އީރާން އިން މިހާރު ވާހަކަދައްކަން ބޭނުން ވަނީ އެމެރިކާ އިން ދިން ހަމަލާތަކުގެ ސަބަބުން: ރޫބިއޯ

އީރާން އަށް އަމާޒުކޮށް އެމެރިކާ އިން ދިން ހަމަލާތަކުގެ ސަބަބުން، މިހާރު އެ ޤައުމު އޮތީ ވާހަކަ ދައްކަން، ނުވަތަ މަޝްވަރާ ކުރަން ތައްޔާރަށް ކަމަށް އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވެއްޖެ އެވެ. 

ފޮކްސް ނިއުސް އަށް ދެއްވި އިންޓަވިޔުއެއްގައި ރޫބިއޯ ވިދާޅުވީ އެމެރިކާ އިން ދިން ހަމަލާތަކުގެ ނަތީޖާއެއްގެ ގޮތުން، އީރާން އިން މިހާރު ވަނީ އެ ޤައުމުގެ ނިއުކްލިއަރ ޕްރޮގްރާމް އާއި، ހުރްމުޒް ކަނޑު އޮޅި ހިމެނޭ ގޮތަށް މަޝްވަރާ ކުރަން ބޭނުންވާ ކަމަށް ހާމަކޮށްފައި އެވެ. 

އެމެރިކާގެ ވަރުގަދަ ހަމަލާތަކުގެ ސަބަބުން އީރާންގެ ނޭވީ އާއި އެއާފޯސް އާއި މިސައިލް ޑިފެންސް އާއި ލޯންޗަރުތައް އަދި ހަތިޔާރު އުފައްްދާ ތަންތަން ނައްތާލާފައިވާ ކަމަށާއި، އީރާންގެ ދިފާއީ ޤާބިލުކަން ވަރަށް ބޮޑަށް ހީނަރުކޮށްލެވިފައިވާ ކަމަށް ވެސް ރޫބިއޯ ވަނީ ވިދާޅުވެފައި އެވެ. 

ނަމަވެސް ރޫބިއޯ ވިދާޅުވީ، އީރާންގެ އަތުގައި އަދިވެސް މިސައިލް އާއި ޑްރޯންތައް ހުރި ކަމަށާއި އަދިވެސް އީރާން އިން ގެއްލުންތަކެއް ދޭނެ ކަމަށެވެ. ނަމަވެސް، އީރާންގެ ކިބައިގައި ފިލައިގެން ރައްކާތެރި ވާނެ އެއްވެސް ކަހަލަ ފަށަލައެއް، ނުވަތަ ނިޒާމެއް މިހާރު ނެތް ކަމަށް ރޫބިއޯ ވަނީ ފާހަގަ ކުރައްވައިފަ އެވެ. 

މީގެ އިތުރުން ރޫބިއޯ ވިދާޅުވެފައި ވަނީ، އެމެރިކާގެ ހަމަލާތަކުގެ ސަބަބުން ޙާލަތު ފުރިހަމަ އަށް ބަދަލުވެފައިވާ ކަމަށާއި، އީރާން އިން މިހާރު އޮތީ އެކަމުގައި ވާހަކަ ދައްކަން ކޮންމެހެން ވެސް ބޭނުންވެފައި ކަމަށެވެ. އެގޮތުން މިހާރު ނިއުކްލިއަރ ޕްރޮގްރާމް ދޫކޮށްލުމާއި ހުރްމުޒް ކަނޑު އޮޅިއާ ގުޅޭ ގޮތުން އެއްބަސްވުމަކަށް އަތުވެއްޖެ ނަމަ، އެއީ އެމެރިކާގެ ހަމަލާތަކުގެ ސަބަބުން އީރާން އިން ނިންމާ ނިންމުމަކަށް ވާނެ ކަމަށް ވެސް ރޫބިއޯ ވިދާޅުވެފައިވެ އެވެ. 

އެއާ އެކު ރޫބިއޯ ވިދާޅުވެފައި ވަނީ، އެމެރިކާ އިން މިހާރު އީރާންއާ ވާހަކަ ދައްކަމުން އަންނަނީ ވަރަށް ބާރުގަދަ ޙާލަތެއްގައި އޮވެގެން ކަމަށެވެ. އަދި އެއީ މީގެ ކުރިން އޮތް ވަރުގެ ޙާލަތެއް ނޫން ކަމަށް ވެސް އޭނާ ވަނީ ފާހަގަ ކުރައްވައިފަ އެވެ. ރޫބިއޯ މިހެން ވިދާޅުވެފައިވާއިރު، އެމެރިކާާ އިން ދިން ހަމަލާތަކުގައި އީރާާން އޮތީ ދޫދޭ ގޮތަކަށް ނޫނެވެ. އީރާން އިން އަދިވެސް ބުނަމުން އަންނަނީ އެ ޤައުމުގެ ދިފާއުގައި ކުރަން ޖެހުނު ކޮންމެ ކަމެއް ކުރާނެ ކަމަށެވެ.