ޓްރަމްޕް ފަދަ ރައީސްއަކާ އީރާން އަށް ކުރިމަތިލާާން ޖެހިފައި ނުވޭ، އީރާންގެ ވެރިކަން ބަދަލުވާން ޖެހޭ: ރޫބިއޯ

އީރާންގެ ސަރުކާރުން މީގެ ކުރިން ދުވަހަކު ވެސް، އެމެރިކާގެ ރައީސް ޑޮނަލްޑް ޓްރަމްޕް ފަދަ އަމަލީ ގޮތުން ފިޔަވަޅު އަޅުއްވާ ރައީސްއަކާ ކުރިމަތިލާން ޖެހިފައި ނުވާ ކަމަށް އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވެއްޖެ އެވެ. 

ހޮނހިރު ދުވަހު ފޮކްސް ނިއުސް އަށް ދެއްވި ބަސްދީގަތުމެއްގައި ރޫބިއޯ ވިދާޅުވީ، އީރާންގެ ސަރުކާރުން ވޭތުވެދިޔަ 20 އަހަރު ނުވަތަ 30 އަހަރު ތެރޭގައި އުޅެމުން އައީ އެމެރިކާގެ އިތުރުން މުޅި ދުނިޔެ އަށް ވެސް އޮޅުވާލައި، އެއްބަސްވުންތަކާ ޚިފާލަށް ކަމަށެވެ. އީރާން އިން އުޅެމުން އައީ މަކަރު ހެދުމުގެ އުސޫލެއްގެ ތެރެއިން ކަމަށް ވެސް ރޫބިއޯ ވަނީ ވިދާޅުވެފައި އެވެ. 

ނަމަވެސް، އެމެރިކާގެ ރައީސް ޓްރަމްޕް އަކީ ކަންކަމުގައި ސީދާ ފިޔަވަޅު އަޅުއްވާ ބޭފުޅަކަށް ވުމުން، އީރާން އަށް މިހާރު ކުރިމަތިލާން ޖެހިފައި ވަނީ މުޅިން ތަފާތު ރައީސްއަކާ ކަމަށް ރޫބިއޯ ފާހަގަ ކުރެއްވި އެވެ. އެއާ އެކު ރޫބިއޯ ވިދާޅުވީ، އީރާންގައި އޮތް ވެރިކަން ބަދަލުވާން ޖެހޭ ކަމަށެވެ. މިވަގުތު އީރާންގެ ވެރިކަން ބަދަލު ނުވެ އޮތް ނަމަވެސް، އީރާންގައި އޮތީ ކޮންމެހެން ވެސް ބަދަލުވާން ޖެހޭ ވެރިކަމެއް ކަމަށް ރޫބިއޯ ވިދާޅުވި އެވެ. 

ރޫބިއޯ މިހެން ވިދާޅުވެފައިވާއިރު، އެމެރިކާގެ އިތުރުން އިސްރާއީލް އިން ވެސް ބޭނުން ވަނީ އީރާންގެ ވެރިކަން ބަދަލު ކުރުމަށެވެ. އަދި އެމެރިކާ އާއި އިސްރާއީލް އިން ބުނާ ގޮތެއް ހަދައި، އެ ދެ ޤައުމުން ބޭނުންވާ ގޮތަކަށް ކަންކަން ކުރާނެ ވެރިކަމެއް އީރާންގައި އޮންނަން އެ ދެ ޤައުމުން ބޭނުންވެ އެވެ. ނަމަވެސް، އީރާންގެ ރައްޔިތުންގެ ސާބިތުކަމާއި، އެއްބައިވަންތަކަމުގެ ސަބަބުން އެމެރިކާ އާއި އިސްރާއީލްގެ މަސައްކަތް ކާމިޔާބެއް ނުވެ އެވެ. 

