ ރުހުން ދީފަ | ރައީސް އޮފީސް
އިންފޮމޭޝަން ކޮމިޝަނަރުގެ މަގާމަށް އަބްދުލްއަޒީޒް ޖަމާލް އަބޫބަކުރު އައްޔަނު ނުކުރުމަށް ޓްރާންސްޕޭރަންސީ އާއި އެތައް ބަޔަކު ގޮވާލަމުން ދަނިކޮށް، އެ މައްސަލަ ދިރާސާ ކުރި މިނިވަން މުއައްސަސާތަކުގެ ކޮމިޓީ އިން އޭނާ އަށް ރުހުން ދީ، މައްސަލަ ތަޅުމަށް ފޮނުވައިފި އެވެ.
2026 އޮގަސްޓް 23 ގައި ޓްރާންސްޕޭރަންސީ މޯލްޑިވްސް އިން ވަނީ ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގެ މުގައްރިރު ހުސެއިން ރިޒާ އާދަމް އަށް އެޑްރެސްކޮށް ސިޓީ އެއް ވެސް ފޮނުވާފަ އެވެ. އެ ސިޓީގައި ވަނީ ކޮމިޝަނަރެއްގެ މަގާމުގައި އަބްދުލްއަޒީޒް ހުންނެވި އިރު އޭނާ އަށް ގާނޫނު ފުރިހަމަ އަށް ތަންފީޒު ނުކުރެއްވޭ ކަމަށް ބުނެފަ އެވެ.
ޓްރާންސްޕޭރަންސީ މޯލްޑިވްސް އިން ބުނީ އަބްދުލްއަޒީޒްގެ ދައުރުގައި ފަރުމާކުރެވުނު މައުލޫމާތު ހޯދުމުގެ ފޯމު އެ ހައްގަށް ހުރަސްއެޅޭ ފަދަ ގޮތަކަށް ފަރުމާ ކޮށްފައިވާ ކަމަށެވެ. އަދި މި މައްސަލައާ ގުޅިގެން ޓްރާންސްޕޭރަންސީ މޯލްޑިވްސްގެ ކަންބޮޑުވުންތައް ހައްލު ކުރުމަށް ކުރި މަސައްކަތްތަކަށް ބެލުމެއް ނެތި އެ މައްސަލަތައް ދޫކޮށްލާފައިވާ ކަމަށެވެ.
ޤާނޫނުގައި ލާޒިމު ކޮށްފައިވާ އާންމު އަޑުއެހުން އިންފޮމޭޝަން ކޮމިޝަނުން ފުރަތަމަ ފަހަރު ބޭއްވީ އެ މަގާމުން އަބްދުލްއަޒީޒް ވަކިވެވަޑައިގެން، ދެވަނަ އިންފޮމޭޝަން ކޮމިޝަނަރަކު އައްޔަނު ކުރުމަށް ފަހު ކަމަށް ޓްރާންސްޕޭރަންސީ މޯލްޑިވްސް އިން ވަނީ ބުނެފައި އެވެ.
މިހެންކަމުން އިންފޮމޭޝަން ކޮމިޝަނަރުގެ މަގާމަށް އަބްދުލްއަޒީޒް އަކީ އެންމެ ގާބިލް ފަރާތެއް ނޫން ކަމަށާއި، މި މިގާމަށް އަލުން ނަން ހުށަހަޅަން މަޖިލީހުން ހުޅުވާލުމަށް ޓްރާންސްޕޭރަންސީ މޯލްޑިވްސް އިން ވަނީ އެދިފައި އެވެ.
އާދިއްތަ ދުވަހު ރައީސް ޑރ. މުހައްމަދު މުއިއްޒު ވަނީ އިންފޮމޭޝަން ކޮމިޝަނަރުގެ މަގާމަށް އަބްދުލްއަޒީޒް އައްޔަނު ކުރުމަށް މަޖިލީހަށް ނަން ފޮނުއްވާފައި އެވެ. ނަމަވެސް ރައީސް މުއިއްޒު ހުށަހެޅުއްވި ނަމަށް ޝަކުވާ ހުށަހަޅަން ރައްޔިތުންގެ މަޖިލީހުން ދީފައި ވަނީ އެންމެ ހަ ގަޑިއިރުގެ ވަގުތެކެވެ.
އެއަށްފަހު ހޯމަ ދުވަހު ބޭއްވި މިނިވަން މުއައްސަސާތަކުގެ ކޮމިޓީ ބައްދަލުވުމުގައި އެ ކޮމިޓީ އިން ވަނީ އޭނާއާ އިންޓަރވިއު ކުރުމަށްފަހު އެ އިންޓަރވިއުގައި އޭނާ އަށް ވަނީ 75 އިންސައްތަ އަށް ވުރެ މަތިން މާކްސް ލިބިވަޑައިގަންނަވާފަ އެވެ. އެހެންކަމުން، އަބްދުލްއަޒީޒް ޖަމާލް އަބޫބަކުރު އަކީ އެ މަގާމަށް ގާބިލު މީހެއް ކަމަށް ފެންނަ ކަމަށް ކޮމިޓީގެ އަޣުލަބިއްޔަތުން ވަނީ ފާސްކޮށްފަ އެވެ. އަދި އެ މައްސަލަ މަޖިލީހުގެ ތަޅުމަށް ފޮނުވުމަށް ވެސް ވަނީ ފާސްކޮށްފަ އެވެ.