މީގެ އިތުރުން އެ އިންޓަވިޔުގައި ރޫބިއޯ ވަނީ އެހެން ޤައުމުތަކާ ގުޅޭ ގޮތުން ވެސް ވާހަކަ ދައްކަވައިފަ އެވެ. އެގޮތުން ރަޝިޔާ އާއި ޔޫކްރެއިންއާ ދެމެދު ހިނގަމުން އަންނަ ހަނގުރާމަ ހުއްޓާލުމަށް ކުރެވޭ މަސައްކަތްތަކާ ގުޅޭ ގޮތުން ވާހަކަ ދައްކަވަމުން ރޫބިއޯ ވިދާޅުވީ، ކުރިއަށް އޮތް ހަފުތާތަކުގެ ތެރޭގައި ދެ ޤައުމުގެ ދެ މެދުގައި އަލުން މަޝްވަރާތައް ފެށުމަށް މަސައްކަތްތަކެއް ކުރެވޭނެ ކަމަށެވެ. އަދި މި ހަނގުރާމަ އަކީ ކޮންމެހެން ވެސް ނިމުމަކަށް ގެންނަން ޖެހޭ ހަނގުރާމައެއް ކަމަށް އޭނާ ވިދާޅުވި އެވެ. 

ނަމަވެސް ރޫބިއޯ ވިދާޅުވީ، ދެ ޤައުމުން ވެސް ދޫ ނުދޭނެ ވަކި ކަންތައްތަކެއް، ނުވަތަ ރަތް ރޮނގުތަކެއް ހުރިކަން ޤަބޫލު ކުރަން ޖެހޭ ކަމަށެވެ. އަދި އެ ކަންތައްތަކުގައި އެއްބަސްވުމަކަށް ނާދެވެނީސް ހަނގުރާމަ ހުއްޓާލުމާ ހަމައަށް ދިޔުމަކީ ދަތި ކަމެއް ކަމަށް ރޫބިއޯ ވަނީ ވިދާޅުވެފައި އެވެ. 

އެމެރިކާ އާއި ޗައިނާއާ ދެމެދު އޮތް ގުޅުމާ ބެހޭ ގޮތުން ވާހަކަ ދައްކަވަމުން ރޫބިއޯ ވިދާޅުވީ، އިޤްތިޞާދީ ގޮތުން ނުވަތަ އަސްކަރީ ގޮތުން ވިޔަސް، ދެ ޤައުމުގެ ދެ މެދުގައި ކުރިމަތިލުމެއް ހިނގައިފި ނަމަ، އެއީ ދެ ޤައުމުގެ އިތުރުން މުޅި ދުނިޔެ އަށް ވެސް ކުރިމަތި ވާނެ ވަރަށް ބޮޑު ކާރިސާ އަކަށް ވާނެ ކަމަށެވެ. އެހެންކަމުން، އެފަދަ ކަމެއް މެދުވެރިވިޔަ ނުދިނުމަށް މަސައްކަތް ކުރަން ޖެހޭ ކަމަށް އޭނާ ވިދާޅުވި އެވެ. 

މީގެ އިތުރުން ރޫބިއޯ ވިދާޅުވީ، ޗައިނާ އާއެކު އޮންްނަ ގުޅުން މެނޭޖުކުރަން ޖެހޭއިރު، އެމެރިކާގެ ޤައުމީ މަސްލަހަތުތައް ދޫކޮށްލެވެން ނެތް ކަމަށެވެ. އެމެރިކާގެ ފޮރިން ސިޔާސަތުގެ ތެރެއިން ކުރަން ޖެހޭ އެންމެ އުނދަގޫ މަސައްކަތަކީ، ޤައުމީ މަަސްލަހަތު ހިމާޔަތް ކުރުމާ އެކު، ބައިނަލްއަޤުވާމީ ގުޅުންތައް ދެމެހެއްޓުން ކަމަށް ވެސް ރޫބިއޯ ވަނީ ވިދާޅުވެފައި އެވެ.